Pages

الأربعاء، 25 أبريل، 2012

بنت الجيران




وكأنها حاجة من التقاليد العتيقة اللي اتربينا عليها .. واللي الحكايات 
والحواديت اللي كانوا بيحكوهالنا وبيملوا دماغنا بيها
لازم هي تبقي موجودة فيها ... يعني لازم أول حب في حياتك يكون
لبنت الجيران ... بغض النظر بقي ازي هتحبها بس لازم تبقي هي البداية
اللي بتتعلم منها ازاي تبقي واد مخربش وفاهم في الحاجات دي عشان لما تكبر
تبقي دايس وسالك ومحدش يضحك عليك أو يقول عليك انك مقفول ياعيني
بس انا مشكلتي ان كل جيرانا مكنش عندهم بنات ... اه والله
او كان عندهم بس كلهم من النوع اللي هو استغفر الله العظيم
 وفضلت مستني بنت الجيران دي تيجي ولا حس ولا خير وأقول ياد اصبر
معقوله حواديت ستي الله يرحمها هتكدب يعني دي لازم تبقي فيه بنت الجيران
ولازم تطلعلها ع السطوح وتبعتلها جوابات وامك تمسكك وتديك علقة محترمة 
لكن انتطاري طول أوي ولقيت نفسي كبرت كمان وبقيت في 2 ابتدائي وبصراحة
حلمي اني احب بنت الجيران بدأ يتبخر ودا كان ليه أثر سىء جدا علي نفسيتي 
وفي المدرسة انا وصاحبي أحمد حبينا نفس البنت هي مكنتش جارتي ولا جارته
كانت من بعيد بس احنا اصرينا نسميها بنت الجيران وكنا كل يوم لما نخرج من المدرسة
نمشي وراها لغاية بيتها ونستناها لما تدخل وياسلام بقي لما كانت تبصلنا وتشاورلنا
بايديها احنا الاتنين ياااااااااااه كان احساس حلو اوي
وكل واحد فينا بيحلم بيها وحاطط في دماغه انها بتجبه وانه هيتجوزها لما يكبر 
وأمبرة بردو كانت تستاهل ... كانت حاجه كدا مش عارف اوصفها ازاي ؟
اهو الكلام دا بقاله يجي 17 سنه ولسه فاكره وفاكر كل اللي احنا عملناه
واللي خلاني افتكره كمان لما قابلت أحمد قريب وكان بيجكيلي عن بنته
وبيفرجني الفستاين اللي هو جايبهالها 
ياااااااااااه الزمن جري بينا بجد
وأحمد اتجوز وخلف .. وبنت الجيران هي  كمان اتجوزت 
وانا اللي فاضل فيهم
بس بردو لما هتجوز مش هتجوز بنت الجيران
علشان الحواديت اللي بتتحكي للاستماع بس

هناك 6 تعليقات:

سواح في ملك اللــــــــــــــــــه- يقول...

بنت الجيران

اعتقد ان اصل حكاية بنت الجيران دي

ان زمان كان ممنوع علي البنت الاختلاط

او الحديث مع شاب غريب

وكان اقرب مايمكنها الحديث معه هو ابن

الجيران فقد تولد الجيرة احتكاكات وتعامل

وعلاقات اسرية احيانا

ومن هنا يبدأ التعارف

ونظرا لقرب السكن

فأنه يراها كثيرا وتراه كثيرا

تحيتي

شمس النهار يقول...

فكرتني بأغنية عبد الحليم وفاتت جنبنا

:))))

ذكريات الشباب نادرا ماتتنسي
كمان هي دي كمان احد عوامل تشكيل الشخصية

YA♥SA يقول...

الحمدلله ابن الجيران بنكره بعض احنا الاثنين لحد الاختناق اه بجد ههههههه
لكن انا بئا اتخطبت لابن الجيران صحيح مش جاري اووي بس قريب من بيتنا وقريبي وانسان طول عمري بحبه ويااه بئا وانا ف ثانوي واداني حصة ههههه ويارب يتم لنا الموضوع ع خير ويبقي زوجي
ويرزقك بالزوجة الصالحة محدش عارف ممكن تطلع بنت الجيران بردو بس مش تعرف ..بتحصل..!!

غير معرف يقول...

روعة تسلم ايديك،كلنا حبينا بنت الجيران او ابن الجيران على حسب بس احلى حاجة انك تحب من بعيد علشان الست الوالدة ما تعلقكش ، كل واحد فينا عند حكاية حلوة ويمكن تكون احلى ذكرى فى حياتة بس المهم ان الذكرى دى تكون حافز للانسان يعنى حياتنا ما تقفش عندها او متأثرش فى مستقبلنا بصورة سلبية انا عن نفسى بعيش اجمل حب كل يوم لانى اخذت الجوانب الايجابية من حبيبى وهى انى اقدر اكمل حياتى مهما كانت الظروف المحيطة بينا لاننا احنا اللى بنخلق الظروف يعنى لو انت كنت عاوز تحب بنت الجيران كنت لقيتها حتى لو جيرانك ما عندهمش بنات بس كنت هتلاقيها مهما طال الانتظار .

غير معرف يقول...

بحب ابن عمووهوابن جيراننا

غير معرف يقول...

بحب ابن عمووهوابن جيراننا