Pages

الجمعة، 16 أبريل، 2010

تاج جرىء جدا



السلام عليكم احبائي 
ازيكم كلكم ويارب تكونوا بخير وبصحة وسعاده
اكيد طبعا كلنا عارفين التاج وانه عبارة عن شوية اسئله 
كل واحد بيحاول يجاوب عليها بصراحه
ومن قلبه لانها بتعرف الناس كلها اللي بيقروا الاجابات
عن حياتنا اكتر وبيقربوا منا اكتر واكتر
بصراحه الاسئلة دي او التاج دا
لما قريته في موقع من المواقع عجبني
مش علشان انا بحب نظام س و ج والكلام دا
علشان الاسئلة دي فيها شوية جرأة وطبعا اجابتها هتحتاج
جرأة اكتر
اتمني ربنا يوفقني اني اجاوب بصدق
يلا نبدأ

*
*
*

. ماذا ستكتب لنا لتعبر عن حياتك التي عشتها الى الان في كلمات قليله ؟

 
احيا لأبحث عن ذاتي

. اذا اردت ان تبكي الان , فعلى من تبكي؟

أبكي بجد علي نفسي وعلي شخصي
اللي اتغير كتير اوي منه وبحاول ارجع كل شىء زي ماكان
لكن فيه عقبات كتير لازم اتخلص منها الاول

من ستختار ليمسح دموعك ؟

أختار كل واحد بيحبني بجد وبيتعامل معايا
لشخصي انا مش علشان
حاجه  تانيه


لو خيروك بين حبيبك وبين اعز صديق فمن تختار ؟


مممممم
سؤال صعب بجد 
ومينفعش فيه الاختيار
لكن لو مفيش بد ان اختار هختار صديقي
لان الحب ممكن اعوضه اما الصديق مستحيل يتعوض
 

.من يسكن قلبك؟


اكيد اللي بحبه هههههههه


.هل تعتقد ان حظك سيئ؟


لا الحمد لله انا لا اؤمن اساسا ان فيه حاجه اسمها حظ
كل شىء مقدر والقدر طالما من عند الله
فلازم اتحمله سواء كويس او سىء


.هل هزمك حزنك في يوما من الايام؟


بصراحه  اه
مرة واحده بس
بعد قصة حب فاشله ويومها عرفت ان مفيش حاجه
في الدنيا تستاهل ان الواحد يحزن علشانها


.((مستحيل انساك)) لمن تقولها ؟


اقولها لكل اللي انا حبيتهم
لاني لما كنت بحب حد كنت بحبه وبجد
علشان كدا مستحيل انساهم


.(( اللي راح راح وماتفيد كلمة ياريت ))
إذا أردت ان توجه هذه العباره لنفسك, فماذا تقصد بها ؟


اقصد عدم البكاء علي اللبن المسكوب 
واني لازم ابص لنفسي كويس
وبلاش تفكير في اللي فات
لان التفكير في الماضي هيعطل مستقبلي اكيد


.(( انت كل شيء بحياتي )) لمن تقولها ؟


ممممممممم
لاشخاص معينه فمفيش حد اقوله كدا في الفتره دي
لان اللي كانوا يستاهلوا الجمله دي انا خرجتهم بره حياتي
لكن فيه اشياء كتير هي كل شىء بحياتي
منها مثلا
تفكيري في مستقبلي


متى اخر مره بكيت؟


لما توفيت جدتي بكيت بكاء مرير
وفضلت لايام كتيره بعدها بكائي لا ينقطع
ولما بفتكرها بردو دلوقتي بعيط علشانها
ربنا يرحمها ويتغمدها برحمته


اي الدول تتمنى ان تزورها ؟


بجد اتمني ازور السعوديه
ومش ازورها بس نفسي اعيش باقي عمري فيها
كفايه علي كدا


هل لديك الجرأه ان تقول عمرك أمامنا ؟


هههههههههههه عادي يعني
22 سنه و8شهور 
وبعدين ماهو مكتوب في المدونة 


هل انت راضي عن نفسك ؟

لا


.هل تؤيد الزواج العاطفي ام الزواج التقليدي ؟ ولماذا ؟


بص
كل واحد من الانواع دي له مميزات وعيوب
بالنسبه ليا انا انا اؤيد العاطفي
بس مش اي عاطفي
معني كلامي اني لازم اللي اختار اللي هرتبط بيها
واكون عارفها كويس جدا
التقليدي دا كان زمان ايام جدي وجدك ايام ما كانت البنت
بتوه لو خرجت بره الشارع بتاعهم
دلوقتي معدش فيه حاجه مضمونه
ولا ايه


.ايهما اهم شهادتك الجامعيه أم الزواج ممن تحب ؟


دلوقتي
الزواج ممن احب طبعا
بلدنا معدتش بتاعة شهادات 
ياعم خد شهادتي واديني فلوس اتجوز
انا موافق


.هل تعترف بشيء اسمه الصداقه بين الرجل والمرأة ؟


مممممممممم
علي حسب 
وعلي حسب شخصية كل واحد فيهم

.هل انت مدمن تفكير؟


لما بيكون في شىء يستدعي التفكير بس
لكن في الغالب مش بتعب نفسي في وجع الدماغ


.من هو اكثر شخص تفكر فيه؟

ايه يا عم حكاية الاشخاص دي
اكتر شخص بفكر فيه هو انا 
ودي مش انانيه
لاني لما بفكر ازاي هكون انا
فدا معناه اني بفكر في الاشخاص التانيه
معادله صعبه .. صح


.اذا تم تعيينك ملكا لجميع البلاد العربيه فما اول قرار ستتخذه ؟


احم .. احم
مرسوم ملكي من فخامة الملك المعظم ابراهيم ملك البلاد
اطال الله عمره وحفظه لنا امين جاء فيه
( أي سيدة مسلمة او فتاة بلغت المحيض تخرج الي الشارع 
وهي ترتدي زي السفور او غير مرتدية للحجاب الشرعي 
تعاقب عقوبة علنيه تقضي بقص شعرها عقابا لها علي فتنتها
للعيال الصيع اللي واقفين في الشوارع ولا شغله ولا مشغله )


.هل تكره شخص بشده في حياتك ؟


تصدق انا كنت برىء اوي ومكنتش اعرف يعني ايه اكره حد
لكن دلوقتي لما دخلت الجيش وعرفت اشكال والوان من البشر
بقيت بكره ناس كتير طلعوا ولاد تيييييييييييييييييت
 

.هل ملابس الشخص امامك تؤثر فيك لتأخذ عنه انطباع ؟؟


اه طبعا 
واي حد يقول غير كدا يبقي كداب
بص اصل بتخنق من اللي بيقولك كل واحد حر في لبسه
يعني ايه حر في لبسه
يعني تلبس هدوم مش هدوم اصلا وتمشي في الشارع
وتقولي المهم هي من جوا
لا طبعا اكيد اللبس المحترم بجد بيدي انطباع ان الشخص 
فيه شوية احترام


.ماالذي يلفت انتباهك بسرعه في الشخص لكي تعجب به ؟


انت تقصد الشخص راجل ولا ست
لو راجل فأنا بيلفت انتباهي طريقة كلامه بعرف منها علي طول
هو اي نوع من الرجال
اما لو بنت فبيلفت انتباهي حاجتين علشان احكم عليها
الحاجه الاولي طريقة لبسها
الحاجه التانيه والغريبه حركة عنيها
اكيد في ناس فهمت ولو فيه حد مفهمش يقولي في التعليق
وانا اشرح يعني ايه حركة عنيها


اذا احببت شخصا في الوقت الخطأ وفي المكان الخطأ فماذا تفعل ؟؟


ممممممم
اكيد قصة الحب دي مش هتنجح
علشان كدا بصارحه بحقيقة الامر
ان الموقف صعب بجد
وساعتها لو هو بيفكر صح هيفهم يعني


.حكمة تؤمن بها جدا؟؟


ما اصابك لم يكن ليخطئك... وما اخطأك لم يكن ليصيبك


.عاده تفعلها دائما تتمنى ان تتركها ؟

ممممممممممم
هو فيه حاجات كتير
حاجات ينفع اقولها وحاجات مينفعش
بس ممكن اقول اني اتمني ابطل اقعد ع النت 
الا لضرورة طبعا
واتمني ابطل ثقة زايده في الناس
دا اللي ممكن اقوله هنا


ماهو اجمل اسم لولد واجمل اسم لبنت من وجهة نظرك؟


يوسف 
ومريم 


.ماذا تفعل اول شيء اذا ربحت مليون ؟


مممممممممم
اشتري بيت كويس للعيله
واتجوز
انا مش انا ني علي فكره
خالص


.هل انت من لديهم رغبة حب التملك واذا تملك الشيء اصابه الملل منه ؟


ممكن اكون عندي حب تملك لكن لما املكه اكيد بعرف انا مالكه ليه
ومش بخلي الملل يتسرب لي منه 


.اعتذار تريد ان تقدمه لمن؟


لاي حد انا اسأت اليه في يوم من الايام
او تعديت حدودي معاه
وبعتذر كمان لاخواتي واخواني المدونين اللي مش بزورهم كتير
اكيد هم عارفين ظروفي 


 لمن تهدي هذا التاج من بعدك ؟


والله بهديه لاي حد دخل عندي وقراه وعلق عليه

هناك 37 تعليقًا:

الملاك الحزين يقول...

السلام عليكم

ممكن اخد اول تعليق

الملاك الحزين يقول...

ازيك يا ابراهيم


اخبارك ايه ياقمر يارب تكون بخير

الملاك الحزين يقول...

يااااااااااااااااااااه

التاج طويل اوووى

هقرئه على روقاااااااان

وارجع اعلق بمزاج
المهم انى حجزت مكانى فى المقدمه

دعاء العطار يقول...

ازيك ياابراهيم

اجاباتك حلوه

بس عايزه اعرف بقىى يعنى ايه من حركة عينها ؟؟؟؟

مش فاهمه بصراحه

فتاه من الصعيد يقول...

فعلا التاج صعب ... بس الاجابات جميله

تحياتي

beautiful mind يقول...

الملاك الحزين
مبروك عليكي التعليق الاول
يلا بقي اقري براحتك
وقولي رايك
مستننننننيه
تحياتي

beautiful mind يقول...

دعاء العطار
ازيك يا قمر
يسلم مرورك
انا اقصد بحركة عنيها
انها تبقي ماشية تبص علي كل واحد
وعنيها رايحه جايه
وتحسي كدا بحاجات كتير فيها
لكن البنت المفروض تبقي ليها نظرة محدده
وعنيها مينفعش انها تعلق علي كل حاجه
تحياتي يا دودو

ستيتة حسب الله الحمش يقول...

يعني يا سيادة الملك حفظه الله ها تقص لهن شعورهن؟
طب ما تشغل الصيع اللي ع النواصي :)
ده حتى الشعر الجرسون موضة دائمة
هههههههههههههههههههههههههه

اجابات عرفتني عليك اكتر
بحب انا قصة التاج دي

تحياتي

ستيتة حسب الله الحمش يقول...

اه نسيت يا باشا أقول لك
في أي وقت ها يكون فيه لقاء تدويني
سواء مصغر على مستوى القاعدة
أو مكبر على مستوى الشعب والأمة التدوينية
ها أديك خبر فوري
ده احنا نتشرف يا هيما

A32L MaGNoNa يقول...

تاج صعب فعلا
بس عجبتني اجاباتك أوي

ربنا يوفقك ^_^

ريمان يقول...

لازم يعنى تهدى التاج لكل اللى هيعلق؟

ههههههههههههههه


التاج جرىء فعلا وفيه اسئله محرجه

بس انت عرفت تخلع منها

ههههههههههههههههه


ربنا يحققلك كل اللى بتحلم بيه

وانا متفقه معاك فى اجابات كتير انت جاوبت عليها خصوصا موضوع اللبس ده


تحياتى ليك

الملاك الحزين يقول...

انا جيت ياقمر

بص بقا بجد التاج فظيع اووى وصعب اووى وبوعدك انى مش هجاوبه نؤهائى خلى الطابق مستور يا عمونا
ههههههههههههههههههه

ربنا يحقق ليك كل اللى بتحلم بيه
وربنا يرحم جدتك
وبجد مش لاقيه حاجه وحشه انتقدك فيها يا ابراهيم
انا لما كلمتك اصلا لقيتك انسان محترم وبتخاف على الناس
ربنا يحميك يارب ويسعدك

تحياتى ليك ياقمر

beautiful mind يقول...

دستيته
حاضر ياست الكل
هابقي اخلي العيال الوزرا بتوعي يوفروا فرص عمل للصيع
متقلقيش هنسيطر علي الوضع
بالنسبه للموضوع التاني
انتي وعدتيني
اما اشوف
انا مستني
يارب ما يكون كتير
تحياتي يا دكتور

beautiful mind يقول...

اعقل مجنونه
يسلم مرورك
وميرسي ليكي جدا
وان شاء الله تكوني بخير
تحياتي

beautiful mind يقول...

ريمان
لالالالالا
متهربيش
لازم تجاوبي
معلش هي اسئله بايخه
بس عايز اعرف اجاباتك
يلا
بطلي كسل
انا مستني اهو

beautiful mind يقول...

الملاك الحزين
تصدقي والله ماكنت اعرف ان النك نيم بتاعك
ماشي يا انوسه كدا تغيريه من غير ما اعرف
عموما ياستي براحتك
انا متشكر جدا لدعواتك
وحقيقي انتي حد كويس جدا وتستاهلي كل خير
يلا جاوبي التاج
ومتزوغيش بالحداقه

مصعب صلاح يقول...

السلام عليكم
الحقيقة التاج جريء وإجابات حضرتك متميزة
بالرغم إني معارضك في بعض الأمور هتعرفها حضرتك لما اجاوب ع التاج ده البوست القادم .. أنا علقت وقرأت أظن التاج من حقي

beautiful mind يقول...

مصعب صلاح
ماشي ياسيدي
كدا انتقل اليك
ومستني اجاباتك
علشان اعرف انت انتقدتني في ايه
ولو اني كنت اتمني اني اشوفها هنا
يلا ملحوقه
تسلم يا بو صلاح
تحياتي

روز يقول...

التاج دا فظيييييييييييييييع وجامد جدا بصراحة وجاوبت بحداقة جامدة
اخر حاجة
والرسوم الملكى دا حلو جدا
بس بشرط انك تطلع مرسوم زية ع العيال الرخمين الى بيعاكسوا ف البنات وروهمش شغلانة غير الماعكسات دا العدل ياريس
والنشيد الملكى
يطول عمرة ويزهزه عصرة وينصرة على مين يعادية هااى هئ

beautiful mind يقول...

روز
حاضر
هعمل مرسوم تاني للعيال
يادي العيال
ياريتني مبقيت ريس
بس النضيد مش هنغيره
دا ثابت
زي ثابت بولتزمان وثابت بلانك
ياروز
ابقي خلينا نشوفك
انتو مبتجوش ليه
تحياتي

لولا وزهراء يقول...

اول زياره لنا هنا

تحفه بجد

شخصيتك واضحه وباينه اوى وواضح انك مش تحب اللف والدوران والكدب عن جد ربنا يوفقك

ان شاء الله تتكرر الزيارات

هي وظروفها يقول...

هييييما

تفتكر ان ممكن شاب يدخل يقولك ازاي افهم بنت من بصه عينها

ايه يا عم ابراهيم انت بتشك في ذكائنا ولا ايه

ربنا يوفقك في حياتك وتخلص جيش

بس الله يخليك يا سياده الملك ممكن تتنازل في تحديد عقوبتك شويتين تلاته لحسن جلالتك الموزز شيء مهم في الحياه بردو مش كده ولاايه ولا مش فاهمني اقولك في التعليق ؟؟؟؟؟؟؟؟هههههههههههههههههههههه

كيــــــــــــارا يقول...

بتوه لو خرجت بره الشارع بتاعهم
دلوقتي معدش فيه حاجه مضمونه
ولا ايه
*******

لا لسه فيه كدا ومش اختفي الموضوع دا ؟

******
حركة عنيها

*****
موش فاهمه ؟

******
اجاباتك صريحه جدا

اتمنالك التوفيق

تحياتي

beautiful mind يقول...

لولا وزهراء
انا بجد سعيد جدا لزيارتكم دي
وسعيد اكتر بالثنائية الروعه اللي انتم عاملينها
ربنا يخليكم لبعض ويجمعكم دايما علي الود
ومتشكر جدا علي رايكم فيا
وان شاء الله ازوركم انا كمان
تحياتي

beautiful mind يقول...

هي وظروفها
اولا حمدلله ع السلامه
كدا بجد كتير اوي علينا
يارب يكون المانع خير
وعموما ياسيدي ممكن نخفف العقوبه شوية
علشان محدش يزعل مننا
كفاية اننا نحرق دمهم بالكلام
ولا معدش الكلام بيجيب نتيجه
تحياتي
ويارب متنساناش

beautiful mind يقول...

كيارا
اجاباتي يا قمر مش علي كل الناس
بس بجد هي للغالبيه العظمي
وانزلي الشارع والجامعات والنوادي وشوفي بعنيكي
مممممم
حركة عنيها دي انا شرحتها في رد قبل كدا
يسلم مروروك
ويارب تكوني بخير
وتحياتي

نهــــــــــار يقول...
أزال المؤلف هذا التعليق.
نهــــــــــار يقول...

السلام عليكم ورحمة الله وبركاته...
أخي إبراهيم يومين وأنا اقرا التاج بس ماشاء الله إجابات جميله
خصوصا الحكمه التي تتبعها بالحياه وهي أفسرها بالرضا بالقضاء والقدر خيره وشره ...
بارك الله فيك ويارب يسهل أمورك وتتزوج قريبا ...
...
في امان الله

مصعب صلاح يقول...

استاذي اعتذر منك
أنا جاوبت ع السؤال إذا تم تعيينك ملكا لجميع البلاد العربية فما أول قرار ستتخذه ؟ وكانت الاجابة
ببساطة ... أسلمت الإعلام والتعليم
ونشر اسم حضرتك ف البداية دي حقك
ودمتم

حنين يقول...

السلام عليكم
اول زياره للمدونه ويكون البوست تاج
انا تشرفت بمعرفتك اخى ابراهيم
واسلوب بسيط ومحترم
تحياتى

حنين يقول...

السلام عليكم
اول زياره للمدونه ويكون البوست تاج
انا تشرفت بمعرفتك اخى ابراهيم
واسلوب بسيط ومحترم
تحياتى

حنين يقول...

السلام عليكم
اول زياره للمدونه ويكون البوست تاج
انا تشرفت بمعرفتك اخى ابراهيم
واسلوب بسيط ومحترم
تحياتى

حنين يقول...

السلام عليكم
اول زياره للمدونه ويكون البوست تاج
انا تشرفت بمعرفتك اخى ابراهيم
واسلوب بسيط ومحترم
تحياتى

ستيتة حسب الله الحمش يقول...

السلام عليكم يا هيما
جيت أوفي بالوعد
يوم الجمعة 30 ابريل فيه لقاء مدونين خيري في بؤجة الخير
التفاصيل عند خالد همس الأحباب وفاتيما

تحياتي

شذا الروح يقول...

السلام عليكم

بسم الله ماشاء الله
ايه الاجابات الجامده والجرئيه دى

رغم صعوبتها لكنها
جميله وقدرت فعلا تجاوب عليها بمنهى العقلانيه والرزانه


دمت ودام اسمك وقلمك اخى الفاضل

تقبل مرورى
وهضيف المدونه عندى للتواصل
دمت بكل ود

شذا الروح

دودي فلسطين يقول...

مرحبا اخويا ابراهيم
اجابات حلوه ومنطقيه وفيها نوع من التعبير بشخصيه قويه وجريئه

انا اول مره بشوف مدونتك
وكتير حلوه
وتحياتي
دودي فلسطين

re7ab.sale7 يقول...

عارفة ان التاج من زمان
بس انا بحب اقرا التاج اووي
عشان اعرف شخصية المدون او الي بيكتب
واحيانا بعرف الشخص من كتاباته
بس التاج يمكن بيكون اضمن شيء لمعرفة الشخصية
عجبني اووي كلامك
وحلوة حكاية قص الشعر دي عقاب ...ههه
واضح انك فعلا شخص مسلم امره لله
ومؤمن بالقضاء والقدر
وفاهم كويس اووي الحياة برغم انه بيتصدم ف حاجات كتير
ده الي انا عرفته من التاج

تحياتي