Pages

الخميس، 22 مارس 2012

الانسان بداخلي لم يمت









كل واحد فينا جواه انسان تاني عايش جواه
الانسان دا هو الشخص نفسه
بس بصورته النقيه وفطرته اللي ربنا خلقه عليها
الانسان اللي جوا كل واحد فينا متعلمش في مدراس البلد دي
ولا اتلوث بدخانها ولا أكل من سرطانها ولا غش في امتحانتها
ولا حتي عاكس بنت من بناتها ولا سرق ولا بلطج ولا طلع من لسانه
لفظ يخدش حياء نفسه ولا شارك في تزوير ولا قبل علي غيره اللي 
ما يقبلوش علي نفسه
يعني الانسان اللي جوانا هو الصورة الأصلية اللي المفروض كل واحد
يكون عليها ... لكننا للأسف برميه جوا أعمق بير جوانا 
وبندفنه وهو حي عشان نستبدل وجوده بالصورة التانية المزيفة 
اللي الناس بتشوفنا بيها
من فينا مش بيخجل لما يقف قدام نفسه في المراية ؟
مين فينا مش عارف ومتأكد انه عايش اكبر تمثيلية في حياته 
وهو متقمص فيها دور كومبارس ولا ليه أي لازمة .؟
مين فينا يقدر يقول وهو واثق ان الصورة اللي الناس شايفاه بيها
هي هي الصورة اللي هو شايف بيها نفسه ؟
مين فينا بيقعد يقول لنفسه يارتني ارجع زي زمان 
يارتني كنت عملت ... يارتني ما كنت عملت ؟
كلنا بنزيف الواقع بالصورة البهتانة اللي بنرسمها قدام الناس
وكلنا قتلنا الانسان جوانا ...
أفتكر في مرة أعز صديق لي لما قالي 
انه معدش بيعرف بيعيط زي زمان ... وسألني عن السبب ؟
ياتري ليه هو بقي كدا ؟
وصديق تاني قابلني مرة وهو متأثر جدا ومهموم ولما سألته عن السبب؟
قالي انه لسه راجع من عند حد تعبان جدا وحالته متأخرة وانه زعلان عشانه
قعدت أواسيه وكلها دقايق وغيرنا الحوار ولقيته قعد يضحك ويهزر ولا كأن كان
فيه حاجه ... هو نفسه كان بيسخر من حاله دا
انا كمان ساعات كتير جدا بقعد مع نفسي واتكلم معايا 
وأدور علي الإنسان المدفون جوايا يمكن يصحي ويكلمني
اعتقدت انه مات زي غيره ما مات وان محاولاتي معاه ملهاش اي لازمة
لكن من أيام قليلة فاتت اتحطيت في موقف صعب جدا وشوفت بعيني
شخص بيعاني وبيتألم ألم حقيقي وأنا جنبه لا حول لي ولا قوة 
ومع كل نفس كان بياخده كانت روحي بتطلع معاه ولقيت قلبي بينقبض
لأول مرة من زمن بعيد جدا انقباضة رعب علي الشخص دا
ودموعي نزلت في مكان مينفعش أصلا انها تنزل فيه
وقد ايه الفرح والسعاده ملت قلبي لما ربنا استجاب دعايا
وأخد بأيد الشخص دا واتخطي الأزمة وبدأت أكلمه ويرد عليا
وقد ايه بالي ارتاح لما كلمته تاني يوم وسمعت صوته وقالي
انه كويس وكل شىء رجع طبيعي
وقد ايه ببقي مبسوط وانا شايفه كل يوم قدامي بيضحك
ساعتها بس حسيت ان اللي جوايا لسه مماتش
بس محتاج اني احفر بجد علشان يخرج من القبر
اللي انا دفنته فيه بأيديا

هناك 19 تعليقًا:

سواح في ملك اللــــــــــــــــــه- يقول...

انهاالفطرة التي فطرنا الله عليها

فدائما ماتكون الفطرة نقية طاهرة بريئة

تحيتي

amiraali يقول...

عندك حق والله في كل كلامك....بس الدليل عن ان الانسان النقي الكويس ايلي جواك مماتش انك فاكر وحاسس بالكلام ده كله...احنا كويسين بس كل الظروف ايلي حوالينا غيرتنا ...والمشكله اننا سبنا نفسنا للحياه والظروف...بس المعدن الاصيل بيبان وبيتحس ..حتي لو لابس ميت وش ومخفي وراهم...نورت مدوتنك تاني

غير معرف يقول...

والله لو كل واحد يقدر يطلع الانسان دة هنبقى احسن ناس بس للاسف كل حاجة جوانا فيها حتة ناقصة,اذا كان الانسان دة متعلمش فيها ولا بلطج ولا سرق منها لكنة (حب) وما ابشعة من احساس يستطيع ان يقتل اجمل الاشياءوالمعانى وبعيدا عن هذا فليتنا نستطيع ان نخرج بعض منة حتى لو اذنب فى حقنا عارفة ان التعليق مش هيظهر عشان كدة اقولك كلمتين لسة سمعاهم من صحبيى(لو مش هيقدر يسامح حد بيحبه يبقى يبعد احسن).

هبة فاروق يقول...

اقولك ايه الحال من بعضه
كل اللى قولته ووصفته بيمر علينا
مش عارفه دى حاله عامه ولا احنا بس فى عالم التدوين اللى عندنا الحاله دى
اشياء كثير ماتت ونفسنا ترجع تانى زى الفرحه وراحه البال
ربنا يتولانا برحمته

faroukfahmy يقول...

الانسان بداخلى فعلا لم يمت
فعلا انها النظرة التى فطرنا عليها
عندك كا الحق احتا مش وحشين ولكن الظروف اللى حوالينا هى التى تحاول ان تغيرنا

غير معرف يقول...

ودموعي نزلت في مكان مينفعش أصلا انها تنزل فيه


يعنى ... مش فاهمها ؟؟

Tarkieb يقول...

الانسان جواك لم يمت وبراك بقى حليوة...ايه ياعم الصور الحلوة دي انت ناوي تعقدنا هههههههه

beautiful mind يقول...

سواح في ملك الله
نعم انها الفطره
ياريتنا بقي بره زي جوه
وتحياتي ليك استاذي

beautiful mind يقول...

اميره علي
ربنا ينور حياتك
وانتي كمان عندك حق
كل واحد فينا جواه حاجه حلوة وكويسه وبتظهر وقت ما بتسمح الظروف
تحياتي ليكي

beautiful mind يقول...

غير معرف
بجد انا مفهمتش حاجه
لان الكلام مش راكب علي بعضه
وبعدين ليه التعليق مش هيظهر
طيب مهو ظاهر اهو
حضرتك بتقولي ان احساس الحب بشع بتقريبا
امال ايه اللي كويس بقي
انا هحاول اقرا الكلام تاني وتالت يمكن افهم حاجه
عامة تحياتي لوجودك

beautiful mind يقول...

هبه فاروق
يارب ربنا يسمع منك
واحنا في ايدينا نرجع اللي كان
بس شوية عزيمة وصبر
تحياتي استاذه هبه

beautiful mind يقول...

هبه فاروق
يارب ربنا يسمع منك
واحنا في ايدينا نرجع اللي كان
بس شوية عزيمة وصبر
تحياتي استاذه هبه

beautiful mind يقول...

فاروق فهمي
ولك ايضا الحق استاذي
انها الفطره النقية
وسحقا للظروف
تحياتي ليك

beautiful mind يقول...

غير معرف
يعني كان المفروض ابقي اقوي من كدا
خاصة قدام الناس اللي كانو معايا
تحياتي ليك

beautiful mind يقول...

تركيب
هههههههههه
ياعم واحنا نيجي ايه جنب الناس اللي زي القمر بس مستخبين عننا
تحياتي ليك
ويارب تكون باتم صحة وراحة بال

غير معرف يقول...

اسفة الكلام مش مترتب بس كان قصدى اقول ان جوانا حلو وحلو اوى كمان بس الظروف هى اللى بتغير مشاعر الناس ,اما عن الحب فالاحساس مش وحش بس للاسف فى حاجات بتخلى الاحساس دة اكثر من بشع اما الحب فى حد ذاتة اتمنى ان يكون سمة تميزنى عن غيرى , اسفة مرة تانية على الخطأ.

غير معرف يقول...

كل سنة وانتى
حنانى طيوبة...
ولقلب محبوبة...
وفى العين موجودة...
هويدا.

;كارولين فاروق يقول...

مساء الخير
احنا ناقصنا الجلوس مع انفسنا ونعمل اللي يرضينا
مش اللي يرضي الناس علشان كده
تلاقينا بنمثل كتير
لحد مانوقف في مره ونلاقي روحنا الحقيقيه ادفنت بأدينا من غير مانحس
كلامك كله صح وانت عرفت لخ حالات كتيره بنمر بيها

pretty nano يقول...

جامده جدا