Pages

الأحد، 12 سبتمبر، 2010

مع مين؟




كان صديقي وكانت حبه الأبدي.... بل كان حبهما حكاية البلد ِ
واستغرب الناس كيف القصة انقلبت .... الي خصام ٍ الي هجر ٍ الي نكد ِ
يااااااااااااااااااااااه ( دي تنهيده علي فكرة )
مين فينا مسمعش الاغنيه دي بتاعة كاظم الساهر وقعد يردد كلماتها
اللي حس انها فعلا كانت معاه وعاش قصتها مع حد من أصحابه
واحد صاحبي .. صاحبي جدا .. تقدروا تقولوا انه انا
كان عايش قصة حب او كان فاكر انه عايش قصة حب مع بنت قريبته
ورفض ان الحكاية تكون في الضلمة وأخد خطوة انه فاتح اهلها في الموضوع دا
ولقي منهم كل ترحيب ولقي فيهم فعلا ناس ينفع انهم يكونوا نواة لاسرة جديده
وعيلتين هتنشأ بينهم علاقة جديده ... مهو الجواز مش علاقة بين اتنين
وخلاص دي علاقة بين عيلتين وكيانين كبار اكبر من مجرد الارتباط الشخصي
بس المشكله عند صاحبي دا مكنتش في عيلة البنت لا
كانت مشكلته في البنت نفسها اللي مقدرتش تفهم وتستوعب يعني ايه ارتباط
يعني ايه تعمل حساب لحد دخل حياتها خلاص واعترفلها بحبه
وهي كمان اعترفت انه الشخص الاول والاخير في حياتها
لكن كلامها كان عكس افعالها خالص (زي ما بيقول ) بدل ما تحسسه انها
معاه وتبين له يعني ايه هي بتحبه.. اتحول الموضوع لاهمال وتطنيش
وحجج رغم انها بتقول انها بتحبه اوي كمان
بس ازاي..؟
ازاي حد بيحب حد ومش بيسمع كلامه
ازاي حد بيحب حد ويتعمد انه يتجاهل حتي وجوده
ازاي حد يقول انه بيحب حد ويخلي الطرف التاني يشحت منه
السؤال والكلمة ودا كله بحجة انه هو الراجل
وطالما هو الراجل فهو اللي لازم يعمل كل حاجه
يعني لازم يكون هو الفعل وهي تكون رد الفعل
وحتي رد الفعل دا مكنش بيلاقيه كمان
لغاية ماحس صاحبي ان الملل بدأ يشتغل وبدأ يحس انه اتسرع لما اتربط
بيها من اللي شايفه قدامه من اصحابه التانين وقد ايه علاقتهم ناجحه جدا
لكن كان دايما بيقول ان ربنا ابتلاه بحد زي الحجر عمره ما بيحس
ابتدي يتعب ويحس انه مش مرتاح واخد قرار انه لازم ينهي العلاقه دي فورا
بس مكنش لاقي السبب اللي يمسك فيه عشان يقولها كفايه كدا
وكان احترامه لاهلها اكبر من انه يقولهم انا هسيب بنتكم عشان مش حاسه بيا
عشان مش بتسال عني او عشان مش بتسمع كلامي
ودايما تعمل عكس اللي يقولها عليه عشان متحسسوس انها سهله
وانه ممكن يسيطر عليها بسهولة ( تفكير غبي جدا في البنات )
لما يطلب منها انها متكلمش فلان او متقعدش في مكان فيه فلان
او حتي تلبس اللبس الفلاني او متخرجش من البيت في المشاوير الغير معتاده
غير لما تقوله عشان ميكونش اخر من يعلم تفتكر انها لو وافقت علي كدا
يبقي بيتحكم فيها وانها لو رضيت بكدا هتخليه يحس انها بنت سهله
وبتسمع الكلام بسهوله .ايه الغباء دا؟
ومرت الايام علي نفس الحال وهو مستني الفرصه انه يخلع
لغاية ما ربنا بعتله كل اللي بيتمناه ووقعت البنت في شر اعمالها
بحاجه مقدرش يستوعب انها ازاي تعملها وهي عارفه انه لما يعرف هيكون رد فعله عنيف جدا
تصوروا انها تروح خطوبة اخت واحده صاحبتها وترقص فيها قدام كل الموجودين
وقدام الشباب المسبسب اللي بيجي الحاجات دي مخصوص عشان يصطاد
وانتم عارفين يصطاد ايه ومين بالظبط؟
ولسوء حظ صاحبتنا ان اللي شافها مش اي حد ,,. اخو صاحبي ومراته
ولما رجعوا قالوله وهو مش مصدقين اصلا نفسهم
وكان السؤال اللي بيتردد علي لسانه باستمرار
للدرجه دي انا معنديش كرامه؟
للدرجه دي مش عاملالي حساب رغم انه حذرها كتير انها تعمل كدا
لانه عارف ان الداء دا فيها وعملت كدا قبل كدا
ولما اتصل بالتليفون وسألها انتي عملتي كدا قالتله اه بكل بجاحه
بس عملت كدا غصب عني اصل اصحابي هم اللي طلبوا مني
وبصراحه مقدرتش اكسفهم
منطق كويس والله يعني ممكن اي حد يعمل اي حاجه في الدنيا ويتحجج بقي
والمطلوب من اللي قدامه انه يفهم ويستوعب والا يبقي مش مودرن
ولا روش ولا عايش حياته
وكان رده علي كلامها انه قال:
انا شخص حاسس اني محترم وطالما انا كدا فكنت اتمني
ان اللي هرتبط بيها تكون محترمه زي
مفيش حد في الدنيا  يقبل علي نفسه ان خطيبته تعمل كدا واذا قبل
فمعلش دا اساسا مينفعش نقول عليه راجل
اعتبري اي حاجه كانت بينا كأنها مكنتش ابدا
******
يمكن الحكاية البسيطه دي عرفتني نوع من البشر
انا كنت من الموافقين علي القرار اللي اخده
رغم ان في ناس كان ليها رأي تاني انه يديها فرصة تانيه
خاصة انها اتوسلت له وحلفت انها اخر مرة تعمل كدا
وانها بجد ندمانه علي كل اللي حصل
تفتكروا انتم مع مين؟

هناك 12 تعليقًا:

campos يقول...

ليا نصيب ابقي اول من يعلق وده لحكمها اكيد
المهم هو لسه بيسأل انا رايي انه ينسي بقي وكفايه كده
فاظفر بذات الدين تربت يداك
وعلي فكره هيا مش بتحبه
/: يمكن لو كانت بتحبه كان يديها فرصه تانيه ورغم اني مش موافق علي كده كمان

sony2000 يقول...

بص بقي ياعمونا
لو فعلا هي بتحبوا
كانت سمعت كلامو وبينت كل حاجه انها بتحبوا
لكن دي من الاخر وخداه استبن لحد ماتلاقي حد تاني
ولما يجي التاني....صاحبك هيتفرقع
فمن الاخر دا قرارو
لو قادر يسامح وهي فعلا بتحبوا...لو عاوذ هيرجع
ولو مفيش ودا الاعم
يبقي كل واحد ربنا يسهلو ويلاقي فعلا اللي بيحبوا بجد

أتنين حبيبين يقول...

ربنا يقدم ليهم كل الخير


تحياتى
توتا

ديالا يقول...

اولا كل سنه وانت طيب

ثانيا انا بجد فخوره انيفي التدوين عرفت حد زيك حد بجد اصيل جدا وبيسأل عن اخواته واخوانه

وبجد ربنا يكرمك يارب

انا في رأيي انه محبهاش

مبدئيا هيا غلطانه جدا بس هل ياتري هوا شاف عيب في اخلاقها جامد اوي غير الرقصه دي

بيتهئالي لو كان كده مكنش حبها

هيبا غلطت بس مش الغلطه الي ممكن في ثانيه تضيع كل حاجه

وكفايه انها ندمت وعايزه ترجعله وبلاش يسمع كلام حدلان ساعات البنات بيجلها نوبات عبط شويه بس من حقها انه يحذرها ويعاقبها بس العقاب ميكونش الفراق

انا برضه مش معاها في الي عملته بس عقابها كان جامد اوي

وده رأيي

beautiful mind يقول...

campos
والله مكنت اعرف انه انت يا سمسم غير لما شوفت الصورة
عارف رايك من غير ما تقوله
يلا بقي اكتب مواضيع وورينا ابداعاتك
ومتحرمناش منك يا جميل

beautiful mind يقول...

سوني
كلامك عين العقل
وكان واضح بجد زي ما قولتي انه كان استبن لغاية اللي في دماغها ما يجي
عموما هو عرف يعمل حاجه صح
علشان لو كان رضي بالغلط دا
كان بعد كدا استحاله يعدل المايل
تحياتي يا قمر

beautiful mind يقول...

اتنين حبيبين
مش عارف قريت الموضوع ولا لا
عامة تحياتي ليكي
وكل سنه وانتم طيبين

beautiful mind يقول...

ديالا
حمدلله علي سلامتك
والله متتصوري فرحتي برجوعك عشان دايما الناس الكويسين بيبقوا مالين مكانهم بجد
ميرسي علي كل الكلام اللي قولتيه عني
ورايك تمام التمام في الموضوع
بس اكيد هو شاف منها حاجات كتير زي دي
ومكنتش اوي غلطه ليها
والا يبقي هو اتسرع في اللي عمله
عاملة كل واحد عارف فين مصلحته وفين الصح وفين الغلط
تحياتي يا ديالا

كيــــــــــــارا يقول...

اللي بيحب حد بيحب يسعده وبيسمع كلامه وهو مسمتع اووووووووووي بدا

وبيبقي مبسوط ان الطرف التاني بيقولو البس كذا ومش تلبس كذا وهكذا

مش عارفه ممكن تكون بتحبه بس بتتعامل بطريقتها

كان اداها فرصة تانيه بلاش البتر

شمس النهار يقول...

الاول كل سنه وانت طيب

وبعدين ياابني اعمل حساب كبار السن في البلوجر
وبلاش الروشنه في البوست
ماكنتش عارفه اقرا خالص

ماعلينا

شوف انا مع الفرصه الاخيرة

يديها فرصه اخيره لو بيحبها لو مش بيحبها بلاش العذاب يطول

ويمكن لما لاقيت انه هيسبها تتعدل

وربنا معاهم

تحياتي

فتاه من الصعيد يقول...

كل شيء نصيب

ربنا وحكمته بقا

وفعلا لازم كل واحده تحافظ على تصرفاتها سواء بقا مخطوبه ولا لا

تحياتي

غير معرف يقول...

أولا كل سنة وانت طيب.
من الواضح انها معرفتكش كويس ودى مشكلة كل اتنين بيحبوا بعض! يمكن لو عرفتك بجد كانت احترمت كل رغباتك حتى قبل ما تحبك.
على العموم ربنا يسعدك وتلاقى انسانة تفهمك و تقدرك بجد.........