Pages

الخميس، 26 نوفمبر 2009

طلقات سريعه

كل سنه وانتم طيبين
وبخير وبصحه يارب
وعيد سعيد علي كل المسلمين
ويارب يكون العيد دا فرصه
للتقارب اكتر ومزيد من التسامح



************
طبعا كل واحد اكيد هيقضي اول يوم العيد
وسط اهله واحبابه
اكيد بيكون يوم جميل خاصة
لما يكون يوم زي دا
انا بقي هقضي اول يوم هناك في المعسكر
حظي كدا
بس ان شاء الله من تاني يوم هاجي علشان احتفل
بطريقتي الخاصه
مع اللحمه طبعا

**************
ياتري مين اول حد هيقولي كل سنه وانت طيب يوم العيد
انا مستنيه من دلوقتي
اما بقي مين اول واحد هقوله كل سنه وانت طيب
فمحجوووووووووز من بدري
بس يارب يكون صاحي ساعتها

****************


الحمد لله الناس ابتدت تهدي شوية
وموجة السب واللعن والقذف ابتدت تخف
بعد ماتش الكورة الشنيع بين مصر والجزائر
اللي المفروض اتنين اخوات
اتحولت الرياضه لشىء تاني خالص
بلطجه وسفاله وقلة ادب من الاتنين
هنا وهناك
النفوس جواها كتير
والماتش دا بين ان في حاجات كتير اوي مدفونه
ياريت كل واحد يراجع نفسه
الف مبروك للجزائر المونديال
وان شاء الله مصر تحاول مرة تانيه علي 2080 كدا
وللجماهير من الجانبين كل تحيه وتقدير
علي كمية قلة الادب اللي فيهم

*********


ديااااااااااااااااااااااااالا
دموع الورد
فاكرنها؟
راحت فين ياتري؟
بجد نفسي اعرف
دي كانت زي الفراشه ما شاء الله
مفيش حد بيكتب موضوع الا وتروحله
اختفت مرة واحده
بعد  اخر موضوع كتبته من 3 شهور
( مش انا اشتغلت)
ياتري هي فين
ربنا يطمنا عليها
ياريت يا جماعه اي حد يعرفها
او قريب منها
او يعرف اي حاجه عنها يطمنا
ويارب تكون غيبتها دي خير
**********

متاكلوش لحمه كتير بقي
وعيد سعيد عليكم
وربنا يهدي الجميع
والسلام ختام

الاثنين، 23 نوفمبر 2009

لمسه



انقضي سواد الليل , وبدأ نهار جديد في الخروج الي الدنيا
بينما يغط في نوم عميق لم ينم مثله من قبل
وبينما هو على هذه الحال, أحس بشىء يلمس خده
ملمس يعرفه جيدا . طالما استمتع به ,
إنها أصابعها الناعمه التي نزلت عليه كأنها قطعة
من ريش النعام الحريري
استيقظ يا حبيبي , قالتها بكل حنو وحب لهذا المخلوق السارح في نومه
اقتربت برفق لترتب بعض الشعر الثائر علي جبينه
 إذ بدأ يفتح عنينه .. يا الهي كم احمدك ياربي
اول ما أبدأ به نهاري ان أرى بريق تلك العينين الممتلئتين بكل هذا الحنين
قالها وهو ينهض من سريره آخذا بكفها يضعه علي فمه ويقبله كالطفل الصغير
لو اردت ان أحمد الله كل عمري على هديته لي لم أستطع ان أوفيه حقه
لذاك سأعده ان أحتفظ بهديته طول عمري جميله حانيه مثلما أهداها لي
تركته في نشوته وذهبت لتجهز فطوره وفمها ممتلىء بابتسامة صافية
افضت بريقا وسحرا آخر علي تلك العينين المخلوقتين من اللؤلؤ
بينما هو يجلس امام طفله الصغير السارح في النوم ايضا مثل أبيه
ياااااااااااه سبحانك يا الهي
ماهذا الجمال الملائكي , إنني لم اخطىء حين أسميته يوسف
طبع قبلة حانية علي جبين طفله الصغير النائم
اعتني بامك حتي أعود , ولا تتعبها
امازلت هناك ؟ هيا ستتاخر
اممممممم  لا توقظ الولد سيعيقني عن استكمال عملي
ابتسم ابتسامه هادئه
واستكمل ما تبقي من ملابسه
هيا حبيبتي اربطي رباط العنق
تعال ,
لما تنظر هكذا لي؟
لا أستطيع ان اقف امام هاتين العينين ولا انظر اليها
امسك بيدها
ثم ناولها قبلة بين حاجبيها
سأهاتفك كل دقيقة
فأنا ما عدت أقدر علي فراقك لحظه يا ام يوسف
ولا انا يا حبيبي
سلم كل منهما علي الاخر
خرج من البيت ومازالت لمسة يدها علي يده
وكلما شده الحنين لها ينظر الي يده التي كانت معها
ثم يقبلها
ويكمل ما تبقي من عمله

السبت، 14 نوفمبر 2009

تاج جديد

السلام عليكم
بجد وحشتوني كلكم والله
دا التاج بتاع دموع القمر
اديني هجاوب عليه
بس يارب اعرف
يلا بينا

انت مين بقى؟
انا........
مهو كل حاجه موجوده في ملف التعريف
بس ممكن هنا اقول
انا واحد نفسه يكون زي ما هو عايز
مش زي ما غيري عايزني
اسمي ابراهيم
وناس كتير اوي بيقولولي يا هيما



عندك كام سنه؟
انا من مواليد 

1987/8/11
يعني بالظبط كدا عندي
22y , 3m , 3d

هل انت متزوج ؟ وهل عندك اولاد؟


لسه والله 
ربنا يقرب البعيد
واكيد يعني مفيش ولاد
دراستك ايه؟
بكالوريوس تربيه 2008
قسم طبيعه وكيمياء


كم طولك...وما لونك
...
اممممممم
انا قصير اوي
طولي 169
ولوني زي ما انتو شايفين كدا
بس دا كان قبل الجيش
هههههههه

هل تمارس عملا بشهادتك ام عمل حر وماهو
اه الحمد لله
كنت شغال في نفس مجال دراستي
مدرس

ماهى مدة عملك اليوميه

والله الشغل كان معظم فترات اليوم
بس طبعا كان فيه بردو فترات راحه كتير


ماذا تفعل بوقت فراغك
مفيش غير النت طبعا
بقضي فيه معظم فراغي
وساعات بقي بخرج
اروح لاصاحبي
او ازور قرايبي كدا يعني

هل لديك هوايات....وهل تمارسها

كنت بلعب كورة ......وبطلت
وكنت بكتب شعر........بس مكسل اوي بقالي فتره
 بحب القراءه جدا
بس اليومين دول لما بكون فاضي
بعلم نفسي بنفسي الفوتوشوب
وبقعد بقي اصمم


هل تشعر برضا ربنا عنك ؟
مفيش حد يقدر يستغني عن رضا ربنا
بس اكيد في اوقات بحس اني قريب من ربنا اوي
واوقات تانيه ببقي بعيد عنه

هل تحب؟...ومن بقلبك الان؟



طبعا اكيد بحب
واكيد اي انسان طبيعي لازم يكون بيحب
اما مين جوا قلبي 
فبلاش بقي
علشان منحرجش الناس
ههههههههههه



لو لم تجد من تحب ....فماذا ستفعل ؟؟
لو ملقتش اللي احبه
هدور علي اللي بيحبني
لاني بالتاكيد هحبه


عندما تكون فى موقف اتخاذ القرار..تخالف الجماعه.. ام تشرك معك الاخرين ؟
بالتاكيد انا بيكون ليا راي شخصي
لكن لو كل الناس اتفقت علي راي
فانا لازم اكون معاهم
حتي لو رايهم غلط من وجهة نظري
دائما الاجتماع علي الخطأ صواب



هل تتعامل بواقعيه؟
غالبا
بس ساعات بسرح بخيالي بردو
لكن مش اوي
علشان مفوقش علي كاوبس
ماهو الشيء الذى فعلته وندمت عليه طول عمرك ؟
ندمان اني مرة حبيت
وكنت اعمي


هل تصارح غيرك بالحقيقه ؟ ام ام تقول له مايريد سماعه؟

انا مش بقول غير الحقيقه دايما
بس بردو براعي شعور اللي قدامي
لكن مش بضحك عليه


صف انسان يمكن ان تحبه عمرك كله
انسانه بقي
تكون هاديه جدا
صوتها واطي اوي
بتحبني ومستعده انها تعمل اي حاجه علشاني
مستعده انها تتخلي عن كل الناس
وميكونش ليها غيري
اناني انا صح؟




متى يقسوقلبك ؟
ساعات قلبي بيقسي
لما بلاقي اللي معايا مش مديني نفس الاهتمام
اللي انا مديهوله


ومتى يقسو لسانك؟
اممممممممم
بجد مش بعرف اضايق حد بكلامي
بس ممكن اعمل كدا
مع بعض الناس
علشان مش بتيجي غير بكدا


من هو اول من قلت له احبك؟
هههههههههه
بلاش 
ياااااااااااااااه
ربنا يديك طوله العمر


هل يمكن ان تحب احد من المدونين؟
وليه لا
وهم المدونين دول مش ناس بردو
احنا بنبحث عن اشخاص 
وميهمش يكونوا فين او هنقابلهم فين
المهم اننا نحس فعلا اننا بنحبهم



وهل يمكن ان يكون شريك حياتك؟

امال هحبها ليه
يومين وبتاع
طبعا اكيد تنفع شريكة حياتي



ماذا تعنى لك المرأة او الرجل؟
المرأه عندي هي
الحب
البراءه
الصدر الحنون
الدفء
هي كل شىء جميل



فى زمن البحث عن الماده ..عن ماذا تبحث انت ؟

ببحث عن كل اسباب النجاح
وعن كل اسباب السعاده
وان كانت الماده جزء منها

متى تعرف انك تحب ؟
لما اكون مش عايزه يبعد عني لحظه
لما اكون مستعد اني اعمل اي حاجه علشانه
لما احس انه بيكملني
واننا مع بعض دايما لينا نفس الراي
ونفس الاتجاه ومفيش تناقض
لما ازعل علشانه واتعب علشانه
واهم حاجه
لما اكون وانا معاه مش شايف حد غيره



ماهى الشخصيه التى اثرت بحياتك ؟
استاذ محمود
استاذي ومعلمي
دا مثلي الاعلي
في كل حاجه
انا كتبت بوست مخصوص علشانه
ربنا  يخليه ليا





هل يوجد من تراه سعيدا فى الدنيا ولماذا ؟

طبعا اكيد فيه ناس كتير
وبشوفهم في كل مكان
سياره وسائق ووقت متاح ....تذهب الى اين ؟ ولمن ؟ بالترتيب


هروح القاهره
علشان بحبها اوي اوي
وبحس وانا فيها باحساس حلو بجد
بعد كدا ممكن اروح مدن القناه
نفسي ازورهم
ماهى درجة صراحتك ؟
كبيرة والحمد لله 
بس صراحه بدون تجريح
وماهى المواقف التى يمكن ان تكذب فيها ؟


مفيش حد مثالي
ولا فيه حد خالي من العيوب
انا كدبت كذا مرة وانا في الجيش
اصل دا شىء متعارف عليه هناك
زي مثلا
ممكن تكدب علشان تنزل اجازة
او تقول انك تعبان علشان تهرب من الشغل 
كدا يعني
هل يتغير الحب بعد الزواج؟
بالتاكيد ممكن يتغير
والدليل حالات الطلاق الكتيره الي بتحصل بين ناس كانو بيحبوا بعض
قبل الجواز


فيما تفكر الان ؟
بفكر في اللي النت بايظ عنده
ومش عارف اكلمه خالص دا
زهقني


لو لم تعيش بمدينتك؟؟؟فاى مدينه اخرى تفضلها


هعيش في اسكندريه
علشان هي قريبه مني اوي
وعلشان ليها حب خاص عندي
من اول من ياتى ببالك لتحكى له اسرارك؟
انا
بحكي ليا انا كل اسراري

من هو الد اعدائك؟
ماليش اعداء الحمد لله

من هو صديقك 
كل حد محترم

لو الدنيا كلها زيك....لمن تقول هذه العباره ؟
اقولها لدعااااااااااااء


ماذا تكره فى الحياه ؟
مكرهتش في حياتي قد الوساطه
واعتقد دي كفايه


ماذا تحب ؟
بحب الخير لكل الناس
وان مفيش حد يبقي زعلان او حزين او مهموم او مجروح

كيف تواجه مايضايقك
وماذا تفعل عند المفاجآت

لما بضايق بشوف حد اتكلم معاه
او بخرج اتمشي 
او بروح لاصحابي
ولما حد بيفاجاني بحاجه
بقعد لحظات كدا استوعب
وبعدين بقول قراري او رايي في المفاجاه دي

 
لو معاك فلوس اكثر مما تتخيل...فماذا ستفعل بها
قولتلكم مفيش حد مثالي
اكيد هظبط حياتي
ومش انا بس
واهلي كلهم كمان
الاقربون اولي بالمعروف
ولو فيه حاجه زادت
هديهالكم
ههههههههه



هل الفقر يصنع حبا؟؟
معتقدش
وسيبكم من الافلام الهندي بتاعة شاروخان
الفقر بيقتل الحب
وبيكون اكبر عقبه قدام اي ارتباط



وماذا لو وجد الحب فى زمن الفقر المادى؟

الخبز ياتي قبل الحب مش احيانا 
دائما

ماهى اقسى صدمه تعرضت لها حتى وقتنا هذا
ربنا ما يجيب صدمات
هي حاجات بسيطه
بس بيتهيالي انها بتبقي صدمات
لكن في الاخر بيتضح ان اختيار ربنا ما بعده اختيار


كان رد فعلك
في الاول بزعل وبضايق
لكن بيتضح لي انها كان لازم تحصل
سبحان الله


هل تعلمت منها شىء
تعلمت 
وعسي ان تكرهوا شيئا وهو خير لكم
وعسي ان تحبوا شيئا وهو شر لكم


هل انت على استعداد لتلقى صدمات اخرى؟؟
ابعد عن اهلي
وعن حبايبي
وعن بلدي
وعن اي حاجه تهمني
وبعدين ممكن اتقبل اي صدمه


كيف ترد على من لاتصدقه
ولا كانه بيتكلم 
ولا بديه اهتمام
وهو بيعرف كدا من طريقتي
اذا احببت انسان ما ...هل تصرح له بحبك ؟
اها
هقوله
بس ممكن مقدرش
اخاف من ردة فعله

ماذا ا تفعل لو لم يتجاوب معك؟
احساس صعب
بس لازم ااقلم نفسي علي اي وضع

هل تؤمن بالمثل القائل:انا احب فانا اعيش

طبعا
الحب حياه
بجد الحب حياه



ماهى القضايا التى تشغل بالك؟

اهم حاجه والله شاغلاني
موضوع الجواز
مش ليا بس
لكل الشباب والبنات
نفسي كلهم يتجوزوا
بفرح اوي لما اسمع عن حد بيتجوز
الجواز طهاره وعفاف وستر
ربنا يوفق الجميع ليه يارب




هل تستطيع تحقيق كل احلامك

اكيد طبعا لا 
لان فيه احلام بتبقي مستحيله
علشان كدا اسمها احلام



هل تمتلك طموحا...وماهو؟
طموحاتي كتيره اوي
اني ارتبط باللي بحبه
اني اكون انسان نافع لمجتمعه ولدينه ولنفسه




كيف ستحقق طموحك...ام سيبقى حلما فقط!!!!!!!!!!
الحمد لله كل مقومات الطموح موجوده
وبدات فيها
وربنا معايا



ماهى علاقتك بالدنيا
انسان عايش فيها



علاقتك بالموت
مستنيه بس خايف منه اوي


لو لك اختيار زمن تعيش به....فماهوذلك الزمن ؟ ولماذا ؟  
.اكيد زمن الرسول صلي الله عليه وسلم والصحابه الكرام
خير القرون قرني ثم الذين يلونهم

هل يمكن ان ارا ك وانت غائب؟؟؟؟؟؟؟ 
زي ما انت شايفني دلوقتي
اكيد هتشوفني وانا مش موجود



ماذا ترى فى نفسك مميزا عن الاخرين؟
مقدرش اجاوب ع السؤال دا
هسال حد
وابقي اقولكم


من اذا اقترب منك ...هربت منه بعيدا؟
التدخين



من تقول له : قرب منى قرب ...ياقلبى يا متغرب
هههههههههه
هو عارف نفسه كويس



ماذا تريد ان تقوم به قبل ان تموت
احقق كل اللي نفسي فيه
اموت وربنا راضي عني
بس

الأحد، 1 نوفمبر 2009

عاده سريه


هبدأ علي طول في كلامي لاني عارف ان العنوان 
خلا الشيطان يلعب في عقلكم وعلامات الاستفهام اشتغلت 
وايه دا ؟ وازاي ؟ ومعقوله هيتكلم في الموضوع دا ؟
علشان كدا انا هطقع عليكم حبل تخيلكم ( الوحش ) دا وهقول:

وانا في تالته جامعه جالي شوية تعب في ودني مكنتش بعرف انام منه
وكل يوم عن يوم بيزيد واروح من دكتور لدكتور وكل واحد فيهم ما عليه الا
يملا الروشته بالشيىء الفلاني والادوية اللي لا بتجيب ولا بتودي بل بالعكس كانت 
بتزود الموضوع اكتر

وصارت الحاله من سىء لاسوأ
ودني فيها صوت دوشه جامد اوي ومش بتهدي نهائي لا في الليل ولا النهار
وششششششششششششششششششششششششششششششش
كدا يعني
كان ناموسه داخله جواها ونازله زننننننننن وكل ما تلاقيني هادي كدا لوحدي
تبتدي تزود الجرعه 
لا كنت بعرف اذاكر ولا اعرف انام
وابتدت ودني الشمال سمعي يتقل فيها شيئا فشيئا وبقي فيها ميه كتير
اعمل ايه بس ياربي ؟
وكله كوم والناموسه اللي جواها كوم
الامتحانات خلاص ع الابواب باقي يادوب شهر واحد بس
وانا كنت في تخصص صعب بجد يعني عايز مذاكره ليل نهار
اشي كيميا بيلوجيه وحيويه وكيميا فيزيائيه
وفيزيا كهربيه وجوامد وفيزيا اشباه موصلات والذي منه
ورياضه بحته واه واه من الرياضه البحته دي هي دي كانت مشكلتي
المهم
التعب بيزيد اكتر ومفيش حاجه نافعه وكل يوم سمعي يتقل شوية بشويه في الودن الشمال دي
اقترحت علي والدتي ( ربنا يديها الصحه ) اني اروح اكشف تبع الجامعه
قالتلي يابني انا سامعه ان عندكم دكاتره كويسين وبعدين بهتموا بالطلبه 
روح كدا جرب يمكن 
سمعت كلامها وروحت 
انا كنت في فرع الجامعه في دمنهور
وهناك حولوني علي المستشفي الرئيسي في المجمع النظري في اسكندريه
دخلت لعيادة الانف والاذن وهناك قابلت الدكتور م ب
عمري ما هنسي اسمه سالني انا بشكي من ايه 
وبعدين كشف عليا وقعد يسالني شوية اسئله 
وجاب جهاز كدا ودخله جوا ودني وانا ملاحظ انه مستغرب
او شاكك في حاجه معينه
قالي:يابني هي الحكاية دي عندك من امتي؟
قولتله: بقالها يجي شهرين تلاته
قالي: ومكشفتش ليه؟
قولتله: كشفت يادكتور وكل مرة يدوني علاج ونقط ومفيش فايده
قالي : ممممممممممم
بص انا هقولك انت عندك عضمه الاذن مسوسه وهي اللي عامله الوش دا
واذا ملحقنهاش في خطر عليك
طبعا ابتدت الدنيا تلف وتدور بيا واشباح واشكال ومشارط ومقصات تيجي قدامي
قولتله : طيب والحل ايه يا دكتور؟
قالي : لازم جراحه وتتعمل حالا
قولتله : طيب يا دكتور انا داخل علي امتحانات قريب وكدا السنه هتضيع مني
قالي : هي الامتحانات اهم من صحتك ولا ايه.. انت تروح دلوقتي وتيجي يوم الخميس 
( احنا كنا يوم التلات )  علي العياده الخارجي بتاعتي وهناك هنعمل استعدادنا 
يلا يابني اتكل ع الله
خرجت وانا بضرب اخماس في اسداس 
جراحه ....... انا ...... وعضمه مسوسه .....
هسقط السنه دي ..  معقوله ؟
 طيب اعمل ايه؟.....وهقولهم ايه في البيت؟
بدأت معنوياتي تنهار وبجد والله بقيت ماشي اخبط في الشارع وبكلم نفسي
لغاية ما روحت وقولتلهم كل حاجه
وقفلت علي نفسي وقعدت في جو كابه
ومش عايز حد يكلمني وهم يحاولو يهدو فيا ويقنعوني انها بسيطه
بدليل ان فلان وفلان عملوا زيها قبل كدا ودلوقتي كويسين
جا يوم الخميس اليوم الموعود ( بالصدفه دا كان يوم محاضرات الرياضه)
وروحت للدكتور وكانت معايا والدتي المره دي
كشف عليا تاني وعمل شوية حاجات كدا
وفي اليوم دا كان عنده استاف كامل من الدكاتره
يجي 4  او 5  وكل واحد فيهم ماشاء الله 
قعدوا يتناوبوا عليا كل واحد شويه كاني فريسه بالنسبه لهم
ويكلموا في بعض وانا مش فاهم اي حاجه
المهم جا صاحبنا

وقالي: كدا كله تمام انت هتيجي يوم الحد الجاي علشان تحجز 
وتجيب معاك حد ... انت اكلت ولا لسه؟
قولتله : ماكلتش حاجه 
قالي : كويس عايز تحليل دم كامل وتجيبه معاك
وخلاص اتاكد اني هعمل العمليه 
الامتحانات باقي عليها 15 يوم
والعمليه بعد يومين
ومن المستحيل اني الحق اذاكر او اعمل اي حاجه
قولت مفيش مفر خلاص غير اني الجأ لربنا هو اكيد اللي عالم بحالي
وقعدت اسمع بعض الخطب ووقفت عند الحديث ( داوو مرضاكم بالصدقه ) قاله الشيخ 
في الخطيه وسبحان الله يتكرر نفس الكلام في خطبة الجمعه عن نفس الموضوع
وقعد الشيخ يحكي عن فلان اللي ابنه كان عنده سرطان ويئس من علاجه 
وفلان اللي ربنا شافاه لما اتبرع بفلوسه 
قولت طيب ما اجرب الحكايه دي هو انا هخسر ايه اكتر من كدا
وعزمت اني هاخد مصروف كل يوم بتاع الكلية واصرف نصه ع المواصلات
وتصوير الورق والاكل ( دا اذا اكلت برا البيت ) والنص التاني هتبرع بيه كل يوم 
لاي حد يقابلني
وفعلا بقيت اعمل كدا كل يوم وبقت دي ( عادتي السريه ) اللي محدش يعرفها غير انا وربنا
اصحابي كانوا مستغربين اوي للي انا بعمله ويقولوا ايه يابني انت لاقي فلوسك ولا ايه
اقولهم اصل في حد اداني الفلوس دي وقالي ابقي اديها لاي حد غلبان
نسيت اقولكم اني طنشت معاد العمليه ومروحتش اساسا واتحججت في البيت اني 
هعمل كل حاجه بعد الامتحانات ان شاء الله
وجات الامتحانات وانا زي منا لسه بردو الالم شغال وانا لسه بنفذ العاده بتاعتي
وكانت حالتي وحشه بجد .. لان نفسيتي كانت تعبانه شوية بسبب الموضوع دا
وعدت الامتحانات 
وكان لازم بقي استكمل حكاية العلاج دي
فاحترت اروح لنفس الدكتور .. طيب هقوله ايه؟
ولما يسالني مجتش ليه هرد اقول ايه؟....... دا كان مجهز لكل حاجه
قولت في نفسي لا مش هروحله
انا هروح عند حد تاني بره واعمل العمليه عنده وخلاص
وروحت لاستشاري كبير عندنا ومتخصص في الموضوع دا
وبردو كانت والدتي معايا
دفعت الفيزيتا بتاعته ( كانت حراقه اوي والله ) واخدت دوري
ودخلت 
لقيته راجل كبير وعليه هيبه كدا ( دكتور بجد )
قالي : اقعد يا ابراهيم ( طبعا عرف اسمي من الورق اللي قدامه )
قعدت
قالي : خير يا سيدي عندك ايه؟
قولتله : انا يا دكتور بقالي مده عندي ................................................
قالي : اها .. مين كشف عليك قبل كدا ؟
قولتله : دكاتره كتير ( نص كم طبعا ) بس اخر واحد كان دكتور م ب  اللي قالي 
عندك عضمه مسوسه ومحتاجه جراحه فوري وكدا

قالي : اها .. طيب 
وقعد يحطلي حاجات ويبص بالعدسه اللي معاه والبنت الممرضه
تديله حاجات وهو شغال في ودني
قالي : انت قولتلي مين اللي كشف عليك ؟
قولتله : دكتور م ب 
قالي : فين دا ؟
قولتله : في مستشفي الطلبه في اسكندريه
قالي : وقالك عندك عضمه مسوسه وعايزه جراحه
قولتله : اه والله قالي كدا ومش هو لوحده كمان
دا كان معاه مجموعة دكاتره غيره

قالي : ولا عندك عضمه مسوسه ولا حاجه والعضمه زي الفل قدامي اهي 
قولتله : امال يا دكتور ايه الالم والوش دا وايه الميه اللي فيها دي كلها
قالي : كل الحكاية يا ابني ان عندك شوية التهابات بسيطه وهي اللي عامله كدا
قولتله : شوية التهابات ........ وبسيطه
قالي : دلوقتي هعملك غسيل وهحطلك نقط معينه وتجيب زيها وتستعملها وقالي ع الطريقه
وان شاء الله تبقي تعيد الكشف تاني ونبقي نشوف ايه حصل
خلصت عنده وخرجت والدنيا كلها مش سايعاني ومبقتش مصدق اي حاجه
معقوله .. احمدك ياربي .. وامي هي كمان كانت فرحانه ومش مصدقه كلام الدكتور
وروحت البيت واستعملت النقط دي
عايز اقولكم اني من بعدها لغاية دلوقتي الحمد لله مشتكتش بودني تاني
وههههههههههههه مروحتش اعيد الكشف ووفرت الفلوس
عايز اقولكم حاجه كمان بقي بس مش كويسه
اني نسيت او بطلت اعمل ( العاده السريه ) تاني
اوعوا تفهموني غلط ... ها
يلا سلام