Pages

الأربعاء، 31 مارس، 2010

سنه اولي حناني



زي النهارده 30 مارس السنه اللي فاتت 2009
ظهرت حناني للنور
وابتدت رحلتها الصعبه في عالم المدونات
علشان تلاقي لنفسها مكان
وابتديت معاها انا كمان رحلتي مع التدوين
مفيش شك اني دلوقتي بعد سنه كامله بالتمام والكمال
باعترف اني اتطورت عن الاول كتير جدا
في كل حاجه ... في الشكل والاسلوب والاداء
حتي في طريقة الكتابة وانتقاء المواضيع والكلمات

كانت حناني هي الوسيلة الوحيده اللي بقدر اعرفكم بنفسي
من خلالها وبقدر كمان اعرفكم كويس واعرف كل واحد فينا
بيفكر ازاي وفي ايه وامتي يكون فرحان وامتي يكون زعلان
لاننا بنكتب عن اي حاجه بتحصل لينا في اي وقت وف اي مكان

وانا كواحد منكم كنت بكتب عن اي حاجه في حياتي
كتبت عن كل حاجه
عن الناس اللي اتاثرت بيهم في حياتي
عن رحلاتي وعن المواقف الصعبه اللي حصلتلي
كتبت عن دخولي الجيش لحظة بلحظة وخبر بخبر
وازاي كنت زعلان وانا رايح
وقد ايه كنت فرحان لما رجعت مرة تانيه
كتبت لما حبيت ووصفت كل شعور حسيته
حاولت اني اخليكم جزء مني زي منا بقيت جزء منكم

انا في السنه دي اتعرفت بناس كتير اوي من خلال المدونات
ومن خارج المدونات بردو وكان كل حد جديد باعرفه بعرف فيه
شخصية جديده وافكار جديده واحساس جديد
مش ممكن ابدا هنسي كل حد قرالي كلمة وقال رايه فيها
سواء عجبته او معجبتوش
وبقولهم كلهم انا مش ممكن ابدا هنساكم ولا هقدر اوفي حقكم
خاصة الاشخاص اللي بيستنوني دايما لما بكتب حاجه جديده
وبيسالوا عني لما بتأخر وهم دول بجد اللي بقولهم فعلا اني بحبهم من قلبي
حتي الأشخاص اللي اختفوا فجأه من حياتي
واللي كانت كل كلمة بتتكب بتبقي ليهم انا متأكد ان روحهم لسه هنا
وريحتهم موجوده في كل صفحة
وحناني زي ما كانت ليهم
هتفضل ليهم


اكيد في كلام كتير دلوقتي عايز اقوله بس لا الوقت ولا المكان
اللي انا فيه يسمح اني اكتب اكتر من كدا لاني مش في البيت للاسف
ان شاء الله هابقي اجاوب في البوست الجاي عن حاجات كتير جدا
وعن اهم سؤال بتسأله دايما
ليه المدونه اسمها كدا؟
وايه حكاية حناني دي؟
اشوفكم بخير
وكل سنه وحناني طيبه
وانتم طيبين
وانا كمان طيب

هناك 8 تعليقات:

sony2000 يقول...

كل سنه وانت طيب وكل سنه وحناني ديما بخير يارب
وديما فتقدم من سنه لسنه
اللهم امين:)

غير معرف يقول...

كل سنة وحنانى طيبه وبخير وفى المقدمه ان شاء الله

احاسيس آيوشه يقول...

كل سنة وانت طيب وعقبال 20 سنة تدوين بلاش طمع :))

ريمان يقول...

السلام عليكم


كل سنه وحنانى طيبه وبالف خير يا رب

وكل سنه وهى منوره كده فى عالم التدوين

تحياتى ليك ولمدونتك

ستيتة حسب الله الحمش يقول...

كل سنة وانت طيب يا هيما
وحناني طيبة
وربنا يخليك وسطنا دايما منورنا
والموسيقى اللي انت حاططها انسب شيء لأسم المدونة
بحبها بشكل خاص جدا

Abo- Kamal يقول...

كل سنة و انت طيب يا ابراهيم و إن شاء الله تكون في المقدمة دايما و تقولنا قصة اسم المدونة ههههههههههههههههههه

إبتسامة ملاك يقول...

السلام عليكم
ازيك يا هيما
اخبارك ايه يارب بخير ويطمنى عليك

كل سنه وحنانى بخير
مزيد من التوفيق والرقى للمدونه الروعه
ربنا يكرمك يارب ويسعدك

تحياتى ومنتظرين البوست القادم عشان نعرف ايه السبب للاسم

مش مهم مين يقول...

كل سنه وانت طيب ويارب دايما احسن