Pages

السبت، 21 يوليو، 2012

اللهم اني صائم




كل سنه وانتم طيبين وبلدنا بخير وكل المسلمين منصورين 
وان شاء الله تكون أيام رمضان أيام خير وطاعه وبركه
..............
احيانا كتيرة واحنا صايمين بنتعرض لمواقف مستفزة 
بنلاقي نفسنا نقول علي طول اللهم اني صائم عشان نفكر
نفسنا ونفكر اللي قدامنا ان الصيام له حرمة زي ما دينا علمنا 
اللهم اني صائم بقي انا بقولها كتير جدا كل يوم 
................

اللهم اني صائم من البنات اللي ماشيين في الشوراع
ولا فارقه معاهم ولا مع اللي جايبنهم ولسه بردو الهدوم زي ما هي
البناطيل في النازل والتيشيرتات في الطالع والموضات
معموله مخصوص لرمضان الهدوم بقت مرشوشه علي الجسم زي البويا ..
كأن البنت بترشها علي جسمها مع الاسبراي
هم دول مش صايمين ولا ايه ؟ طب هم ان شالله عنهم ما صاموا
احنا نعمل ايه ؟..... نغمض عنينا ونمشي ولا ايه بالظبط
وزعلانين ان فيه تحرش وخطف ....
دي بقت حاجه تخلي الميت يموت تاني
.........................
اللهم اني صائم من سواقين الميكروباصات والتكاتك والحاجات دي
بالاغاني اللي قرفنا بيها في كل مواصله بنركبها ولما تكلم حد فيهم 
وتطلب انه يوطي الصوت شوية تلاقي ماسورة مجاري اتفتحت في وشك
الفاظ سافله وقلة أدب وكأن فئة السواقين دي لازم عشان تبقي واحد منهم
لازم تبقي قليل الادب وصايع وحشاش ولو محترم يبقي هتاخد على دماغك
هي الناس دي محتاجه ايه عشان تنضف يا جماعه ؟
......................
اللهم اني صائم من الناس اللي مش بيحلالها الخناق غير في رمضان
وكأنها بتدفعنا ضريبة انها صايمة ... صيام ايه دا اللي كله شتايم وسب ولعن
ولما تحب تكلم حد منهم نلاقي الف واحد يقولك : سيبه عشان صايم
هو انت يعني لو مش صايم ياخويا كنت هتكون مؤدب ومش بتاع مشاكل
انت اصلا لو فاهم ايه الهدف من الصيام كنت عرفت ازاي تصوم
نصيحة : لو شوفت اي اتنين بيتخانقوا قدامك في رمضان
اوعى تعمل نفسك بطل وتروح تسلك بينهم واسمع كلام ستي الله يرحمها
ما ينوب المسلك الا تقطيع هدومه وضياع صيامه

......................

اللهم اني صائم من الجماعة بتوع الكهربا اللي بقى شغلهم اليومين دول
انهم يرزلوا علي خلق الله ويقطعوا عليهم الكهربا عمال علي بطال
ولا بيراعوا اي حاجه ولا اي ظروف طب والموضوع دا مظهرش ليه
غير دلوقتي مانتو بقالكم مليون سنه شغالين تمام لازم يعني يبقالكم نصيب
في الهرجله اللي البلد فيها ... ياجماعه حطوا في اعتباركم الناس التجار 
اللي البضائع بتاعتها باظت في التلاجات والاكل اللي ناس بترميه عشان
فسد من الحر والجوامع اللي لما الكهربا بتقطع بتبقي زي الفرن 
استقيموا يرحمكم الله

.........................

اللهم اني صائم من الجماعه بياعين العصير اللي في الشارع
واللي بيحطوه في اكياس كدا وتلاقي ع الكيس من بره نقط ميه
وانت ماشي في الشارع والشمس واكلاك من الحر وفجأة وبدون اي مقدمات
تقع عينك ع الأكياس دي ساعتها بيجيلك جنون العطش
فبضتطر انك تدير وشك وتمشي وانت بتتقطع من جواك بس متزعلش
كله بثوابه وربنا عنده كتييييييييير

............

اللهم اني صائم من التليفزيون بتاعنا ومن ال 500 مسلسل اللي هيتعرضوا
هي الناس دي متخلفه للدرجة دي هو مين اصلا هيقدر يتابع الكمية دي
دا لو افترضنا ان فيه حد ناوي يضيع وقته وصيامه ويقعد يتفرج
وبعدين حرام والله المبالغ الخرافية اللي اتصرفت علي الافساد دا
مش مراعيين ان البلد عايشه ازمة وانها داخلة علي مرحلة افلاس
اذا كان ربنا بيسلسل شياطين الجن في رمضان عشان ميغووش الناس
فشياطين الانس شايفين شغلهم تمام التمام وعارفين ازاي يحققوا هدفهم
فين الرقابة ؟ هي اتشالت في الثورة ولا ايه ؟ دا احنا مكناش نص كدا
ايام المخلوع ولا هي ثورة علي كل حاجه واي حاجه وخلاص

..............
كل سنه وانتم طيبين

هناك 8 تعليقات:

غير معرف يقول...

اللهم إنى صائم / عبارة تذكرنا بكثير مما قلته ولكن لابد من إرضاء الله فى كل الشهور وكل الأوقات ولكن الناس فى ذلك الوقت أصبحت تبحث عن السىء وتفعله وعن الذنوب وتعملها ربنا يرحمنا ويعفو عنا يارب وجزاك الله خيرا على موضوعاتك الرائعة وأسلوبك الشيق .
أنا بحب مدونتك أوى

شمس النهار يقول...

بالنسبة للبنات انت اصلا بتاخد ثواب غض النظر
:))
خد ثواب والعداد شغااااااال
بالنسبة لبتوع العصير ازاي في نهار رمضان في بلد اسلامي؟؟
بالنسبة للخناقات دي بفعل انسحاب النيكوتين
:))
اصلا باقي السنة الناس بتتخانق

التليفزيون اغلااااااااااق
كل سنة وانت طيب :)

سندس يقول...

اللهم اني صائمة..بس اكثر شيء بيستفزني الخناق في رمضان ...فيه ناس فاكرة ان الصيام عن الأكل والشرب بس ربنا يهدي

ماما أمولة يقول...

كل سنة وأنت طيب وبخير يارب
ويكفيك شر القهر باء :)

dodo, the honey يقول...

مهما يكن فرمضان شهرٌ جميل و مبارك مهما حفل بتلك الأمور المزعجة !

رمضان كريمــ
:)

غير معرف يقول...

السلام عليكم ورحمه الله وبركاته
وصف رااائع لما يدور بخاطر كل مسلم فهو واقع نعيشه ف حياتنا اليوميه وليس امامنا سوي الدعاء للتغيير لان الله لا يغير ما بقوم حتي يغيروا ما بأنفسهم.

بنوته مسلمه

Tarkieb يقول...

بالنسبة للبنات انت ماشي في شارع ايه ده...البلد كلها لابسة اسدالات وشولة...العصير ده للفطار هو انت تطنش الطرشي وتبحلق في التمر هندي ...الخناقات قبل رمضان زي رمضان يامعلم....الميكروباصات ده عشان مفيش دولة من زمان بتهتم بشعبها ودول بيستغلونا...رمضان كريم يامعلم

غير معرف يقول...

يـظن حين أتحدث عن ذكرياته أنني لازلت أحبه ويظـن حين أكتب عنه بعين الرضا أني لا زلـت أتمنى عودته و لا يـــدرك !!!أنني منـذ أن فارقته " عددتـه ميتاً " فحديثي الأبيض عنه لايعد إلا إمتثالاً لقول المصطفى : أذكروا محاسن موتاكم