Pages

الأربعاء، 30 سبتمبر 2009

مش انا اتسرقت......


السلام عليكم
ازيكم
طبعا وحشتكم اوي ....... صح؟
ياعم وحشتنا ايه دا انت كل يوم هنا
هو دا جيش؟... ولا دا سلاح اللي انت فيه
دا احسن من سلاح التلميذ بشويه
ماشي يا سيدي
المهم
طبعا العنوان خضكم
وكل واحد بيسال نفسه ايه الحكايه دي؟

 هحكيلكم طبعا
صلوا بينا ع النبي
طبعا انتم عارفين اني مجند  في البحريه
وعارفين كمان ان المكان اللي انا فيه قريب اوي من بيتي
علشان كدا بكون موجود معاكم باستمرار والحمد لله
وربنا يديمها علينا نعمه
يوم الحد اللي فات بقي كان معاد سفري
اتكلت علي الله ومشيت
ومكنش معايا حاجه خالص غير محفظتي
اللي فيها الكارنيه بتاع الجيش ( البلوه) دا
وشوية فلوس صغنطتين كدا حوالي 70 جنيه
 واتنين تلاته جنيه فكه والبطاقه وورق شخصي 
وكد ايعني ....المهم
ركبت مواصله من حته اسمها ( الطابيه ) 
للمكان اللي فيه تجنيدي
المواصله دي تقريبا 5 دقائق بالعربيه
طلعت المحفظة دفعت الاجرة ودخلتها تاني في جيبي 
ونزلت لما نزلت بحط ايدي في جيبي ملقتش حاجه
المحفظه فص ملح وداب
طبعا انا وشي جاب الوان وقعدت اضرب اسباع في اسداس
اعمل ايه ياناس؟ واتصرف ازاي؟
كل اللي كان شاغلني الكارنيه بتاع الجيش.. 
هعمل ايه وهو مش معايا
دا غير الجزاء اللي هاخده وهتحبس
لانه اهم حاجه في المهمات اللي معايا
 وضياعه معناه اني مهمل
المهم
كان معايا واحد زميلي اخدت منه فلوس وطلعت بره تاني
طبعا لاني خلاص معدش معايا الحديده حتي
والفلوس اللي كانت في المحفظه كنت هقضي
 بيها الكام يوم اللي بقعدهم
ركبت وروحت ورا العربيه زي المجنون
ولا لقيت لا العربيه ولا السواق وقعدت اسال السواقين كلهم واديلهم مواصافات السواق
ولا من شاف ولا من درى
رجعت تاني علشان متكتبش تأخير .. واهو كله سواد
بعد ما خلصت طابور الصبح جريت للظابط بتاعنا
 وقولتله يافندم انا محفظتي ضاعت وانا جاي
قالي طيب وايه يعني
قولتله يافندم فيها الكارنيه والبطاقه والفلوس وكل حاجه
قالي فيها الكارنيه...؟
قولتيه اه
قالي (........)  انت عسكري مهمل ومستهتر
 وتستاهل اللي هيجرالك
قولتله يافندم طيب اعمل ايه بس انا قولتلك اللي حصل
قالي استني بقي لما تعمل محضر وتعمل بدل فاقد
بس لازم هتاخد جزاء ياحلو وتتسجن
 اقل حاجه شهر سجن
اجري من وشي  يلا
طبعا انا مشيت ورجلي بتخبط ع الجيران
والمركز كله عرف ان كارنيهي ضاع
وكله يقولي معلش ان شاء الله هيرجع
وانا اقولهم يارب
المهم الكارنيه مش مهم اي حاجه تانيه
المهم
في نص اليوم كدا لقيت الصول  بينادي اسمي 
وبيقولي افرح ياد لقينا حاجاتك واحد لاقاها
 واداها لواحد زميلنا وهيجبهالك
متتصورورش والله قد ايه كانت فرحتي برجوع حاجاتي 
طبعا تفاصيل رجوعها كانت مثيره بردو
المهم اني اتصلت باخويا وخليته راح قابل الراجل اللي معاه الحاجات بتاعتي وجابها منه
بس تعرفوا والله الحرامي دا طلع ابن ناس وكريم اوي
اخد ال70 جنيه وسابلي 2 جنيه فكه
اهو قال ممكن اجيب حاجه ساقعه ولا حاحه
دا انا في جيش وغلبان
بذمتكم مش حرامي كريم بردو
بس الحمد لله ان الكارنيه رجع بالسلامه
واني انا كمان رجعت بعد ما كنت هفقد الامل
يلا 
ادينا بنتعلم
تصبحوا علي خير


الأحد، 20 سبتمبر 2009

حتي اكون عارية لك + تحديث مهم جدا

وحشتوني اوي
كل سنه وانتم طيبين
ويارب عيد سعيد علي الجميع
*************
بجد انا لما قريت الموضوع دا في احد المواقع
عجبني جدا 
لدرجة اني قررت وصممت وانا في كامل قواي التدوينيه
اني اعمله بوست جديد
علشان كل الناس تقراه زي انا ما قريته
بصراحه كمان انا مش عارف مين بالظبط اللي كتب 
الخاطره الروعه دي
بس اقل وصف ممكن اوصفه انها فعلا عبقريه بجد
انا هضيف ليها شوية صور كدا
علشان تثري الموضوع اكتر
وكان نفسي والله احط خلفيه موسيقيه معبره
علشان نعيط واحنا بنقرا
ههههههههه
بس للاسف فشلت كل محاولاتي
لاني معرفش بتتعمل ازاي
شوفتوا انا خايب قد ايه
........ وكمان انا
بطل رغي بقي وهات البتاعه دي
حاضر
يلا بينا
****************

(1)
نعم !!
لم يكن أبي امْرَأَ سَوْءٍ
وما كانت أمي بغيا
لكني لست بطهر مريم العذراء
كي أقاوم شوق أنوثتي إلى أحضانك
ولا أنا بتقوى يوسف الصديق وورعه
كي لا أهم بك وأنت تُغلق أبوابك دوني!
وأخشى أن لا أثبت أمامك طويلا !
أخشى أن لا أثبت أمامك طويلا !
فجنبني الحرام ...و ارحل !!
(2)
وأنت تهاتفني في الليلة الأخيرة
وتحدثني بهمس عن وعن وعن
كنت تغمض عينيك بنشوة
وتتخيلني معك على بقعة أرض محرمة
وكنت أغمض عيني بصمت !!
وأتخيلك معي على الأرائك في جنة الخلد !
وأعلم أن ألمي العظيم في الفقرة السابقة لن يشعر به
إلا عاشقة تقيم الليل على سجادة صلاتها
ورجل ...مازال يبكيه قول الله تعالى
والسابقون السابقون أولئك المقربون
(3)
شربت من حكايتك البحر كله !!
حتى شرقت بملح أمواجه !
ضربت رأسي بجدار ظروفك حتى أفقدته ذاكرته!
مددت لك يدي كأنك أخر أطواق النجاة لي !!
جاهدت في الوصول إليك كأنك قشة الغريق الوحيدة!
ركضت خلفك بقلب لاهث وكأنك سفينة نوح التي خلفتني !
حتى انقطعت أنفاسي
وتعبت !!
تعبت منك....تعبت مني !
تعبت من صمت التمثال بك !
تعبت من بكاء الأنثى بي !
(4)
فمنذ أن أحببتك!!
وأنا أغرق في بحر فراقك وأنتظر منك طوق النجاة
ومنذ أن عرفتني وأنت تنتشي بغرقي
وتُلقي لي بطوق خذلانك!!
منذ أن أحببتك !!
وأنا أعاملك كأميرات الحكايا وفرسان الخيال
ومنذ أن عرفتني !
وأنت تعاملني كفريسة الطريق وذئاب الغابة
كلما اقتربت بجوع الحب منك !
اقتربت بجوع الرغبة مني!
فضع عينيك بعين الله إن استطعت وأخبره !
كم مرة دعوتني بها إلى الحرام
وكم مرة صرخت بك :
أخاف الله رب العالمين
(5)

وكم من ليلة خلتها ا ليلة زفافي إليك !
وكم من ليلة ارتديت بها فستاني المطرز بالشوق!
وكم من ليلة خضبت يداي بنقوش الحناء !
وكم من ليلة أغرقت ضفائري بالمسك والدفء والعود !
وكم ليلة زينت بها كفي بالأساور و قدمي بالخلخال!
وكم ليلة رددت بها أني زوجتك نفسي لـ نفسي !!
وخفضت رأسي خجلا منك ووهما بك !
وكم ليلة أشرقت بها الشمس علي..وأنا وحدي!
يغفو على وسادتي الأخرى وهمي .. وهمي !
ولم ... أزف بها إليك !!
(6)
فـ كالأرجوحة كانت حكايتي معك
مرجحتني على خيوط الوهم تارة .
.وعلى خيوط الحنين تارة أخرى !!
فكنت كالمعلقة بخيوط الهواء مابين السماء والأرض
أنتظر سقوطي مع كل ارتفاع إلى السماء
وأترقب موتي مع كل نزول إلى الأرضِ !!
فلا أنا لامست السماء بها معك!
ولا أنا استقريت فوق الأرض !!
(7)

والله إني أشتاقك وأحتاجك !!
حد رؤية ملك الموت يحوم في ليالي فراقك حولي!
فلست دمية ثلجية.. ولا لُعبة خشبية !
ولا جدار منزل قديم متهاوي. لا يشعر بالمارين به شوقا !
ولكن ... كيف الوصول إليك ؟
والله يحاصرني من كل الجهات ِ !!
(8)
فإشتر لي قطعة أرض لا تدخل في ملك الله
وأنا أعدك أن أمارس معك عليها
كل آثام البشر وكل خطايا أهل الأرض منذ أن خلق الله الأرض!
أعدك أن أصافحك عليها بشوق..!
دون أن أتذكر حديث أمي عن( جمرة ) مصافحة الغرباء!!
أعدك أن أمزق غطاء رأسي أمامك...
وأسدل على صدرك أرجوحة ضفائري. !!
دون أن أنتفض رعبا..حين تصرخ بي نفسي اللوامة باكية
أن كل شعرة من رأسي.. بجمرة من النار !!
(9)
اشتر لي قطعة أرض لا تدخل في ملك الله !
وأنا أعدك أن أكون عليها معك بكامل أنوثتي وجنوني وخطيئتي!
وان أحكم غلق الأقفال بقوة كي لا يراني معك أحد.. !
وأكتم صوت ضميري وهو يردد لي مذكرا !!
( إن لم تكن تراه فانه يراك ...إن لم تكن تراه فانه يراك)
(10)
اشتر لي قطعة أرض لا تدخل في ملك الله !
وأنا أعدك أن أغافل ثقتهم الآمنة بي
وأتحايل على حسن ظنهم بتربيتي..
وأغدو إلى موعدك الآثم بفرح دون أن يعرقل سيري إليك !!
منظر سيري على الصراط والنار تحتي
وألسنة اللُهب تتخطفني من كل صوب..وإتجاه!!
(11)
اشتر لي قطعة أرض لا تدخل في ملك الله
وأنا أعدك أن أمارس عليها معك الحب والغرام بأرقى الطرق
وأرخص الطرق ... !!
دون أن يُعكر صفو شوقي إليك إنشغال تفكيري !!
بالكبيرة التي ساءت سبيلا !!
(12)
اشتر لي قطعة أرض لا تدخل في ملك الله
وأنا أعدك أن أتجرد أمامك عليها من كل شي
وان أراقصك عليها عارية إلا من ذنبي !
دون أن تعترض خيالي صورتي وأنا ممدة على مغسلة الموت
عارية من كل شيء إلا خطاياي وأعمالي!
أعدك أن أملا بياض ثوبك بأحمر شفاهي..
وأبعثر بوحشية أنثى لهفى غطاء سريرك الأبيض
دون أن يذكرني غطاء سريرك ببياض كفني
وأنا أزف إلى القبر ووحشة القبر وضمة القبر وحدي!!
(13)
اشتر لي قطعة ارض لا تدخل في ملك الله !!
فلن أخون الله أمام عينيه وفي ملكه
لن أخون الله أمام عينيه وفي ملكه
لن أخون الله أمام عينيه وفي ملكه
(14)
في كل مرة أعدك بها أن لا أعود
كنت باسم الحنين أعود !!
ومع كل عودة كان يمزقني إنتحاب الكبرياء بي !
لهذا وعدت الله أمامك في المرة الأخيرة
أن لا أعود
ولن أعود !!!
حنيني وأعرفه
يخجل أن يُخلف مع الله وعده !!
(15)
ثق !!
لم يكن فشلي في حكايتك
سوى طعنة نصيب
لا أكثر ... ولا أقل !!
لا أكثر ... ولا أقل !!
فقط


:يارب تكون عجبتكم
اليكم خالص تحياتي
ibrahim


تحديث
دا لينك تحميل ملف الموضوع
وسهل التحميل جدا ان شاء الله
حمل من هنا

الخميس، 17 سبتمبر 2009

من اعماق قلبي اهنيكم



السلام عليكم

من اعماق قلبي اقدم لكم ولكل من اعرف

وكل المسلمين في مشارق الارض ومغاربها

اقدم لكم جميعا التهنئة بهذه المناسبات الجميله والايام المباركه

وادعوا الله ان يجعلها ايام سعاده وحب ورخاء

علي امتنا وبلدنا وارضنا وجميع بلاد المسلمين

اللهم تقبل يارب العالمين




***********

اممممممم
طبعا في كلام كتير عايز اقوله
وحاجات كتير عايز اعملها
بس الاول انا بتمني من ربنا ان الشكل الجديد للمدونه
واللي طلع عيني مش انا لوحدي والله
واللي ساعدوني فيه
اتمني انه ينال اعجابكم 
ولو حد شايف فيه اي ملاحظات ياريت يقولي عليها
علشان الكمال لله وحده
وعلشان اقدر اصلحها قبل ما اسافر تاني باذن الله
وربنا يجعلنا كلنا متحابين فيه
بعيدا عن المصالح والمجاملات
وكل شىء يعكر صفو حياتنا 
اللهم امين 

************

كل التهاني الجميله بعيد الفطر المبارك
ازفها اليكم 
كل فرد بشخصه
وكل اصحاب المدونات الكرام
وكل الزوار والقراء
ويارب يكون عيد سعيد علينا جميعا
تختفي فيه خلافاتنا
وتسعد فيه حياتنا
وينال فيه كل متمني امنيته
ويفرح فيه كل شخص بمن يحب
ويارب يعيد علينا الايام دي ونكون في حالة افضل
ويكون رمضان والعيد الجايين احسن حالا من السنه دي
يارب ان شاء الله 

***********

انا عارف ان فيه اشخاص كتير زعلانين مني
بسبب ومن غير سبب
بس حابب اقول 
اني بشر
اصيب واخطىء
ومفيش حد كامل ابدا
ومعلش ياريت كل حد يسامحني
لان انا والله مغلوب علي امري
ومش عارف اذا كنت هفضل كدا
ولا الظروف هتتحسن
عموما ربنا يساعدنا جميعا

************

اخر حاجه بقي عايز اقولها
اني ان شاء الله هقول لكم خبر
جميل جدا عني وعن حياتي
الشخصيه بمعني اصح
استنوني بقي
ان شاء الله القاكم قريب جدا
دومتم للمحبه
وللخير
وللاخوه
والسلام عليكم

الخميس، 10 سبتمبر 2009

رمضان ...والشباب السيس


تعالوا نكمل الموضوع اللي بداته البوست اللي فات

واللي اتكلمت فيه عن الظواهر المنحرفه في الشباب

واللي زادت جدا في رمضان دون مراعاه لحرمة الشهر

ولا لشعور الاخرين اللي بيحاولوا يكونوا ملتزمين

كان نفسي استخدم اسلوب ارقي من كدا في التعبير

علشان اوصف بيه العيال دي لانهم فعلا عيال

ومتعلموش ابدا يكونوا رجاله وابسط شىء يقال عنهم

انهم شباب ( سيس ) علي راي احمد حلمي

اكملكم بقي الامثله اللي انا شوفتها وادهشتني

بل وصل بعضها لحد الصدمه لاني عمري ما شوفت حاجه زي كدا

في رمضان بل وعمري ما تخيلت لحظه انه ممكن يحصل



طبعا الالفاظ البذيئه دي حاجه موجوده وبكثره عندنا وخاصة في المكان

اللي انا موجود فيه وكنت متخيل والله انه لما يجي رمضان والناس تصوم

كل واحد هيحاول يصون لسانه علشان يحافظ علي صيامه

بالعكس زادت جدا في رمضان انا مش عارف السبب ايه؟

حتي ان بعضهم قالنا ( اوعوا تكونوا فاكرين ان رمضان يعني هنام..

انا معنديش حاجه اسمها رمضان)

ولما حد قاله رمضان كريم يافندم قاله (........) رمضان كريم كل سنه وانت طيب يا حبيبي

طبعا مكان النقط فيه بلاوي

وهلم جرا من الكلام اللي بجد والله يخدش الحياء ويخلي

كل واحد يستحي خجلا من اللي بيسمعه



طبعا فيه مكان للاستراحه موجود فيه تليفزيون وريسيفر

وطالما احنا في الشهر دا يبقي اكيد هتلاقي التليفزيون شغال ليل

نهار علي محطات القران والقنوات الدينيه او حتي القنوات العامه

المعتدله شويه

طبعا دا حلم

التليفزيون بدءا من الساعه 12 الضهر لغاية الساعه 3 بليل

مفيش حاجه عليه غير رقص وغناء وافلام

ولو حاول حد انه حتي يشغل برنامج عادي يبقي يومه مش فايت

نقعد نقول يا رجاله احنا في رمضان حرام عليكم عيب كدا

ولا حياة لمن تنادي

حتي الماتشات ممنوعه بردوا لان سيادتهم مش بيحبوا الكورة

يبقي خليك ساكت ياتتفرج معاهم يا تغور من هنا



المعظم بقي من الشباب السيس دا بيعمل ايه بليل

علشان يسلي وقته اصله يا حرام تعبان اوي

ومحبوس وعنده كبت وبعيد عن اهله

بيكون طبعا مهرب تليفون معاه ( لانه ممنوع ) ويقعد بقي

طول الليل يكلم سوسو ولولو

يابني حرام عليك عايزين ننام

ولا كانك بتكلم بني ادم

وعادي جدا يكلمها كدا ويشغل الميكرفون كمان علشان غيره

يسمع ويعرف ان الواد راجل وسبع وبيعرف يوقع البنات

وياذن الفجر وندخل في صباح جديد والتليفون لسه شغال

ميتقفلش غير لما البطاريه تفصل

مش عايز اقولكم بقي ان معظم كلامهم علي اشياء خارجه جدا

وكلام يندي له الجبين



اليوم بقي اللي كنت نازل فيه الاجازة دي

دخلت اغير هدومي عادي يعني

واتفاجات بحوالي 10 كدا من الشباب دول

السيس يعني وطبعا فارشين ولقمه هنيه تكفي ميه

بصتلهم كدا باحتقار لغاية ما واحد منهم لاحظ

الموضوع وقالي وهو مكسوف اوي

رمضان كريم يا صاحبي تاخد حته

الحاجه بقي اللي تغيظ انهم كلهم من اسكندريه

وكل واحد فيه بيروح كل يوم ياكل وينام في بيته

يعني مش بيجي غير 4 ساعات تقريبا

ومش مستحملهم

مامته بتحضرله السندويتشات ياخدها معاه

علشان حماده بيتعب اوي والصيام غلط عليه



والله اللي خلاني اكتب الموضوع دا

المناظر السيئه اللي شوفتها

والحاجات اللي مكنتش اتصور انها موجوده في رمضان

فعلا الخجل والحياء ضاعوا

ياتري باقي ايه عندنا لسه مضاعش؟

القاكم بخير

الاسبوع القادم




الأربعاء، 9 سبتمبر 2009

واذا بليتم فاستتروا


السلام عليكم

اللهم اغفر لنا وارحمنا واعتق رقابنا من النار

ازيكم يا احلي واجمل ناس في الشبكه العنكبوتيه

بصراحه والله وبدون اي مجاملات ( ومش من صفاتي المجامله ) انتم

وحشتوني اوي فوق ما تتخيلوا

وانا كل ما اكون موجود هنا بتابع اعمالكم جميعا وبرد عليها كمان

والحمد لله اني ظروفي كويسه جدا في رمضان وموجود باستمرار اهو

ندخل بقي في موضوعنا علشان مطولش عليكم

بس بالله عليكم تاخدو بالكم من كلامي كويس

الموضوع اللي هتكلم فيه انا كنت فاكر انه تصرف فردي من شخص واحد

او اتنين وانه بقي شىء نادر خاصة مع موجة التدين اللي بتجتاح مجتمعنا

مع انتشار الفضائيات الدينيه بالشكل اللي احنا شايفينه اليومين دول

لكن الظاهر ( الا ما رحم ربي ) انه تدين وهمي شكلا لا موضوعا

ايه بقي الحكاية

رمضان الشهر الفضيل افضل شهور السنه اللي كل واحد فينا بينتظره

من العام للعام علشان يغسل ويطهر نفسه فيه من كل الاثام والذنوب الصغيره

والكبيره واللي بنعكف فيه علي الصيام والصلاة بالنهار وقراءة القران والتهجد بالليل

واللي له من الشان مالايعلمه الا الله

مش عارف حصل ايه للشباب انا مش لاقي كلام اقوله بجد

غير اني هحكي ليكم بعض الاشياء اللي شوفتها بعنيا واسيب ليكم الحكم

وانتم اللي تقولولي ايه اللي حصل ؟ وليه كدا؟

يقول رسولنا الكريم صلي الله عليه وسلم ( واذا بليتم بالمعاصي فاستتروا) وهذا الحديث

ينطبق اصلا علي ايام السنه العاديه فما بالك بالمعاصي في رمضان ومش دا المشكله

كل واحد حر في اللي بيعمله

المشكله الجهر بكدا ... تلاقي الواحد فاطر علنا وبيقولها صريحه وبياكل ويشرب قدام الكل

ولا حتي في قلبه ذره حياء او خجل من اللي بيعمله

خدوا الامثله دي

طبعا انا في الجيش والمعروف انه اليوم بيكون صعب شويه بس والله العظيم عادي

والحمد لله ربنا بيعنا جدا علي الصيام والحمد لله ايضا ان ربنا سخر لنا ناس فاهمه

يعني مش بيخلونا اساسا نعمل حاجه فوق طاقتنا واحنا صايمين

يعني كل اللي بنعمله حاجات عاديه ممكن اي حد يعملها ويتحملها

البعض بقي من ضعاف النفوس بيستغل انه عسكري واسمه في الجيش

ويسمح لنفسه انه يفطر ( طيب ياسيدي دي مشكلته هو ) انا ماليش دعوه بتصرفه

هو اكيد شخص تعدي سنه 21 سنه وعارف الصح من الغلط

لكن شوفوا بقي بيفطر ازاي

كنت في الكانتين او البوفيه ( المكان اللي بيتباع فيه الاكل والشرب في الجيش ) الساعه تقريبا

واحده الضهر وقال بمنتهي البجاحه ( عايز اكل ) انا عادي قلت دا اكيد ( نصراني ) بس غريبه اوي

طيب ما الناس دول ( النصرانيين ) معانا وبصراحه والله في قمة الادب والاحترام والذوق وعمر ما واحد فيهم

سمح لنفسه انه ياكل او يشرب قدام اي واحد فينا بل بالعكس كانوا بياكلوا ساعة المغرب معانا زي الصايمين بالظبط

كانت بقي دهشتي الكبيرة لما عرفت انه مسلم وزي ( الشحط ) واللي ما يستهلش اسمه حتي

قلت عادي ممكن يكون تعبان ولا حاجه .. اللي حصل بقي انه جه ومعاه 3 او 4 شباب حلوين كدا زيه

واشتغلوا سندويتشات وسجاير وشاي قدام كل اللي موجدين بمنتهي قلة الادب والوقاحه

من يومين كدا روحت اجيب طلبات للكانتين ( ايه حكاية الكانتين دي ) اصل انا اشتغلت فيه يومين كدا

من حي المندره في اسكندريه وهناك سوق معروف جدا مليان بقي من كل ما تشتهيه الانفس

وصلت هناك بقي وعينك ما تشوف الا النور الناس عادي جدا ولا كأن فيه رمضان ولا غيره

السجاير شغاله والشيشه والالفاظ البذيئه زي ماهي والبنات ماشيه لابسين هدوم رش

هههههه ( علي رأي الشيخ وجدي غنيم ) قلت في نفسي هو ايه دا

هي الناس دي عارفه يعني ايه رمضان ولا انا يمكن اللي جيت في وقت غير مناسب؟

ان شاء الله هكمل الموضوع دا في جزء تاني علشان بس تقدروا تقروا

ومطولش اكتر وعلشان اللي جاي انقح من كدا بكتير

ويارب يهدي كل عاصي ويرد الشباب لدينهم ردا جميلا

دومتم بكل خير