Pages

الجمعة، 5 أغسطس 2011

رمضاني




تهنئة
لكل مصري ومصرية , لكل مسلم ومسلمة
لكل اللي أعرفهم واللي مش أعرفهم كمان
تهنئة لكل حد عايش في جو الروحانيات البديع
اللي عايشينه الايام دي وحاسين قد إيه بالصفاء
والنقاء والراحة والقرب من ربنا الكريم
مبارك علينا الشهر , مبارك علينا التوبة
القرءان ,الرحمة , المغفرة , العتق من النار
" بعيد عن رحمة الله من أدرك رمضان ولم يغفر له "
تهنئة بشهر رمضان

خبر حلو
كان أول يوم في الشهر الفضيل حلو أوي علي
من كل ناحية لأني سمعت فيه خبر قبولي في الوظيفة
اللي كان نفسي اشتغل فيها من زمان وفي المكان اللي
بحبه جدا وتعبت كتير عشان أوصله
وبعد ما كان اليأس هيتمكن مني وضاقت بي السبل
وملقتش حل غير إني الجأ لربنا اللي كان فضله
علي عظيما والحمد لله رب العالمين

شكر
لكل أصحابي اللي وقفوا جانبي أيام التعب
كل اللي ساندني ولو بكلمة
شكرا لكل اللي كانوا معايا بجد لحظه بلحظه
شكرا ليك يا مصطفي يا إنسان بجد وصديق
صعب يتكرر مرة تانيه
شكرا ليكي يا أمي ياللي زعلتك مني غصب عني
وعرفت قد إيه أثر زعلك مني وأنا في لجنة الامتحان
والدنيا سودة قدامي بس انتي عارفه اني نرفوز شوية
ماانتي امي بقي وحافظاني هو انا هعرف اكتر منك يعني؟
شكرا للي مش هقدر أقول اسمها هنا علشان الرقابة
ههههههه بس انا مش هسكت بردو أنا هقول كل حاجه
كمان شهر شهرين كدا يعني
أنا لازم أفضح نفسي وأقول كل حاجه
أمال أنا عامل المدونة دي ليه أصلا؟

متابع في رمضان
زي عادتي دايما في كل سنه
بقسم يومي في رمضان عشان أعمل كذا حاجه
الصبح طبعا بكون في الشغل وبيطلع عيني
بعد الضهر ممكن أنام شوية وبعد صلاة العصر
ببقي مع القران لغاية أذان المغرب
طبعا صلاة التراويح لازم جماعة في المسجد
بعدها باتمشي شوية مع العيال اصحابي
وبعدين برجع البيت ع 11 كدا ممكن وقتها
أفتح التليفزيون أشوف أي حاجه تستاهل
كل سنة باختار حاجه او اتنين اتابعهم كويس
السنة دي بتابع برنامج " الشعب يريد " لطوني خليفه
علي قناة القاهره والناس برنامج جامد بجد
وبتابع بردو أستاذي عمروخالد في برنامج
" مع التابعين " علي قناة CBC

رسالة SMS
أجمل رسالة وصلتني علي الموبايل
من فتره كبيرة جدا كانت في أول رمضان
فيها دعاء جميل جدا بكرره دايما في أي صلاة
الرسالة بتقول
لم أجد أجمل من إرسال باقه رحمانيه
،ورودهاقرآنيه،أوراقهاملائكيه،
أغصانها صلوات محمديه تقول
 اللهم اجمعنا في دار الدنيا و جنة الأخره٠

سلام ختام
ربنا يجعل أيامنا كلها رمضان كلها خير
كلها سعادة وحب وهناء
كل سنة وكلنا طيبين ومصر بخير

هناك 12 تعليقًا:

كريمة سندي يقول...

بوست عفوي جميل جدا ورائع ... كل عام وأنت بخير

الشكر موصول لك

Unknown يقول...

كل سنة وانت طيب ومبروووووووووك الوظيفه ومبرووووك مقدما عن اللى هنسمع عنه كمان شهرين وربنا يخليلك الست الوالده وميحرمكش منها ابدا

Tarkieb يقول...

رمضان كريم ياريس ومبروك الوظيفة

غير معرف يقول...

مبروك الوظيفه ... ورمضان كريم :)

beautiful mind يقول...

كريمة سندي
كل عام وحضرتك بكل خير
ولك ايضا جزيل الشكر
رمضان كريم

beautiful mind يقول...

mena
كل سنة وانتي طيبه
ويارب تكوني بخير
الله يبارك فيكي
وربنا يتقبل دعواتك
رمضان كريم

beautiful mind يقول...

tarkieb
رمضان كريم
الله يبارك فيك
وكل سنه وانت بكل خير

beautiful mind يقول...

فتاة من الصعيد
الله يبارك فيكي
وكل سنه وانتي بكل خير
رمضان كريم

شمس النهار يقول...

الف مبروك علي الوظيفة الف مبروك
اما ست الحبايب اول ماهتراضيها بكلمتين خلاص
اصل قلب الام مابيعرفش يغضب علي ضناه

وكل سنة وانت طيب

دعاء العطار يقول...

الفففف مبرووووووووك ع الشغل ومالناش دعوه احنا عايزين عزووومه جامده D: D:

بالنسبه للرقابه بقى فأمن الدوله اتشال D:

كل سنه وانت طيب ورمضان كرررريم

مهرة سالم يقول...

السلام عليكم ورحمة الله وبركاته ..
مبارك عليكم الشهر
وكل عام أنت وعائلتك بألف خير
..
في حفظ الله

غير معرف يقول...

كل سنة وانت اطيب ومن الرحمن اقرب وفى الدنيا اسعد وفى الاخر اخلد