Pages

الأربعاء، 25 يناير 2012

أول مرة


 



الاحساس الأول بيكون دايما هو الأساس 
هو اللي بيعيش معانا حتي لو جربنا غيره الف واحد
أول حاجه بتحصلنا بتفضل ذكراها هي اللي عايشه جوانا
مهما مر عليها الزمن ومهما حاولت الأيام تنسينا
بنلاقي نفسنا نحن له ونشتاق اننا نرجعله مرة تانيه
رغم اختلاف الظروف ومرور الايام وتبدل الأحوال
افتكر كدا أول مرة وانت في الفصل ولسه يادوب بتعرف تنطق اسمك
والمدرسة بتاعتك تقولك انت ولد شاطر ... أول مرة يقولولك انت نجحت
أول مرة تسيب بيتك وتسافر في اجازة مع حد .. افتكر أول مرة تحب
أول مرة تسمع كلمة بحبك من حد .... الحب الأول في حياة كل واحد فينا
مش مجرد ذكري وعدت ولا مجرد قصة وانتهت .. الحب الأول كان أكبر دليل
علي اننا جوانا قلب وعندنا مشاعر ممكن تتحرك لحد غيرنا 
الحب الأول مش مجرد كلام بنفتكره وتنهيدات بتطلع منا .. ونبضات قلب
بتضرب جوانا لما بنصادف حبيبنا الأول في الشارع أو بنسمع اي حاجه عنه
افتكر كدا أول مرة تحس انك عملت حاجه صح وقد إيه احساسك كان 
لا يوصف حتي ولو كان الشيء اللي عملته ملوش قيمة عند حد تاني
افتكر احساسك الأول لما بتشتري أي حاجه جديدة وبتستخدمها لأول مرة
وتبقي حاسس ان كل الأنظار متوجهة ليك وحاسس انك بقيت مركز الكون
وكل  الدنيا بتدور حواليك
الله علي أول حاجه في حياتنا ياريتنا ساعتها كان معانا كاميرات عشان نصور
نفسنا ونصور فرحتنا علشان لما الدنيا تكتم علي نفسنا ونبقي مش قادرين نكمل 
فيها ساعتها نجري علي البوم ذكرياتنا ونفتكر انها محنة وتعدي
كلنا الأيام دي بنحس أحساسيس المرة الأولي وكأننا عايشين جوا حلم
خايفين نصحي منه او خايفين حد يقولنا اننا بنحلم
أول مرة أحس ان صوتي فرق ونجح الشخص اللي انا عايزه يتكلم عني
أول مرة أشوف في بلدي رئيس مجلس شعب بيزين كلامه بالايات والاحاديث
اول مرة اشوف رئيس المجلس بيبكي ونشوف النواب وهم بيستغلوا وقت الراحة 
عشان يصلوا مع بعض
رغم انه في ناس (ولاد جزمة) ولا بتحس بأي حاجه من دي والدنيا عندهم دايما سوده
ورغم ان فيه ناس مولعين من جواهم للي بيحصل 
رغم دا كله أول مرة بجد أفتخر اني مصري

الخميس، 19 يناير 2012

الخازوق




كل يوم بنتعرض لحاجات ومواقف واشخاص ملهاش ستين لازمة
بتكون بمثابة منغصات لحياتنا ومنكدات لعيشتنا وهادمة للذاتنا
والحاجات والمواقف والاشخاص دول احسن وصف يتوصفو بيه 
انهم خوازيق اتحطت بقصد وغتاته او بدون قصد جوا حياتنا
والامثلة عليها كتير اوي ومتعدش 
يوم من الايام واحنا لسه عيال في ثانوي اتفقت انا واصحابي
 اننا نطلع البحر نقضي يوم ونرجع تاني
 وخلاص كل شيء تمام وقعدنا بليل نشتري الاكل والمشروبات
والحاجات اللي هنحتاجها واتفقنا اننا نطلع بعد الفجر
 علي طول علشان نلحق اليوم من اوله
وطلعت انا الخازوق في الرحلة دي ونكدت عليهم
 لانهم لما جم ينادوا عليا الصبح
قولتلهم مش جاي يارجاله معاكم معلش
 بس انا والله ماليش ذنب 
لان كان فيه خازوق اكبر مني في البيت رفض اني اروح الرحلة دي .
 لغاية النهاردة العيال اصحابي كل ما يفتكروا اليوم دا يعايروني بيه
وخد عندك تاني لما تكون بتذاكر في الثانوية ونفسك تتدخل الكلية
 اللي نفسك فيها وهاري نفسك من المذاكرة لغاية
 ما نظرك يبوظ وتجيب مجموع زي الفل 
وخلاص بتحضر نفسك انك هتدخل الكلية اللي نفسك فيها
 فجأة تلاقي خازوق اسمه التنسيق يا معلم يقلب كل حاجه
 في وشك دون اعتبار لاي حاجه
من اللي رغيت فيها من شوية
وحتي لما تدخل كلية تانية خالص غير اللي كان نفسك فيها وتذاكر 
وتجتهد وتخلص الاربع سنين 
العجاف دول وتطلع بقي وانت فاكر انك هتلاقي شغل تاخد خازوق العمر 
وتتصدم بالواقع ومتلاقيش شغل
وحتي لو لقيت حد يعطف عليك ويشغلك يجيلك خازوق
 تاني مستعجل اسمه الجيش وهكذا وهكذا خوازيق ورا خوازيق
 والشاطر يستحمل وحتي لو عديت منهم كلهم
 ولسه فيك نفس وتطلع بقي للحياة هتلاقيهم 
مستنينك يا معلم واحد ورا التاني
زي الحواجز بتاعة مسابقات جري الحواجز 
تلاقي في شغلك واحد زميل ليك زي الخازوق
 ولا بيعحبه العجب ولا الصيام في رجب
تلاقي عندك في الفصل ( عشان انا مدرس )
  تلات اربع خوازيق يعكننو عليك الحصة
وياسلام بقي لو ربنا كرمك يابني وقولت اخطب
 وعديت بقي من جو اهل العروسه  والاتفاقات والسجاجيد
 والنجف والبيتي فور بتاع الفرح ومين اللي هيجيب
فرقة حسب الله عشان تزمر
تلاقي ربنا مبتليك بخازوق يطلع من نافوخك وهو الواد اخو العروسه
اللي هيقرفك في عيشتك  كل ما تروح عندهم ولا هيهنيك علي قاعده 
دا لو كان كبير وعايز يعمل نفسه راجل البيت وشاكم
البنت اللي هي اخته . اما لوكان عيل صغير يبقي ياويلك هتلاقيه 
واد غلس زي اللي جايبينه ويقعد يتنططلك في الاوضه
 ويكب عليك العصير ويحدفك بالبرتقال المعفن
 اللي انت شارية وانت مستحمل
وساكت عشان خاطر عيون ام قويق احسن تزعل منك يابيبي
وتعدي السنه اللي انتم اتفقتم عليها وتعمل فرح وتدعلي المعازيم
 وتكون ليله ولا كل ليله
سودة بعيد عنك وتدخل بقي سيادتك جنة الخلد وعش الزوجية 
تكتشف وانت مدمع العينين
 وحالك يصعب علي ابوجهل ( علي اساس انه كافر) 
انك يا عزيزي اخدت اكبر خازوق في حياتك

الثلاثاء، 17 يناير 2012

بداية




الحمد لله رب العالمين
اجتزت موضوع التعب بفضل الله
وتماثلت تماما للشفاء بعدما نفذت كلام الأطباء والاصدقاء
وقضيت علي أسباب التعب ولذلك شعرت بعدها بنوع من التحسن
وزال الألم تدريجيا حتي اختفي تماما 
لكن احسن نصيحة بجد افادتني والله هي نصيحة الاخت العزيزة هبه فاروق
صاحبة مدونة هبه فاروق فعلا الواحد كان محتاج الكلام دا كله
وواضح ان فيه حد كويس اوي مع ربنا كان بيدعيلي وربنا استجاب دعوته
الحمد لله كمان ان الدراسه خلصت والامتحانات عدت علي خير والفتره الجاية
الواحد يبعد بقي عن اي توتر او تفكير في اي حاجه
وزي ما قلتلكم اني قضيت علي اي سبب ممكن يخليني افكر في اي حاجه تتعب تاني
وتقريبا الحمد لله معدش فيه رجوع تاني لورا
أعيش بقي لنفسي شوية كفاية كل اللي كان وان شاء الله يكون اللي جاي احلي
واقدر الاقي نفسي من جديد وأبدأ بداية جديدة والحمد لله كل مؤشرات البداية دي
موجودة بالفعل بس ناقص خطوة التنفيذ مني
ربنا معانا جميعا ومع بلدنا ويارب يعدي الايام الجاية علي خير



الجمعة، 13 يناير 2012

نيران صديقه

قبل أن يرحل في يأس هوانا
قبل أن تنهار في خوف خطانا
قبل أن أبحث عنك بين أنقاض صبانا
خبريني.. كيف ألقاك إذا تاهت رؤانا
وانطوت أحلامنا الثكلى رمادا.. في دمانا
في زمان ماتت البسمة فيه
وغدا العمر.. هوانا؟
خبريني..
عندما يصبح بيتي في جنون الليل
أشلاء عبير
منهك الأنفاس كالطفل الصغير
كيف ألقاك إذا صارت أمانينا
دماء في غدير
نشرب الأحزان منها
تقتل الأفراح فينا والضمير؟
* * *
من سنين عشت يا عمري
أخاف من الضياع
عندما أدفن بعضي
في سحابات وداع
عندما أشعر أني
صرت أنقاض شعاع
عندما تغدو أمانينا
فتاة بين أحضان الظلام
عندما يغرق قلبي
في دموع لا تنام
عندما أصبح شيئا
كسطور ساقطات كفتات.. من كلام
ربما أبحث عنك بين أحضان كتاب
ربما ألقاك في ذكرى.. عتاب
ربما ألقاك في عمري سراب
ربما أسمع عنك من حكايات صحاب
عندما يصيح قلبي
بين خوف الناس كالأرض الخراب
ربما ألقاك في الأرض الخراب
آه يا دنياي من نفسي تذوب بين الخراب!!
سوف ألقاك ضياء
في عيون الناس يغتال الدموع
رغم كل الحزن يغتال الدموع
سوف ألقاك حياة
في زمن ميت الأنفاس ممسوخ الرفات
سوف ألاقاك عبيرا بين يأس الناس
عذب الأمنيات
دائما أنت بقلبي
رغم أن الأرض ماتت
رغم أن الحلم.. مات
ربما ألقاك يوما في دموع الكلمات!!

الاثنين، 9 يناير 2012

وجع الراس



صحيح صدق اللي قال الغايب حجته معاه
وانا غيبت  كتير أوي وكانت معايا حجه كبيرة اوي بردو
الا وهي شىء ملعون اسمه وجع الدماغ المادي والمعنوي
من شهر تقريبا وانا بشعر بصداع رهيب في راسي من فوق
وقولت ياد ا كيد دا من البرد وهياخدله كام يوم ويروح لحاله
لكنه كان كل يوم يتطور عن اللي قبله
ومع مجهود الشغل الاقي نفسي اخر اليوم مش قادر حتي افتح عنيا
ولقيته عمال يزيد يوم ورا التاني وانا مش قادر اعرف اذا كان دا صداع
ولا وجع ولا ايه بالظبط... هو ابتدي بصداع ودلوقتي بقي عباره عن خرقان جامد
جدا في فروة الراس وشعور خفيف بالدوار اللي هو الدوخة يعني
وقررت اني اروح بقي اكشف عند دكتور وبلاش استهتار اكتر من كدا
وفعلا روحت لدكتور كبير ومشهور عندنا بتاع مخ واعصاب قعد بقي يسألني
اسئلة كتير عن كل حاجه حتي سألني ان كنت خاطب ولا لأ
وبعد ما كشف عليا قالي ان كل حاجه تمام وقاع العين سليم والجهاز العصبي
زي الفل ونخاعك الشوكي لسه فيه شوك زي ما هو
انت بس عندك شوية ارهاق من الشغل  وكتبلي علي علاج قد كدا وقالي
لو ارتحت عليه كان به ولو ما ارتحتش يبقي تروح تعمل كشف انف واذن
ونظر وتحليل دم كامل وتعمل اشعة مقطعية وتبقي تجيني تاني
ولما لقيت ان الالم زي ماهو ومفيش جديد روحت كشفت انف واذن
ونظر وحللت دم وكان كلام الدكاترة الاربعة هو هو 
كل ماحد يكشف عليا يقولي يابني انت معندكش اي حاجه
انت زي الفل
طيب يا جماعة امال الغول اللي عمال ينهش في راسي دا ايه
كانت بردو اجابتهم واحده
انت عندك ارهاق نفسي وتعرضت لضغط عصبي شديد
لازم تاخد فتره راحه وتستجم 
ياتري كلام الدكاترة دا بجد ؟
عامة انا عشان اقطع الشورت في البيسين هروح اعمل الاشعة
ولو بردو طلعت كويسه هضطر اسفا اني اتجه لاشياء غير طبيه
ادعولي والنبي
الله المستعان