Pages

الخميس، 19 يناير 2012

الخازوق




كل يوم بنتعرض لحاجات ومواقف واشخاص ملهاش ستين لازمة
بتكون بمثابة منغصات لحياتنا ومنكدات لعيشتنا وهادمة للذاتنا
والحاجات والمواقف والاشخاص دول احسن وصف يتوصفو بيه 
انهم خوازيق اتحطت بقصد وغتاته او بدون قصد جوا حياتنا
والامثلة عليها كتير اوي ومتعدش 
يوم من الايام واحنا لسه عيال في ثانوي اتفقت انا واصحابي
 اننا نطلع البحر نقضي يوم ونرجع تاني
 وخلاص كل شيء تمام وقعدنا بليل نشتري الاكل والمشروبات
والحاجات اللي هنحتاجها واتفقنا اننا نطلع بعد الفجر
 علي طول علشان نلحق اليوم من اوله
وطلعت انا الخازوق في الرحلة دي ونكدت عليهم
 لانهم لما جم ينادوا عليا الصبح
قولتلهم مش جاي يارجاله معاكم معلش
 بس انا والله ماليش ذنب 
لان كان فيه خازوق اكبر مني في البيت رفض اني اروح الرحلة دي .
 لغاية النهاردة العيال اصحابي كل ما يفتكروا اليوم دا يعايروني بيه
وخد عندك تاني لما تكون بتذاكر في الثانوية ونفسك تتدخل الكلية
 اللي نفسك فيها وهاري نفسك من المذاكرة لغاية
 ما نظرك يبوظ وتجيب مجموع زي الفل 
وخلاص بتحضر نفسك انك هتدخل الكلية اللي نفسك فيها
 فجأة تلاقي خازوق اسمه التنسيق يا معلم يقلب كل حاجه
 في وشك دون اعتبار لاي حاجه
من اللي رغيت فيها من شوية
وحتي لما تدخل كلية تانية خالص غير اللي كان نفسك فيها وتذاكر 
وتجتهد وتخلص الاربع سنين 
العجاف دول وتطلع بقي وانت فاكر انك هتلاقي شغل تاخد خازوق العمر 
وتتصدم بالواقع ومتلاقيش شغل
وحتي لو لقيت حد يعطف عليك ويشغلك يجيلك خازوق
 تاني مستعجل اسمه الجيش وهكذا وهكذا خوازيق ورا خوازيق
 والشاطر يستحمل وحتي لو عديت منهم كلهم
 ولسه فيك نفس وتطلع بقي للحياة هتلاقيهم 
مستنينك يا معلم واحد ورا التاني
زي الحواجز بتاعة مسابقات جري الحواجز 
تلاقي في شغلك واحد زميل ليك زي الخازوق
 ولا بيعحبه العجب ولا الصيام في رجب
تلاقي عندك في الفصل ( عشان انا مدرس )
  تلات اربع خوازيق يعكننو عليك الحصة
وياسلام بقي لو ربنا كرمك يابني وقولت اخطب
 وعديت بقي من جو اهل العروسه  والاتفاقات والسجاجيد
 والنجف والبيتي فور بتاع الفرح ومين اللي هيجيب
فرقة حسب الله عشان تزمر
تلاقي ربنا مبتليك بخازوق يطلع من نافوخك وهو الواد اخو العروسه
اللي هيقرفك في عيشتك  كل ما تروح عندهم ولا هيهنيك علي قاعده 
دا لو كان كبير وعايز يعمل نفسه راجل البيت وشاكم
البنت اللي هي اخته . اما لوكان عيل صغير يبقي ياويلك هتلاقيه 
واد غلس زي اللي جايبينه ويقعد يتنططلك في الاوضه
 ويكب عليك العصير ويحدفك بالبرتقال المعفن
 اللي انت شارية وانت مستحمل
وساكت عشان خاطر عيون ام قويق احسن تزعل منك يابيبي
وتعدي السنه اللي انتم اتفقتم عليها وتعمل فرح وتدعلي المعازيم
 وتكون ليله ولا كل ليله
سودة بعيد عنك وتدخل بقي سيادتك جنة الخلد وعش الزوجية 
تكتشف وانت مدمع العينين
 وحالك يصعب علي ابوجهل ( علي اساس انه كافر) 
انك يا عزيزي اخدت اكبر خازوق في حياتك

هناك 9 تعليقات:

Tarkieb يقول...

بس احلاهم اخر خازوق ههههههه خزق الختام

كريمة سندي يقول...

الله المستعان الحكاوي ما بتخلص والعمر بيخلص !!

غير معرف يقول...

السلام عليكم بجد كلامك جامد جدا بس بعيدا عن الكليه و الشغل فى حاجات تانية لو اخدنا فيها خازوق مستحيل نرجع نشوف الدنيا زى ما كانت مثلا انك تلاقى حياتك بيتحكم فيها حد غيرك و المبرر انهم اكبر منك وعايزين مصلحتك وخد من ده كتير يا معلم.

غير معرف يقول...

ههههه والله عندك حق بس الخوزيق كلها كوم واخر خزوق ده كوم تاني ده الي مفهوش هزار مش عرفة ملها العزوبية يعني ما احنا زي الفل بس ما تخدش علي كلامي ربنا يرزقق ببنت الحلال الي تستهلها ندي

beautiful mind يقول...

تركيب
ههههههههههههه
طبعا احلاهم وكثرهم حدة في نفس الوقت
عشان دا هايبقي قضاك
ويا اما تستحمل يا اما يتقال عليك انك مش ولا بد
استحمل بقي وامرك لله

beautiful mind يقول...

كريمة سندي
استاذه كريمة حمدالله علي السلامه
فعلا العمر كله قصص وعبر
وادينا بنتسلي

beautiful mind يقول...

غير معرف
طبعا اكيد
ودي كانت اخر ماسي حياتي
مش الاخيرة اوي يعني
يلا
عش في الدنيا كأنك غريب
او ان شالله عنك ما عشت
لانك ولا حاجه

beautiful mind يقول...

ندي
هههههههههه
عندك حق والله
هو احنا ليه نجيب العكننه لروحنا
ما احنا عايشين زي الفل اهو
تحياتي ليكي يا قمر

غير معرف يقول...

هههههههههههههههههههههه
لا بجد الموضوع جامد عاجبنى اوى :)