Pages

الثلاثاء، 25 مايو، 2010

مذكرات طفل رومانسي



ياتري كل واحد فينا فاكر اول مرة حب
مش قصدي انه كانه حب حقيقي
لا حب
ولو مجرد شعور انه بيحب حد
اكيد كلنا حسينا بالاحساس دا
من واحنا صغيرين اوي اوي
من واحنا اطفال صغيرين لسه مليانين براءة
انا حبيت كتير اوي
هههههههههههههه
مش تستغرب لان هي دي الحقيقه
في حكايات كان نفسي تكمل
وحكايات تانيه اتمنيت انها تنتهي اصلا من قبل ما تبدأ
فيه ناس عرفتهم بجد من بعد ما صارحتهم بشعوري ناحيتهم
واتضح انهم مكنش يستاهلوا اني حتي اوجع خلايا قلبي الضعيف  انه يفكر فيهم
وفيه ناس تانيه كانوا ولاد ناس بحق وحقيق
وكل ما افتكرهم لازم اقول
يااااااااااااااااااااااااااااااااااااااه
ياتري انتم عاملين ايه؟
مفتقدكم جدا
....
اول مرة احب كنت لسه صغير اوي
يعني ممكن نقول كدا 5 سنين
قبل حتي ما اروح مدرسه
والبنت اللي حبيتها كانت زميلتي في الكتاب
الكتاب بضم الكاف وتشديد التاء يعني مكان تحفيظ القران
اصلها كانت بنت زي الملايكه
مش هقدر اوصفلكم يوم ما كنت ماسك في ايدي
عملة معدنية قديمة اوي وبضحك ع العيال زمايلي
وبقولهم انها عادي ممكن نشتري بيها دي زي الربع جنيه
وجت هي وقالتلي وريني كدا ومسكت ايدي عشان تشوف
البتاعه دي
انا عمال افتكر كان اسمها ايه
لغاية ما افتكرت انها كان اسمها ياسمين
علي فكره اتجوزت ومعاها ولاد دلوقتي
هيييييييييييييييييييييييييه
دنيا


تاني مرة بقي كانت مدرسة الفصل بتاعتي
وانا في اولي ابتدائي
ابله حنان
مش هقول مس عشان مس دي لسه جديده شوية
كنت اتمني انها تكون معايا علي طول وتكلمني انا لوحدي
مرة حلمت بيها
انها جت بيتنا واكلت معايا
والحلم دا طبعا مش موجود غير معايا لوحدي
ومقدرتش اقول لمس حنان عليه
دورت عليها كتير لما كبرت شوية
وسالت عنها كتير
ولسه بسال
مش علشان اقولها الحلم
علشان اقولها انا اتعلمت منك حاجات كتير اوي
....
مرة بقي من المرات
قعدنا قعدة رجاله مع بعض
واحنا في تانيه ابتدائي كدا
وقولنا بلعض
يا جدعان مش عايزين حد يقطع ع التاني
وكل واحد يعرف مين البنت بتاعته
عشان محدش يتعدي علي حق اخوه
وقعد كل واحد يختار هو بيحب مين
ومين اللي عاوز يتجوزها لما يكبر
ههههههههه
وكان كله متوقع اني اختار اميره
البنت اللي زي القمر
اللي كان كله فاكر اننا معلقين مع بعض
لكن انا بمبدأ حب الامتلاك اختارت واحده تانيه خالص
مكنتش في البال ولا الحسبان
منال
صاحبة اجمل عيون في مدرستنا
واهدي بنت ممكن تشوفها في حياتك
واستمرينا علي موقفنا من الاتفاقيه
لغاية ما انا لعبت بديلي بعد كدا
وقولتلهم لا انا مش عايز منال
انا بحب اميره
هههههههههههههههه
بجد والله كنا بنحب واحنا لسه اطفال منعرفش اي حاجه
الحاجات دي لما بفتكرها بحس بانتعاشة
عشان كانت ايام جميله
بعد المرحلة دي
كنا دخلنا في مرحلة تانيه خالص
كان كل واحد ابتدي يعرف عقله
ويعرف كمان ازاي يتلون ويحور
وازاي يغير مشاعره زي التعبان
عارفين
كنت فاكر ان لما حد بيحب حد ممكن فعلا يعمل اي حاجه عشانه
اللي لقيته
انه ساعة المصلحة
كله بيقول يلا نفسي
 

هناك 16 تعليقًا:

مش مهم مين يقول...

الحب اللى بجد عمره ما يتنسى وكان لازم يتحافظ عليه الحب اللى بجد مفهوش مصلحه الحب شئ جميل وصعب تحب ومتلاقيش

ستيتة حسب الله الحمش يقول...

مكنش يستاهلوا اني حتي اوجع خلايا قلبي الضعيف انه يفكر فيهم
ههههههههههههههههههههه
لأ دي شديدة قوي
اتاري الواد عفرتو ابني مش لوحده
طيب الحمد لله انه كده طبيعي طالما زي هيما مصور لي بنت على الموبيل ومحتفظ بيها في السكرت ومخبي صورتها عننا كلنا :)

شذا الروح يقول...

السلام عليكم
ازيك يا هيما
اخبارك ايه يارب تكون بخير
بتغيب وبترجع بأجمل الموضوعات

موضوعك جميل بيتحدث عن الذكريات الجميله ايام الطفوله والحب اللى كان برىء بعيد عن المصالح
لكن دلوقتى فعلا كلامك صح كله بيقول يلا نفسى وبقا عمله نادره
بتمنالك السعاده من اعماق القلب لشخصك الجميل

الحب الجميل يقول...

صباح الخير

أزيك ياهيما

طبعا الحب الاول حب الطفوله من أجمل وأصفى أنواع الحب ولا ينسى و يبعد كل البعد عن المصلحه ويحمل معنى البرأه

بوست جميل مع ذكريات هيما الأجمل

دمت بخير

Haytham Alsayes يقول...

ههههههههههههههه

ايه الذكريات الجامدة دي
علي فكرة مش لوحدك كلنا هذا الطفل

تحياتي

beautiful mind يقول...

مش مهم مين
صعب تحب ومتلاقيش
لا مش صعب ولا حاجه
بقي سهل جدا دلوقتي
تحياتي

beautiful mind يقول...

د ستيته
هههههههههه
طيب وانتي عرفتي منين اني حاطط صورة بنت علي موبايلي وعاملها سكرت كمان
لالالالا
انا مسحتها من زمااااااااان
من ايام كي جي 2
وبعدين سيبي عفروتو يعيش حياته
وبلاش عكننه
ههههههه
تسلم ايدك يادكتور

beautiful mind يقول...

شذا الروح
بجد والله انا ببقي عاجز اني اقول اي كلام
يناسب سلوكك الراقي في التعليق
بجد ربنا يخليكي يارب
غيابي بيبقي غصب عني
ان شاء الله الجاي احلا
كل تحيه وتقدير

beautiful mind يقول...

الحب الجميل
مساء الفل حسب توقيتي انا
الذكريات هي احنا
جزء منا
صعب تتنسي اكيد
متشكر جدا علي كلامك الجميل
وان شاء الله تكوني بخير وصحة وسعاده

beautiful mind يقول...

هيثم
طبعا اكيد كلنا عشنا الطفل الرومانس دا
ولسه هو عايش جوانا
تحياتي ياهيثم
ويارب تكون بخير

فتاه من الصعيد يقول...

:)

احنا صعايده والحاجات دي عيب :)

تحياتي

beautiful mind يقول...

فتاه من الصعيد
ماشي يامروة
دايما بتقولي المختصر المزيد
يعني كلمة ولا كلمتين
تحياتي

4xmisr يقول...

csmag.builder-eg.com
تم انشاء مجلة متخصصة فى المجتمع المدنى ,يكتب موضوعاتها أعضاء المنتدى
ibond.builder-eg.com
أقسامها المجتمع المدنى واقتصاد و تكنولوجيا اتصالات ومعلومات
ملف العدد,صفحة كاريكاتير
كما تم انشاء دليل للبرامج المفتوحة
foss.builder-eg.com
أغراض المنتدى
تجمع للمهتمين و المتطوعين فى العمل المدنى , رسالة أورمان الخ,
الاشتراك فى مجموعة أو مجموعات المنتدى لعمل كتب , ملفات فيديو للتنزيل أو على يوتيوب
عمل مكتبة تابعة للموقع من كتب الأعضاءفى موقع خاص بعد عمل عدد لا بأس به من الكتب, شرح شامل للرخص الحرة و الملكية الفكرية, ترجمة المشاريع المفتوحة المصدر ,تبادل الخبرات بين أعضاء المنتدى,الاستثمار و المشروعات الصغيرة و العمل من المنزل ,التسوق و التجارة الاليكترونية
بالاضافة لمواقع أخرى سيتم افتتاحها بعد نجاح هذا المشروع باذن الله
وهى مواقع ذات صلة بالمصادر المفتوحة وكيفية الاستفادة منها للجمعيات و الشركات و الأفراد الخ
يسعدنا انضمامكم للموقع بكتابة مقالات فيه بالتعاون مع من سيرغب فى ذلك أيضا
ملحوظة : بالطبع يستطيع صاحب المدونة مسح التعليق , و نأسف للازعاج

ساسو يقول...

مساء الفل يا ابراهيم
بجد موضوعك جميل أوي
بجد الطفوله بتبقي أجمل ذكريات
وبيكون الواحد صادق في مشاعره

ربنا يوفقك
وبجد كل كلامك جميل جدا

amiraali يقول...

عارفين
كنت فاكر ان لما حد بيحب حد ممكن فعلا يعمل اي حاجه عشانه
اللي لقيته
انه ساعة المصلحة
كله بيقول يلا نفسي
عندك حق...
بس عجبني اوي البوست...تسلم

meroo elramky يقول...

أجمل حاجه فى الدنيا الحب وتكون بتحب بجد مش كلام