Pages

الأربعاء، 30 سبتمبر، 2009

مش انا اتسرقت......


السلام عليكم
ازيكم
طبعا وحشتكم اوي ....... صح؟
ياعم وحشتنا ايه دا انت كل يوم هنا
هو دا جيش؟... ولا دا سلاح اللي انت فيه
دا احسن من سلاح التلميذ بشويه
ماشي يا سيدي
المهم
طبعا العنوان خضكم
وكل واحد بيسال نفسه ايه الحكايه دي؟

 هحكيلكم طبعا
صلوا بينا ع النبي
طبعا انتم عارفين اني مجند  في البحريه
وعارفين كمان ان المكان اللي انا فيه قريب اوي من بيتي
علشان كدا بكون موجود معاكم باستمرار والحمد لله
وربنا يديمها علينا نعمه
يوم الحد اللي فات بقي كان معاد سفري
اتكلت علي الله ومشيت
ومكنش معايا حاجه خالص غير محفظتي
اللي فيها الكارنيه بتاع الجيش ( البلوه) دا
وشوية فلوس صغنطتين كدا حوالي 70 جنيه
 واتنين تلاته جنيه فكه والبطاقه وورق شخصي 
وكد ايعني ....المهم
ركبت مواصله من حته اسمها ( الطابيه ) 
للمكان اللي فيه تجنيدي
المواصله دي تقريبا 5 دقائق بالعربيه
طلعت المحفظة دفعت الاجرة ودخلتها تاني في جيبي 
ونزلت لما نزلت بحط ايدي في جيبي ملقتش حاجه
المحفظه فص ملح وداب
طبعا انا وشي جاب الوان وقعدت اضرب اسباع في اسداس
اعمل ايه ياناس؟ واتصرف ازاي؟
كل اللي كان شاغلني الكارنيه بتاع الجيش.. 
هعمل ايه وهو مش معايا
دا غير الجزاء اللي هاخده وهتحبس
لانه اهم حاجه في المهمات اللي معايا
 وضياعه معناه اني مهمل
المهم
كان معايا واحد زميلي اخدت منه فلوس وطلعت بره تاني
طبعا لاني خلاص معدش معايا الحديده حتي
والفلوس اللي كانت في المحفظه كنت هقضي
 بيها الكام يوم اللي بقعدهم
ركبت وروحت ورا العربيه زي المجنون
ولا لقيت لا العربيه ولا السواق وقعدت اسال السواقين كلهم واديلهم مواصافات السواق
ولا من شاف ولا من درى
رجعت تاني علشان متكتبش تأخير .. واهو كله سواد
بعد ما خلصت طابور الصبح جريت للظابط بتاعنا
 وقولتله يافندم انا محفظتي ضاعت وانا جاي
قالي طيب وايه يعني
قولتله يافندم فيها الكارنيه والبطاقه والفلوس وكل حاجه
قالي فيها الكارنيه...؟
قولتيه اه
قالي (........)  انت عسكري مهمل ومستهتر
 وتستاهل اللي هيجرالك
قولتله يافندم طيب اعمل ايه بس انا قولتلك اللي حصل
قالي استني بقي لما تعمل محضر وتعمل بدل فاقد
بس لازم هتاخد جزاء ياحلو وتتسجن
 اقل حاجه شهر سجن
اجري من وشي  يلا
طبعا انا مشيت ورجلي بتخبط ع الجيران
والمركز كله عرف ان كارنيهي ضاع
وكله يقولي معلش ان شاء الله هيرجع
وانا اقولهم يارب
المهم الكارنيه مش مهم اي حاجه تانيه
المهم
في نص اليوم كدا لقيت الصول  بينادي اسمي 
وبيقولي افرح ياد لقينا حاجاتك واحد لاقاها
 واداها لواحد زميلنا وهيجبهالك
متتصورورش والله قد ايه كانت فرحتي برجوع حاجاتي 
طبعا تفاصيل رجوعها كانت مثيره بردو
المهم اني اتصلت باخويا وخليته راح قابل الراجل اللي معاه الحاجات بتاعتي وجابها منه
بس تعرفوا والله الحرامي دا طلع ابن ناس وكريم اوي
اخد ال70 جنيه وسابلي 2 جنيه فكه
اهو قال ممكن اجيب حاجه ساقعه ولا حاحه
دا انا في جيش وغلبان
بذمتكم مش حرامي كريم بردو
بس الحمد لله ان الكارنيه رجع بالسلامه
واني انا كمان رجعت بعد ما كنت هفقد الامل
يلا 
ادينا بنتعلم
تصبحوا علي خير


هناك 21 تعليقًا:

همس يقول...

والله حرامى موووووووووز خلى عندك دم بقى ورجعله الاتنين جنيه متكلش الفلوس على الراجل وحمد لله على سلامتك ياهيما

بيطرية ومش بايدى يقول...

الحق تانى تعليق

اللللللللللللللحق يا معلم

بيطرية ومش بايدى يقول...

اه ربنا يستر
شكل العنوان مايطمنش

طب كنت قولى ان انت هتتسرق
كان زمانى عملت معاك احلى واجب

عارف كنت هاعمل ايه


كنت هاساعده هههههههههههههههههه

بيطرية ومش بايدى يقول...

نروح نقرا ونرجع تانى


ومادام لحقت التانى يبقى اقرا براحتى

سلامووووووووز مؤقت

بيطرية ومش بايدى يقول...

طب والله فيه الخييييير :)

يعنى الرادل اهو عامل حساب الحر والعطش

وقال يدوبك تجيب بيهم حاجة ساقعة

معلش تعيش ومتاخدش غيرها ياهيما

الحمد لله ان الكارنيةرجع
ربنا معاك يا جميل

ومايوقعكش الا ف ولاد الحلال
ومش هاقولك غير
فلوسك ف جيبك مطوتك ف ايديك
اللى يقولك ممكن اسرقك شرحه

احلام سعيدة يا هيما
وانت من اهل الخييير

عمرو يقول...

تحيه كبيره أوى لهذا الحرامى أبن الحرامى الشهم الجدع اللى رحمك يا اٍبراهيم من شهرين حبس بالميت و كمان يا عم عزمك على حاجه ساقعه و ده من كرمه يعنى :)
ياريت يكون هذا الحرامى العفش قدوه للحراميه الكبار اللى حتى مش بيسيبوا الفتات لضحاياهم علشان يقتاتوا منه ..
حرص على كارنيهك يا اٍبراهيم لأنه بالنسبه للجندى قد يكون فقده سبب مشاكل لا حصر لها ..
جات سليمه و تقبل تحياتى ..

dr/shiko يقول...

الف مبروك علي السرقة ..هههههه... لالا ماتزعلش كده خلاص ... الف مبروك علي رجوع المحفظة والكارنية بالسلامة ليك ... واستعوض ربنا في الفلوس ... علي فكرة انا الحرامي ..ههههه

أم مالك يقول...

ياخبر ابيض
كنت زعلانة مش على السرقة
انما على العقاب والحبس
بس الحمد لله الفلوس تتعوض
خلى بالك السرقة بالطريقة ديه
منتشرة من زمان انهم ياخدوا
الفلوس ويرموا الاوراق والمسروقين
فعلا بيفرحوا بعودة الاوراق اكثر
الحمد لله اللى جت على اد كده
تحياتى ياابراهيم

Yusuf يقول...

الف حمد الله علي سلامة الكارنيه

انت من الواضح ان الحرامي اللي قلبك ده باشا

مبيحبش يشيل فكة

بس كله يهون والا السجن

وابقا خد بالك ياهيما

أبــــو ضـــيــاء يقول...

خلي بالك المرة الجاية

ستيته حسب الله الحمش يقول...

مرسي ابن المعلم الزناتي اتسرق يا رجالة بالإنجليزي

كرم الله انه ساب المحفظة بكارنيهك وبابا غنوجك وخد الفلوس اللي هي ارخص كتييييييييييييير في الموقف ده

الحمد لله انك جيت يا عم ومشحططناش وراك بالعيش والحلاوة :)

mimi يقول...

ربنا يخللي الحرامي اللي رجع الكارنيه اللي كان ضياعه هيحبسك ويمنعك عن أصحابك وأخواتك

حمد الله علي سلامة الكارنية

والاتنين جنيه دول ... تجيبلنا بيهم حاجة حلوة .. أو تديهم للصول اللي عندك

تحياتي

dramaqueen يقول...

الحمد لله ان المحفظة رجعت وفداك70000000000000 جنية

بجد نشفت دمى
مبروك على المحفظة وخلى بالك منها بعد كدة

بص هى مش اتسرقت منك
هى وقعت فى الميكروباص الاول وبعدين اللى لقاها سرق الفلوس وساب الورق

الحمد لله على كل حال

فتاه من الصعيد يقول...

ههههههههههه
ده برتكول رسمي للحراميه .... بيسرقوا الفلوس ويسيبوا الورق علشان عارفين انها بلد ورق

تحياتي للحرامي الاصيل ..... وخد بالك المره الجايه يا دفعه

عاشقة الأحزان يقول...

السلام عليكم

هيما ازيك اخبارك ايه يارب تكون بالف خير وحمدالله على سلامتك ياقمر بجد كنت واحشنى موووووت
وبفرح قووى لما بلاقى بوست بيطمنى عليك يا ارق هيما

معلهش بقا تعيش وتاخد غيرها
والحمد لله انت انسان طيب وربنا بيحبك ومش عاوزك تتبهدل ورجع ليك الكارانيه
خلى بالك من نفسك
وطمنى عليك
مودتى
انوسه

dodoo يقول...

حمدالله على سلامتك وعلى سلامة الاتنين جنيه

ههههههههههههههه

معلش سرقه تفوت ولا حد يموت

ريمان يقول...

السلام عليكم

هقول ايه بس


سرقه تفوت ولا حد يموت


ههههههههههه


بيحصل معانا حاجه شبه كده


ــــــــــــــــــــــ


ردا على تعليقك فى مدونتى

beautiful mind


اهلا اهلا


بجد نورت مدونتى وسعيده اوى ان البوست عجبك

وياريت اللى انت بتهديله الكلمات اللى انا كتبتها يا ريت بجد يدخل يشوفها ويقراها


هكون بجد سعيده والله


تحياتى لمرورك وشكرا لزيارتك الجميله

آيوشة يقول...

هههههههه طيب الحمد لله انك لقيتها ومتحبستش وربنا ستر
بقالى كتير ممرتش على المدونة من ساعة اخر مرة قولت فيها رايح الجيش وافتكرت انك مش هنشوفك غير بعد كام سنة :)
طلع الجيش بتاعكم حاجة حلوة خالص

آه وكفى يقول...

يله حمدالله على سلامة الكارنية ياعم ومتضعش البيض كلو في سلة واحدة كده وبعدين الحرامي ده عسل موت قال يعني الاتنين جنية دوول هما االي مش هيدخلوه النار ياسلااااااااااام حرامي ذوق ذووق ذووووووق يعني

دموع القمر يقول...

تعيش ومتاخدش غيرها ياهيما

معذرة على التأخير بس انت عارف الطروف

ربنا يكرمك

والف حمدا لله على سلامة الكارنيه :)

تحياتى لك

القدر و انا يقول...

ابراهيم
موقف مؤلم وسخيف
العن ما فيه ضياع البطاقات والكارنيهات ودور دور على بلد فاقد ايام وليالى
الحمد لله ان ربنا ستر عليك وانقذك من الحبس
انا فعلا قررت امشى بصورة للبطاقة والاوراق المهمة تحسبا لتلك المواقف الصعبة
تحياتى يا بطل