Pages

الخميس، 25 فبراير، 2010

اعد رسم وجهي



ملامحي ضاعت منذ سنين


بين نفــــايات ٍ  وركـــــــــام


ما عـــــــدت أذكر أوصافي


ذاكرتي مســـحتها الايـــــام


من فضلك ارسم لي وجهي


رجــــــع لي نفسي , لأنام

الاثنين، 22 فبراير، 2010

اه من الانفلونزا

امشير بقي وعمايله
زي ما امي قالتلي
اصله بحالات
يوم حر وفجأه يقلب بريح ومطر وزعبايب
يعني من الاخر محدش ياامن له
بس انا وقعت في الفخ دا
من كام يوم لما كان الجو حر
قلت لا مش هيضحك علي بردو
وهفضل متقل هدومي ولابس كل الدولاب
رغم اني مش بستحمل الحر
تاني يوم لسه الجو حر
معلش استحمل شويه
تالت يوم
رابع يوم
قلت خلاص
لا بقي
الصيف جه خلاص
وجيت مخفف
والله مش مخفف اوي
وخرجت ومشيت وعادي
ولا سمعت كلام الست الوالده
اللي قالتلي
يابني هتاخد برد
قلت لالالا
الموضوع ماشي تمام
لغاية ما سافرت الجيش
من يومين كدا
وهناك بقي شوفت اللي نص مصر شافته زيي
صدااااااااااااااع
حكه
رشح
زوري مسدود مش عارف ابلع
ولا عارف اتكلم
وعنيا احمرت
واشتغلت الانفلونزا في كل جسمي
حتي وصلت لنخاشيشي
حلوة نخاشيشي
صح
واديني اهو
بقي عندي صيديله برشام
ومشروبات ساخنه
وباره
والناس بتبعد عني وهي بتكلمني
اصل انا ممكن اكون بقيت مخنزر
يعني عندي انفلونزا خنازير
والعياذ بالله
عموما ولا يهمنا
خنازير
فراخ
ان شالله حتي تبقي انفلونزا نسانيس
يلا
متقروش البوست دا للاخر
لانكم هتعطسوا بعد ما
تخل .. تخل.....
تخل
تخلصوه
هااااااااااااااتشي


الخميس، 18 فبراير، 2010

شعره

لو كل واحد فينا فكر لحظة قبل ما يعمل اي حاجه
ايه نتيجة الحاجه دي؟
وايه هيكون تاثيرها القريب والبعيد عليه
وحتي علي اللي حواليه
اكيد
كانت افعاله كلها مش هتكون زي الصورة اللي بقت عليها
لاننا دايما مش بنشوف نفسنا وقت اي فعل
زي بالظبط اللي بيبص لنفسه في المرايه
استحاله يشوف حركة عنيه وقت ما بيحركها يمين وشمال
عجبتني اوي جملة سمعتها في اخر فيلم لاحمد حلمي
وتقريبا هي محور الفيلم كله
الجمله بتقول :
( احنا ممكن نغير الواقع علشان احنا اللي بنعمله....
لكن مش ممكن ابدا نغير القدر علشان بيحصل لينا)
لما سمعتها عرفت انا ليه كتير كنت بتصرف غلط؟
علشان مكنتش بفكر صح
فيه حاجات كتير ليها نفس النتيجه
لكن الطريقه مختلفه... ممكن صح او غلط
مثلا
زي انا مثلا لما بصرف الفلوس
النتيجه واحده
ان الفلوس ضاعت
لكن مرة صرفتها ع التليفون والكلام عمال علي بطال
والمرة التانيه اديتها لوالدتي
هي هي نفس النتيجه
لكن الشعور هو اللي مختلف
هو دا تغيير الواقع
واحنا واقعنا مليان حاجات زي دي عايزة تتغير
دور كدا علي اخر حاجه عملتها وكانت نتيجتها سلبيه
فكر ثواني
لو رجع بيك الزمن لورا شويه
هتتصرف نفس التصرف؟
اكيد
مش ممكن
عشان دايما بيكون
بين الصح والغلط......... شعره
وبين الحياه والموت بردو شعره
وبين انك اتكون انت او تكون حد تاني خالص غيرك
هي هي نفس الشعره

السبت، 13 فبراير، 2010

ماشي الحال




كنت وعدتكم اني هكتب بوست من فتره
بس مكتبتنش
بجد مكتبتش لانه غصب عني
معرفتش
الوقت كان ضيق اوي
وبعدين جه عفريت النت وقطع
اصل النت عندي بحالات
عامل زي اسطوانات البوتاجاز اليومين دول
ساعه موجود وايام متشمش حتي ريحته
المهم
عشان بس منزعلش مننا السيد وزير النت
والسيد وزير الجاز وخلافه
خلال الكام يوم اللي فاتوا دول
حصلت حاجات كتير اوي اوي
مش هقول في البلد
لان بلدنا بتحصل فيها حاجات كل ثانيه
لا
حصلت حاجات في حياتي شخصيا
حاجات اتصلحت
وحاجات باظت
حاجات انضافت
وحاجات اتشالت
والحاجات دي كلها
اما بفعل فاعل
واما بفعل عوامل الزمن
وبعد ما دا كله حصل
وقفت كدا مع نفسي وقفه وقلت
انا كدا كويس
ولا الاول
بصراحه ملقتش اجابه
لكن المؤشرات بتقول اني كدا كويس
بس الاول كنت اكوس من كدا شويه
الحمد لله
اااااااااااااه
نسي والله معلش
اقولكم
وحشتوني اوي بجد
وحمدلله علي سلامتي ليكم
هههههههههههه
قاعد اسبوع علي قلبكم
حضروا بقي المسكنات
وبرشام الصداع
والكحه
ولو عندكم ( تاميفلو) ياريت
علشان البوست الجاي
هيكون عن
الطيور
ملحوظه بقي صغنطوته
علشان مستعجل اوي
محدش يقولي هابي فلانتين
عشان بزعل والله م الكلمة دي
يلا بقي
روحوا اشتروا الدباديب
تحياتي

الخميس، 4 فبراير، 2010

بعيدا عن العواطف

بعيدا عن العواطف اللي مش متظبطه
والعواصف اللي عماله تخبط فينا
انا جيت النهارده
عشان اقولكم اني الحمد لله كويسه جدا
صحيح انا غبت شويه
لكن طالما بعد كل غيبه فيه رجوع
يبقي ما احلا الغياب
بجد شكرا لكل اللي سالوا عني
واللي ردوا ع البوست اللي فات
واللي يعني ادوه اكتر من حقه شويه
بس دا عرفني قد ايه الناس دي فعلا
يستاهلوا كل التقدير
لانهم فعلا ناس محترمين من جواهم
ان شاء الله هكتب بوست تاني علي بليل كدا
لاني ماشي الصبح تاني
بس اوعدكم بعد كدا هتلاقوني موجود علي طول
تحياتي لكل اللي بحبهم
اسما اسما
شخصا شخصا
حتي لا انسي احد