Pages

الاثنين، 4 نوفمبر 2013

النوم يأتي قبل الحب أحيانا





في أحد أركان حجرتي جلست مسترخيا علي كرسي الهزاز
ممدا رجلي الي كرسي اخر أمامي أشعلت سيجارتي
وبدأت أنفخ دخانها في الهواء وأنا أنظر الي سقف الغرفة
متابعا خيوط الدخان وهي تتراقص أمام عيناي كفتيات الهند
حينما يتمايلن على موسيقى فلكلورية أعشق الاستماع اليها
والي جانبي يأتي صوت عبد الحليم : بحياتك يا ولدي امرأة عيناها سبحان المعبود
وانا في هذه النشوة المرمرية التي قلما تتكرر في ايامنا العابثة
رن هاتفي رنة مطولة ... التقطه متكاسلا شاعرا بالغثيان
عندما رأيت اسمها أمامي على شاشة الهاتف .. فكرت مرات
ألا أرد لعلها تتركني في نشوتي تلك التي تغنيني عن لذة الاستماع
لصوتها الدافىء ونبراتها الطاغية الأنوثه ورقتها عندما تناديني باسمي
ضغت علي زر الاستجابة
- مش بترد ليه ؟
- منا رديت أهو
- يا سلام

 - اووووووووووف صبرني يارب
- انت بتكلمني كدا ليه ؟

 - ...........
- هو أنا بكلم نفسي ؟
 
- لا ياستي انا معاكي اهو والله
- طيب متصلتش بيا ليه ؟ ولا انت مصدقت
 
- مصدقت ايه ؟
- مصدقت تطنشني زي عوايدك

 - علي فكره انا تعبان وكنت هنام ورديت عليكي عشان متزعليش
- هو انت كمان مكنتش عايز ترد ؟

 بدأت أحس فعلا بالنوم يتسرب الي وانا مازلت مسترخيا مغمضا عيناي
- بردو ساكت

 - عملتي ايه النهارده
- يهمك تعرف يعني ؟
 
- اها
- لو كان يهمك كنت كلمتني واتطمنت عليا .. انا مش هقولك حاجه
-
طيب
- طيب ايه ؟

 - طيب متقوليش
- اه منا عارفه انك مش هامك تعرف حاجه
-
ماشي
- طيب وماشي متقولش الكلمتين دول تاني انا بتجنن منهم

 - طيب
- بردو

 - روحتي المشوار ؟
- ملكش دعوة
 
- هو انتي بتتصلي علشان تعكنني عليا
- اه قصدك تقول اني نكدية

 - لا انتي عسولة وزي القمر قولي بقي
- اقول ايه ؟
- ارحمني ياربي ..
روحتي مشوارك اه ولا لأ ؟
- اه انا نزلت من بيتنا الساعه 5 كدا بعد العصر قولت اروح بدري
علشان أرجع بدري ومتأخرش وكانت نور مستنياني عشان انت عارف
انها هتروح معايا .. قبل ما اخرج كلمت ناهد قولتلها تيجي معانا عشان
هي كمان كانت عايزة تروح من زمان وقالتلي كذا مرة .. اتصلت بيها
جوزها رد عليا وقالي انها تعبت شوية ودخلت تنام من ساعه كان عايز يصحيها
بس أنا مردتش عشان هي كانت هتأخرنا لسه بقي هتصحي من النوم وتاخد شاور
وتحط ميك اب وانت عارف ان ناهد اصلا مبتحبش تروح اي حته الا وهي مظبطه
نفسها علي الاخر عشان هي شايفه نفسها من يومها 

وكانت طول عمرها بتضايقني بكدا
انا قولت بقي انزل لوحدي وخلاص ونروح انا ونور ومش مهم ناهد تيجي معانا
وأحسن انها طلعت نايمة عشان اصلا نور زعلانه منها بقالها فتره 

ولو كانو شافوا بعض الله أعلم ايه اللي كان هايحصل ... 
المهم نزلت انا ومردتش اركب تاكسي
قولت اخد الطريق مشي عشان المسافه مش بعيدة وبعدين انا بخاف اركب تاكسيات
اليومين دول من ساعة ما زيزي ما قالتلي ان واحده جارتهم اتخطفت من اسبوع كدا
وهي رايحة الشغل ..اسكت مش هتصدق انا شوفت مين وانا نازله
كانت معدية وشافتني وعملت نفسها مش واخده بالها ... حزر فزر مين ؟.
ها
؟
انت معايا
الو
الوووووووووو
انت نمت ولا ايه؟
الو
حبيبي


كان هاتفي قد وقع علي الارض بينما غرقت في سبات عميق
لم استيقظ منه الا في اليوم الثاني علي كارثه

هناك 31 تعليقًا:

غير معرف يقول...

ههههههههههههه حلو البوست عجبنى،مش عارفه ليه الراجل بيمل لما يسمع تفاصيل يوم الست رغم انها بتبقى متشوقه انها تحكيله كل حاجه بالتفصيل الممل علشان تحسسه انه موجود معاها،وعلى العكس بقى هى بقى ممكن تسمعه لساعات من غير ما تكل ولا تمل حتى لو عاد الكلام 100 مره فى الساعه ،عجبت لكم

أمل حمدي يقول...

سرد جميل :))

سواح في ملك اللــــــــــــــــــه- يقول...

اكيد لقيتها فوق دماغك بتصحيك ههههه

تحيتي

كريمة سندي يقول...

فضفضة جميلة والله ما ألذ نعمة النوم فهي فوق كل اعتبار تحياتي وتصبح على خير جبتلي النوووووووم!!!!

هبة فاروق يقول...

ههههههههههههه
تصدق بأيه قريت البوست ده امبارح وغلبنى النوم وقولت اول ما اصحى اعلق الظاهر اتعديت منك ولا ايه
عارف ده مش حب ..لو حب بجد كنت استمتعت معاها بكل كلمه ..بأى كلام حتى لو فاضى
كنت فتحت عنيك أوى وطرطقت ودانك لاى كلمه حتى لو كانت هايفه وملهاش لزمه كنت أتمنيت تقضى طول الليل صاحى طول ماهى معاك على الخط
معلش النوم يأتى عندما يكون القلب خالى ولا ينام الا مرتاح البال والحب ليس به راحه

غير معرف يقول...

من حسن حظي إن أول تعليق كان ليا طبعا اللي يعمل كده أكيد يستاهل اللي يجراله تاني يوم الصبح بس نصيحه قبل ما تكلمها دور علي حجه مقنعه علشان تعرف تصالحها وهو ما أعرفه عنك بأسلوبك البسيط المقنع(أصل بنات حواء دول مجنونات زي وصفك انت ليهم قبل كده في احد البوستات )
كنت عايز نعرف أنا مين...
أنا من تدين لك بإعتذار منذ ما يقرب من أربع سنوات.

كلام حسام يقول...

جميل :)

شمس النهار يقول...

علي فكرة ده مش حب

الحب كنت هتبقا متلهف عليها حتي لو تعبان كنت هتكلما وتطمن عليها
وهتقولها انك تعبان وكانت هتقولك طيب نام ونتكلم الصبح
:)
وعلي راي المثل الصباح رباح

غير معرف يقول...

تعليقا على رد شمس النهار عندك حق

علي فكرة ده مش حب خالص بس الموضوع عايزه أقولك مشوق جدا كل سطر ببقى عايزه أعرف اللى بعده ( بس آخرتعا إيه بقى )
التوقيع
بحب المدونة دى أوى

موناليزا يقول...

حلوة أوى التدوينة :)

رحاب صالح يقول...

هههههههههههه
واكيد كارثة رهيبة
يعني كسرت دماغك اذا مكانش تليفونك عشان متنامش تاني
بجد عجبني كتير البوست
ويا عم انت احسن بكيتر مني
ومتقلقش كل واحد فينا يا مدونين بيشوف نفسه اقل من غيره بس ده ف حد ذاته كويس لاننا لو شوفنا نفسنا احسن هنبقي مغرورين وعمرنا ما هنوصل لفوق ولا نبقي احسن طلكن لما نبقي شايفين اننا مش احسن هنحاول دايما اننا نكون احسن
تحياتي

beautiful mind يقول...

غير معرف
هههههههههههه
بس هم بيجبوا الرغي
ودي حاجه علمية
الستات رغاييييييييييييين
لكن الرجالة ياعيني مضطرين يسمعوا وهم ساكتين
وفي الاخر تقولوا عليهم كلام عجيب
تحياتي ليكي

beautiful mind يقول...

ماما امولة
سرد جميل
اها
الكلام شكله مش داخل دماغك
عموما والله منا اللي في البوست ولا فيه شىء مني
دي تخاريف
مش حقيقي يعني
هههههههههه
تحياتي

beautiful mind يقول...

شواح في ملك الله
فوق دماغه هو بقي
وانا مالي
انا رواي القصة
ههههههههه
تحياتي استاذي

beautiful mind يقول...

كريمة سندي
النوم دا اجمل حاجه في الدنيا
دا الواحد بيصحي من النوم عشان يريح شوية ويرجع ينام تاني
ههههههههه
تحياتي

beautiful mind يقول...

هبه فاروق
فعلا لا ينام الا مرتاح البال
واكيد لما بيكون فيه حب صادق بين شخصين بيبقي كل واحد مستني الللحظة اللي هيسمع صوت حبيبه فيها
لكن مننكرش ان اللي حكيته دا بيحصل ولو بنسبة صغيره بس بيحصل
تحياتي

beautiful mind يقول...

غير معرف
تدينين لي باعتذار؟
والله انا ازددت حيره
عامة غفر الله لنا ولكم ولا حاجه للاعتذار
لكن اكيد حضرتك حد يعرفني كويس لان معلوماتك عني اكيده
انا مستني اني اعرف لان الذاكرة فعلا خانتني
تحياتي

beautiful mind يقول...

كلام حسام
انت الاجمل
شرفتني بزيارتك
خالص تحياتي

beautiful mind يقول...

شمس النهار
اه والله فعلا الصباح رباح
بس هو بقي لما هايجي الصبح كان هايخترع اي حجه عشان يهرب منها
دي تقريبا كاتمه علي نفسه
وزي ما حضرتك قولتي اكيد دا مش حب

beautiful mind يقول...

غير معرف
انتي رديتي بالنيابة عني عن ماما شموسه
هههههههه
انتي عرفتي منين انها اخترعايه
يبقي اكيد انتي عارفاني كويس
واانا كدا خلاص عرفتك
بس ابقي غيري التوقيع تاني
عشان اقولك يا صاحبة الاسم الجميل
سي يو

beautiful mind يقول...

موناليزا
انتي الاحلي
تحياتي لتشريفك المدونة

beautiful mind يقول...

رحاب صالح
هابقي اسأل البطل ايه الكارثه بقي ولو اني عارفها ..... هههههههههه
بس فعلا لما نشوف نفسنا في حجمنا الطبيعي وانا بنغلط عادي وبنتعلم اكيد حياتنا هتكون افضل لاننا بشر ومش ملايكة
تحياتي يا رحاب

غير معرف يقول...

عندك حق اصل الموضوع قديم صعب عليك انك تفتكر عموما انا بعت رساله ع الاكونت بتاعك لتفسير سبب اعتذاري اتمني ان تقراها.
شكرا لاهتمامك
اتمنالك التوفيق

;كارولين فاروق يقول...

معلش استحمل شويه
احنا الستات كده
بس طيبين والله
تحياتي

beautiful mind يقول...

غير معرف
لم يصلني شىء
ارجوا من حضرتك تحديد الاكونت بالظبط

beautiful mind يقول...

كارولين فاروق
اكيد طبعا طيبين
واحنا من غيرهم ولا حاجه والله
ههههههه
تحياتي

beautiful mind يقول...

غير معرف
مرة أخري لم يصلني شىء في الاكونت ممكن يكون وصل لشخص تاني بنفس الاسم
عامة حضرتك ممكن تقولي اللي انتي عايزاه هنا في تعليق وانا لن انشره
خالص تحياتي

beautiful mind يقول...

غير معرف
انا قرأت رسالتك ولم أفهم منها شىء
وهذا يوترني أكثر
رجاء التواصل معي بأي طريقة او عن طريق الفيس بوك لكن ادخلي عليه من داخل المدونة
يمكن ايضا عن طريق الايميل
الموضوع يهمني جدا علي المستوي الشخصي
والتعليقات هنا لن تكون مناسبة
رجاء الاهتمام

reemaas يقول...

لا لا ماتقولش
انا توقعت كده جدا على فكرة ههههههههههههههههههه

البنات لما بتحب وتزن والولاد مابتحبش بتبقى الحياة ملل جدا سيبها سيبها

شمس النهار يقول...

اثببببببببببببببت
:))
اهو انت قلتها كاااااااااتمة علي نفسه
لو كان حب ماكانتش بقت كاتمة علي نفسه
:)))))

كل سنة وانت طيب وبخير وصحة وسعادة

شمس النهار يقول...

الحمد لله الحمد لله انا ماعنديش زهيمر :))
اصل من العنوان عرفت ان دي تدوينة سابقة انا قريتها
ولما ابتديت في القرايه قلت ايوة اصل التدوينة الحلوة ماتتنسيش :))
كل سنة وانت طيب