Pages

الأحد، 14 مارس 2010

اتق شر كل من اقترب من الارض

كل يوم بشوفه
هادى جدا لابعد الحدود
مش بيكلم حد إلا بحدود برضه
بقابله كل يوم في المسجد ولاقيه قاعد في نفس المكان
ماسك المصحف وبيقرا فيه قبل ما تقام الصلاه
وبعد ما ننهي الصلاه بيكون اول واحد ياخد بعضه ويخرج
حتي لما كنت بدخل والقي عليه السلام
مش عارف كان بيرد ولا مكنش
ما علينا
حتي مكنتش اعرف اسمه رغم اني بقالي مده مش قصيره
في المكان دا وتقريبا كدا عرفت كل الناس
انما هو علشان مكنش بيظهر في الكادر كتير فمكنتش شاغل نفسي بيه
بالرغم انه كان ( رتبه ) كبيره في ال army لكن شكله من غير اللبس الميري
لا يوحي بكدا خالص
اصله باين عليه انه شارب الهم من كيعانه ومبهدل في نفسه
والحاجه الاغرب فيه انه قصير اوي انا حتي استغربت هو دخل ال army
ازاي دا بالكاد ممكن يكون 160 سم
طيب انا عمال اقطع في فروة الراجل ليه يعني
واحنا مالنا وماله .. مانسيب كل واحد في حاله
ماشي
بس من يومين بالظبط حصلت حاجه غريبه اوي
حتي من صدمتي مكنتش مصدق
وقعدت اليوم بطوله لغاية ما استوعبت اللي حصل
ها.. احكي ولا ايه
طيب طيب هحكي وامري لله
واحد زميلي نادي عليا او نادم عليا باللهجه الصعيدي العسل
قالي تعالي اكتبلي حاجه معلش فأنا علشان قلبي حنين واخضر زي قلب
الوز روحت عملتله اللي هو عايزه
وساعتها كنت لابس بنطلون ترننج وتيشرت بتاع كورة لبس رياضي يعني
خلصت الكتابه دي وخرجت لقيت كام واحد كدا واقفين وقفت معاهم
ومش عارف بجد اللحظه دي كنت بكلم واحد وانا سرحان في حاجه تانيه
وبمد ايدي علشان احط ميداليه المفاتيح في جيبي وانا باصص لزميلي دا
عادي جدا خالص. مفيش اي حاجه
وصاحبنا اللي انا اكلت لحمه من شويه كان واقف قدامي مع واحد بيكلمه
قريب مني
وفجأة .. لقيته بيقول :
ايه هو في حاجه ضايعه في جيبك وبتدور عليها ولا ايه؟
بصيت في اتجاه الصوت لقيته بيكلمني
انا بصراحه قولت يمكن الراجل علشان شايفني قبل كدا
كذا مرة يعني وبنصلي مع بعض وزمل يعني وكدا وبتاع
قال يعني ممكن ممكن يكون بيهزر معايا
قولتله : أبدا يافندم والله دا انا بحط بس المفاتيح في جيبي
ووشي احمر بقي والوان الطيف ابتدت تترسم عليه
قولت خلاص الحكاية خلصت
لقيت الطيب الحنين اللي مكنش بيكلم حد ولا كان ليه صوت
فجأة برضه بقي وحش كاسر وعنيه احمرت ووشه اتقلب
وكان ناقص يطلع نار من عنيه
وقال: انت بتستهبل فاكرني هندي يا............ ولا ايه؟
الصدمة سمرتني في مكاني زي المسمار القلاوووووووظ
قولتله: والله مش بستهبل ولا حاجه يافندم انا بحط المفاتيح بس
وكمل الوحش كلامه
انت تبع ايه يا.... ؟
قولتله : انا تبع ......
جه قعد يرص جزاءات من كل حدب وصوب ومن كل شكل ولون
وانا والله منا مصدق اصلا ان الموقف دا شغال اساسا
هو في ايه؟
وراح باصص علي واحد جنبي كان مخبي سيجارة ورا ضهره كدا
وقاله: وانت ياباشا لسه مش عايز ترميها
مش عارف اصلا شافها ازاي
جه الواد رميها
قاله انت مالك مبتسم ليه كدا ؟ شوفت انا قولت ايه لزميلك
قاله : ايوه يافندم
قاله : شرحه
شرحه دي بلغتهم معناها يعني اعتبر نفسك زيه
واخد بعضه ومشي
وانا ولا مصدق كل اللي بيحصل
وبتدير لقيت كل اللي حواليا ميتين من الضحك
الظاهر انه مشهور بكدا وانا معرفش
علي طول افتكرت المثل اللي خليته عنوان البوست
اتق شر كل من اقترب من الارض
بس ما تقلقوش
الحمد لله انا منفذتش الجزاءات دي
اصل صاحبنا طلع نساي وقابلني بعدها بمفيش يعني في نفس
اليوم قولت دا هيعمل فيا البدع
طلع اصلا مش فاكر انه قابلني قبل كدا

هناك 11 تعليقًا:

sony2000 يقول...

طب الحمد لله انه نسي
والا كان هيبقي تشريييييييييييح فعلن
ههههههههههههه
بس ماتقولشي كدا علي القصريين كتير
ممكن تكون حاجه كانت مضايقاه وجت فيك
بس كدا نونكن اذعل
اكادو اعتبر منهم
فالمثل دا ولااااا تاخود بالك منه
هههههه

promise is promise يقول...

ايه يا عم الناس دى
معقول فى حد ممكن يقلب كده
من الهدوء للوحش الكاسر

يا عينى عليك اتظلمت
بس سيبك يا بخت من بات مظلوم ومابتيش ظالم

اياااااااام وبتعدى واكيد بتستفيد كتير منها وبتخلق منك راجل

تحياتى

غير معرف يقول...

ههههههه

لا ده تعبان شويه ... معلش استحملوه بقا

تحياتي

شمس النهار يقول...

صحيح النسيان نعمة

يارب الجيش ده يخلص علي خير

لحد دلوقتي مش فاهمه بيجندوكوا ليه

سلامي

Kiara يقول...

هههههههههههههههههه ياحيني

بس مالمهم القصيرين بئا

beautiful mind يقول...

sony 2000
ههههههههههه
وانا ميرضينيش زعلك
وبعدين اساسا 99% من البنات في مصر قصيرين يعني الموضوع دا عادي بالنسبه ليكم
يلا الحمد لله انها جت لحد كدا وبعد كدا هاخد بالي اوي
تحياتي يا سوني

beautiful mind يقول...

promise is promise
اه فيه ناس كتير كدا بيقلبوا فجأه وبيتغيروا في ثانيه
بس الراجل دا اللي عرفته عنه بعد كدا انه كان طول عمره شراني اوي وحصلتله حادثه معينه خلته بقي هادي
لكن الظاهر ان ريمه هترجع لعادتها القديمه
يلا ربنا يستر

beautiful mind يقول...

فتاه من الصعيد
لازم نستحمله
وبعدين هانت خلاص
يلا مرة تصيب ومرة تخيب
ربنا معاااااااااانا

beautiful mind يقول...

شمس النهار
ان شاء الله الايام هتعدي علي خير
اما بقي بيجندونا ليه عندهم 100 سبب
اهم واحد فيهم بيقولك : علشان نكسر نفسك ونطلعك جبان ومنافق وخواف وكداب ومعفن ومبهدل في نفسك وتمشي تكلم روحك وتتلفت حواليك ومتامنش لاخوك وتبيع اي حد في لحظه و و
بس

beautiful mind يقول...

كيارا
الاول بس حمدلله ع السلامه
عودا حميدا ومحمودا واحمدَ
وبعدين مالهم القصيرين
حد جاب سيرتهم؟
زي الفل اهم
مطلعين عنينا بس
وبعدين انا واحد منهم
دا انا مش باين من الارض
169 هروح فين يابنتي

الحياة الطيبة يقول...

موقف طريف ومخيف في نفس الوقت ,أنت بس ركزت على حالة غريبة وفعلا طلعت غريبة وعجيبة ,في المرة القادمة عندما تدخل المسجد لا تنظر له حتى لا يتذكرك ,اسلوبك مشوق في طرح المواقف ,اسمح لي مروري في مدونتك .