Pages

الأحد، 1 نوفمبر 2009

عاده سريه


هبدأ علي طول في كلامي لاني عارف ان العنوان 
خلا الشيطان يلعب في عقلكم وعلامات الاستفهام اشتغلت 
وايه دا ؟ وازاي ؟ ومعقوله هيتكلم في الموضوع دا ؟
علشان كدا انا هطقع عليكم حبل تخيلكم ( الوحش ) دا وهقول:

وانا في تالته جامعه جالي شوية تعب في ودني مكنتش بعرف انام منه
وكل يوم عن يوم بيزيد واروح من دكتور لدكتور وكل واحد فيهم ما عليه الا
يملا الروشته بالشيىء الفلاني والادوية اللي لا بتجيب ولا بتودي بل بالعكس كانت 
بتزود الموضوع اكتر

وصارت الحاله من سىء لاسوأ
ودني فيها صوت دوشه جامد اوي ومش بتهدي نهائي لا في الليل ولا النهار
وششششششششششششششششششششششششششششششش
كدا يعني
كان ناموسه داخله جواها ونازله زننننننننن وكل ما تلاقيني هادي كدا لوحدي
تبتدي تزود الجرعه 
لا كنت بعرف اذاكر ولا اعرف انام
وابتدت ودني الشمال سمعي يتقل فيها شيئا فشيئا وبقي فيها ميه كتير
اعمل ايه بس ياربي ؟
وكله كوم والناموسه اللي جواها كوم
الامتحانات خلاص ع الابواب باقي يادوب شهر واحد بس
وانا كنت في تخصص صعب بجد يعني عايز مذاكره ليل نهار
اشي كيميا بيلوجيه وحيويه وكيميا فيزيائيه
وفيزيا كهربيه وجوامد وفيزيا اشباه موصلات والذي منه
ورياضه بحته واه واه من الرياضه البحته دي هي دي كانت مشكلتي
المهم
التعب بيزيد اكتر ومفيش حاجه نافعه وكل يوم سمعي يتقل شوية بشويه في الودن الشمال دي
اقترحت علي والدتي ( ربنا يديها الصحه ) اني اروح اكشف تبع الجامعه
قالتلي يابني انا سامعه ان عندكم دكاتره كويسين وبعدين بهتموا بالطلبه 
روح كدا جرب يمكن 
سمعت كلامها وروحت 
انا كنت في فرع الجامعه في دمنهور
وهناك حولوني علي المستشفي الرئيسي في المجمع النظري في اسكندريه
دخلت لعيادة الانف والاذن وهناك قابلت الدكتور م ب
عمري ما هنسي اسمه سالني انا بشكي من ايه 
وبعدين كشف عليا وقعد يسالني شوية اسئله 
وجاب جهاز كدا ودخله جوا ودني وانا ملاحظ انه مستغرب
او شاكك في حاجه معينه
قالي:يابني هي الحكاية دي عندك من امتي؟
قولتله: بقالها يجي شهرين تلاته
قالي: ومكشفتش ليه؟
قولتله: كشفت يادكتور وكل مرة يدوني علاج ونقط ومفيش فايده
قالي : ممممممممممم
بص انا هقولك انت عندك عضمه الاذن مسوسه وهي اللي عامله الوش دا
واذا ملحقنهاش في خطر عليك
طبعا ابتدت الدنيا تلف وتدور بيا واشباح واشكال ومشارط ومقصات تيجي قدامي
قولتله : طيب والحل ايه يا دكتور؟
قالي : لازم جراحه وتتعمل حالا
قولتله : طيب يا دكتور انا داخل علي امتحانات قريب وكدا السنه هتضيع مني
قالي : هي الامتحانات اهم من صحتك ولا ايه.. انت تروح دلوقتي وتيجي يوم الخميس 
( احنا كنا يوم التلات )  علي العياده الخارجي بتاعتي وهناك هنعمل استعدادنا 
يلا يابني اتكل ع الله
خرجت وانا بضرب اخماس في اسداس 
جراحه ....... انا ...... وعضمه مسوسه .....
هسقط السنه دي ..  معقوله ؟
 طيب اعمل ايه؟.....وهقولهم ايه في البيت؟
بدأت معنوياتي تنهار وبجد والله بقيت ماشي اخبط في الشارع وبكلم نفسي
لغاية ما روحت وقولتلهم كل حاجه
وقفلت علي نفسي وقعدت في جو كابه
ومش عايز حد يكلمني وهم يحاولو يهدو فيا ويقنعوني انها بسيطه
بدليل ان فلان وفلان عملوا زيها قبل كدا ودلوقتي كويسين
جا يوم الخميس اليوم الموعود ( بالصدفه دا كان يوم محاضرات الرياضه)
وروحت للدكتور وكانت معايا والدتي المره دي
كشف عليا تاني وعمل شوية حاجات كدا
وفي اليوم دا كان عنده استاف كامل من الدكاتره
يجي 4  او 5  وكل واحد فيهم ماشاء الله 
قعدوا يتناوبوا عليا كل واحد شويه كاني فريسه بالنسبه لهم
ويكلموا في بعض وانا مش فاهم اي حاجه
المهم جا صاحبنا

وقالي: كدا كله تمام انت هتيجي يوم الحد الجاي علشان تحجز 
وتجيب معاك حد ... انت اكلت ولا لسه؟
قولتله : ماكلتش حاجه 
قالي : كويس عايز تحليل دم كامل وتجيبه معاك
وخلاص اتاكد اني هعمل العمليه 
الامتحانات باقي عليها 15 يوم
والعمليه بعد يومين
ومن المستحيل اني الحق اذاكر او اعمل اي حاجه
قولت مفيش مفر خلاص غير اني الجأ لربنا هو اكيد اللي عالم بحالي
وقعدت اسمع بعض الخطب ووقفت عند الحديث ( داوو مرضاكم بالصدقه ) قاله الشيخ 
في الخطيه وسبحان الله يتكرر نفس الكلام في خطبة الجمعه عن نفس الموضوع
وقعد الشيخ يحكي عن فلان اللي ابنه كان عنده سرطان ويئس من علاجه 
وفلان اللي ربنا شافاه لما اتبرع بفلوسه 
قولت طيب ما اجرب الحكايه دي هو انا هخسر ايه اكتر من كدا
وعزمت اني هاخد مصروف كل يوم بتاع الكلية واصرف نصه ع المواصلات
وتصوير الورق والاكل ( دا اذا اكلت برا البيت ) والنص التاني هتبرع بيه كل يوم 
لاي حد يقابلني
وفعلا بقيت اعمل كدا كل يوم وبقت دي ( عادتي السريه ) اللي محدش يعرفها غير انا وربنا
اصحابي كانوا مستغربين اوي للي انا بعمله ويقولوا ايه يابني انت لاقي فلوسك ولا ايه
اقولهم اصل في حد اداني الفلوس دي وقالي ابقي اديها لاي حد غلبان
نسيت اقولكم اني طنشت معاد العمليه ومروحتش اساسا واتحججت في البيت اني 
هعمل كل حاجه بعد الامتحانات ان شاء الله
وجات الامتحانات وانا زي منا لسه بردو الالم شغال وانا لسه بنفذ العاده بتاعتي
وكانت حالتي وحشه بجد .. لان نفسيتي كانت تعبانه شوية بسبب الموضوع دا
وعدت الامتحانات 
وكان لازم بقي استكمل حكاية العلاج دي
فاحترت اروح لنفس الدكتور .. طيب هقوله ايه؟
ولما يسالني مجتش ليه هرد اقول ايه؟....... دا كان مجهز لكل حاجه
قولت في نفسي لا مش هروحله
انا هروح عند حد تاني بره واعمل العمليه عنده وخلاص
وروحت لاستشاري كبير عندنا ومتخصص في الموضوع دا
وبردو كانت والدتي معايا
دفعت الفيزيتا بتاعته ( كانت حراقه اوي والله ) واخدت دوري
ودخلت 
لقيته راجل كبير وعليه هيبه كدا ( دكتور بجد )
قالي : اقعد يا ابراهيم ( طبعا عرف اسمي من الورق اللي قدامه )
قعدت
قالي : خير يا سيدي عندك ايه؟
قولتله : انا يا دكتور بقالي مده عندي ................................................
قالي : اها .. مين كشف عليك قبل كدا ؟
قولتله : دكاتره كتير ( نص كم طبعا ) بس اخر واحد كان دكتور م ب  اللي قالي 
عندك عضمه مسوسه ومحتاجه جراحه فوري وكدا

قالي : اها .. طيب 
وقعد يحطلي حاجات ويبص بالعدسه اللي معاه والبنت الممرضه
تديله حاجات وهو شغال في ودني
قالي : انت قولتلي مين اللي كشف عليك ؟
قولتله : دكتور م ب 
قالي : فين دا ؟
قولتله : في مستشفي الطلبه في اسكندريه
قالي : وقالك عندك عضمه مسوسه وعايزه جراحه
قولتله : اه والله قالي كدا ومش هو لوحده كمان
دا كان معاه مجموعة دكاتره غيره

قالي : ولا عندك عضمه مسوسه ولا حاجه والعضمه زي الفل قدامي اهي 
قولتله : امال يا دكتور ايه الالم والوش دا وايه الميه اللي فيها دي كلها
قالي : كل الحكاية يا ابني ان عندك شوية التهابات بسيطه وهي اللي عامله كدا
قولتله : شوية التهابات ........ وبسيطه
قالي : دلوقتي هعملك غسيل وهحطلك نقط معينه وتجيب زيها وتستعملها وقالي ع الطريقه
وان شاء الله تبقي تعيد الكشف تاني ونبقي نشوف ايه حصل
خلصت عنده وخرجت والدنيا كلها مش سايعاني ومبقتش مصدق اي حاجه
معقوله .. احمدك ياربي .. وامي هي كمان كانت فرحانه ومش مصدقه كلام الدكتور
وروحت البيت واستعملت النقط دي
عايز اقولكم اني من بعدها لغاية دلوقتي الحمد لله مشتكتش بودني تاني
وههههههههههههه مروحتش اعيد الكشف ووفرت الفلوس
عايز اقولكم حاجه كمان بقي بس مش كويسه
اني نسيت او بطلت اعمل ( العاده السريه ) تاني
اوعوا تفهموني غلط ... ها
يلا سلام


هناك 22 تعليقًا:

♥نبع الغرام♥♪≈ يقول...

احم احم


ممكن اخد اول تعليق

♥نبع الغرام♥♪≈ يقول...

طيب نقول بقا السلام عليكم

اخبارك ايةةةةةةةةةةةة

يارب تكون بخير وحمدالله على سلامتك ونرت مدونتك من تانى

♥نبع الغرام♥♪≈ يقول...

اممممممممممم

اروح اقرء وارجع
بسررررررررررررررررررررررررررررعه

♥نبع الغرام♥♪≈ يقول...

ممممممممممممم

كويس قريت كلامك كلمة كلمة
بصراحه ربنا كبير وحنين على عباده
ويمكن عشانك طيب جت كده من عند ربنا

وفعلا فى دكاترة كتير قووى نصابين كل اللى يهمهم المادة وبس
يلا قدر الله وما شاء فعل
وربنا يبعد عنك اى الم ويكرمك خير يارب
مودتى
ايناس

♥نبع الغرام♥♪≈ يقول...

ياريت ابقا طمنى عليك

مع السلامة

غير معرف يقول...

داووا مرضاكم بالصدقه

ربنا يعافيك يا رب

تحياتي

ستيتة يقول...

قصة رائعة
وكلها عوبر
ربنا يتم شفاءك ولا يريك ألم قط
بس ارجع للعادة بتاعتك
الصدقة تطفيء غضب الرب
تحياتي يا هيما

الفراغ يقول...

الحمد لله انك بخير

ان الله مع الذين والذين هم مؤمنين

أحمد بسام يقول...

الحمد لله على سلامتك
زيارة اولى و ليست اخيرة باذن الله
جزيت خيرا

دعاء العطار يقول...

ربنا يشفى كلللللللل مرضى المسلمين يااااااااااارب

ويرحمهم من افترا الدكاتره المستغلين اللى كل همهم يعقدوا الواحد فى عشته

الحمد لله انك طلعت منها على خييييييير

دمت بخير وصحه وسلامه

د. ياسر عمر عبد الفتاح يقول...

بقي هيه دي العادة السرية بتاعتك
ده الشيطان ده بيصور للواحد حاجات يا أخير

المهم ألف سلامة عليك وعلي ودنك
أن برضه عانيت مع ودني كثير أوي
يلا الحمد لله


علي فكرة كنت المفروض تروح إعادة الكشف
لأنها في الغالب ببلاش ومن غير فلوس
يعني إنت موفرتش حاجة

غير معرف يقول...

ازيك ياابراهيم
اخبارك ايه وعامل ايه
يارب تكون بخير
شفاك الله وعفاك من كل مكروه
وجع الودان ده مشكلة
وبعد ذلك ياريت تدوام على ماكنت
تعمله من الصدقة وجدد النية
تحياتى

غير معرف يقول...

السلام عليكم
الاخ ابراهيم
جزاكم الله خيرا على الموضوع الروعه ده

وفعلا فكره ممتازه انك تتبرع بجزء على طول من فلوسك
حتى ولو كان شئ قليل
لان افضل الخير ادومه وان قل

كويس انك مرحتش للدكتور الاولانى تاني
فى حاجات مهمه زي دي الافضل انك تسال اكثر من واحد
لان ممكن واحد يشخص غلط او ممكن احيانا بتكون حاله لها اكتر من طريقه للعلاج فممكن تشوف اللى مناسب ليك
ربنا يبعد عنك المرض ويشفى المرضى

عابرة السبيل يقول...

اول بوست طويل كده اقراه للاخر وده لانى شفت من الدكاترة انواع كتير بتستهبل كده
بس ده مش موضوعنا

طيب ما انت افتكرت اهو ما تعيد "العبادة " دى تانى ...ولا احنا ما نفتكرش ربنا غير وقت الزنقة بس ؟


جزاك الله خيرا على التذكرة

Unknown يقول...

حمداًً لله على سلامتك
اختلاف التشخيص أو قل
خطأ التشخيص شىء وارد
جداً لاى طبيب لكن العيب
التمسك بالخطأ والمكابرة عليه
انت ربنا نجاك من شىء ملوش لازمة
وياعالم لو كنت عملت العملية ايه
كانت حتبقى النتيجة؟وكمان ياترى الدكتور الاولانى دا كان حيعمل
عملية من اساسه ولا اهو ياخد
الاتعاب وشوية (همبكة)ومع
السلامة :( ربنا لطف فى
قضائه الف حمد وشكر.

Yusuf يقول...

خذ من اموالهم صدقة تطهرهم وتزكيهم بها

يارب تكون بخير يا هيما وربنا يكتر من صدقاتك

تحياتي

خواطر شابة يقول...

من المعلوم ان الصدقة تدفع البلاء ونقل عن النبي صلى الله عليه وسلم قوله ما معناه داوو مرصاكم بالصدقة
على العموم الحمد لله على سلامتك ولو ان حمد الله كان سيكون بالاستمرار في عادتك السرية ولو بمبلغ اقل وولو على فترات متقطعة
دمت في رعاية الله

ريمان يقول...

ااااااه يا ودانى


انا اللى ودانى وجعتنى


ربنا يعافيك يا رب



سلامتك الف سلامه

singamaraja يقول...

Reading and visiting your blog

مدحت محمد يقول...

انا كنت هفهم غلط الصراحة

Reda يقول...

lol . nice story :)

غير معرف يقول...

Nice story but what's the moral