Pages

الثلاثاء، 25 أغسطس، 2009

استودعكم الله

السلام عليكم ورحمة الله
احبائى كل عام وانتم بخير
ورمضان كريم
ويارب كل الناس يجمع بينها الحب والمؤاخاه والتفاهم
وان شاء الله السنه دي تكون احسن من اللي فاتت
والقادم يكون اجمل باذن الله
خساره
الايام الحلوة بتعدي بسرعه جدا
والاجازة بتاعتي خلصت خلاص
وهسافر النهارده ان شاء الله بعد الفطار
كنت اتمني اقعد معاكم كمان شوية
بس اعمل ايه
هي الظروف كدا
عموما والله بجد انتم وحشتوني من دلوقتي
وانا لو قلت من هنا لبكره انا بحبكم وبحترمكم قد ايه
مش هايكفي
كل واحد بقي يخلي باله من نفسه
ويصوم كويس
ورجاء مني او طلب صغير
ياريت اي حد عارف ان فيه حد زعلان منه
ياريت يصالحه
او يكلمه او يبعتله حتي sms
علشان ربنا يتقبل صيامنا جميعا
اشوفكم بخير ان شاء الله
انا المرة دي مش عارف امتي
بس انا بدعي ربنا يكون عن قريب
استودعكم الله الذي لا تضيع ودائعه
والسلام عليكم

السبت، 22 أغسطس، 2009

تاج رمضان من ام مالك


السلام عليكم ورحمة الله



يارب تكون ايام رمضان ايام خير وفرحه



وتوبه وسعاده لكل الناس في كل مكان



وان شاء الله تزيد فيه الموده والحب بين الناس



ونرجع زي ما كنا



اللهم امين



نظرا لضيق الوقت عندي واللي مش مديني فرصه حتي اني ارد علي تعليقاتكم



فانا بشكر كل شخص سال عني او حتي زار المدونه في غيابي



دلوقتي انا هجاوب علي اسئلة التاج اللي اخدته من اختي الغاليه



ام مالك ربنا يكرمها يارب



وبدعي ربنا ان اكون موفق فيه


. .



. .



. .





ماذا يمثل لك رمضان في كلمتين؟


راحه نفسيه و نقاء داخلي




هل كتبت خطتك التي تنوي تطبيقها في رمضان؟؟



مش خطة بالظيط بس فيه اساسيات عندي لازم تكون موجوده كل سنه



وان شاء الله احافظ علي الثوابت بتاعتي وربنا يتقبل




ايه احسن حاجة لك في رمضان ؟


احسن حاجه هي التجمع من اصحابي والذهاب للصلاه سواء صلاه التراويح او صلاة التهجد بلليل

كل ليله


ايه الحاجة اللي انت جربتها رمضان اللي فات وناوي تكررها السنة دي ؟


طبعا الاعتكاف اخر 10 ايام من رمضان

لاني متعود عليه من كذا سنه والحمد لله بيكون له اثر عظيم علي

وعلي كل اللي بيعتكفوا


شعارك السنة دي في رمضان ايه؟


شعاري في رمضان دا ان شاء الله ( ثبات حتي اخر لحظه )

ودا بسبب اني هحضر معظم الايام في الجيش وبدعي ان ربنا يثبتي هناك

لاني متاكد انه هيكون صعب


ناوي تفطر كام واحد في رمضان؟


والله دي بظروفها والله اعلم لاني بجد معرفش ظروفي ايه

لكن بالنيه ان شاء الله ربنا يديني الثواب


ايه الطاعة اللي انت ناوي تداوم عليه بعد رمضان ؟


طبعا المداومه علي صلاة الجماعه وقيام الليل ولو ركعتين


امرر التاج الى؟

امرره لكل اصحاب المدونات اللي انا ضايفهم في قائمة مدوناتي

وربنا يتقبل من الجميع يارب



الخميس، 20 أغسطس، 2009

وحشتوووووووووووني



(أقسم بالله العظيم ... ان اكون جنديا وفيا لجمهورية مصر العربيه..



محافظا علي امنها وسلامتها ... حاميا ومدافعا عنها.....


في البر والبحر والجو... داخل وخارج الجمهوريه.... مخلصا



لرئيس الجمهوريه....مطيعا للأوامر العسكرية.....


منفذا لاوامر قادتي ... ومحافظا علي سلاحي .


لا اتركه قط حتي اذوق الموت... والله علي ما اقول شهيد)



داكان اخر حاجه في حفلة تخرجنا .. واديني رجعتلكم تاني



انا بصراحه مش عارف ابدأ ازاي او اقول ايه


بس بجد والله العظيم وحشتوني كلكم



وكنت وانا هناك بفكر فيكم ودايما علي بالي



طبعا اكيد فيه سؤال شاغلكم



احوالي ايه؟ وعملت ايه في الجيش؟


طبعا هجاوب



بس الاول انا احب اشكر كل شخص سأل عني في غيابي



وبجد انا عرفت واتاكدت ان ربنا بيقرب بين ناس



مكنش ابدا في اعتقادهم انهم ممكن يتقابلوا في يوم من الايام


بالنسبه بقي لاخباري واحوالي



انا الحمد لله كويس جدا



ومعنوياتي كويسه جدا الحمد لله رب العالمين


اما بخصوص عملت ايه في الجيش



فانا مش هقدر اتكلم خالص لان دا ممنوع امنيا



حفاظا علي الاسرار العسكريه واللي انا اقسمت قسم الولاء



اني احافظ علي اسرار الجيش



بس انا احب اقول كلمة حق لازم اقولها



رغم كل الصعوبات والضغط النفسي والعصبي والبدني


وكل شىء صعب كنت انا وزمايلي فيه هناك


الا انه بجد والله العظيم اللي مدخلش الجيش بصراحه



فاته كتير جدا في حياته



وفيه حاجات كتير ناقصاه

انا اتعلمت هناك اللي كان استحاله اتعلمه بره في سنين

اهم شىء ازاي تتحكم في نفسك وتعرف قيمتها


وانا احب ا طمن كل الناس

والله العظيم احنا بجد عندنا جيش


جيش قادر يحمي البلد دي

انا بحب بلدي جدا وكنت فاكر نفسي وطني اوي


بس وانا هناك واحنا بنتدرب وبنغني مع بعض

الاغاني الوطنيه


وكله في صوت واحد

وحاجه كدا تخلي جسمك يقشعر

واحساس داخلي اني والله وكل اللي معايا مستعدين


اننا ندفع عمرنا كله علشان حبة تراب من ارضنا

اللي قال ان الجيش مصنع الابطال


فعلا كان كلامه صادق



انا بتشرف اني بخدم في جيش بلدي



وان شاء الله كل كلمة اقسمت عليها هناك


هتكون سيف علي رقبتي


اسيبكم بقي شويه



علشان انتو عارفين

عايز املا الدنيا تنطيط واشوف كل الناس


بس ان شاء الله انا هكون معاكم


لغاية ما اسافر تاني


يلا بقي