Pages

الأربعاء، 30 ديسمبر 2009

اللي اختشوا ماتوا.... باقي الحكايه



كمل صاحبي كلامه وقال:
حسيت في اليوم دا ان فيه مصيبه هتحصل مش عارف ليه
المهم . كل واحد روح بيته في الليله دي وانا روحت نمت
وفجأه تليفوني رن حوالي الساعه 4 الفجر كدا
قولت دا مين دا اللي امه داعيه عليه اللي سمح لنفسه انه يرن علي دلوقتي
قومت وانا في غاية العكننه وناوي اديله شوية كلام مما لذ وطاب
لقيته اخو ..... صاحبنا اللي مقطع السمكه وديلها مع البنات
قالي : الحق يا محمد تعالي بسرعه دلوقتي
قولتله: فيه ايه يابني مالك؟
قالي: اخويا في ناس جم رموه قدام البيت والواد متعور جامد
ومش بيتكلم تعالي بسرعه
جيت لابس هدومي بسرعه وطلعت اجري في الشوارع لغاية ما روحت بيته
فيه ايه يا جماعه ؟ ايه اللي حصل ؟
الواد كان بيجيب دم من كل حته في جسمه ومش راضي ينطق
سالت والدته في ايه يا ام فلان ماله .......؟
قالتلي : والله يابني ما اعرف . انا بصيت لقيت عربيه واقفه
وابو ..... ( البنت زميلتنا ) بينادي ويقول
خدي يا حاجه ابنك اهو واحمدي ربنا انه لسه فيه نفس
ابنك خرب بيتي وخرب بيت بنتي
ورمي الواد غرقان في دمه وسابه ومشي

بصراحه الواد كان معدوم العافيه كأنه كان بيلاعب واحد من بتوع المصارعه
جبناله دكتور عمله شوية حاجات كانت معظم الجروح سطحيه
وواحده واحده ابتديت افهم منه اللي حصل
قالي: انه كان مع ....... في بيتهم وجوزها دخل عليهم
ومسكه خلي جسمه شوارع من الضرب
ومش كدا وبس
دا مضاه علي 6 وصولات امانه بمبالغ كبيره
واتصل جاب ابو البنت وعرفه اللي حصل كله
انا عقلي بقي يودي ويجيب واقول بقي انتم الاتنين
انت والبنت تقرطسونا كدا واحنا زي الطرش في الزفه
ويطلع منكم كل دا
قولتله : طيب والله دا جوزها طلع واد ابن حلال وكاجوال خالص
هو دا اللي ربنا قدره عليه علقه ووصولات امانه

قالي : مهو طلق البنت وراح رفع قضايا بالوصولات دي ع الواد
انا بقي حكيتلك الحكايه دي كلها ليه؟
قولتله : ليه يا معلم؟
قالي: لان انا مطلوب أشهد في النيابه علي اللي حصل
دلوقتي الواد مستنينا عند المحامي فلان هنروح نشوف هيقولنا ايه
قولتله : محامي ونيابه ؟ 

وانت يابني مالك ومال دا كله " ميولع الواد واللي جابوه
قالي : اصل انا حاولت اصلح بينهم واروح لجوز البنت عشان
يدينا الوصولات دي وهو رفض
الغريب كمان ان البنت بتحلف بالايمانات كلها
ان الواد هو اللي اتهجم عليها هههههههه
شايف البجاحه
وانا هشهد اني شوفت الواد مضروب ومتعور ليلة الحادثة دي
المهم
روحت انا مع صاحبي لمكتب المحامي اللي الواد موكله

 ( اصل الباشا رافع قضية هو كمان 
انه انضرب ومضي الوصولات دي بالاكراه)
لقينا سيادته مستنينا ومعاه اتنين كمان
المهم طلعنا كلنا عند المحامي
انا استنيتهم بره لاني ماليش دعوه بالحوار دا كله
وهم دخلوا عنده
عمنا المحامي بقي بيقول ايه لصاحبي :
انت مستعد تشهد باللي حصل وتقسم بالله عليه ؟
قاله: ايوه انا مستعد اشهد اني شوفته مضروب
قاله : لا    "  تشهد ان جوز البنت ضربه ومضاه ع الحاجات دي
غصب عنه عشان المحضر ينجح وصاحبك ياخد حقه
قاله : لا مهو انا مش هشهد علي حاجه مشوفتهاش
انا سمعت الكلام دا
خلاصة دا كله
ان المحامي عايز محمد صاحبي دا يشهد علي حاجه مشفهاش
علشان قال ايه ينقذ صاحبه اللي هو اتمسك مع البنت
شوفتوا الناس بتفكر ازاي؟
انا بقي قررت اني احكي دا كله واوجع دماغكم علشان
فيه شوية اسئله هتكسر جمجمتي مش لاقيلها اجابه
هو للدرجه دي فيه بنات كدا؟
طيب هي اتجوزت وربنا المفروض انه ملي عنيها بكل حاجه
ايه بقي لازمتها الرمرمه ؟

ولا الواد اللي سمح لنفسه انه يدخل بيت حد في غيابه
وياخد حاجه مش بتاعته حتي ولو هي اللي دعته ليها
راحت فين الامانه؟
والمحامي اللي اساسا دي شغلته انه يزور الحقيقه
ويخلي الحق باطل والباطل حق
انا عايز منكم لما تقروا الموضوع دا للاخر تقولولي بجد
تقولوا ايه للاشخاص دي
البنت
جوزها
الواد المدرس
المحامي
وتقولو ايه لصاحبي

يلا اشوفكم بخير الاجازة الجايه
سلام

الثلاثاء، 29 ديسمبر 2009

اللي اختشوا ماتوا

علي فكره يا جماعه الاسلوب اللي مكتوب بيه
البوست دا زي ما حصل بالظبط في الاحداث
زي ما ورد في الأحداث بأسلوب قائله وليس بأسلوبي
وان كان فيها بعض الاختصار
امبارح كنت بزور شخص عزيز علي جدا
هو ساكن في مكان بعيد عني شوية(  دمنهور )
كان هدفي من الزيارة دي اني اشوفه لاني وحشني اوي
وثانيا لاننا هنروح سوا نزور واحد صاحبنا بردو تعبان شوية
بعد ما خلصنا مشوارنا قعدت انا واياه نتمشي شوية في شوارع مدينته
كنا بليل والجو بجد جميل  وهو انسان ميتشبعش منه
خاصة وان دمه اخف من الشاي اللي بشربه بليل
قالي بص انا هحكيلك حكاية بس سر بيني وبينك
الحكايه دي هتخلي شعر راسك يوقف
حاجه مبتحصلش غير في الافلام
قولتله قول ياسيدي انا شعري ابتدي يوقف اصلا
قالي طيب صحصح معايا كدا وفوق وخليك معايا في كل كلمة
ومتسرحش في المناظر اللي حواليك ( وش بيغمز)
قالي السنه اللي فاتت واحده زميلتنا بعد احنا ما خلصنا كليه
قالتلنا يلا نعمل مجموعه وندي دروس واهو المكان موجود وكل حاجه جاهزه
يعني مش ناقصنا الا شوية دعايه
المهم وافقنا ع الموضوع خاصة واننا لسه شباب طالع جديد وعايزين نعمل حاجه
قعدنا وظبطنا الكلام فلان هيدي علوم وفلانه هتدي عربي
وانا كذا وفلان كذا
تمام كدا ؟ 
قولتله : اخر تمام والله
قالي كانت المشكله في مين هنجيبه يدي انجليزي
المهم جت زميلتنا دي قايله : فلان
وقعدت تشكر فيه وانه كويس وشغال كويس وملتزم في شغله
قعدت تقول قصايد في الواد
قولتلها ياستي خلاص هو احنا هنتجوزه هاتيه
المهم وهي بتتكلم عنه كدا قولت عادي دا زميلنا بردو
قولتله : يمكن يكون الجو بتاعها يامعلم
قالي : متسبقش الاحداث خليك معايا واحده واحده
قولتله : شغال ... كلي اذان صاغيه
كل دا واحنا ماشيين في الشارع والجو بديع لسه زي ماهو
قال صديقي
وابتدينا الشغل ياخويا والعمليه مشيت وابتديت الاحظ حاجات غريبه
الاتنين دايما قاعدين مع بعض . وكلامهم كتير اوي
وكل ما تحصل مشكله تلاقيهم هم الاتنين ليهم نفس الراي
عمرهم ما بيختلفوا ابدا ودايما نطلع احنا اللي غلطانين
قولتله : مش بقولك دول انتيم يا معلم
قالي : يابني اسمع بس
قولتله : خلاص مش مقاطعك تاني ..
 جو أهيد وخلي بالك من التفاصيل الصغيره
قالي : النهارده جايباله اكل ومشروبات وبكره قاعده تشكيله همها
قولتله : طيب وانت زعلان علشان بتشكيله همها ولا زعلان ع الاكل
والمشروبات ؟
قالي : بص يا ابراهيم انا خلقي ضيق ومتقفلنيش
هههههههههههه ( علي فكره كلمة خلقي ضيق دي هو مشهور بيها وسطنا )
المهم كمل كلامه وقال
ومرت الايام والسنين
قولتله : سنين ؟ سنين ايه يابني
قالي: يابني عديها مش قولتلك هتخليني اسكت ومتكلمش
كل دا وانا مش مبطل ضحك لان طريقته في الكلام
وخفية دمه شىء لا يمكن وصفه
قالي وبعدين اتعزمنا علي فرحها
قولتله : فرحها ؟ ايه دا هي كانت مخطوبه؟؟
قالي : ااااااااااه هو انا مقولتلكش؟
قولتله : لا
قالي : دي كانت مخطوبه لواحد تاني
قولتله : يابن الذين وسايبني اقول عليهم مظبطين وجو وبتاع
قالي: مانت عمال ترغي ومش راضي تسمع وانت ساكت
قولتله: المهم يا ريس وروحتوا الفرح..
قالي : روحنا الفرح والواد راح ورقص رقص ياابراهيم
ولا كأنه فرح امه
انا بضحك
المهم خلصنا ليلتنا وهنيناها وبتاع 
وكل واحد راح يشوف مصلحته
بعدها باسبوع كنت رايح عند واحد زميلنا 
في محل (....) ( صاحبي اللي بيتكلم مش انا )
وبعدين لقيت فلان بيتكلم في التليفون معاها ( فلان دا جديد خالص غير الاولاني)
وهاتك ياضحك ويامسخره
قولتله : بيكلم مين ؟
قالي : انت توهت ولا ايه ؟ بيكلم .....
قولتله :العروسه اللي لسه متجوزه؟
قالي : اه هي
قولتله : اللي فرحها كان من اسبوع وروحتوا والواد راح وقعد يرقص وبتاع
قالي : متحكي انت احسن
ههههههههههه
قولتله : بجد غريبه طيب وهي بتكلم فلان الجديد دا ليه يعني
قالي : ........ بعيد عنك اصلها كانت معانا في الكليه
وكانت فتاحاها ع البحري شوية وعادي يعني
قولتله : عادي ايه دي بقت متجوزه تكلم فلان ليه؟ وجوزها فين؟
قالي : اللي حصل بقي . المهم قعد يكلمها وهي تكلمه وانا هتنقط
وعقلي يودي ويجيب واقول اه يابنت ال........... هو انتي لحقتي
بس وعدي كمان شوية ايام ورجعت صاحبتنا الشغل تاني معانا
راجعه بقي ايه حاجه تانيه خالص
قولتله : طبعا ياعم مش اتجوزت بقي . عايزة تعرفكم انها عندها حاجات كتير
قالي : لابسه ياخويا بنطلون جينز هيتقطع من كتر ماهو ضيق وحاجات
تانيه فظيعه وحاطه في وشها يجي 5 كيلو مكياج
قولتله : عادي يابني عروسه جديده بقي وشايفه نفسها
قالي : دي لسه فرحها كان من 10 ايام وايه اساسا اللي نزلها
وبعدين فين جوزها ف كل دا
وقعد الواد يتكلم ويشتم فيها وفي اللي جابوها( اصل صاحبي لسانه فالت شوية)
كمل كلامه وقال: صاحبنا بقي ( يقصد صاحبنا المدرس اللي كان مأنتم معاها)
حاله انقلب وكل يوم والتاني يغطس ومنعرفش بيروح فين
نسأله انت يابني بتروح فين وبتسيبنا كدا
يقول اصلي متعرف علي بنت جديده انما ايه ........
 وبروح أدحرج التماسي وكدا يعني
والواد يجي الشغل كل يوم حاله مدهول ومش عارف يسند طوله
ولاحتي صاحي للي بيعمله
قولتله : كتر خيره والله يامحمد ( اديكم عرفتو اسم صاحبي) هيلاقيها منين ولا منين
قالي : وف يوم من الايام جاله تليفون واحنا مع بعض بليل
راح قايم وقال طيب سلام دلوقتي يا جدعان عندي مصلحه
هخلصها ونتقابل بعدين
واحد صاحبنا جري وراه وكلمه مش عارف ف ايه كدا
وسابه ومشي
انا حسيت ساعتها بس ان والله في مصيبه هتحصل
ياتري ايه اللي هيحصل؟
اكملكم بعدين دا لو قولتو كمل
لان لسه الموضوع كبير بجد
وفعلا اللي اختشوا ماتوا

الجمعة، 25 ديسمبر 2009

لا تحزن




 اثناء تواجدي في مسجد المعسكر وقعت ايدي علي كتاب
مطبوع طباعه فاخره جدا وشكله في منتهي الجمال
اخدته وقلت اشوف ايه الموجود جواه ومكنش ابدا في بالي
اني اقرا منه حاجه لاني بقيت قليل القراءة جدا في الكتب المطبوعه
الكتاب اسمه ( لا تحزن ) لفضيلة الدكتور الشيخ ( عائض القرني )


ومن اول كلمة قريتها وحسيت بجد ان الكتاب اسرني بسبب بساطته الشديده
واسلوبه الحيوي الاكثر من ممتاز
ولما انطبع الكتاب واتوزع باع اكثر من 3مليون نسخه في العالم
العربي بس واصبح الكتاب الاكثر مبيعا في العرب
الكتاب فيه وصفات سحريه لمرضي القلق والاضطراب النفسي
ودعوه لنبذ الحزن والتنعم بكل ما في حياتنا من اسباب السعاده
مش عايز اقولكم قد ايه كنت مستمتع جدا وانا مع الكتاب دا
وقدا ايه استفدت منه كتير خاصة خلال الفتره الاخيره اللي انا مريت بيها
وعشان الفايده تعم الجميع
قلت في نفسي لازم ابلغ كل اللي اعرفه وكل اللي بحبهم انهم يقتنوا هذا الكتاب
بجد مش هتندم ابدا انك قريته او ضيعت فيه لحظات من وقتك
انا بتمني الجميع يشتروه
واللي مش هيعرف يوصله
انا دورت ع النت ولقيته الحمد لله
ان شاء الله هيعجبكم وهتستفادوا منه
وابقوا ادعولي

الأربعاء، 23 ديسمبر 2009

شكرا


اولا السلام عليكم اخواني واخواتي
ثانيا
انا بقدم كل شكري لكل اصدقائي اللي
قدموا واجب العزاء ليا في وفاة جدتي الحبيبه
سواء كان علي المدونة او علي التليفون
وجعل الله ايامكم كلها خاليه من الاحزان
وفي الجنة نلتقي ان شاء الله
انا كويس الحمد لله وحالتي المعنويه مستقره
بعض الحزن لكنه ليس حزن مطغي
يعطلني عن استكمال حياتي
لكم جميعا اسمي مشاعر الحب
واسال الله ان يجعل دعواتكم مستجابه
وان يسكنها فسيح جناته
اللهم امين

الجمعة، 18 ديسمبر 2009

انا لله وانا اليه راجعون



لم اكن اعلم اني عندما رايتها امس وانا استعد للسفر
في الفجر ان هذه اخر نظراتي اليها
تلقيت نبأ وفاتها في المساء فارتجف قلبي
واقشعر بدني وانصبت الدموع تنهمر من عيني
حينها صمم الجميع ان اذهب لحضور الجنازة
ماتت جدتي الحانيه الطيبه
التي مازلت اتذكر بسمتها وهي تفتح ذراعيها وهي تحتضني
كلما قدمت في اجازة
ماتت دون ان تؤذي احدا او يتاذي منها احد
رحمك الله يا جدتي
اللهم انك تعلم اني ليس لي سوي دعائي ودموعي
التي تنهمر مني الان
اللهم ارحمها وسامحها واعتق رقبتها من النار
اللهم اجعل قبرها روضة من رياض الجنة
اللهم انسها في وحشتها
وبلغها مني السلام
وبلغها باني ساستغفر لها مادام لساني ينطق
وسادعوا لها مادام بي رمق من حياه
فراقك صعب
لكن اطمني فعلامات رضا الله عنك قد وضحت
فقد مت في ليلة جمعه
وفي ليلة مباركة ليلة راس السنه وفي شهر مبارك
شهر الله المحرم
والله يا جدتي
ان العين لتدمع
وان القلب ليحزن
واني لفراقك لمحزون
ولن اقول الا ما يرضي ربي
انا لله وانا اليه راجعون

الثلاثاء، 15 ديسمبر 2009

والله العظيم مش انا



اولا ازيكم كلكم
عايز اقول لكل اللي سالوا عليا انا بخير الحمد لله
وكل شىء تمام
وانا اللي كنت غايب  بقصد
كنت حابب ابعد شويه
يعني تغيير جو ممكن
او الهروب من الجو احتمال
وملقتش مكان اكون متواجد فيه وانا بالي خالي
مش خالي اخو مامتي هههههههه ( رخم اوي )
غير اللي المكان اللي انتوا عارفينه
وعدي يوم ورا يوم
وانا مستمتع بجد
عايش مع بشر من اصناف وطباع شتي
الطيب والشرير والمؤدب وقليل الادب
كله كله
بس مدونتي والناس واللي فيها مغابوش بجد عني
وحنيني ليهم كان كل يوم بيزيد
وكان قدامي اختيار من اتنين
يا اما اروح البيت علشان اشوفهم واطمن عليهم
يا اما استني هناك واتصرف
ففضلت استني هناك
بس اتصرف ازاي
لغاية ما صدفة لقيت واحد زميلي معاه موبيل فيه نت
( بس اوعوا تقولوا لحد علشان ميتاخدش منه )
المهم
جيت طالب منه انه يدخل علي المدونة
وقد كان
وشوفت شىء مستفز بجد
حاجه تخلي الواحد يجيله شعور بالكيد والغيظ
واحد مريض نفسيا مقدرش اقول عليه غير كدا
دخل الشات بوكس وكتب كلام باسمي
كاني انا اللي بقوله
وبدا يشتم الناس بقلة ذوق
انا مش عارف ليه فيه ناس كدا
ليه فيه حد جبان كدا
مهو لو هو فيه ذرة شجاعه ومسؤليه مكنش عمل كدا
طيب هيستفاد ايه
اكيد الناس لما تقرا كلامه مش هتصدق انه انا
خاصة الناس اللي تعرفني كويس
والحمد لله
هم اتصلوا بيا وقالولي ان فيه حد بيتكلم باسمي
يعني اللعيه اللي بيلعبها بانت
انا بقوله عيب كدا
ولو انت زعلان مني ف حاجه قولي
قولي قدام الناس دي كلها
ولو انا غلطان هعتذرلك قدامهم بردو
لاني مش جبان زيك
وعلي فكره
انا جيت النهارده مخصوص علشان اشوف الحكاية دي
وكنت ناوي اشيل الشات بوكس خالص
واعمل اشراف ع التعليقات كمان
بس لقيت اني كدا هحط نفسي في مواجة عيال
اطفال يعني
ورجعت عن قراري دا
عشان كدا بقولك
اعمل كل اللي انت عاوزه
واذا خاطبك السفيه فلا تجبه
فخير من اجابته السكوت





الثلاثاء، 1 ديسمبر 2009

لازم اتكلم



مش ذنب الانسان انه يلاقي نفسه بيحب حد
ويوصل حبه له انه يتعلق بيه لدرجة انه مش ممكن يتخيل ابدا حياته من غيره
ويفضل يبني احلام واحلام وكل حلم يجره للتاني
ويعيش اسعد ايام عمره
لكن ميعرفش ان القدر مستنيه وان فيه حاجات كتير مكشره انيابها
ومستعده انها تقتل احلامه دي وتموت اي لحظة سعاده كان بيعيشها
ويقف الانسان دا عاجز بمعني الكلمة
يبكي.... وهيعمل ايه البكاء؟
يتحدي حياته؟.........يتحدي القدر؟
مين عنده استطاعة انه يتحدي القدر؟
ويعيش متخبط
مش عارف يعمل ايه؟
يعمل ايه وكل حاجه بتضيع منه؟
يبقي مفيش غير الاسف
يمكن دي الكلمة الوحيده اللي ممكن يقولها
لانه ضعيف
لانه عاجز
لانه ميستهلش حتي ان حد كان يهتم بيه
مش ممكن يكون انسان
مش ممكن يكون جواه احساس
لانه معرفش يحافظ علي اجمل حاجه في حياته
الدموع اللي نازله دي عمرها ما هتغفر اللي عمله
بقي كابوس
ومش عايز يفوق منه
لازم يرحل دلوقتي
لازم ميظهرش في حياة اي حد تاني
زي المخدر بالظبط
لازم ينسحب من الجسم بهدوء
رغم الالم اللي هيسيبه
رغم العذاب اللي هيعيش بيه
بس لازم ينتهي من حياته
************
إذا ارت شيئا بشده فأطلق سراحه
فإن عاد اليك فهو لك
وإلا
فهو لم يكن لك من البدايه