Pages

الاثنين، 8 مارس 2010

امينه

انا حاسس اني لو ما ارتبطتش بالبنت دي
هاموت...... حياتي هتنتهي ....
دي كانت كلمات واحد صاحبي لما كان بيحب بنت
في بلدهم ومش عارف يوصل لقلبها ازاي
رغم انه حاول كل المحاولات الشرعيه وغير الشرعيه
علشان يخليها توافق انه يرتبط بيها بالطريقه اللي ترضاها
احمد .. شخصية غريبه وعجيبه ملامحه مصريه اصيله
ابن بلد بحق... رجوله قلما تشوفها في حد من شباب الزمن دا
اللي بقوا ماشين في الشوارع متعرفش تفرق بين تيمو ( توفيق ) الولد
وتيمو ( تحيه ) البنت
عنده بساطه وتلقائيه سبحان الله تخليك تحس انك تعرفه من زمان اوي
ودا كله مش هايجي حاجه جنب بركان الاحاسيس والمشاعر والعواطف
اللي ماليه قلبه
واللي كانت السبب انه ينكب مره واحده ويتدهول وتبقي حالته
لا تسر عدو ولا حبيب لما قلبه حن ورق لاول مرة في حياته
قدام بنت تقربله من بعيد شويه وشاف انها هي فتاة احلامه اللي قعد
سنينه دي كلها قافل عليه قلبه بالضبه والمفتاح قدام اي حب او علاقه عابره
معرفتوش عن قرب الا في الجيش وسبحان الله كانت معرفتي بيه سوء تفاهم
ونفوس مش راضيه لكن بمرور الايام تتغير الاحوال وما دايم الا وجهه
ويكون احمد هو الحضن الدافي اللي ببقي ملهوف اني اسافر علشان اقعد معاه
ونعيش شوا هناك في المكان الوحش اللي انتوا عارفينه
محبوب من طوب الارض حتي من الظباط اللي بينادوه بالاسم عشان يهزروا معاه
ودا علشان قلبه اللي انقي من جواهر الدنيا
نرجع بقي تاني لحكاية احمد مع حبيبته
فضل يكلمها في التليفون ليلاتي بالساعات ويجي يجري يحكيلي اللي حصل
رغم ان البنت مكنتش مدياه اهتمام لكنه كان جواه امل انها تبقي ليه
وكل يوم عن التاني حاله يتغير والتعب يبان في عنيه
والبنت ولا هي هنا رغم انها بتكلمه دا كله في التليفون
انا مش فاهم ليه طالما هي مش عايزه ترتبط بيه ايه يخليها تعمل كدا
وتعلقه في حبالها الدايبه علشان لما يقع ميعرفش يقوم لان رقبته هتكون
انكسرت خلاص
واحمد يوصفلي اللي جواه ويقولي ع اللي هوا ممكن يعمله علشانها
دا ممكن يخدمها طول العمر بس هي توافق
هيجيبلها كل اللي بتحلم بيه
هيعملها الفرح في المكان اللي هي تتمناه
هايخليها بس ما عليها الا انها تشاور وتكون كل حاجه تحت رجليها
دا هيعمل وهيعمل وهيعمل
ويسألني يعمل ايه وايه رايي في كلامه؟
وانا كان رايي انه يسيبه من الموضوع دا كله
اي نعم هيعب شويه.. لكن هيرتاح بعد كدا عمره كله
لانه حب البنت دي لدرجه مخيفه
لدرجة انه بعد كدا هايبقي هو امينه وهاتبقي هي سي السيد
واهله رايحين جاين علي اهلها وابوها شويه يرفض
والبنت شويه ترفض
وصاحبنا حالته بقت تصعب ع الكافر
لدرجة اني قولته : تعرف يا احمد لو انا بنت
والله مانا سايبك بس يا خساره يابني
انا في ناس متكلمين علي
وفي يوم من الايام داخل انا بليل كدا لكافيتريا المعسكر
لقيته عازم الناس كلها علي مشروبات
خير يا جدعان في ايه
قالي اختار الحاجه اللي انت عايزها الناس كلها معزومه علي حسابي
انا طبعا انتهزتها  فرصه وهاتك يا طلبات
فهمني يابني في ايه؟
قالي الجماعه لسه متصلين بيا واللي كنت عايزه حصل؟
قولتله : بجد؟
قالي : اه والله
سكت ... متكلمتش
قولته يااااااااااااااااااااااااااااااااااااااه
بعد دا كله اخيرا وافقت
قالي : تخيل
قولتله: طيب انت هتعمل ايه وهترد عليهم تقولهم ايه
قالي : بكره انا نازل اجازة علشان اخلص كل حاجه
ونزل احمد الاجازة
علشان يقول لاهله انه مش ممكن يتجوز البنت دي بالذات
لانه مش هيرضي علي نفسه انه يكون امينه

هناك 14 تعليقًا:

ريمان يقول...

معقوله؟

على فكره نهايه غير متوقعه

بجد مش فاهمه يعنى بعد الحب ده كله وما صدق انهم وافقوا يقوم يقولهم لاء مش هجوزها؟

دعاء العطار يقول...

بص انت لو تشوف منظرى وانا بقرا البوست

ابتسمت من اول المشوبات وكل شويه الابتسامه تزيد لحد مامره واحده بلمت ع اخر جمله

وبعدين قلت لاء اكيد انا فهمت غلط

رجعت قريت تانى من اول المشروبات عشان اتاكد لقيت نفسى بلمت برضه

حكايه عجيييييبه جدااااا يعنى بعد الحب ده كله والفرحه دى كلها يسيبها

بس تعرف بالرغم انى مستغربه الموقف واتصدمت بس تصرفه صحححححح جداااااا
لان معاها هيفضل طول عمره هو اللى بيحبها وهى ولا هى هنا ومش هتقدره خااالص

ربنا يوفقه ويعرف ينساها

غير معرف يقول...

لا ده رخم بقا هههههههههه

عموما ده شغل عيال معلش

اثنين جدهن جد وهزلهن جد النكاح والطلاق " ص "

تحياتي

ستيتة يقول...

احمد مريض نفسي
ده رأيي ومتأسفة لو كان صادم لك

انا رفضت لأني بنت
طول عمري لازم الراجل هو اللي يتقدم لي واقبله او ارفضه

لكن افضل وراهل لأني مريض نفسي علشان اقول لها انا اللي رافضك
وبعدين ابرر ده بإني دكر قوي ومرجلة

لأ انت مش مرجلة
خاااااااااااااااااااالص

ده في حالة ان كانت القصة حقيقية

sony2000 يقول...

الحمد لله ان حصل كدا فعلا
قول لصحبك ان العقل لاذم يكون متواقف مع المشاعر
وانه لاذم يعرف من الاول انها بيعاه بيعاه
وموش بتحبه لا دي بس عاجبها تمسكه بيها لاغير
والحمد لله انها بانت ادامه وعرف يتصرف صح
تفبل مروري وتحياتي

beautiful mind يقول...

ريمان
لانه حس وعرف واتاكد انها هتتعبه في حياته
علي فكره في تفاصيل تانيه في الحكاية انا مقولتهاش
وانا شايف انه عمل الصح
لاني لو في مكانه هعمل زيه بالظبط
تحياتي يا ريمان

beautiful mind يقول...

دعاء العطار
وجهة نظرك صح جدا
ومتوافقه مع كل اللي شهدوا الحكايه
حياتنا مينفعش نعيشها واحنا حاسين ان غيرنا بياخد وبس
يعني مينفعش طرف يكون ايجابي علي طول وطرف تاني يكون سلبي علي طول
تسلم عقليتك يا دعاء

beautiful mind يقول...

فتاه من الصعيد
لا يامروة دا مش شغل عيال
بجد هو اتصرف صح
يابنتي اي حد راجل مكانه كان لازم يتصرف كدا
انا عن نفسي لو حسيت اني بحب حد وهو مش علي نفس الدرحة اللي بحبه بيها
اكيد مش هستحمل اعيش معاه
لازم يكون فيه مقابل لكل حاجه
تحياتي

beautiful mind يقول...

د ستيته
اولا القصه حقيقيه 100%
وانا مش في حاجه اني اختلق قصص علشان اخلي ناس تدخل تقرا وخلاص وازود عدد الموضوعات
لا القصه دي حقيقه وكل كلمة فيها حصلت فعلا
ثانيا مين قال ان لازم البنت هي اللي تقبل وترفض
مين قال كدا؟
يادكتور اللي حضرتك متعرفيهوش ان البنت رفضته لان كان فيه حد تاني في حياتها ورغم كدا كانت بتكلم صاحبنا دا يعني بتلعب ع الونجين
والتصرف اللي هو عمله اي واحد ( دكر ) سوري في اللفظ اللي حضرتك قولتله كان لازم يعمل زيه
تحياتي

beautiful mind يقول...

sony 2000
بجد كلامك هو بالظبط كلامي
ودا راي الناس العقلاء
هو فعلا بيحبها جدا ورغم كدا رفض انه يرتبط بيها
دي حياه
مش كام يوم هنقضيهم وخلاص
تحياتي

ستيتة يقول...

حلو قوي يا ابراهيم
وطبعا انت متعرفش البنت دي
تعرفها على لسان صاحب القصة
صاحب القصة اللي عارف ان في حياتها راجل تاني ومع ذلك مستمر يكلمها
من باب أهي واحدة فاضية وانا ورايا ايه انا كمان

صاحب القصة اللي عمال يسوق عليها الأهل والخلان علشان توافق
مع علمه بأنها عارفة واحد تاني
ومع علمه بأنه ها يبقى امينة


بس الحمد لله الحمد لله في نهاية اللعبة نشكر له انه مش ها يطلع امينة
وانه ها يفضل تيمو
هو انهي تيمو بقى
ربنا بس هو اللي يحكم

يا هيما القصة غير سوية
والبنت كونها لعبية فكتير كده
لكن هو مين؟
هو مين علشان يلعب بقلب واحدة في التليفونات
هي لا تتقي الله
طب وهو؟
والا مش مهم طالما هو راجل

لأ بصراحة راجل قوي
بس يا ابراهيم انا لا احترمه
لا احترمته وهو عارف ان قلبها في حتة تانية وبيكلمها
ولا احترمته وهو عارف ان قلبها في حتة تانية وبيخطبها
ولا احترمته لما وافقت وشرب الكتيبة ساقع
ولا استعنيته لما راح على بلدهم علشان يقول لها وافقتي يا بطة طب انا مش موافق

Kiara يقول...

كلام دكتورة ستيتة صح مليون في المية

اصلا ازاي يستمر معاها وهو ارف انها مرتبطة

وازاي اصلا يتقدم وهو عارف انها مش خالية

وازاي يقول توافق وانا هعملها واعملها وهو عارف انه بكدا يبقي امينة بلعكس الي بيحب حد بيتمنى يسعده لكن هو شاف انه امينة يبقي عمر قلبه مادق
وياسلام يشرب الكتيبة حاجه ساقعه عشان يقولهم انا سي السيد مش امينة
بزمتك مش شغل عيال

الراجل مش بيقول انا راجل ولا بيفرقع بمب عشان يقول انا راجل

الراجل بتكون تصرفاته وافعاله هي اللي بتتكلم عنه

غير معرف يقول...

v etes innovateur
viens voir REASON65.unblog.fr

hamza يقول...

tres interressant
reason65.unblog.fr