Pages

السبت، 27 أغسطس، 2011

الشعور بالألم






عندما تشعر بألم ما يجتاح كيانك

ويبعثر أجزائك ليجد لنفسه مكانا بين خلاياك

ويظل ينمو وينمو ليصبح كالغول الذي ينهشك

كفريسة بلا رحمة ولاشفقة

وعندما ترفض أن يشاركك الاخرين في ألمك

وتفضل أن يعتصرك لأخر صرخة في أعماقك

فهذا منتهي الألم

أما قمة الألم أن تري غيرك يتألم أمامك

ولا تملك له شيئا إلا مواساته بكلماتك

عندما يخبرك بأن جزءا منه صار في وعكة

وأنه فعل وفعل ليجتاز هذا التألم

وتعتقد في قرارة نفسك أنه لم يفعل

ما يجب فعله وكأنك تعتقد أنه ألمك أنت

ساعتها سشتعر بمدي الخوف الذي يعتريك

والرعب من هذا الشعور المخيف

الشعور بالألم

أعلم أن الألم هذه المرة يمس جزءا غاليا

عندي ليته كان عندي فعلا فلقد تعودت

علي هذه الأحاسيس المرعبة وصرت الان أقوي

علي مجاراتها وكتمانها عندما تقتضي الحاجه لذلك

لكنه هذه المرة يمس يد طفلتي الصغيرة جدا

وكلتاهما صغيرتان .. طفلتي ويدها

وهي لا تملك شيئا الا أن تقول
يدي تؤلمني... ما أصعبه فعلا

الشعور بالألم

الجمعة، 19 أغسطس، 2011

فوزية




عارفين فوزية ؟........ فوزيه! ايوه

الاسم مش غريب صح؟

فوزية اللي كانت بنت فؤاد المهندس في مسرحية سك علي بناتك

ايوه هي دي اكيد افتكرتوها

بتاعة مسك ايدي قال ايه بيعديني

فوزية دي بقي مثال لكل المجنونات من بنات حواء

وما اكثرهن.... اه والله

من زمان وانا بسمع مقولة " ناقصات عقل ودين " اللي فيه

ناس بتقول عنها انها حديث كمان الله اعلم بقي

انا كنت فاهم يعني ايه ناقصات دين عشان يعني

بعض الفرائض اللي بتسقط عنهم بسبب ما

ومش مطالبين بتأديتها بعد زوال السبب الما ده

زي الصلاة مثلا وبالتالي عندهم نقص في الدين

أما بقي ناقصات العقل فمعرفتش معناها كويس

غير لما عرفت فوزية

وعرفت ازاي بيكون الجنان الرسمي
 
وازاي بيكون الخمستلاف حاجه اللي عكس بعض

وبيتعملوا في وقت واحد

وعشان عرفت واتاكدت ان الجنان دا من طبعهن 
 
ودا باعتراف معظمهن صراحة

ودي حاجه مش غريبة ولا جديدة علي ذوات الجنس الناعم

فقررت اني مستغربش من اي تصرف كدا ولا كدا منهن
 
وفي هذه المناسبة أحب استعير قصيدة رومانسية جميلة جدا

قالها محمد هنيدي في فيلم صعيدي في الجامعة الامريكية

واللي انا كنت باستني الفيلم مخصوص والله عشان اسمعه وهو بيقولها
 
وباهديها للأخت فوزية

لعل الله ان ينعم عليها بزوال نعمة الجنان اللي عندها

 

عرفت وفاج

حبيت وفاج

وفاج .... وفااااااااااااج
 
  راحت وفاج

وعرفت ست الحتة

وحبيت ست الحتة
 
ست الحتة ..... ست الحـــــــــــــــــــــــــــــتة

راحت ست الحتة

وعرفت فوزية
 
وحبيت فوزية

فوزية.....فوزيـــــــــــة

وروحت انا 

الجمعة، 12 أغسطس، 2011

شمعة جديدة




النهارده نورت شمعة جديدة في عمري

وانضمت لاخوتها ال 23

بس شمعة السنة دي مختلفة شوية عن كل سنة

علشان كل حاجه مبقتش زي الاول

ياتري باقي كام شمعة تانية
 
ولو اني حاسس واحساسي عمره ماخيب

انهم مش كتير

بس برغم كدا هينوروا بردو

ان شاء الله

علشان انا متعودتش ان في يوم ميلادي

اطفي الشمع

الجمعة، 5 أغسطس، 2011

رمضاني




تهنئة
لكل مصري ومصرية , لكل مسلم ومسلمة
لكل اللي أعرفهم واللي مش أعرفهم كمان
تهنئة لكل حد عايش في جو الروحانيات البديع
اللي عايشينه الايام دي وحاسين قد إيه بالصفاء
والنقاء والراحة والقرب من ربنا الكريم
مبارك علينا الشهر , مبارك علينا التوبة
القرءان ,الرحمة , المغفرة , العتق من النار
" بعيد عن رحمة الله من أدرك رمضان ولم يغفر له "
تهنئة بشهر رمضان

خبر حلو
كان أول يوم في الشهر الفضيل حلو أوي علي
من كل ناحية لأني سمعت فيه خبر قبولي في الوظيفة
اللي كان نفسي اشتغل فيها من زمان وفي المكان اللي
بحبه جدا وتعبت كتير عشان أوصله
وبعد ما كان اليأس هيتمكن مني وضاقت بي السبل
وملقتش حل غير إني الجأ لربنا اللي كان فضله
علي عظيما والحمد لله رب العالمين

شكر
لكل أصحابي اللي وقفوا جانبي أيام التعب
كل اللي ساندني ولو بكلمة
شكرا لكل اللي كانوا معايا بجد لحظه بلحظه
شكرا ليك يا مصطفي يا إنسان بجد وصديق
صعب يتكرر مرة تانيه
شكرا ليكي يا أمي ياللي زعلتك مني غصب عني
وعرفت قد إيه أثر زعلك مني وأنا في لجنة الامتحان
والدنيا سودة قدامي بس انتي عارفه اني نرفوز شوية
ماانتي امي بقي وحافظاني هو انا هعرف اكتر منك يعني؟
شكرا للي مش هقدر أقول اسمها هنا علشان الرقابة
ههههههه بس انا مش هسكت بردو أنا هقول كل حاجه
كمان شهر شهرين كدا يعني
أنا لازم أفضح نفسي وأقول كل حاجه
أمال أنا عامل المدونة دي ليه أصلا؟

متابع في رمضان
زي عادتي دايما في كل سنه
بقسم يومي في رمضان عشان أعمل كذا حاجه
الصبح طبعا بكون في الشغل وبيطلع عيني
بعد الضهر ممكن أنام شوية وبعد صلاة العصر
ببقي مع القران لغاية أذان المغرب
طبعا صلاة التراويح لازم جماعة في المسجد
بعدها باتمشي شوية مع العيال اصحابي
وبعدين برجع البيت ع 11 كدا ممكن وقتها
أفتح التليفزيون أشوف أي حاجه تستاهل
كل سنة باختار حاجه او اتنين اتابعهم كويس
السنة دي بتابع برنامج " الشعب يريد " لطوني خليفه
علي قناة القاهره والناس برنامج جامد بجد
وبتابع بردو أستاذي عمروخالد في برنامج
" مع التابعين " علي قناة CBC

رسالة SMS
أجمل رسالة وصلتني علي الموبايل
من فتره كبيرة جدا كانت في أول رمضان
فيها دعاء جميل جدا بكرره دايما في أي صلاة
الرسالة بتقول
لم أجد أجمل من إرسال باقه رحمانيه
،ورودهاقرآنيه،أوراقهاملائكيه،
أغصانها صلوات محمديه تقول
 اللهم اجمعنا في دار الدنيا و جنة الأخره٠

سلام ختام
ربنا يجعل أيامنا كلها رمضان كلها خير
كلها سعادة وحب وهناء
كل سنة وكلنا طيبين ومصر بخير