Pages

السبت، 13 نوفمبر، 2010

عشان انا مش علي



كل واحد فينا ليه حكمة عايش بيها

وشايف انها اكتر حاجه بتعبر عنه وعن ذاته

وبيحاول انه ينفذ كل كلمة فيها بالطريقة اللي تناسب حياته وامكانياته

ولو سالت اي حد : ايه الحكمة اللي انت بتؤمن بيها اكتر من غيرها؟

في ناس هتفكر كتير وبعد كل التفكير دا هتقول : مفيش

وناس تانيه هتفكر بردو وبعد التفكير هتقول الحكمة او الهدف اللي هي ماشية عليه في حياته

وفيه ناس تانيه هتجاوب علي طول من غير تفكير

******************
من فتره كدا لما كنت في الجيش

كنت رايح لظابط في مكتبه اجيب منه حاجه معينه

وبعدين دخلت الاوضه بتاعته وكان هو من الظباط اللي لسه بدأين حياتهم العسكرية

ورغم انه كان شاب عادي جدا بل بالعكس مكنش باين عليه

اي نوع من الالتزام وغيره

الا اني لقيته كاتب ورقة ومعلقها علي الحيطه عنده

وكاتب عليها جملة واحده بس

فضلت واقف لما قرأتها وانا سرحان فيها لدرجة انه بقي يكلمني

وانا مش مركز معاه خالص انا كان كل تركيزي في الجمله اللي قريتها

قد ايه فعلا هي حكيمة جدا وقد ايه انا كنت محتاجها في الوقت دا

الورقة كان مكتوب فيها

(إذا أردت فاطمة ..... فكن علي )

لما نقراها للمرة الاولي ممكن منحسش بالمعني اللي هي تقصده بالظبط

لكن لما نفكر فيها كويس هتعرف كل حاجه

كلنا بنتمي فاطمة

وكلنا عايزين اطهر حد في الدنيا

لكن منعرفش ان من اعمالكم سلط عليكم

ومنعرفش كمان ان فاطمة لا تكون الا لعلي

وعشان انا صدقت الحكمة دي قوي

بقيت بقولها لنفسي كل شويه

لما افكر في الموضوع دا

بس انا مش لاقي فاطمة دي دلوقتي

حتي لما كانت في ايدي

انا ضيعتها

عارفين ليه هي ضاعت؟

وعارفين ليه انا مش عارف اقابل فاطمة؟

علشان انا لسه مبقتش علي

يمكن لما هكون هو في يوم من الايام

هتيجي فاطمة

لكن لا لو جت دلوقتي

الله اعلم دي هتكون مين

اكيد هتكون حد تاني خالص

غير انها تكون فاطمة

هناك 8 تعليقات:

Dr/ walaa salah يقول...

جميله اوي الحكمه دي

فكرتني بكتاب كوني له خديجه

فعلا لو كل رجل فكر انه يبقى علي اكيد هيلاقي فاطمه

والطيبون للطيبات

والعكس طبعا صحيح

جميل اوي البوست ده على فكره واللي يفكر فيه صح هيعرف ليه حياته متلغبطه وليه مش قادر يلقى الانسان اللي يرتاح معاه

فعلا من اعمالكم سلط عليكم

اشكرك على البوست الجميل وجزاك الله خيراً

شمس النهار يقول...

ازيك
كل سنه وانت طيب

ربنا قال في كتابه العزيز

الطيبون للطيبات
والخبيثون للخبيثات

وقيس بيها كل حاجه

sony2000 يقول...

اولا كل سنه وانت طيب
ثانيا
اعمل كل حاجه كويسه
وتحس انها بترضي ربنا
صدقني
هتيجي من غير ماتحس
ان شاء الله

Tarkieb يقول...

بس من السهل انك تكون علي وده في إيدك ياريس ومضمون ..اما انك تلاقي فاطمة بعدها فاده مش مضمونة...يمكن عشان انت دلوقتي مش على فبتقول لو بقيت على ممكن تيجي فاطمة وحلنى بقى لما تبقى على...راي ان كل شئ نصيب والمقولة دي مش مضمونة والدليل في ناس كتيرة زي على ومتجوزين ستات اخوات ابليس...وناس كتير زي فاطمة واجوازهم شياطيين

Dr/ walaa salah يقول...

جينا نهني بالعيد ونقول :

الله يتقبل اعمالك ومبارك عليك العيد
و يعود عليك بصحه وسعاده وعمر مديد

ستيتة حسب الله الحمش يقول...

عجبني البوست جدا
مع ان في قصة تانية
الجميلة والدميم
اللي قالوا لها لما رزق الله هذا الدميم بك
قالت ربما كان صالحا فكافأه الله بجمالي وربما كنت طالحة فهو عقوبة الله لي
الشاهد
مش كل شيء مكافأة سريعة
كل سنة وانت طيب ياهيما

بنت الإسلام يقول...

موضوع فى قمة الروعة بس فعلا مش شرط لما تكون على ترزق بفاطمة لان الحياة دار ابتلاء فلو كانت زوجتك صالحة او غير ذلك ففى الحالتين ابتلاء وندعوا ان يوفق الجميع لما يتمناه وان شاءالله تلاقى الانسانة الصالحة اللى تسعدك

Abo- Kamal يقول...

حكمة جميلة اوي يا هيما و ان قعلا اول ما قريتها لم اشعر بشئ و لكن لما ركزت فيها حسيت بيها و باهميتها فالواحد لكي يستحق فاطمة لابد أن يكون على فعلا فربنا يهيدنا و يرزقنا ازواج صالحات

تهون علينا في المعالي نفوسنا
كمن يخطب الحسناء لم يغلها المهر

http://inventorshere.blogspot.com