Pages

الاثنين، 25 أبريل 2011

غير اي حد




من بين كل الاشخاص اللي بنتعامل معاهم كل يوم...
واللي بنقضي معاهم معظم أوقات يومنا .....
منهم اللي بتختارهم بإرادتك .... ومنهم اللي اتفرضوا عليك غصب عنك
من بين كل الوشوش الكتير اللي بتشوفها كل لحظة....
واحد بس من كل دول بتلاقيه طول الوقت معاك
بتشوفه دايما قدامك.....
وبتتمني انه يستني طول عمره كدا معاك
عشان بتلاقي فيه الأنس ... الراحة... الصدق ..... الإحساس
عشان بتلاقي فيه الحب ... اللي انت عايش تدور عليه
وتلاقي نفسك وانت بتتكلم معاه حتي لو في الف موضوع
عنيك وقلبك نفسهم يكلموه في حاجه واحده بس ....
تتشوق كل لحظة انك تسمع صوته ...
حتي وهو لسه مكلمك من دقايق
تتمني تشوفه .. رغم انه معاك طول الوقت
تمشي في الشارع تدور عليه في وجوه الناس..
وانت عارف انك مش هتلاقي حد يشبهه
بس انت بتصبر نفسك وخلاص
تبكي وانت وحدك .....
عشان مش عارف تقوله اللي نفسك فيه وانت معاه
ولما تاخد الف قرار انك تصارحه باللي معذبك...
تلاقي مليون مانع يمنعك
وبتدعي انك تكمل معاه اللي باقي من حياتك..
حتي ولو في مش في الواقع
كفاية انك تقدر تخليه عايش جواك
بتشوفه بعيونك..
وبتسمعه بقلبك....
وبتقوله كل ثانيه
.......... انا بحبك .........


السبت، 23 أبريل 2011

اللهم اجعله خير




فيه حاجات كتير اوي اتغيرت
وحاجات اكتر لسه بتتغير كل يوم قدام عنينا
حاجات احنا مصدقين انها بتتغير
وحاجات مش مصدقين ولا اي حاجه منها
بس هي فعلا اتغيرت .. وبتتغير
للاحسن او للأسوأ .. الله أعلم
المهم اننا قدرنا نغيرها برضانا او غصب عنا
انا تقريبا لسه بحلم باللي حصل
ومش مصدق اننا وصلنا للدرجة دي
وان ثورتنا العظيمة عملت كدا فعلا
وقلبت الكراسي فوق دماغ كل مسئول حرامي
كان قاعد ومبرتع في بلد ابوه ولا حاسس بالناس
وكأني كنت نايم نوم طويل اوي كعادتي
ولما صحيت لقيت نفسي واحد من اهل الكهف
لقيت بلد غير البلد وناس اتغير فيها كتير
وحاجات بقت احسن بجد
ربنا يتمم علينا نصره ونعمته ورحمته
ويديم علينا الامن
****************