Pages

الجمعة، 16 أكتوبر، 2009

سؤال محيرني



اهلا بيكم يا اغلي الناس
وحشتوني اوي من كل قلبي
ووحشني كلامكم
ومدوناتكم
وكل حاجه فيكم
كان نفسي اكتب بوست جديد
اقول فيه اي حاجه اوجع فيها دماغكم او قلبكم
لكن لما تعب فكري ... واحتار دليلي

 ومحددتش بالظبط اكتب ايه او اقول ايه
لما لقيت كل الناس بتوع المدونات كل واحد فيهم
اللي عايز يبطل تدوين... واللي الدنيا ماليه احزان وغرقان فيها
واللي بتحكي عن مشاكل من سبعين تمنين سنه
وحاجات ومحتاجات كدا تهوس
لقيت انا بقي سؤال محيرني انا بصراحه
وسالت فيه ناس كتير
وكل واحد ليه راي شكل
هو ممكن الشخص يحب اكتر من حد في وقت واحد ؟
وانا اقصد انه حب حب
يعني مش واحد حب والتاني اعجاب 
حب بمعني حب
يعني مثلا لو هو ولد فبيحب بنتين بنفس الدرجه
ويتمني اي واحده فيهم
ولا دا كلام فاضي
ومفيش حاجه اسمها كدا
وانه بيضحك عليهم هم الاتنين
ومش بيحب لادي ولادي
طيب واذا كان الشخص دا فعلا واثق من نفسه اوي
وبيقول ان مشاعره فعلا حقيقيه
وانه ميقدرش يستغني عن واحده فيهم
نقوله ايه بقي؟
انا عايز كل واحد يفكر معايا
هو دا ممكن يكون فعلا
ولا دا نوع من الانقسام والشيزوفرنيا
وحب الامتلاك والانانيه
يلا كل واحد يمسك امالكيبورد بتاعته ويجاوب
بس استنوا
حاجه صغنونه بس
بلاش والنبي شغل الواااااااااو
وايوه ياعم
وهنيالك
والكلام دا
ههههههههههه
علشان الكلام دا مش بتاعي خالص
كفايه علينا واحده 
ومطلعه عين اللي جايبنا كمان
يلا يا جدعان 
هو انتم لسه مردتوش بردو
ادعولي بقي
مسافر الصبح
ربنا معايا يارب
ومعاكم
ودومتم بخير

الأربعاء، 7 أكتوبر، 2009

حد في حياتي


يا اهلا باحبائي اللي بحبهم بجد 
وربنا يعلم مقدار هذا الحب
واللي بتمني انهم يكونوا كلهم بكل خير
ومفيش حد يكون زعلان من حد يارب
************
الحب في حياتنا

لازم يكون فيه حب
علشان نعرف نعيش
لازم نحس ان فيه حد مهتم بينا بجد
حد يهمه امرنا
حد مستعد انه يعمل اي حاجه علشانا
حد مش مستني مقابل
او منتظر اننا نقوله كلمة شكرا لانك عملت
كل واحد فينا لازم يكون معاه الحد دا
لازم يكون جنبه فعلا 
او حتي قريب منه ويعرفه
او قريب منه ومش واخد باله
او يكون مستني انه يجي
كل واحد فينا اكيد ربنا اكرمه ولقي الشخص دا
اللي بيحبه بجد
واللي لسه مصادفهوش 
اكيد هايجي اليوم اللي يلاقيه قدامه
يعوضه كل لحظة حزن عاشها في حياته
علشان نقول داخل نفسنا
ياااااااااااااااااه
احنا قبلك كنا ولا حاجه
انت كنت فين من زمااااااااااان ؟
ياتري الجمله دي ممكن تقولها لمين في حياتك
انت كنت فين من زمان ؟
بس اوعي تعمل زي ناس  معرفتش تحافظ عليه
وتخيلت انها ممكن تعيش حياتها من غيره
ودلوقتي بتقول 
ياريتك ترجع زي ماكنت
لازم نحب في حياتنا
لازم ناخد دافع علشان نعيش
لازم حد نرتاح اننا بنكلمه
ونجري عليه نحكيله ايه حصلنا
ونبقي في منتهي السعاده واحنا معاه
ولما يغيب نفضل مستنين رجوعه
واحنا بنعد كل لحظه
ونقول 
الثانيه في بعدك سنين
ولو مرة سمعنا انه ممكن يرحل
انه ممكن يسبنا ويمشي
انه ميكونش في حياتنا تاني
اننا نصحي منلاقيش صورته قدامنا
ولا نسمع صوته الحنون
ولا نقوله اننا بنحبك
في اللحظات دي بتتقلب حياتنا
وتختل موازين الامور جواها
ونلاقي نفسنا مش عارفين نعيش
لان حياتنا انسحب منها اجمل حاجه فيها
*********
انا بدعي ربنا كل واحد فينا 
يكون لقي الشخص دا فعلا
علشان يعرف بجد قد ايه حياته هتتغير
زي حياتي انا متغيرت بجد
علشان حد من دول في حياتي
جه الوقت اللي كان لازم اقوله كدا
اقوله
مهما قولتلك 
كلامي  مش هيكفي
ومهما عملت
مش هقدر بردو اوفي
بس عارف انا هقدر اقولك حاجه واحده
كفاية علي انك حفرت اسمك جوايا
مستحيل حاجه تقدر تمسحه
ربنا يخليك ليا
واقدر بجد اكون انا معاك
زي ما انت معايا
دايما
يكفيني
نور
اسمك


الجمعة، 2 أكتوبر، 2009

السادات ......... والخطاب القاتل

السلام عليكم
انا مسافر بكره ان شاء الله
وحبيت قبل ما امشي اني احط البوست دا
علشن اسيبكم تقروه كويس وتقولوا رايكم فيه
واتمني من ربنا ان ينال اعجابكم



..............
من منا لا يحب الرئيس السادات؟
من منا لا يحترم شخصية هذا الرجل العظيم؟
اذا كان هناك من يقول نعم انا لا احبه ... نعم انا لا احترمه
نعم انا اختلف معه ومع ما فعله
فانا اقول انني كلما اسمع اسم هذا الرجل فانا اقف احترما واجلالا لشخصيته العبقريه
الرئيس السادات الذي لم يمهله القدر لكي يجعل مصر كما كان يحلم
ولكن تطاولت عليه الايدي بحق وبغير حق لكي تنال من حياته
ولكي يقع شهيدا في ساحة العرض غير متراجع ولا متخاذل 
فليرحم الله السادات
........
من فتره كدا مش بعيده كنت بتابع قناتي المفضلة
قناة الجزيرة وكانت بتعرض كل يوم في تمام الساعه 12 و5 دقايق ليلا
فيلم وثائقي من اعداد فريق العمل بالقناة
ومش عايز اقولكم اني كنت بستني الوقت دا كل يوم بجد علشان اتابع الفيلم بكل شغف
لانهم فعلا عندهم عبقرية في العمل تجعل المشاهد ينجذب بكل ذرة قيه للمستوي المعروض قدامه
وفي مرة من المرات
عرضوا فيلم عن اغتيال الرئيس السادات
واسبابه الحقيقه والاشخاص اللي قاموا بهذه الفعله
واثناء الفيلم كانوا بيعرضوا مقاطع لخطاب الرئيس السادات الاخير
في مجلس الشعب المصري يوم 5 سبتمبر 1981 يعني قبل مقتله بشهر بالظبط
لاني اغتيل يوم 6 اكتوبر 1981 
المهم
بجد مكنتش قادر اغمض عنيه وان بتابع المقاطع دي
وكنت بتمني لو يعرضوا الشريط كامل وظل الامر جوايا 
عايز فعلا اشوفه كله
لغاية ما ربنا كرمني وبعد بحث عميق داخل اروقة المواقع والمنتديات
فعلا نجحت اني احمل الشريط كله والخطاب اللي قاله السادات
وكل كلمة نطق بيها
 وكم ادهشني اسلوبه بجد حسيت والله اني قدام والدي

الرئيس بيتكلم كانه قاعد في بيته
وقدامه كل حاجه وعمال يطلع في اوراق ويقرا من الجرايد والمجلات
في الخطاب دا بقي الرئيس فتح النار علي ناس كتير جدا
 علي الاخوان والمعارضين والبابا شنوده
وكل واحد كان بيعارضه في اي حاجه
اللي يهمني اكتر اسلوبه في الكلام بلهجته الريفيه الجميله 
رغم اعتراضي علي بعض الكلمات والحاجات اللي قالها 
واللي ان شاء الله هتسمعوها
انا جبتكلم روابط الشريط بالكامل علشان تقدروا تستمتعوا بيه
وانا متاكد ان كل واحد فيكم هيحتفظ بيه للابد
لانه شىء تاريخي مالوش مثيل
ودا اخر كلام للسادات واللي كان السبب الرئيسي وراء مقتله
ومن الكلام ما قتل
ان شاء الله تقدروا تحملوا الفيلم
بس خلي بالكم
الفيلم عباره عن 4  اجزاء مضغوطه
يعني لازم تحملوا الاربع اجزاء كلهم وبعد التحميل لازم بردو تفكوا الضغط
باي برنامج فك زي مثلا الون رار
ربنا يوفقكم جميعا
وان شاء الله تستمعوا بالفيلم
واتمني من ربنا ان احساسي يوصلكم




************
مساحة الفيلم حوالي 800 ميجا
ومدته اكتر من ساعتين ونصف


ملفات التحميل


1_ موقع الربيدشير


2_موقع سيند سبيس



اشوفكم بالف خير
وان شاء الله تقدروا تحملوا 
وباذن الله الروابط دي كلها شغاله لاني مجربها بنفسي
واللي مش هيعرف يحمل يبقي يستناني بقي لما انزل الاسبوع الجاي 
علشان اعمله شرح ازاي يحمله
يلا بقي سلام