Pages

الأربعاء، 7 أكتوبر 2009

حد في حياتي


يا اهلا باحبائي اللي بحبهم بجد 
وربنا يعلم مقدار هذا الحب
واللي بتمني انهم يكونوا كلهم بكل خير
ومفيش حد يكون زعلان من حد يارب
************
الحب في حياتنا

لازم يكون فيه حب
علشان نعرف نعيش
لازم نحس ان فيه حد مهتم بينا بجد
حد يهمه امرنا
حد مستعد انه يعمل اي حاجه علشانا
حد مش مستني مقابل
او منتظر اننا نقوله كلمة شكرا لانك عملت
كل واحد فينا لازم يكون معاه الحد دا
لازم يكون جنبه فعلا 
او حتي قريب منه ويعرفه
او قريب منه ومش واخد باله
او يكون مستني انه يجي
كل واحد فينا اكيد ربنا اكرمه ولقي الشخص دا
اللي بيحبه بجد
واللي لسه مصادفهوش 
اكيد هايجي اليوم اللي يلاقيه قدامه
يعوضه كل لحظة حزن عاشها في حياته
علشان نقول داخل نفسنا
ياااااااااااااااااه
احنا قبلك كنا ولا حاجه
انت كنت فين من زمااااااااااان ؟
ياتري الجمله دي ممكن تقولها لمين في حياتك
انت كنت فين من زمان ؟
بس اوعي تعمل زي ناس  معرفتش تحافظ عليه
وتخيلت انها ممكن تعيش حياتها من غيره
ودلوقتي بتقول 
ياريتك ترجع زي ماكنت
لازم نحب في حياتنا
لازم ناخد دافع علشان نعيش
لازم حد نرتاح اننا بنكلمه
ونجري عليه نحكيله ايه حصلنا
ونبقي في منتهي السعاده واحنا معاه
ولما يغيب نفضل مستنين رجوعه
واحنا بنعد كل لحظه
ونقول 
الثانيه في بعدك سنين
ولو مرة سمعنا انه ممكن يرحل
انه ممكن يسبنا ويمشي
انه ميكونش في حياتنا تاني
اننا نصحي منلاقيش صورته قدامنا
ولا نسمع صوته الحنون
ولا نقوله اننا بنحبك
في اللحظات دي بتتقلب حياتنا
وتختل موازين الامور جواها
ونلاقي نفسنا مش عارفين نعيش
لان حياتنا انسحب منها اجمل حاجه فيها
*********
انا بدعي ربنا كل واحد فينا 
يكون لقي الشخص دا فعلا
علشان يعرف بجد قد ايه حياته هتتغير
زي حياتي انا متغيرت بجد
علشان حد من دول في حياتي
جه الوقت اللي كان لازم اقوله كدا
اقوله
مهما قولتلك 
كلامي  مش هيكفي
ومهما عملت
مش هقدر بردو اوفي
بس عارف انا هقدر اقولك حاجه واحده
كفاية علي انك حفرت اسمك جوايا
مستحيل حاجه تقدر تمسحه
ربنا يخليك ليا
واقدر بجد اكون انا معاك
زي ما انت معايا
دايما
يكفيني
نور
اسمك


هناك 36 تعليقًا:

ريمان يقول...

السلام عليكم


كلامك طبعا صحيح


لان فعلا الحياه بتتغير وبيكون ليها طعم تانى

بس المشكله ان الواحد لو مقدرش يكمل حياته مع الشخص ده او حصل شىء اقوى منهم فرقهم عن بعض


ساعاتها هتبقى كارثه بجد

آه وكفى يقول...

يارب يخليه لكل اللي معاه ويرزق لاللي لسه مش لئاه

:)

آه وكفى يقول...

ايه الخيانة دي ياريمان انا قولت انا اول تحليق
ايه الحظ الكفتة ده

غير معرف يقول...

كلامك تماااام

ويا رب يسعد ايامك يا رب .... هو انت ليه مظلل اول حرف من اخر اربع كلمات " وش خباثه "

تحياتي

Unknown يقول...
أزال أحد مشرفي المدونة هذا التعليق.
beautiful mind يقول...

اه وكفي
والله فرحان بوجودك هنا
ويارب تكون معرفة خير
اللهم امين
وبعدين انتي ولا ريمان واحد
هههههههههه
المهم اللي يجي الاول
تقبلي مني خالص التحيات

beautiful mind يقول...

فتاة من الصعيد
ههههههههه
ولا وش خباثة ولا حاجه
عادي يعني
هههههههههه
ربنا يسمع منك
وكل سنه وانتي بالف خير

beautiful mind يقول...

ريمان
اكيد هاتبقي كارثه
علشان كدا انا قولت ان كل واحد فينا يحافظ علي الشخص اللي معاه
بس ساعات بيبقي مفيش حل غير الفراق وساعتها بيكون اريح للاتنين
تقبلي مني خالص التحيات
وسلامي اليك

Yusuf يقول...

دايما
يكفيني
نور
اسمك

ده انت طلعت لعيب
:)

ربنا يخليكوا لبعض

تحياتي

♥نبع الغرام♥♪≈ يقول...

اذيك اخبارك ايه يارب تكون بخير يارب
ربنا يطمنا عليك
وبجد ليك واحشة كبيرة قوووووووووى
اسفه على عدم متابعتى وكمان جايا متاخرة
اصلى اخد اجازة يومين كده من النت

بس رجعت تانى اهووووووووووووو

♥نبع الغرام♥♪≈ يقول...

موضوع جميل قووووووووووووى يا ابراهيم بجد


ربنا يديم عليك نعمة السعاده يارب ويجمعك مع من تحب
اللهم امين يارب العالمين

مودتى

VÖltaa يقول...

لان حياتنا انسحب منها اجمل حاجه فيها



انا حياتى انسحب احلى مافيها فعلا
كلامك ده ياجميل قلب المواجع

عموما تسلم ايدك

dramaqueen يقول...

الله على كلامك
حلو اوى
وطالع باحساس جميل وصادق لانه من قلبك

وطبعا دخل على قلبى بسرعة لان عندى احساس زيه

ربنا يسعدك مع احب الناس ليك ومايحرمش حد من حبيبه

ويخلى لى حبيبى

Unknown يقول...

ربنا يسعدكم سوا
يارب ويديم عليكم
هذه المحبة والألفة

ستيتة يقول...

ماشية معاك يا عم
هنيالو يا سيدي
صفارة طويلة وبعاكس
ههههههههههههههههههههههه

ادعو الله المنان ان لا تفترق ابدا عن من غير لك طعم الأيام
وخلها لون قوس قزح :)
بس خد بالك منه
وخليك انسان عاطفي وبتبين مشاعرك
من حق كل حبيب يسمع غلاوته من بؤ حبيبه
ومش بس كده
لأ يشوفها في كل تصرفاته

الف مبروك يا عم
ربنا يبعد عنك عنين بلوج اسبوت

------ يقول...

كلامك جميل

كنت بقولها كل يوم هى فين ماتيجى بقى

لغاية ماقبلتها

ودى اعز صحابى وبجد اتمنى ان نفضل مع بعض

فيه اغنية تقولك ايه

اللى ليه حبيب يروح يقولوا بحبك بعيد او قريب يروح يقولوا بعزك

beautiful mind يقول...

yusuf
ايه يا جو
انت هتفتح عنيهم علينا كدا
وبعدين مين فينا اللعيب ياهندسه
ههههههه
ربنا يطمني عليك
وتكون بالف خير وسلامه

beautiful mind يقول...

عاشقة الاحزان ايناس
متشكر جدا علي دعواتك ليا
واكيد ان شاء الله هتابعي اكتر
انا عارف الظروف اللي انتي فيها
بس بجد مفيش حاجه تستاهل اننا نحزن عليها كل دا
اشوفك بخير ان شاء الله
دومتي بكل ود

beautiful mind يقول...

محمد
ياااااااااه
مشوفتكش من زمان اوي
حمدلله علي سلامتك
وان شاء الله ربنا هيعوضك خير
بس لما تختار اختار صح
مع خالص حبي

beautiful mind يقول...

dramaqueen
حمدلله علي سلامة رجوعك لمدونتي تاني
والله بجد ليكي وحشه
ويارب يخليكي لكل اللي بيحبوكي
وتعيشي حياتك في سعاده
مع تحياتي

beautiful mind يقول...

norhaty
متشكر جدا
ربنا يسمع منك يارب
وان شاء الله تكوني سعيده
وحياتك مليانه فرح

beautiful mind يقول...

د ستيته
بجد والله مش عارف اقول لحضرتك ايه
انتي منوراني والله العظيم
وربنا يتقبل منك كل الدعوات
وان شاء الله هاعمل زي ما قولتي
دومتي بكل خير

beautiful mind يقول...

دموع القمر
ربنا يخليكم لبعض
بس انا عرفت انتي بتتكلمي عن مين
لان مفيش غيرها
انوسه القمر
كلامي صح ولا
ابقي ردي بقي
علشان اتاكد بس من معلوماتي
مع خالص تقديري واحترامي

تنهيد يقول...

ليه بتقول ان الانسان مش يقدر يعيش من غير حب انا معاك ان الحب كيان ووجود وتكامل واهم نقطة التكامل وبصراحة كل نقطة احسن من نقطة بس الاهم من كده الحب تفاهم وتعامل مين دلوقتى بيقدر ده وينف ده ويرغب فى ده انت بتتكلم عن شئ شبه معدوم او نادر مش بنشوفه غير فى القصص والروايات مش بنشوفه غير فى السينيمات مش بنشوفه غير بين الاطلال ويوم من عمرى وشارع الحب لكن دلوقتى خلاص مش فى حاجة زى كده اللى بيحب عوز يتملك حبيبه وبس ويلغى كيانه ويعتبر حبيبه حاجة بتاعته وده فى حد الذات خنقة مش حب الحب تأنى واختيا مش اندفاع الحب حلو بس ممكن نعيش من غيره

beautiful mind يقول...

تنهيد
انتي طبعا عندك حق وانا جيت فى وقت وحسيت نفس كلامك بس اتاكدت ان احساسى كان غلط لان ما ينفعش تجربه واحده تخلينا نفقد الامل فى الحب اكيد الاختيار مكنش موفق واكيد ان شاء الله لما تلاقى الشخص المناسب اللى يقدرك ويستاهل حبك ويضيف لكى مش ياخد منك بس اكيد هتقوليله كنت فين من زماااااااااااان؟

تنهيد يقول...

كلامك ممكن يحصل فعلا واكيد لكن انا مش عشت تجارب دى مجرد وجهة نظر من اللى بشوفه قدامى لكن مش تجربه وانا مأنكرتش انا مافيش حب هو اه شبه معدوم لكن في حب وانا ات\عترفت وقولتلك الحب كيان ووجود وتكامل واهم المهم تفاهم وتعامل واختيار

beautiful mind يقول...

تنهيد
انا ما قولتش انك عشتى التجربه دى انا بقول لما تقبلى الشخص المناسب اكيد وجهه نظرك هتختلف واكيد الحب من غير تفاهم ماينفعش يعنى 50% حب 50% تفاهم وتعامل واهتمام ودى بردو وجهه نظرى

amr imam يقول...

هو اكيد لازم بس الحياة اكبر من كدة بكتير وكمان شوية لما عمرك يقرب من فوق التلاتينات بحاجة بسيطة هتشوف انناس معينة بس فى الحياة هما الى فعلا يستهله حنانك ورعايتك وكل الحاجات الحلو دية

ولماتيجى عند سن الاربعين هتلاقى مفاهيم تانبة وفهم اخر للحياة


بس كل دة هيجى بمدى احتكاكك وخبراتك فى الحياة


انا كل الى عاوز اوضحهولك
انك يكون ليك مبداء وقدوة فى الحياةتقتضى بيها

اتمنى تشريفك لية المدونة
بتكلم فى مضوع مهم ممكن يفيدك
او لو مش هيفيدك ممكن تفيد بية ناس تانين

beautiful mind يقول...

استاذ عمرو امام
انا سعيد جدا براي حضرتك
وان شاء الله هتشرف بزيارتك
وكلام حضرتك كله عجبني بجد
اشوفك بخير

عمرو يقول...

ربنا يوفق الجميع للشخص المناسب له اللى يقدر يتفهمه و يفهم زرايره كويس علشان مايدوسش على زرار غلط و يفقده و يرجع يفتكره و يتألم و ينساه و يفتكره و يبعد و يقرب و يقرب و يبعد لأن كل ده بيوجع النفسيه و بيؤثر على الشخصيه و لو من طرف خفى ..
بوست حلو أوى يا اٍبراهيم قريته كذا مره كالعاده :)
تقبل تحياتى ..

beautiful mind يقول...

وتحياتي المعطره اليك يا استاذي الجميل
وماشاء الله علي سحر كلامك
دائما مبدع يا عمرو بك
اشوفك بكل خير

دعاء العطار يقول...

امسك الخشب وخاف على نفسك من النق

هههههههههههههههههههه

ربنا يسعدك ويخلى كل ايامك كلها حب

وماشاء الله انت بكلمات بسيطه جدا قدرت تجسد كل ماتحمله كلمة " حب " من معانى

ياااااااااااارب دايماً

اقدم عاصمه فى الحب يقول...

السلام عليكم

دعوه جميله اوى ورقيقه للحب
تسلم ايدك وشكرا اوى على الاحساس اللى انا حسيته هنا
كلامك انا لمسته بجد
كتير بعيش فى مدونات ناس صحابى وبستمتع بكلامهم اوى لان بجد الكلام ده ترجمه لأحساس جواهم وانت من النهارده بقيت واحد من الناس اللى انا انشاء الله حهتم بمتابعه كل ما يخطه قلمك ده بعد اذن حضرتك طبعا
وخصوصا ان انت ابن بلدى كفر الدوار
يا ريت تقبل ودى واحترامى
كن كما تحب :)

♥نبع الغرام♥♪≈ يقول...

السلام عليكم
ازيك يا ابراهيم
اخبارك ايه يارب تكون بخير
ان شاء الله ترجع وتنور مدونتك

ربنا معاك
وخلى بالك من نفسك

♥نبع الغرام♥♪≈ يقول...

طولت الغيبه المرة دى
يارب ترجع بالسلامه

ايه معتش فيه اجازات ولا ايه

ربنا معاك

غير معرف يقول...

نفسي اعيش اليوم ده تانى