Pages

السبت، 21 يوليو 2012

اللهم اني صائم




كل سنه وانتم طيبين وبلدنا بخير وكل المسلمين منصورين 
وان شاء الله تكون أيام رمضان أيام خير وطاعه وبركه
..............
احيانا كتيرة واحنا صايمين بنتعرض لمواقف مستفزة 
بنلاقي نفسنا نقول علي طول اللهم اني صائم عشان نفكر
نفسنا ونفكر اللي قدامنا ان الصيام له حرمة زي ما دينا علمنا 
اللهم اني صائم بقي انا بقولها كتير جدا كل يوم 
................

اللهم اني صائم من البنات اللي ماشيين في الشوراع
ولا فارقه معاهم ولا مع اللي جايبنهم ولسه بردو الهدوم زي ما هي
البناطيل في النازل والتيشيرتات في الطالع والموضات
معموله مخصوص لرمضان الهدوم بقت مرشوشه علي الجسم زي البويا ..
كأن البنت بترشها علي جسمها مع الاسبراي
هم دول مش صايمين ولا ايه ؟ طب هم ان شالله عنهم ما صاموا
احنا نعمل ايه ؟..... نغمض عنينا ونمشي ولا ايه بالظبط
وزعلانين ان فيه تحرش وخطف ....
دي بقت حاجه تخلي الميت يموت تاني
.........................
اللهم اني صائم من سواقين الميكروباصات والتكاتك والحاجات دي
بالاغاني اللي قرفنا بيها في كل مواصله بنركبها ولما تكلم حد فيهم 
وتطلب انه يوطي الصوت شوية تلاقي ماسورة مجاري اتفتحت في وشك
الفاظ سافله وقلة أدب وكأن فئة السواقين دي لازم عشان تبقي واحد منهم
لازم تبقي قليل الادب وصايع وحشاش ولو محترم يبقي هتاخد على دماغك
هي الناس دي محتاجه ايه عشان تنضف يا جماعه ؟
......................
اللهم اني صائم من الناس اللي مش بيحلالها الخناق غير في رمضان
وكأنها بتدفعنا ضريبة انها صايمة ... صيام ايه دا اللي كله شتايم وسب ولعن
ولما تحب تكلم حد منهم نلاقي الف واحد يقولك : سيبه عشان صايم
هو انت يعني لو مش صايم ياخويا كنت هتكون مؤدب ومش بتاع مشاكل
انت اصلا لو فاهم ايه الهدف من الصيام كنت عرفت ازاي تصوم
نصيحة : لو شوفت اي اتنين بيتخانقوا قدامك في رمضان
اوعى تعمل نفسك بطل وتروح تسلك بينهم واسمع كلام ستي الله يرحمها
ما ينوب المسلك الا تقطيع هدومه وضياع صيامه

......................

اللهم اني صائم من الجماعة بتوع الكهربا اللي بقى شغلهم اليومين دول
انهم يرزلوا علي خلق الله ويقطعوا عليهم الكهربا عمال علي بطال
ولا بيراعوا اي حاجه ولا اي ظروف طب والموضوع دا مظهرش ليه
غير دلوقتي مانتو بقالكم مليون سنه شغالين تمام لازم يعني يبقالكم نصيب
في الهرجله اللي البلد فيها ... ياجماعه حطوا في اعتباركم الناس التجار 
اللي البضائع بتاعتها باظت في التلاجات والاكل اللي ناس بترميه عشان
فسد من الحر والجوامع اللي لما الكهربا بتقطع بتبقي زي الفرن 
استقيموا يرحمكم الله

.........................

اللهم اني صائم من الجماعه بياعين العصير اللي في الشارع
واللي بيحطوه في اكياس كدا وتلاقي ع الكيس من بره نقط ميه
وانت ماشي في الشارع والشمس واكلاك من الحر وفجأة وبدون اي مقدمات
تقع عينك ع الأكياس دي ساعتها بيجيلك جنون العطش
فبضتطر انك تدير وشك وتمشي وانت بتتقطع من جواك بس متزعلش
كله بثوابه وربنا عنده كتييييييييير

............

اللهم اني صائم من التليفزيون بتاعنا ومن ال 500 مسلسل اللي هيتعرضوا
هي الناس دي متخلفه للدرجة دي هو مين اصلا هيقدر يتابع الكمية دي
دا لو افترضنا ان فيه حد ناوي يضيع وقته وصيامه ويقعد يتفرج
وبعدين حرام والله المبالغ الخرافية اللي اتصرفت علي الافساد دا
مش مراعيين ان البلد عايشه ازمة وانها داخلة علي مرحلة افلاس
اذا كان ربنا بيسلسل شياطين الجن في رمضان عشان ميغووش الناس
فشياطين الانس شايفين شغلهم تمام التمام وعارفين ازاي يحققوا هدفهم
فين الرقابة ؟ هي اتشالت في الثورة ولا ايه ؟ دا احنا مكناش نص كدا
ايام المخلوع ولا هي ثورة علي كل حاجه واي حاجه وخلاص

..............
كل سنه وانتم طيبين

الخميس، 5 يوليو 2012

شوية أنا بقي






في هذه التدوينة هحاول إني أجاوب علي أسئلة التاج
اللي لقيته في احدي المدونات ضمن حملة التدوين الحالية
واللي المفروض ان كل المدونين هيجاوبوا عليها
فحبيت أخلص نفسي بدري بدري قبل الزحمة ورمضان وكدا
هه استعنا بالله 
.............................
عرف نفسك ؟
ممممممممم اسمي ابراهيم 
25 سنه الا شهر عشان عيد ميلادي في 8 
بشتغل مدرس في مدرسة بنات 
وبحب شغلي جدا ... حبيته بعد ما اشتغلته رغم اني كنت مرغم عليه
بس يلا عادي الحمد لله مهي دي مشكلة بلد بحالها مش انا لوحدي يعني
............................................
ما أكثر ما يميز شخصيتك ؟
مش عارف ..... بس ناس قالولي اني هادي 
وناس قالوا رومانسي .. وناس تانين قالوا اني رخم
انا بعتبر نفسي بسيط ... ابسط من البسيط كمان
مش بحب الزحمة ولا الصوت العالي ولا اي حاجه غريبه
وبيجيني توتر عصبي لما اسمع اغاني الخبط والرزع بتاعة اليومين دول
بيعجبني اوي كاظم الساهر وهشام الجخ والشيخ ناصر القطامي وابو اسحاق الحويني
ومدمن نزار قباني ومحمود سعد وأحمد حلمي 
ساعات بكتب شعر بس مش بكتبه الا لما بكون حاسه بجد
ومش بكتب الا لمواقف معينه واشخاص معينه.. قبل كدا اخدت كذا جايزة
في مسابقات شعر في الجامعه 
...............................................
ما هى اهم نقطة تحول فى حياتك ؟
فيه نقاط تحول كتير جدا في حياتي
الثانوية العامة كانت نقطة تحول
شغلي كان نقطة تحول
عشان عرفت فيه ناس حقيقين
ناس بعتز جدا بمعرفتهم وفعلا لقيتهم خير اخوة واصحاب
خطوبتي كانت نقطة تحول 
والسبب انا محتفظ بيه لنفسي 

.............................................

كيف دخلت الى عالم التدوين ؟
الحكاية دي غريبه أوي .. بدأت من حوالي 4 سنين كدا
كنت مرة بتفرج علي برنامج البيت بيتك بتاع محمود سعد
وكان مستضيف واحده ست كانت تعرضت لتحرش جنسي في الشارع
والست دي قالت انها عاملة مدونة عشان تدافع عن حقوق الستات اللي زيها
بعدها قررت اني أبحث عن موضوع المدونات دا وقريت كتيرعنها
واتفرجت علي فيديوهات لغاية ما أخدت قرار اني أنشىء المدونة دي
.........................................................

ما اسم مدونتك ولماذا اخترته ؟
 حناني 
اخترت الاسم دا ليه 
هو قصة غريبة شوية
انا لما جيت أعمل المدونة دي كنت فعلا محتار اسميها ايه
طلبت من ناس اعرفها انها تقترح لي اسماء
وملقتش فعلا الاسم اللي بدور عليه
في الوقت دا ممممممممم مش عارف اقول ازاي
كنت بحب حنان ترك جدا بجنون يعني
خاصة كمان لما لبست الحجات حبي ليها زاد اكتر
كنت بشوف فيها صورة البنت اللي ممكن احبها وارتبط بيها
قررت اسمي المدونة حناني علشان تبقي حاجه تشبهها
بس
............................................................
صف مدونتك ؟
مدونتي تحكي عن نفسها اكتر مني
خد بس حضرتك تاكسي من علي اول ناصية كدا
وخدلك كام لفة جواها هتعرف كل حاجه عنها
....................................................
من هم أكثر ثلاث شخصيات أثروا بك من داخل عالم التدوين ؟ ومن خارجه ؟
الشخصيات اللي في حياتي كتير جدا الحمد لله
من داخل عام التدوين فيه شمس النهار وتركيب
واستاذ فاروق وبناته هبه وكارولين وناس تانيه كتير جدا
من خارج التدوين فيه مثلي الاعلي وقدوتي استاذي محمود عيسي
وشخصية مديري في المدرسة وايضا اخويا وصديقي استاذ فتحي
...........................................
ما هو الاسلوب المفضل لديك فى التدوين ؟
والله علي حسب الموضوع نفسه بس انا بفضل
الاسلوب الساخر علشان بيكون أخف علي القارىء 
وعلشان بيخلق جو من المرح يخلي الواحد يكمل الموضوع للاخر
لأننا في عصر السرعه ومعدش حد ليه تقل انه يقعد ويقرأ وكدا
.......................................................
فى رأيك ما أهم ما يميز تدويناتك ؟
أهم ما يميز مدونتي انها انا 
بتتكلم عني في كل حالاتي
وانا فرحان وانا متضايق وانا عاشق
كل حاجه مريت بيها كتبتها هنا 
وكل حاجه بتكسف احكيها لحد بحكيها هنا
انا هنا بلاقي نفسي
..............................................................
اختر اقرب تدويناتك الى نفسك وضع رابطها وحدثنا عنها ؟
ممممممممممم بجد كل تدوينة كتبتها بتكون قريبة لقلبي
علشان لما بكتب اي حاجه مش بكتب الا لما بكون عايز اكتب
عشان كدا بيطلع الكلام مني وبيعبر فعلا عني
بس يمكن في تدوينة أو اتنين انا بحبهم جدا جدا
ولازم اقرأهم كل شوية لما بيوحشوني
وهم بيوحشوني كتير بصراحة
التدوينة الأولي اسمها
والتدوينة الثانية اسمها
..................................
استعرض اهم المواقف الغريبة او الطريفة التى صادفتك مع التدوين ؟
والله كلها بتكون مواقف لذيذه وبستفيد منها
يعني ممكن اقعد ساعات طويلة جدا وانا بدور علي حاجه
جديده اعملها للمدونة او اضيفهالها علشان شكلها يبقي احلي
ومرة عملت حاجه غلط واكتشفت بعد كدا ان كل حاجه في المدونة باظت
وقغدت بقي اعيد تاني كل حاجه من اول جديد
وقولت لنفسي اللي مكلش فيه متلعبش فيه
...............................................
هل أحدث التدوين تأثيرا عليك ؟ وكيف ؟
طبعا علشان بقيت مش بعدي اي موقف يحصلي 
اويحصل قدامي يعدي كدا وخلاص
بقيت بفكر كويس جدا في كل حاجه وفي اي حاجه
واتعلمت من التدوين ان مش اي كلام يتقال
ومش اي حاجه تعجب الناس
ولو مكنش المدون صادق فعلا بينه وبين نفسه
في اي حاجه بيقولها محدش هيحس كلامه
.....................................
اختر اى مدون ووجه له سؤال ؟
سؤالي لكل المدونين 
يمكن هو نصيحة أكتر منه سؤال
ياريت نرجع نقرأ لبعض تاني
ونسأل علي بعض تاني زي الاول 
...........................
تحياتي للجميع 
اتمني من ربنا ان كلامي يكون وصل فعلا 

الأربعاء، 4 يوليو 2012

قرار شيطاني







لما شيطانك يسيطر عليك بتلاقي نفسك بتعمل حاجات
بتضرب نفسك 100 جزمة لما ترجع لعقلك وتفوق
بعد المصيبة اللي عملتها 
وساعات تانيه الواحد بيقرر انه يعمل حاجه شيطانيه
ملهاش اي تبرير غير انك ترضي المارد اللي عايش جواك
من كام يوم كدا قررت قرار شيطاني اني اخرج بره حياتي
واتخلي عنها لمدة يوم كامل واشوف ايه اللي هيحصل
ومحطتش في بالي اني لما اخدت القرار دا نسيت اخد رأي
الناس اللي عايشه معايا .. اهلي واصحابي وزمايلي
بس يمكن عشان عقدة النقص اللي جوايا وعشان اثبت لنفسي
اني اعرف اعمل حاجه لوحدي ولو مرة واحدة في حياتي
قررت تاني مقولش لحد ولا اني اخد رأيهم في حاجه خطيرة
زي دي علشان اعملها وانا مطمن ان محدش هيعارضني ويخليني
ارجع عن قراري
وجه اليوم اللي هنفذ فيه خطتي الشيطانيه للخروج من حياتي
وجربت اني اعيش بره حياتي
ورضيت الشيطان اللي بيقودني
قررت تاني اني ارجع للحياة
ونويت بيني وبين نفسي
ان عمري ما اتخلي عن حياتي 
.........................
( لا تحاول اسقاط الكلام السابق علي حالتي
فهو لا يتناسب معي شكلا وموضوعا
انها تخاريف شيطانيه )

الأربعاء، 27 يونيو 2012

سكرانه





( مِنْ كَامَ شَهْر
خَدَتْ قَرَار مُشْ هَاكْتّب شِعْر
وَإِنِّيَ هَذَاكِر وَانْجِحْ وأَفْلَح
وَاخِدْ الْبَكَالرِيُوسُ وَأَتَجَوَّز
وَأَشْتَرِيَ عَفَشْتِيّ بِالْتَّقْسِيْطِ
مِنْ كَامَ شَهْر
أَنَا كُنْتُ عَبِيْطٌ)

كنت فاكر زي ما كل الناس كانت فاكره اننا فعلا ماشين صح
وبلدنا ع الترعة بتغسل شعرها وبقي عندنا مجلس شعب وشوري وخلاص 
بننتخب الرئيس وكلها كام يوم والحياة تزهزه والحرية ترفرف وترجلعنا بلدنا

( مِنْ كَامَ شَهْر
زَرَعَتْ الْمِيَه وَطُرِحَتْ فِجْلَةٌ
جَابْ الْعِجْلَ الْفِجْلَةِ لِعَجَلَة
وَقَالَهَا مَهْركِ
رَيِحَة قَهْركَ
فَايْحّة فِيْ نَهْرِك
قَالَتْ إِوْعا تَعِيْش كَسْلَانَ
بَابَا نُوَيْلُ بِيْوَزِّعْ يَوَيْوَ فِيْ حَرْب إِيْرَانَ
شَامِمْ رَيِحَة جِبْنَةُ قَدِيْمَة
فِيْلْمَ الْسَّهْرَة مَكَنْشْ سِيَاسِي
 
كَانَ عَبَّاسِيَّ )
 
 وكنت فاكر ان تفكير الناس اتغير وبقت واعية وعارفه وذاكرت الدرس كويس
وعرفت مين كان بيخدم البلد دي ومين كان بيسرق خيرها ... مين كان بيحميها 
ومين كان بيخونها ... كنت فاكر اولاد بلدي فاقوا من الكابوس اللي عاشوا فيه
عمرهم كله مذلولين .. مسروقين ... شحاتين ... عايشين في صناديق الزباله 
 ( عَبْدُالْنَّاصِرِ حَبَّ يقَلِّد فِيْنَا الْرُّوْسِ
سَاوَىْ الْرُّوْسِ
لِبْرَل نَفْسَكَ
لِأَجْلِ مَا تَبَقَّىْ مُثَقَّفٌ زَيّ صَاحِبنْا إِيَّاه
عِنْدَكَ مَاركْسْ عِنْدَكَ هِيَجِل
عِنْدَكَ حَسْن الْبَنَّا وَحَجِّي
عِنْدَكَ زَحْمَةِ
صَفِّيّ وَنَجِي )

ومن بين 13 مرشح كان فيهم واحد ولا ليه أي لازمة وكل ما يروح 
مكان يضربوه الناس بالجزمة ... ومفيش اي حد فيكي يا بلد الا واتريق عليه
دا مرشح نفسه ليه ؟. هو مش فاكر ان الشعب خلعه في التحرير .. هو مش 
فاكر انه كان من بقايا النظام ... راجع تاني عشان ايه ..؟ هو خلاص مفيش دم  
اه صحيح افتكرت ... الدم ساح ع الأرض من شبابنا وراح هدر
واتقفلت كل القضايا ولا حس ولا خبر
 ( مَنْحَنى عَرَضَ النُّسْكَافِيْهِ وَاخِدْ إْفِيْه
حَاصِل ضَرَب الْنَّكْسَة فِيْ حَرْب أُكْتُوْبَرْ فِيْ مُعَاهَدَةً دَيْفِدَ
بِيُسَاوِيّ حَاصِل ضَرَبَ الْنَّار فِيْ الْتَّار فِيْ الْعَار
وَزِّيْ إِمْرُؤٌ الْقَيْس وَجَلامِدّة
الْلِيْ بَتَنَزَّل مِنْ عَلِيٍّ
عِنْدِيْنَا وَادٍ اسْمُهُ عَلِيّ
بْيِطْلَعْ الدَّبَّابَةِ وَيُلَفَّ بِيْهَا فِيْ الْبَلَدِ
وْمْرَاتُهُ دَايِرَة بِشَعْرِهَا تِدَوْر عَلَيْهِ
وَمَّتَسْأَلُوّش أَنَا قَصّدِيِ إِيْهِ
أَنَا نَفْسِيْ مِشْ فَاهِمٍ كَلَامِيَّ
بَسْ الْكَلِامْ وَاعْرْ حَوَيْطِ
أَنَا الْلِيْ دُوْنِ الْنَّاسِ ... عَبِيْطٌ )

وبقينا زي المخاويت بنعمل الغلط علي اساس انه صح
واتقسمت البلد لأحزاب .. وكل واحد بيخون التاني ومستنيله غلطه
وناس ركبت فوق كتاف البلد .. وناس طلعت من القمقم
وناس مصدقت لقت فرصة .... وناس بتعاند في ناس
ولا حد فاهم احنا ليه بقينا كدا ولا ليه بنعمل كدا ؟. 
( مِنْ كَامَ شَهْر وَكُنْت بَحبِّكَ
كُنْت بْوضَب رُوْحِيْ وَاحِبّكْ لِأَجْلِ مَا أُقَابِلُكَ
كُنْتَ فِيْ كُلِّ حَالَاتِكَ قَابَلَكَ
تَفْرَحِيْ قَابَلَكَ
تِزْعَلِي قَابَلَكَ
تَتَّقَّلَيْ قَابَلَكَ
كُنْتِي الْأَرْضِ وَكُنْت سَنابلِكِ
كُنْتِي الْحَرْبِ وَكُنْتُ قَنَابِلُكَ
حَتَّيَ فِيْ بُعْدِكْ وْإِنْتِي مُسَافِرَة
وَبَيْنِيْ وَبَيْنَكَ أَلْف مَحَطَّة
كُنْت بِقابلِكِ )

مع ان حبها بيجري في دمي بس مبقتش قادر استحمل
مع اني شايفها اجمل ما خلق ربي واني مهما لاقيت 
وشوفت عمري ما هشوف زيها ... بس معدتش قادر استحمل
وانا مش عارف انا زعلان لها ولا زعلان منها ولا يمكن زعلان عليها
بس انا مش قابل احبها وهي بترجع بيا لورا 100 سنه
ومعدتش قادر افهمها ولا أفهم الناس اللي فيها
لكن صدقيني يا بلدي ...  عمرك ما هتخلصي
من الفراعين اللي حاكمينك

( عُمْرِيّ يَا "نَانَا" مَا قَلْبِيْ اتَنَازِلَ وَلَا سَابِ حَقَّةٌ
زِيَ مَا سَّابلِكِ
عُمُرِه مَا ضحَىً بِسُهْدِهِ وَسَهَرِهِ وَجَّابْ مِنْ عُمْرِيّ
زِيَ مَا جَابلِكِ
هَذَا الْوَجَعُ بَقَايَاكِيّ
سِحْرٌ تُمَدَّدَ بَيْنَ ضِلْعِيْ
وَتَوارِيّ خَلَفْ سلِمَ مَنْزِلُكَ
تَرَكَ لِكَيْ رِسَالَة كُلِّ صَبَاحْ
 وَسَافِرْ
يَشْهَد عَلَيْكِي الْسَّلَمَ المسَتَنِيّ خطُوَتِنَا
تَشْهَدُ عَلَيْكِي الْشَّبَابِيْكِ الْلِيْ فَتَحَتِيهَا عَلِشَانِيّ فِيْ نَصِّ الْلَّيْلِ
وَعَزَّ الْبَرْدِ
يَشْهَد عَلَيْكِي مَحَلِّ الْهَدَايَا الْلَّيْ عَ الْنَّاصِيَةِ
وكُشكّ الْوَرْدْ
تَشَهَدعَلَيكِيّ هُدُوُمِكْ الْلِيْ قُوَلِتِلكِ مَا تِلْبَسَهَاش
تَشْهَد عَلَيْكِي إِمْتِحَانَاتِيّ الْلِيْ عَلَشَانَكْ مدْخَلْتهُاش
تَشْهَد عَلَيْكِي وَيتنِي هُوِسْتِنْ جُوَرْجَ مَايِكِل
عَمَّ شَوْقِيِّ بِتَاع الْفَطِير
كَيْفَ يَصْيِر الْحَال كِدَهْ
مْ الْإِبْتِدَا
أَنَا الْلِيْ غَلْطانَلك
وَأَنَا الَلْيَ مَحقَوقُلك
وَأَنَا الَلْيَ دُوْنِ الْنَّاس
عَشِقَتِك
كُنْت عَايِشْ جُوَّهْ صَدْرَكَ حِلُم دَافِيْ
كُنْت بَنْسَىَ الْنَّاس وأَجيِلكِ يَوْمَ مَعَادَكَ
يَكِش حَافِيِ
كُنْتُ أَبْسَطُ مِنْ بَسِيْطٌ
وَاكْتَشَفْت إِنِّيَ ف هَوَاكِي
كُنْت دُوْنِ الْنَّاس
عَبِيْطٌ )
وكأنك ناوية تعيشي طول حياتك مذلوله ... ولأنك رضعتي القهر
سنين وسنين طويله ... رافضة تشمي نفسك ... رافضة ينصلح حالك
وضحكتي علينا خلق الله شرق وغرب
وخليتينا بنتكسف لما يجيبوا سيرتك ... وخليتنا بنجري لغيرك حتي
لو نغسل صحون ... اذا كانت كرامتك انتي منداسة
ازاي أعيش فيكي كريم
  



الأحد، 13 مايو 2012

انها ارادة الله



اوقات كتير جدا بتحصل حاجات عكس اللي احنا بنتوفعها
وعكس المتعارف عليه ..... وضد اي قانون في الطبيعة
ولما بنلاقي نفسنا مستغربين من اللي حصل بنقول
ربنا عايز كدا
وبنبقي متأكدين ان مفيش حاجه مهما كانت في حياتنا كبيرة ولا صغيرة
الا وربنا كاتبها ومقدرها من قبل ما يكون لينا وجود في الدنيا
يعني بنقعد نلف وندور ونخطط ونتكتك ونتوقع ونستنتج ونعمل
 ونقدم الاسباب ونلاقي النتائج بردو زي ما ربنا عايز
لكن في الأول وفي الأخر اختيار الله ما بعده اختيار ودايما بقول الكلمة دي
لأي حد انا عارفه لانه انطبق معايا شخصيا في حياتي كلها
ابقي مخطط لحاجة معينه وتحصلي حاجه تانيه خالص وازعل واموت نفسي
من الزعل ولما الوقت يعدي واكتشف ان انا كنت غلطان اقول يااااااه
قد ايه ربنا كبير
صديق دراسة كان أصيب بمرض خطير سرطان والعياذ بالله
والمرض كان انتشر في العظام وابتدي يجري في جسمه كله
وهو كان بيقاوم ويعافر رغم انه كان كل اسبوع بيروح ياخد جرعة
الكيماوي اللي كانت بتتعبه جدا .. ورغم انه فضل 3 سنين محجوز في المستشفي
بين الحياة والموت لكنه قدر يقاوم ويصارع الغول اللي بينهش جواه ومعشش جوا
كل خلية في دمه وكلنا كنا متوقعين ان المرض الملعون دا هايقضي عليه بين لحظة 
والتانيه ... من شهرين كدا  سمعت خبر وفاته وقد ايه ارادة ربنا كانت موجوده
علاء مات وارتاح من عذابه .... ربنا يرحمه
الغريب في الموضوع كله ان علاء مكنش السرطان هو السبب في موته
علاء مات في حادث سيارة ....
غالبا تأتي الرياح بما لا تشتهي السفن
ومن كتر ما الحكاية دي بتحصل معايا .. بقيت موقن ان اي شىء تمنيته أو بتمناه غالبا 
هايحصلي عكسه ..... ودائما عندما يحدث العكس أجد السعاده 
التي كان يستحيل ان احظي بها فيما تمنيت
فابتسم وأردد من داخلي : انها حقا ارادة الله
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
شوية حاجات صغنططه
مممممممممممممم
الحمد لله انا خطبت وخلاص بقي ودعت مرحلة العذوبية
وقررت اني ادخل القفص وانا بكامل قواي العقلية
علي أمل اني ع الجواز كدا الاقي بعض القوي دي لسه موجوده
لأنها بتضعف بالتقادم فربنا يستر
واللي قرا الموضوع اللي فوق كويس ويعرفني بردو كويس
هايعرف ازاي كل كلمة تنطبق علي الموضوع دا بالذات
.....
انت هتغير اسم المدونة بعد ما خطبت .؟
انا اتسألت السؤال دا كتير جدا من كذا شخص
وبصراحة كانت اجابتي واحده
اللي عارف انا كنت مسميها كدا ليه هايعرف انها عمرها
ما هيتغير اسمها وهتفضل زي ما هي
مع انها  لو بقت ايماني هاتبقي أجمل ...هههههههههههه
تحياتي للجميع 
وعذرا للتقصير وعدم المتابعه والله ما منعني من متابعة مدوناتكم 
الا ظروف شديدة .. لكني موجود

الخميس، 3 مايو 2012

سأعيش في جلباب أبي






رجل بسيط خطا بعمره نحو الستين
عاش حياته مكافحا ليطعم صغاره وأهل بيته من حلال
لم يذق طعما للراحة .. فمنذ نعومة أظفاره والدنيا تقذفه بين جنباتها
وتذيقه الضربة تلو الأخري .. لم يكن  من اولائك المحظوظين باستكمال تعليمهم
فلقد عاش حياة مادية صعبة جدا .. خرج الي الدنيا ليجد اخوة خمسا صغارا هو أكبرهم
تركهم والده أمانة في عنقه .. لذلك ترك التعليم في عامه الخامس
 وذهب ليتعلم حرفة ينفق منها عليهم
هاجر من بلده التي ولد وتربي فيها ليستقر به الحال هاهنا 
حيث تزوج وانجب 6 من الأولاد والبنات
ليضافوا الي اخوته فيزداد عناء علي عناء
كانت أمنيته أن يكمل ابنائه تعليمهم ليصلوا الي اعلي الشهادات ليتمتعوا بالنعمة التي حرم منها
وفي سبيل ذلك انفق كل غال ورخيص لديه ... وكم كانت فرحته تملأ قسمات وجهه المتعب
حيتما يأتيه ابن من ابنائه حاملا شهادة نجاحه فقد كان يعتبر ذلك نجاحا شخصيا له
أرغمته ظروف الحياة الصعبة علي ان يقضي ساعات طويلة خارج بيته تاركا مهمة تربية الابناء
الي رقيقة دربه التي عاشت معه الحياة بحلوها ومرها
أعترف انه لم يصاحبني يوما من الأيام .. ولم يتحدث الي كمثل ما يتحدث اي اب لابنه
لكنني كنت أكن له من داخلي احتراما فاق خوفي الشديد منه ومن عضبه علي حينما أخطىء
كنت أعرف في قرارة نفسي أنه يفخر بي وأنه يري في شخصي الصغير نموذجا لشخصيته
العظيمة التي تصلح أن تحكي في فيلم سينمائي كبير 
لكنني لم أشعر يوما بمدي فخره بي الا منذ أيام حينما سمعته يتحدث مع أحد اصدقائه
عن موقف فعلته مؤخرا وانتصرت فيه انتصارا كبيرا علي نفسي وعلي رغباتي
حمساته في الكلام جعلت دموعي تذرف ليس علي اني قد ارتكتب خطأ لا
علي انني سمحت لنفسى يوما ان اغضب هذا الرجل العظيم
سأظل أقخر به ..... سأعيش حياتي كلها طوعا لإشارته ...
ملقيا بوجهي تحت حذائه ...... سأعيش تحت عبائته .. وفي جلبابه
انها قصة حياة أبي

الأربعاء، 25 أبريل 2012

بنت الجيران




وكأنها حاجة من التقاليد العتيقة اللي اتربينا عليها .. واللي الحكايات 
والحواديت اللي كانوا بيحكوهالنا وبيملوا دماغنا بيها
لازم هي تبقي موجودة فيها ... يعني لازم أول حب في حياتك يكون
لبنت الجيران ... بغض النظر بقي ازي هتحبها بس لازم تبقي هي البداية
اللي بتتعلم منها ازاي تبقي واد مخربش وفاهم في الحاجات دي عشان لما تكبر
تبقي دايس وسالك ومحدش يضحك عليك أو يقول عليك انك مقفول ياعيني
بس انا مشكلتي ان كل جيرانا مكنش عندهم بنات ... اه والله
او كان عندهم بس كلهم من النوع اللي هو استغفر الله العظيم
 وفضلت مستني بنت الجيران دي تيجي ولا حس ولا خير وأقول ياد اصبر
معقوله حواديت ستي الله يرحمها هتكدب يعني دي لازم تبقي فيه بنت الجيران
ولازم تطلعلها ع السطوح وتبعتلها جوابات وامك تمسكك وتديك علقة محترمة 
لكن انتطاري طول أوي ولقيت نفسي كبرت كمان وبقيت في 2 ابتدائي وبصراحة
حلمي اني احب بنت الجيران بدأ يتبخر ودا كان ليه أثر سىء جدا علي نفسيتي 
وفي المدرسة انا وصاحبي أحمد حبينا نفس البنت هي مكنتش جارتي ولا جارته
كانت من بعيد بس احنا اصرينا نسميها بنت الجيران وكنا كل يوم لما نخرج من المدرسة
نمشي وراها لغاية بيتها ونستناها لما تدخل وياسلام بقي لما كانت تبصلنا وتشاورلنا
بايديها احنا الاتنين ياااااااااااه كان احساس حلو اوي
وكل واحد فينا بيحلم بيها وحاطط في دماغه انها بتجبه وانه هيتجوزها لما يكبر 
وأمبرة بردو كانت تستاهل ... كانت حاجه كدا مش عارف اوصفها ازاي ؟
اهو الكلام دا بقاله يجي 17 سنه ولسه فاكره وفاكر كل اللي احنا عملناه
واللي خلاني افتكره كمان لما قابلت أحمد قريب وكان بيجكيلي عن بنته
وبيفرجني الفستاين اللي هو جايبهالها 
ياااااااااااه الزمن جري بينا بجد
وأحمد اتجوز وخلف .. وبنت الجيران هي  كمان اتجوزت 
وانا اللي فاضل فيهم
بس بردو لما هتجوز مش هتجوز بنت الجيران
علشان الحواديت اللي بتتحكي للاستماع بس

الخميس، 5 أبريل 2012

الحب المستحيل




لما أي حد فينا يكون محتاج لأي حاجه بجد
ونفسه رايحه عليها ومهما كانت الحاجه دي
أكيد بيجي الوقت اللي بياخدها فيه وبيحقق الحلم
اللي كان بيحلم بيه ليل نهار
والحاجه اللي الواحد بيكون نفسه فيها ممكن تكون أكلة معينه
او لبس نفسه يشتريه او شقه او عربية او حتي انه يتجوز
ومصيره إن اجلا أو عاجلا إنه يحقق اللي نفسه فيه
حتي لو بذل الغالي والرخيص ولو ضيع عمره علشانه
حتي ولو كان متأكد انه مش هايلحق الحلم دا 
غير مع اخر نفس في عمره ... بردو بيبقي نفسه فيه
في مرة وانا في الجامعه دكتور قالي : كل واحد هايجي عليه يوم
ويحقق كل حاجه كان بيتمناها ... لو نفسك تلبس بدلة هتلبسها
لو نفسك تركب افخم عربية هايجي يوم وتركبها
ويوم ورا يوم ولقيت كلام الراجل بيتحقق وحصلت معايا
في 100 حاجه ولقيت فعلا كل حاجه ببقي نفسي فيها اوي
وكل حاجه كنت محروم منها بقيت معايا وبقي سهل جدا اني
اوصلها حتي اني في يوم من الأيام 
يعني من الاخر كل واحد نفسه في اي حاجه يسعي انه يحققها وهايحققها
بس تعمل ايه لما تكون الحاجه دي بقت مستحيله
تعمل ايه لما تتمني انك تعيش وانت اصلا ميت
تعمل ايه لما تتمني انك تشوف حد نفسك تشوفه
لما تحب حد بجد وتلاقي نفسك بقي وبينه بلاد ومسافات بعيده
لما يتعذب وانت مش حاسس ولما تحتاجه وهو مش عارف
ولما يبقي نفسك انك تقوله بحبك وبردو متعرفش
ولما تتحول كل حاجه في حياتك لمستحيل
مستحيل أنساك
مستحيل أعيش من غيرك
مستحيل أحب تاني
لإن حبي ليك كان " الحب المستحيل "

الجمعة، 30 مارس 2012

كل سنه وانتي طيبه يا حناني





السنه دي كملتي 3 سنين
من عمري انا مش من عمرك انتي
كتبت فيكي كل حاجه بحسها
وكل حاجه بحبها
كتبت فيكي اللي مقدرش اقوله لأي حد 
عشان كنت بلاقي فيكي اللي بيسمعني
اللي بيخليني أحس بوجودي
عيد ميلادك السنه دي مختلف عن اي سنه
كل سنه وانتي طيبه
ويفضل عمرك من عمري
وتفضلي موجودة علي طول
علشان يوم ما هتغيبي عن الناس
هابقي انا كمان مبقاش ليا وجود

الخميس، 22 مارس 2012

الانسان بداخلي لم يمت









كل واحد فينا جواه انسان تاني عايش جواه
الانسان دا هو الشخص نفسه
بس بصورته النقيه وفطرته اللي ربنا خلقه عليها
الانسان اللي جوا كل واحد فينا متعلمش في مدراس البلد دي
ولا اتلوث بدخانها ولا أكل من سرطانها ولا غش في امتحانتها
ولا حتي عاكس بنت من بناتها ولا سرق ولا بلطج ولا طلع من لسانه
لفظ يخدش حياء نفسه ولا شارك في تزوير ولا قبل علي غيره اللي 
ما يقبلوش علي نفسه
يعني الانسان اللي جوانا هو الصورة الأصلية اللي المفروض كل واحد
يكون عليها ... لكننا للأسف برميه جوا أعمق بير جوانا 
وبندفنه وهو حي عشان نستبدل وجوده بالصورة التانية المزيفة 
اللي الناس بتشوفنا بيها
من فينا مش بيخجل لما يقف قدام نفسه في المراية ؟
مين فينا مش عارف ومتأكد انه عايش اكبر تمثيلية في حياته 
وهو متقمص فيها دور كومبارس ولا ليه أي لازمة .؟
مين فينا يقدر يقول وهو واثق ان الصورة اللي الناس شايفاه بيها
هي هي الصورة اللي هو شايف بيها نفسه ؟
مين فينا بيقعد يقول لنفسه يارتني ارجع زي زمان 
يارتني كنت عملت ... يارتني ما كنت عملت ؟
كلنا بنزيف الواقع بالصورة البهتانة اللي بنرسمها قدام الناس
وكلنا قتلنا الانسان جوانا ...
أفتكر في مرة أعز صديق لي لما قالي 
انه معدش بيعرف بيعيط زي زمان ... وسألني عن السبب ؟
ياتري ليه هو بقي كدا ؟
وصديق تاني قابلني مرة وهو متأثر جدا ومهموم ولما سألته عن السبب؟
قالي انه لسه راجع من عند حد تعبان جدا وحالته متأخرة وانه زعلان عشانه
قعدت أواسيه وكلها دقايق وغيرنا الحوار ولقيته قعد يضحك ويهزر ولا كأن كان
فيه حاجه ... هو نفسه كان بيسخر من حاله دا
انا كمان ساعات كتير جدا بقعد مع نفسي واتكلم معايا 
وأدور علي الإنسان المدفون جوايا يمكن يصحي ويكلمني
اعتقدت انه مات زي غيره ما مات وان محاولاتي معاه ملهاش اي لازمة
لكن من أيام قليلة فاتت اتحطيت في موقف صعب جدا وشوفت بعيني
شخص بيعاني وبيتألم ألم حقيقي وأنا جنبه لا حول لي ولا قوة 
ومع كل نفس كان بياخده كانت روحي بتطلع معاه ولقيت قلبي بينقبض
لأول مرة من زمن بعيد جدا انقباضة رعب علي الشخص دا
ودموعي نزلت في مكان مينفعش أصلا انها تنزل فيه
وقد ايه الفرح والسعاده ملت قلبي لما ربنا استجاب دعايا
وأخد بأيد الشخص دا واتخطي الأزمة وبدأت أكلمه ويرد عليا
وقد ايه بالي ارتاح لما كلمته تاني يوم وسمعت صوته وقالي
انه كويس وكل شىء رجع طبيعي
وقد ايه ببقي مبسوط وانا شايفه كل يوم قدامي بيضحك
ساعتها بس حسيت ان اللي جوايا لسه مماتش
بس محتاج اني احفر بجد علشان يخرج من القبر
اللي انا دفنته فيه بأيديا

السبت، 11 فبراير 2012

انا عيل سيس




ذات يوم قرررت وأنا في كامل قواي العقلية
وبدون أي ضغوط خارجية أو داخلية إني أتخلى
عن كل حاجه تخصني وتخص شخصيتي اللي قاعد
أكون فيها بقالي سنين .. وأتغير زي ما كل حاجه بتتغير
ولقيت نفسي محتار .. طيب أتغير أبقي ايه ... فيه حاجات كتير أوي
أروح التحي وأقصر البنطلون وابقي سلفي ... ولا ابقى ليبرالي
ولا انضم لأي حزب جديد واشوف بيقولوا ايه واشارك معاهم في اي حاجه
يمكن أفهم هم بيعملوا ايه .. وهم عايزين إيه أصلا ؟
ولا اروح أقدم في نادي والعب أي لعبة ان شالله حتى العب بلي مسافات طويله
المهم آخد لقب رياضي .. ولا أعملي أي مشروع علي قدي كدا وابقى رجل أعمل
وفي لحظة قررت إني أكون حاجه تانيه خالص غير كل دا
قررت إني ابقي شاب استايل .. واغير لبسي وكلامي وكل حياتي
واتعرفت علي واحد من الشباب دول اللي احنا بنسميهم شباب " سيس "
وعرضت عليه فكرتي وسعادتي بإني أكون واحد منهم وطلبت منه بعض
النصايح علشان ابقي " سيس " معتبر وسالك
قعد الواد يقولي شوية حاجات اللي كانت بالنسبه له كأنها شيء مقدس
أو عقيدة " عقيدة الشباب السيس " .. 
وانا عمال استمع لكلامه وكلي اذان صاغية
قالي :
بص يا مان عشان تكون زينا لازم تعمل اللي هقولك عليه
قولتله : قول
قالي : أول حاجه لازم تغير طريقة كلامك وسيبك بقي من الكلام القديم
بتاعكم دا .. يعني أديك مثال ... مثلا انت لما تدخل مكان علي ناس بتقول ايه؟
قولتله : بقول السلام عليكم ؟
قالي : دا كان زمان .. دلوقتي لأ
انت تقول: هاي يا جماعه ... عاملين ازاي ؟ وحشتوني طحن موت
لو عايز تمشي بقي تفول . بيس دلوقتي .. سي يو
قولتله : يا سلام ... تصدق حاجات حلوة
قالي : ولازم تعمل ابديت لكل كلامك يا مان لأن فيه حاجات جديدة بتظهر
كل يوم عشان يبقي عندك باك جراوند لأي كلام بيتقال
قولتله زي ايه كدا ؟
قالي: يعني تقول انا هامشي ناو .. وهكلمك فون .. وهقعد ع الفيس
وهروح السكول ... كدا يعني
فل يا مان كدا ؟
قولتله : فل الفل كمان .. انا كدا بقي بقيت استايل " بلاش كلمة سيس عشان بيزعلوا منها "
قالي : لالالا هو احنا لسه عملنا حاجه
قولتله : دا انت غيرت قاموس اللغة بتاعتي ولساني اتعوج ناقص ايه تاني ؟
قالي : نيجي بقي للأكل ... انت بتحب تاكل ايه ؟
قولتله : عادي يعني باكل اي حاجه ... مش بتفرق معايا
قالي : ايه دا يعني ايه اي حاجه ؟ ... يعني ممكن تاكل فول وطعمية والحاجات دي
قولتله : يا سلام ومالك قرفان من نفسك كدا ليه ؟ ... ايوه طبعا باكلها وبشرب عرق سوس كمان
بصلي باشمئزاز وشكله كان هيرجع وقال : يا مان دا أكل الناس الداون احنا بناكل حاجات تانيه
لازم تجرب تاكل سوسيس .. هوت دوج ... تشيكن بيكاتا .. حاجات من دي
قولته : اه حاضر بس يارب الاقي الصيدليات فيها الحاجات دي
قالي : تعالي بقي للدماغ..   قولتله : دماغ ايه .: ما احنا كدا كويسين
قالي : يا مان دماغك لازم يبقي ع المود ويبقي ريفريش علي طول
اي حته تروحها لازم يكون معاك التظبيط بتاع الهيد دا عشان الروشنه تكمل
بصتله وانا مش فاهم ولا كلمة وقولتله : نعم
قالي : يعني الحشيش دا اساسي .. البرشام ... لو فيه افيون يبقي بيس
بس سيبك من البانجو عشان دا بيقلب بمعيلة في الاخر ... ها . فهمت ؟
قولتله : وانا اجيب الحاجات دي منين يا مان ؟
قالي : انوي انت بس وجهز البراتس وانا اظبطك
قولتله : براتس ... وتظبطني .... هو لسه فيه حاجات تانيه ولا كدا تمام ؟
قالي فاضل بقي الحتة ..... قولتله : حتة اية ؟
قالي : القطة ؟ .. قولتله يا عم قطة ايه ؟ هي فيها قطط كمان
قالي اقصد الجيرل فيرند يا مان .. انت مصاحب ولا ايه؟
قولتله : بفكر ... قالي : انا هعرفك علي شلة بنات استايل اخر حاجه
وانت شوف اي حتة فيهم عشان الشكل العام بتاعك قدام باقي الشباب
عشان تبقي معاك في اي مكان ومتبقاش الوون
اخر حاجه بقي وهي اهم حاجه يا مان
قولتله : قول يا مان انا دماغي باظت اصلا
قالي : كدا غلط .. متقولش دماغي باظت اصلا .. اسمها دماغي باظت اصلي
قولتله : والله .... تصدق فرقت .. انتم عيال ولاد ايه
قالي : اهم حاجه بقي في دا كله وهو الاساس يا مان .. الشكل البراني واللبس بتاعك
قولته : ايوه هو دا الكلام .. انا عايز الناس كلها تعرف اني استايل
قالي : اول حاجه لازم تسيب شعرك يكبر اخر حاجه واوعي الشيطان يوزك في يوم وتسرحه
لازم يبقي عامل زي فروة الخروف وسيبه علي راحته
وانت بتشتري بقي الهدوم اشتري اكبر حاجه يعني البنطلون يكون اكبر 4 او 5 نمر عليك
والتيشيرتات اشتريها عليها رسومات كتير زي جماجم مطربين الروك .. جيفارا
لازم بقي تلبس اكبر عدد من السلاسل الجلد والحظاظات ودي مهمه جدا
لو عرفت تعمل وشم في اي حته باينه يكون تمام لو معرفتش احنا نعملك
مممممم اه لازم بقي تسقط البنطلون شوية لا مش شوية .. شويتين
عشان البوكسير يبقي باين وانت ماشي .. هو دا النظام
قولتله وانا متاخد كدا ومش مصدق اللي بسمعه : بصحيح دا يا مان
قالي : هو انا ههرج في الحاجات دي .. شايفني انا عامل ازاي ؟
قولتله : عارف يا كابتن
قالي : تل مي ..
قولتله : انا اصلا عيل سيس اني قعدت معاك وسمعت كلامك