بين نارين

كل ما نبعد عنه او نفتكر اننا خلاص بقينا بعيد عنه

لاننا عمالين نبني قدامه سدود وحصون وموانع

صعب اي حد يجتازها مهما كانت قوته او جبروته او سلطانه

وكل ما نخرج من سيطرته وهيمنته علي كل افعالنا ومشاعرنا

وبعد ما نقسم اغلظ الايمان اننا عمرنا ما هنرجع له تاني

نلاقي نفسنا

يا اما برضانا

او رغما عنا

واقعين تاني في شباكه

بقصد او من غير قصد

ونرجع تاني للحكاية من الاول

نسهر, نتعب , نفكر , نقرر

وبعد كل تفكير بناخد قرار

وبعدين نرجع تاني عن قرارنا

ياتري نصارحه بحبنا له

ياتري نخفي الشعور دا جوانا

طيب ونخاف ليه طالما احنا مؤمنين ان كل شىء نصيب

طيب ونقول ليه اذا كنا بردو عارفين اننا مش قد الحب دا

نعترف له يمكن يكون بيبادلنا نفس الشعور وساعتها مين هيكون سعيد زينا

وايه يخلينا نعمل كدا مهو ممكن يكون مش شايف فينا اللي ممكن يكون بيدور عليه

يعني نقول وخلاص

ولا نكتم ونخبي وخلاص بردو

لما بنكون محتارين

وبين نارين

بنختار دايما الاسهل

لكن ما ينفعش في الحب اننا نختار الاسهل

اصعب حاجه في الحب الصدمة الاولي

وكل واحد وحظه بقي

ياتري حظي هايبقي ايه؟



عشان انا مش علي

كل واحد فينا ليه حكمة عايش بيها

وشايف انها اكتر حاجه بتعبر عنه وعن ذاته

وبيحاول انه ينفذ كل كلمة فيها بالطريقة اللي تناسب حياته وامكانياته

ولو سالت اي حد : ايه الحكمة اللي انت بتؤمن بيها اكتر من غيرها؟

في ناس هتفكر كتير وبعد كل التفكير دا هتقول : مفيش

وناس تانيه هتفكر بردو وبعد التفكير هتقول الحكمة او الهدف اللي هي ماشية عليه في حياته

وفيه ناس تانيه هتجاوب علي طول من غير تفكير

******************

من فتره كدا لما كنت في الجيش

كنت رايح لظابط في مكتبه اجيب منه حاجه معينه

وبعدين دخلت الاوضه بتاعته وكان هو من الظباط اللي لسه بدأين حياتهم العسكرية

ورغم انه كان شاب عادي جدا بل بالعكس مكنش باين عليه

اي نوع من الالتزام وغيره

الا اني لقيته كاتب ورقة ومعلقها علي الحيطه عنده

وكاتب عليها جملة واحده بس

فضلت واقف لما قرأتها وانا سرحان فيها لدرجة انه بقي يكلمني

وانا مش مركز معاه خالص انا كان كل تركيزي في الجمله اللي قريتها

قد ايه فعلا هي حكيمة جدا وقد ايه انا كنت محتاجها في الوقت دا

الورقة كان مكتوب فيها

(إذا أردت فاطمة ..... فكن علي )

لما نقراها للمرة الاولي ممكن منحسش بالمعني اللي هي تقصده بالظبط

لكن لما نفكر فيها كويس هتعرف كل حاجه

كلنا بنتمي فاطمة

وكلنا عايزين اطهر حد في الدنيا

لكن منعرفش ان من اعمالكم سلط عليكم

ومنعرفش كمان ان فاطمة لا تكون الا لعلي

وعشان انا صدقت الحكمة دي قوي

بقيت بقولها لنفسي كل شويه

لما افكر في الموضوع دا

بس انا مش لاقي فاطمة دي دلوقتي

حتي لما كانت في ايدي

انا ضيعتها

عارفين ليه هي ضاعت؟

وعارفين ليه انا مش عارف اقابل فاطمة؟

علشان انا لسه مبقتش علي

يمكن لما هكون هو في يوم من الايام

هتيجي فاطمة

لكن لا لو جت دلوقتي

الله اعلم دي هتكون مين

اكيد هتكون حد تاني خالص

غير انها تكون فاطمة

اجمل حب

الحب في حياة كل واحد منا ليه اسلوب وطريقة 

بتختلف عن غيره

منا اللي بيحب عشان ميعرفش يعيش غير وهو بيحب

ومنا اللي بيحب عشان بيلاقي في الحب نفسه

ومنا اللي بيحب عشان ميحسش بالنقص عن غيره

ومنا اللي بيداري عيوب كتير جواه بالحب

ومنا اللي بيحب عشان مصلحته ولما بتخلص مصلحته دي 

بيخلص معاها الحب

ومنا اللي بيمشي يحب علي نفسه وبشوف في اي حد 

بيعامله كويس ان دا حب حياته وانه قاعد يدور عليه من زمان

بس عشان تكمل كل قصة حب جميلة من دي

لازم يكون فيه طرفين

والطرفين دول بلغة العلوم لازم يكونوا موجب وسالب عشان تكون

قوي الجذب بينهم اكبر ما يمكن

عشان استحالة هيعيش الحب اذا كان الطرفين ليهم شحنه واحده سواء موجبة

ولا حتي سالبه التنافر اللي هيكون بينهم كفيل انه يموت الحب دا

وكل واحد بيحاول من ناحيته انه يخلي حبيبه دا اسعد واحد في الدنيا

وبيحاول يبان قدامه انه شخص مميز عن غيره

ويفضل يتقلب من فرح لنشوة لغضب وحزن وعيون مترتاحش

وساعات بتزداد الامور سوء لما يفشل كل واحد انه يبقي مع التاني

وهكذا .. هي دي قصص الحب اللي نعرفها

لكن تصدقوني لو قلتلكم ان اجمل مرة حسيت اني عايش قصة حب امتي؟

حاجه محدش يصدقها

لما كنت بحب حد وهو ميعرفش

يعني حب من بعيد لبعيد

كانت عندي مشاعر جميله اوي

رغم ان اللي بحبه ميعرفش بكدا

مشاعر اقوي من اي مشاكل بتحصل بين اتنين

اقوي من الاهل والظروف والمجتمع

الحب من طرف واحد مش دايما بيكون وحش

انا عرفت انه كان اجمل حب حسيته

لما عشته 

وعايشه دلوقتي

حتي لو مكنتش بحب حد بعينه

اصله حب خيالي شوية

يعني بيديني حرية اتي احب اي حد في الدنيا

في اي بلد

حاجه غريبه

لكن جميله

اكيد كلنا جربناه

خساره

كتيرة هي الحاجات اللي بنخسرها كل يوم

ومادام احنا في الحياة

مادام احنا عايشين

وكل يوم بنجرب حاجات جديده

يبقي لازم نخسر اي حاجه في طريقنا

احيانا اللي بنخسره مش بيكون ليه قيمة

طالما بنقدر نعوض اللي خسرناه

دور جوا حياتك وفكر في اللي خسرته قبل كدا

هتلاقي حاجات كتير خسرتها ورغم كدا قدرت تكمل حياتك

عادي

انا خسرت صديق , وظيفة , خسرت مدينه

خسرت حب

مقدرتش اعوضه

مش كل حاجه بنخسرها ممكن نعوضها

عشان في حاجات لما نخسرها

حياتنا كلها بتبقي كارثه

انا فرحاااااان

الاول السلام عليكم ورحمة الله

ازيكم كلكم يا اجمل ناس

والله ما تتصوروا فرحتي دلوقتي قد ايه

والفرحة دي سببها حاجات كتير

اهمها

ان النت خلاص بقي عندي تمام

مهو انا من 6 شهور لما كنت في الجيش كانت الشبكة اللي

انا مشترك فيها باظت

وغلبنا مع الواد صاحبها عشان يصلحها ولا حياة لمن تنادي

حتي اني لما تعبت معاه خالص روحت اشتريت فلاشة نت

بالشىء الفلاني ويارتني ما عملت كدا

اولا النت فيها زباله اوي وغالية جدا

ومكنتش بعرف افتح عليها اي مدونة حتي بتاعتي علشان الجرافيكس

بتاع المدونات عالي اوي

المهم

ربنا اكرمنا واشتركت انا و5 جيراني وجبنا شبكه لينا لوحدنا

ودلوقتي الخدمة لسه واصله اهي

وحشتني اوي كتابتكم واخباركم

وهبقي معاكم علي طول باذن الله

رغم مشاغلي اللي كترت بجد بسبب الشغل وكدا

بس طبعا هستغل اي فرصة اني ادخل عندكم واعرف عنكم كل حاجه

اروح بقي اشوف حاجه اقراها

سلام

مع مين؟

كان صديقي وكانت حبه الأبدي.... بل كان حبهما حكاية البلد ِ
واستغرب الناس كيف القصة انقلبت .... الي خصام ٍ الي هجر ٍ الي نكد ِ
يااااااااااااااااااااااه ( دي تنهيده علي فكرة )
مين فينا مسمعش الاغنيه دي بتاعة كاظم الساهر وقعد يردد كلماتها
اللي حس انها فعلا كانت معاه وعاش قصتها مع حد من أصحابه
واحد صاحبي .. صاحبي جدا .. تقدروا تقولوا انه انا
كان عايش قصة حب او كان فاكر انه عايش قصة حب مع بنت قريبته
ورفض ان الحكاية تكون في الضلمة وأخد خطوة انه فاتح اهلها في الموضوع دا
ولقي منهم كل ترحيب ولقي فيهم فعلا ناس ينفع انهم يكونوا نواة لاسرة جديده
وعيلتين هتنشأ بينهم علاقة جديده ... مهو الجواز مش علاقة بين اتنين
وخلاص دي علاقة بين عيلتين وكيانين كبار اكبر من مجرد الارتباط الشخصي
بس المشكله عند صاحبي دا مكنتش في عيلة البنت لا
كانت مشكلته في البنت نفسها اللي مقدرتش تفهم وتستوعب يعني ايه ارتباط
يعني ايه تعمل حساب لحد دخل حياتها خلاص واعترفلها بحبه
وهي كمان اعترفت انه الشخص الاول والاخير في حياتها
لكن كلامها كان عكس افعالها خالص (زي ما بيقول ) بدل ما تحسسه انها
معاه وتبين له يعني ايه هي بتحبه.. اتحول الموضوع لاهمال وتطنيش
وحجج رغم انها بتقول انها بتحبه اوي كمان
بس ازاي..؟
ازاي حد بيحب حد ومش بيسمع كلامه
ازاي حد بيحب حد ويتعمد انه يتجاهل حتي وجوده
ازاي حد يقول انه بيحب حد ويخلي الطرف التاني يشحت منه
السؤال والكلمة ودا كله بحجة انه هو الراجل
وطالما هو الراجل فهو اللي لازم يعمل كل حاجه
يعني لازم يكون هو الفعل وهي تكون رد الفعل
وحتي رد الفعل دا مكنش بيلاقيه كمان
لغاية ماحس صاحبي ان الملل بدأ يشتغل وبدأ يحس انه اتسرع لما اتربط
بيها من اللي شايفه قدامه من اصحابه التانين وقد ايه علاقتهم ناجحه جدا
لكن كان دايما بيقول ان ربنا ابتلاه بحد زي الحجر عمره ما بيحس
ابتدي يتعب ويحس انه مش مرتاح واخد قرار انه لازم ينهي العلاقه دي فورا
بس مكنش لاقي السبب اللي يمسك فيه عشان يقولها كفايه كدا
وكان احترامه لاهلها اكبر من انه يقولهم انا هسيب بنتكم عشان مش حاسه بيا
عشان مش بتسال عني او عشان مش بتسمع كلامي
ودايما تعمل عكس اللي يقولها عليه عشان متحسسوس انها سهله
وانه ممكن يسيطر عليها بسهولة ( تفكير غبي جدا في البنات )
لما يطلب منها انها متكلمش فلان او متقعدش في مكان فيه فلان
او حتي تلبس اللبس الفلاني او متخرجش من البيت في المشاوير الغير معتاده
غير لما تقوله عشان ميكونش اخر من يعلم تفتكر انها لو وافقت علي كدا
يبقي بيتحكم فيها وانها لو رضيت بكدا هتخليه يحس انها بنت سهله
وبتسمع الكلام بسهوله .ايه الغباء دا؟
ومرت الايام علي نفس الحال وهو مستني الفرصه انه يخلع
لغاية ما ربنا بعتله كل اللي بيتمناه ووقعت البنت في شر اعمالها
بحاجه مقدرش يستوعب انها ازاي تعملها وهي عارفه انه لما يعرف هيكون رد فعله عنيف جدا
تصوروا انها تروح خطوبة اخت واحده صاحبتها وترقص فيها قدام كل الموجودين
وقدام الشباب المسبسب اللي بيجي الحاجات دي مخصوص عشان يصطاد
وانتم عارفين يصطاد ايه ومين بالظبط؟
ولسوء حظ صاحبتنا ان اللي شافها مش اي حد ,,. اخو صاحبي ومراته
ولما رجعوا قالوله وهو مش مصدقين اصلا نفسهم
وكان السؤال اللي بيتردد علي لسانه باستمرار
للدرجه دي انا معنديش كرامه؟
للدرجه دي مش عاملالي حساب رغم انه حذرها كتير انها تعمل كدا
لانه عارف ان الداء دا فيها وعملت كدا قبل كدا
ولما اتصل بالتليفون وسألها انتي عملتي كدا قالتله اه بكل بجاحه
بس عملت كدا غصب عني اصل اصحابي هم اللي طلبوا مني
وبصراحه مقدرتش اكسفهم
منطق كويس والله يعني ممكن اي حد يعمل اي حاجه في الدنيا ويتحجج بقي
والمطلوب من اللي قدامه انه يفهم ويستوعب والا يبقي مش مودرن
ولا روش ولا عايش حياته
وكان رده علي كلامها انه قال:
انا شخص حاسس اني محترم وطالما انا كدا فكنت اتمني
ان اللي هرتبط بيها تكون محترمه زي
مفيش حد في الدنيا  يقبل علي نفسه ان خطيبته تعمل كدا واذا قبل
فمعلش دا اساسا مينفعش نقول عليه راجل
اعتبري اي حاجه كانت بينا كأنها مكنتش ابدا
******
يمكن الحكاية البسيطه دي عرفتني نوع من البشر
انا كنت من الموافقين علي القرار اللي اخده
رغم ان في ناس كان ليها رأي تاني انه يديها فرصة تانيه
خاصة انها اتوسلت له وحلفت انها اخر مرة تعمل كدا
وانها بجد ندمانه علي كل اللي حصل
تفتكروا انتم مع مين؟

كل سنه واحنا بخير

كل سنه وانتم كلكم طيبين

هلت الاعياد والافراح

ويارب يكون العيد فرصة تانيه للم الشمل

ولعودة الروح لكل واحد اتسرقت منه روحه

ويارب يكون الحب دايما معانا

ونسعد بيه كل أوقاتنا

يارب نفضل مع بعض علي طول

علشان نخلي ايامنا احلي

كل سنه واحنا كل بخير

ودايما اعياد في اعياد

حاجات

حاجة بجد جميله

اني الاقي كمية التعليقات دي كلها

من اعز ناس علي قلبي

وكله بيسال عليا وبيطمن وبيعتذر عن تقصيره

بجد ربنا يخليكم ليا

وان شاء الله تكون جمعتنا كلها خير

وكل تحياتي وحبي وتقديري ليكم كلكم اللي سأل واللي مسألش

حاجه جديدة لانج

خلاااااااااااص خلصت جيش

وبقيت حر يا ناااااااااااس

مش عايز حد يباركلي عشان معاييش شيكولاتات

ولا جاتوهات

اللي هايجي يبارك يجيب الحاجات الحلوة دي معاه

اخيرا شميت ريحة الحرية

طبعا السؤال اللي هيموت ناس كتير اوي

هتعمل ايه بعد كدا؟

مممممممم

انا مش عامل حاجه

انا هاخد فتره كدا زي شهر استجم وادور علي نفسي

والحمد لله ان الشهر دا هيكون شهررمضان

ودا اجمل فرصة اني ارجع بجد زي ماكنت

حاجه تحير وتجنن

اللوحات الجديده بتاعة العربيات

مجنناني اوي اليومين دول

علشان بركب مواصلات كتير اوي

وبقعد بقي اتابعها وانا ماشي

ولا فيه حد عارف يترجم حروفها

اللي كل عربية واخده ليها شوية حروف شكل

حتي انا بيني وبين نفسي قلت اكيد اكيد يعني

كل واحد صاحب عربية من دول

بيختار الحروف اللي تتناسب مع شخصيته

يعني مثلا تلاقي عربيات مكتوب عليها

ن ج م   _  أ س د _  ن س ر

ص ع ب _ م ل ك

وأحيانا تلاقي الموضوع بيتطور وبيبقي حاجه تانيه خالص

زي

ب ق ف _ ب غ ل _ ع ج ل

واحيانا تانيه بقي بيقلب خالص لسفاله وقلة أدب

زي

مممممممم

ولا بلاش

رمضان كريم

حاجه تقرف

كمية المرشحين لمجلش الشعب

ابنكم واخيكم واختكم وامكم

اللي مش بنشوف وشهم الا في المناسبات السودا دي

طيب حتي مش من الواجب والضمير

انهم يخلوا عندهم دم

ويبقوا ميقطعوش الرحم طالما هم اهلنا كدا

ولا هي معرفة مصلحة وخلاص

حاجة تفرح

موووووجة شبكات وجوازات واخده كل اصحابي

حتي مش بيعدي اسبوع الا وبتعزم اما علي شبكة او فرح

والله لسه صغيرين يا جدعان

بيقولهم كلهم ربنا يباركلكم في نصكم التاني

وتاخدوا بايد بعض عشان تعدوا الدنيا دي

ومتقلقوش هحصلكم قريب اوي

بس لما الاقي حد يرضي بيا

هههههههههههه

كل سنه وكلنا بخير

ورمضان يجمعنا دايما يارب

عناوين أخباري

الف سلام والف تحيه ليكم

بجد بحبكم جدا

وعلي قد الحب دا كانت وحشتي ليكم

صحيح انا غبت

لكن دايما كنتم معايا

بجد مكنتش اعرف ان فيه ناس كدا

ناس كل معرفتي بيهم المدونة وبس

لكن مبطلوش يسألوا عني وعن احوالي

عرفت بجد انهم ناس بحق وحقيق

عكس ناس تانيه

ماليش الحق اني الومهم

لانهم ميستاهلوش اللوم

*الحمد لله انا كويس جدا

بس فيه شوية مشاكل بسيطه

هتعدي ان شاء الله

خلال الاسبوعين دول حصلي حاجات كتير اوي

بينت لي كل واحد علي حقيقته

ومين معاك ومين ضدك

*يلا خلاص هانت والسنه الشؤم دي قربت تخلص

نفسي بقي اتنفس الصعداء واعيش الحرية شوية

بجد يا جماعه اللي مدخلش الزفت دا عمره ما هيعرف قيمته

حاجه تقرف وتمرض وتتعب  وتطير النوم من العين

* عاطفيا ونفسويا انا كويس الحمد لله

بعد ما عرفت اللي ليا واللي عليا

وبعد ما فهمت نفسي صح

وفهمت انا عايز ايه

وايه ينفع وايه مش ينفع

يعني في المجمل كل شىء علي ما يرام

اشوفكم بقي بخير ان شاء الله

واعذروا تقصيري

ان شاء الله هرجع تاني

وابقي معاكم علي طول

ولغاية دا ما يحصل

اتنمالكم كل خير وسعاده

إبراهيم

الكابوس

علي فكره انا مش متعصب ولا حاجه

بس بحب اوصف حاله انا بحس بيها

امبارح كان ماتش الاهلي والزمالك

وطبعا كالعاده الازليه كل الناس بتقول ماتش القمة

وانا بسال السؤال بردو المعتاد

هو انتم مازلتم بتقولوا ان ماتش الاهلي والزمالك قمة؟

يعني ايه قمة؟ وهل لسه هنقول عليها قمة رغم كل اللي بيحصل

يعني لما الفريقين يلعبوا مع بعض اخر16 مباراة

يفوز الاهلي ب 13 ويتعادلوا 2 ويفوز الزمالك مرة

بردوا لسه بنقول قمة

الفوز لفريق القرن المرة دي كان ليه اكتر من طعم

طعم عرف جماهير الابيض الغلبانه هي حجمها ايه

وعرف العميد الحقوووووووووووود هو مين وايه امكانياته

عمري ما شوفت حقد جوا انسان زي ما بيحقد هو واخوه 

علي النادي اللي رباه وعلمه ازاي يلعب كورة

وطعم كمان عرف الناس كلها ان الاهلي مازال اهلي

والطعم الاحلي

اللي خلا كل الناس تحلم وتحلم وتحلم

هناخد الكاس وهنكسب الاهلي

وهنعمل وهنضرب وهنغلب

وهنكسر ولن يوقفنا احد

واحنا خلاص جينا

في الوقت اللي كان فيه كل واحد جوا الاهلي بيفكر في صمت

وسابوا الببغاوات يتكلموا بكلام هم  مش قده

وظهر الحقد الدفين جواهم

لكن بعد الاحلام دي كلها

يصحي الجميع

علي كابوس احمر

شوفوا الصور

مذكرات طفل رومانسي

ياتري كل واحد فينا فاكر اول مرة حب
مش قصدي انه كانه حب حقيقي
لا حب
ولو مجرد شعور انه بيحب حد
اكيد كلنا حسينا بالاحساس دا
من واحنا صغيرين اوي اوي
من واحنا اطفال صغيرين لسه مليانين براءة
انا حبيت كتير اوي
هههههههههههههه
مش تستغرب لان هي دي الحقيقه
في حكايات كان نفسي تكمل
وحكايات تانيه اتمنيت انها تنتهي اصلا من قبل ما تبدأ
فيه ناس عرفتهم بجد من بعد ما صارحتهم بشعوري ناحيتهم
واتضح انهم مكنش يستاهلوا اني حتي اوجع خلايا قلبي الضعيف  انه يفكر فيهم
وفيه ناس تانيه كانوا ولاد ناس بحق وحقيق
وكل ما افتكرهم لازم اقول
يااااااااااااااااااااااااااااااااااااااه
ياتري انتم عاملين ايه؟
مفتقدكم جدا
....
اول مرة احب كنت لسه صغير اوي
يعني ممكن نقول كدا 5 سنين
قبل حتي ما اروح مدرسه
والبنت اللي حبيتها كانت زميلتي في الكتاب
الكتاب بضم الكاف وتشديد التاء يعني مكان تحفيظ القران
اصلها كانت بنت زي الملايكه
مش هقدر اوصفلكم يوم ما كنت ماسك في ايدي
عملة معدنية قديمة اوي وبضحك ع العيال زمايلي
وبقولهم انها عادي ممكن نشتري بيها دي زي الربع جنيه
وجت هي وقالتلي وريني كدا ومسكت ايدي عشان تشوف
البتاعه دي
انا عمال افتكر كان اسمها ايه
لغاية ما افتكرت انها كان اسمها ياسمين
علي فكره اتجوزت ومعاها ولاد دلوقتي
هيييييييييييييييييييييييييه
دنيا

تاني مرة بقي كانت مدرسة الفصل بتاعتي
وانا في اولي ابتدائي
ابله حنان
مش هقول مس عشان مس دي لسه جديده شوية
كنت اتمني انها تكون معايا علي طول وتكلمني انا لوحدي
مرة حلمت بيها
انها جت بيتنا واكلت معايا
والحلم دا طبعا مش موجود غير معايا لوحدي
ومقدرتش اقول لمس حنان عليه
دورت عليها كتير لما كبرت شوية
وسالت عنها كتير
ولسه بسال
مش علشان اقولها الحلم
علشان اقولها انا اتعلمت منك حاجات كتير اوي
....
مرة بقي من المرات
قعدنا قعدة رجاله مع بعض
واحنا في تانيه ابتدائي كدا
وقولنا بلعض
يا جدعان مش عايزين حد يقطع ع التاني
وكل واحد يعرف مين البنت بتاعته
عشان محدش يتعدي علي حق اخوه
وقعد كل واحد يختار هو بيحب مين
ومين اللي عاوز يتجوزها لما يكبر
ههههههههه
وكان كله متوقع اني اختار اميره
البنت اللي زي القمر
اللي كان كله فاكر اننا معلقين مع بعض
لكن انا بمبدأ حب الامتلاك اختارت واحده تانيه خالص
مكنتش في البال ولا الحسبان
منال
صاحبة اجمل عيون في مدرستنا
واهدي بنت ممكن تشوفها في حياتك
واستمرينا علي موقفنا من الاتفاقيه
لغاية ما انا لعبت بديلي بعد كدا
وقولتلهم لا انا مش عايز منال
انا بحب اميره
هههههههههههههههه
بجد والله كنا بنحب واحنا لسه اطفال منعرفش اي حاجه
الحاجات دي لما بفتكرها بحس بانتعاشة
عشان كانت ايام جميله
بعد المرحلة دي
كنا دخلنا في مرحلة تانيه خالص
كان كل واحد ابتدي يعرف عقله
ويعرف كمان ازاي يتلون ويحور
وازاي يغير مشاعره زي التعبان
عارفين
كنت فاكر ان لما حد بيحب حد ممكن فعلا يعمل اي حاجه عشانه
اللي لقيته
انه ساعة المصلحة
كله بيقول يلا نفسي
 

ليه كدا

عيبك انك لما بتحب حد بتحبه اوي

بتحبه بكل ذرة فيك

ودا مش كويس 

دا كان كلام اعز اصحابي ليا يوم من الايام

وانا مكنتش شايف ان دا عيب

دا ابسط شىء ممكن حد يعمله تجاه اي حد

بيحس ناحيته انه بقي كل شىء في حياته

لكن للاسف مش كل الناس بتفكر بنفس التفكير

ومهما قلت ومهما عملت

اكيد تصرفات كتير لينا الناس بتفسرها بطريقة 

غير اللي احنا نقصدها خالص

ليه بندور علي اخطاء تافهه جوا اي كلام بنقوله

ليه بنقف لبعض ع الواحده وكأننا مستنين اللي قدامنا يغلط

علشان نعريه قدام نفسه 

ليه دايما بتكون ايام خصامنا اكتر من الايام اللي بنتصالح فيها

مع نفسنا

ليه بنرفض نخرج جزء من اللي جوانا بتلقائية

وبدون اي ضغوط

يمكن علشان مش عايزين اللي قدامنا يعرف هو ايه بالنسبة لينا

وبكدا ممكن يتحكم فينا

تفكير عقيم

ليه بنعمل في بعض كدا

طفلتي

ما زلتي في فن المحبة طفلة ً

بيني وبينك أبحر وجبال ُ

لم تستطيعي بعد أن تتفهمي 

أن الرجال جميعهم أطفال ُ

فإذا وقفت أمام حسنك صامتا  ً

فالصمت في حرم الجمال جمال ُ

كلماتنا في الحب تقتل حبنا

إن الحروف تموت حين تقال ُ

هو فيه ايه؟

رن جرس الباب فأسرع الرجل ليفتح

وهو لا يعرف من القادم الاتي

أول ما شاف الطارق استغرب جدا

اي نعم هو زميله في العمل

لكن العلاقة بينهم كانت علاقة اتنين جمعهم عمل واحد

والسؤال اللي دار في عقل صاحب البيت كان محيره جدا

ايه اللي جابه في وقت زي دا؟خاصة وانه من مكان مش قريب من هنا

رحب الرجل بالضيف واللي كان مش جاي وايده فاضية

لكن كان جايب معاه حاجه اغرب من زيارته

كان جايب معاه واحده ست 

دخلهم الرجل بيته في الوقت المتأخر دا وبدأ يتعامل معاهم

زي اي حد من ولاد البلد الكرماء اللي لما يجيله ضيف 

يبقي محتار يعمل معاه ايه

قاله الضيف انه جاي هنا علشان زوجته المسكينه

اللي جايه معاه علشان تعمل عملية خطيرة عند طبيب مشهور

وهي ازالة الرحم

بدأت زوجة الرجل صاحب البيت بدافع الحنو الانثوي والامومي الخالص

في محاولة التخفيف عن زوجة الضيف المسكينه التي لاحول لها ولا قوة

واللي هتتحرم من اعظم شىء تمتلكه الانثي 

هرع الرجل صاحب البيت ولبس هدومه ونزل الشارع علشان يجيب اكل

لضيفه بينما زوجته كانت منهمكه في تجهيز المكان اللي هينام فيه الضيف وزوجته

واللي مكنش ع البال ولا ع الخاطر انهم هيجوا في وقت زي دا

اكل الضيوف واخدوا واجبهم من الضيافه وقام صاحب البيت مع زوجته 

وجابلوهم ملابس تنفع انهم يناموا بيها خاصة انهم جايين من بلدهم مش عاملين حسابهم

ونام الجميع في هدوء وسلام

وصحبي الجميع في الصباح ليتناولوا الافطار سويا وبكل خجل شكر الضيف

زميله علي كرمه وحسن ضيافته لهم واستاذنه في ان يرحل مع زوجته 

علشان يلحقوا معادهم مع الدكتور 

طلب زميله انه يجي معاهم لكنه رفض علشان ميبقاش ضيف تقيل

وكفايه اوي اللي عمله معاهم دي حاجه اكتر من اللي بتكون بين الاخوات

رحل الضيوف الي وجهتهم ومشي ايضا الراجل لعمله

وتفاجأ زوجته ان بعض مصوغاتها الذهبيه مش موجوده

تتصل بزوجها تليفونيا وتخبره بالواقعه

وتخبره ايضا بشىء صادم وهي انها شاكه ان هو اتفق مع الراجل دا

وزوجته علشان يجوا عندهم ويسرقوا دهبها 

وانها رايجه بيت اهلها ومش هترجع الا اذا الحاجه رجعت

طار عقل الراجل من الصدمه

هو ايه اللي بيحصل دا؟ هو دا جزاء المعروف

معقول يكون الضيف هو اللي عمل كدا

وانه كان جاي فعلا علشان يسرقه

احتار الرجل وتخبط ودارت بيه الدنيا

حكي الموضوع لبعض اصدقائه واللي كان رايهم

انهم ياخدوا بعضهم بربطة المعلم ويروحوا للولد دا في بلده

يمكن يلحقوه قبل ما يعمل اي حاجه في اللي اخده

وفعلا راحو

وقابلوا والده لان صاحبنا كان لسه مازال هناك في المدينه لم يرجع بعد

لكن المفاجأه اللي الجمت الجميع

وكانت صدمتها اكبر من الكل

ان الراجل اللي اتسرق من بيته الحاجات دي قابل هناك زوجة الرجل

ودي واحده تانيه خالص غير اللي كانت معاه

يعني اللي كانت معاه كانت واحده من اياهم 

تخيلوا

يجي لبيت الراجل في وقت متاخر

ووينام علي سريره ويلبس هدومه وهي تلبس هدوم زوجته

وهلم جرا

ويسرقوهم

هو دا جزاء الاحسان؟

هي الدنيا حصل فيها ايه؟

اسئلة حيرتني انا شخصيا لما سمعت القصة الغريبه اوي دي

واللي تناقلتها السنة الاخوة الزملاء

بجد ربنا يستر