Pages

السبت، 11 فبراير 2012

انا عيل سيس




ذات يوم قرررت وأنا في كامل قواي العقلية
وبدون أي ضغوط خارجية أو داخلية إني أتخلى
عن كل حاجه تخصني وتخص شخصيتي اللي قاعد
أكون فيها بقالي سنين .. وأتغير زي ما كل حاجه بتتغير
ولقيت نفسي محتار .. طيب أتغير أبقي ايه ... فيه حاجات كتير أوي
أروح التحي وأقصر البنطلون وابقي سلفي ... ولا ابقى ليبرالي
ولا انضم لأي حزب جديد واشوف بيقولوا ايه واشارك معاهم في اي حاجه
يمكن أفهم هم بيعملوا ايه .. وهم عايزين إيه أصلا ؟
ولا اروح أقدم في نادي والعب أي لعبة ان شالله حتى العب بلي مسافات طويله
المهم آخد لقب رياضي .. ولا أعملي أي مشروع علي قدي كدا وابقى رجل أعمل
وفي لحظة قررت إني أكون حاجه تانيه خالص غير كل دا
قررت إني ابقي شاب استايل .. واغير لبسي وكلامي وكل حياتي
واتعرفت علي واحد من الشباب دول اللي احنا بنسميهم شباب " سيس "
وعرضت عليه فكرتي وسعادتي بإني أكون واحد منهم وطلبت منه بعض
النصايح علشان ابقي " سيس " معتبر وسالك
قعد الواد يقولي شوية حاجات اللي كانت بالنسبه له كأنها شيء مقدس
أو عقيدة " عقيدة الشباب السيس " .. 
وانا عمال استمع لكلامه وكلي اذان صاغية
قالي :
بص يا مان عشان تكون زينا لازم تعمل اللي هقولك عليه
قولتله : قول
قالي : أول حاجه لازم تغير طريقة كلامك وسيبك بقي من الكلام القديم
بتاعكم دا .. يعني أديك مثال ... مثلا انت لما تدخل مكان علي ناس بتقول ايه؟
قولتله : بقول السلام عليكم ؟
قالي : دا كان زمان .. دلوقتي لأ
انت تقول: هاي يا جماعه ... عاملين ازاي ؟ وحشتوني طحن موت
لو عايز تمشي بقي تفول . بيس دلوقتي .. سي يو
قولتله : يا سلام ... تصدق حاجات حلوة
قالي : ولازم تعمل ابديت لكل كلامك يا مان لأن فيه حاجات جديدة بتظهر
كل يوم عشان يبقي عندك باك جراوند لأي كلام بيتقال
قولتله زي ايه كدا ؟
قالي: يعني تقول انا هامشي ناو .. وهكلمك فون .. وهقعد ع الفيس
وهروح السكول ... كدا يعني
فل يا مان كدا ؟
قولتله : فل الفل كمان .. انا كدا بقي بقيت استايل " بلاش كلمة سيس عشان بيزعلوا منها "
قالي : لالالا هو احنا لسه عملنا حاجه
قولتله : دا انت غيرت قاموس اللغة بتاعتي ولساني اتعوج ناقص ايه تاني ؟
قالي : نيجي بقي للأكل ... انت بتحب تاكل ايه ؟
قولتله : عادي يعني باكل اي حاجه ... مش بتفرق معايا
قالي : ايه دا يعني ايه اي حاجه ؟ ... يعني ممكن تاكل فول وطعمية والحاجات دي
قولتله : يا سلام ومالك قرفان من نفسك كدا ليه ؟ ... ايوه طبعا باكلها وبشرب عرق سوس كمان
بصلي باشمئزاز وشكله كان هيرجع وقال : يا مان دا أكل الناس الداون احنا بناكل حاجات تانيه
لازم تجرب تاكل سوسيس .. هوت دوج ... تشيكن بيكاتا .. حاجات من دي
قولته : اه حاضر بس يارب الاقي الصيدليات فيها الحاجات دي
قالي : تعالي بقي للدماغ..   قولتله : دماغ ايه .: ما احنا كدا كويسين
قالي : يا مان دماغك لازم يبقي ع المود ويبقي ريفريش علي طول
اي حته تروحها لازم يكون معاك التظبيط بتاع الهيد دا عشان الروشنه تكمل
بصتله وانا مش فاهم ولا كلمة وقولتله : نعم
قالي : يعني الحشيش دا اساسي .. البرشام ... لو فيه افيون يبقي بيس
بس سيبك من البانجو عشان دا بيقلب بمعيلة في الاخر ... ها . فهمت ؟
قولتله : وانا اجيب الحاجات دي منين يا مان ؟
قالي : انوي انت بس وجهز البراتس وانا اظبطك
قولتله : براتس ... وتظبطني .... هو لسه فيه حاجات تانيه ولا كدا تمام ؟
قالي فاضل بقي الحتة ..... قولتله : حتة اية ؟
قالي : القطة ؟ .. قولتله يا عم قطة ايه ؟ هي فيها قطط كمان
قالي اقصد الجيرل فيرند يا مان .. انت مصاحب ولا ايه؟
قولتله : بفكر ... قالي : انا هعرفك علي شلة بنات استايل اخر حاجه
وانت شوف اي حتة فيهم عشان الشكل العام بتاعك قدام باقي الشباب
عشان تبقي معاك في اي مكان ومتبقاش الوون
اخر حاجه بقي وهي اهم حاجه يا مان
قولتله : قول يا مان انا دماغي باظت اصلا
قالي : كدا غلط .. متقولش دماغي باظت اصلا .. اسمها دماغي باظت اصلي
قولتله : والله .... تصدق فرقت .. انتم عيال ولاد ايه
قالي : اهم حاجه بقي في دا كله وهو الاساس يا مان .. الشكل البراني واللبس بتاعك
قولته : ايوه هو دا الكلام .. انا عايز الناس كلها تعرف اني استايل
قالي : اول حاجه لازم تسيب شعرك يكبر اخر حاجه واوعي الشيطان يوزك في يوم وتسرحه
لازم يبقي عامل زي فروة الخروف وسيبه علي راحته
وانت بتشتري بقي الهدوم اشتري اكبر حاجه يعني البنطلون يكون اكبر 4 او 5 نمر عليك
والتيشيرتات اشتريها عليها رسومات كتير زي جماجم مطربين الروك .. جيفارا
لازم بقي تلبس اكبر عدد من السلاسل الجلد والحظاظات ودي مهمه جدا
لو عرفت تعمل وشم في اي حته باينه يكون تمام لو معرفتش احنا نعملك
مممممم اه لازم بقي تسقط البنطلون شوية لا مش شوية .. شويتين
عشان البوكسير يبقي باين وانت ماشي .. هو دا النظام
قولتله وانا متاخد كدا ومش مصدق اللي بسمعه : بصحيح دا يا مان
قالي : هو انا ههرج في الحاجات دي .. شايفني انا عامل ازاي ؟
قولتله : عارف يا كابتن
قالي : تل مي ..
قولتله : انا اصلا عيل سيس اني قعدت معاك وسمعت كلامك



هناك 19 تعليقًا:

سواح في ملك اللــــــــــــــــــه- يقول...

هههههههههه عسل وربنا

فيه مثل زمان كان بيقول

ال...... لما يتمدن بيجيب لاهله العار

واللي غايظني بقي في العيال دي

(((هوت دوج)) في حد ياكل هوت دوج

الله يقرفهم هههههههههه

موضوع مهم وجميل وساخر

;كارولين فاروق يقول...

ههههههه
هي دي فوائد العيال السيس
انه الواحد يضحك عليهم

أع ـقل مـ ج ـنـونــة يقول...

=D

هبة فاروق يقول...

ههههههههههه عجبتنى المصطلحات السيسيه المتاصله وعجبنى الحوار اللى انتهى بالفرار بدون راجعه
حلو البوست ودمه خفيف

دعاء يقول...

:)

كريمة سندي يقول...

والله وقت ضايع معاهم لكن عرفنا إزاي بيتكلموا ويفكروا ويتصرفوا أول مرة أسمع عنهم معلومات جيدة لمجتمع يحاول أن يتخلص من جذورة بشكل بايخ جدا عملت خير إنك رديت عليه كدا وأخدته على قد عقله ربنا يكرمك خليك زي ما أنت أفضل ابن البلد الشهم والأصيل

amiraali يقول...

ههههههههههههههههههههههههههههههههههههههههه....فطستني علي روحي من الضحك...علي راي سواح في ملك الله..الفلا لما يتمدن يجيب لاهله العااار ..بييييس يا ماااان

beautiful mind يقول...

سواح في ملك الله
هههههههههه
بكره ياكلو الهوت كات كمان
هي فعلا عيال مقرفه باشكالهم دي
شرفني وجودك
خالص تحياتي

beautiful mind يقول...

كارولين فاروق
ههههههههه
عندك حق والله يا استاذه
وادينا بنتعلم
شرفني حضورك للمرة الاولي
واسعدني تواجدك
ادام الله التواصل
تحياتي

beautiful mind يقول...

هبه فاروق
نعمل ايه بقي يا استاذه
اصل مجتمعنا بقي غريييييييييب
وكل يوم بلاوي جديدة بتطلع
حبينا بس نلقي عليها الضوء
خالص التحيات

beautiful mind يقول...

كريمة سندي
دي موضه منتشرة جدا في الشباب العربي
خاصة شباب الخليج
ربنا يبعدهم عنا
وفعلا مفيش اجمل من الاصل
تحياتي لحضوركم الكريم

beautiful mind يقول...

اميره علي
بيييييييييس
شوفتي بقي اديكي اتعلمتي مصطلح من بتاعهم
يعني التدوينة جات بفايده
والله هم يضحك وهم يبكي
انا حبيت بس اطلع الناس بره جو الغم والنكد اللي احنا عايشينه
يلا سي يو

غير معرف يقول...

ههههههههههههههههههههه البوست جامد جدا
وحلوة اوى تل مى :D

Unknown يقول...

هذا نتاج الغزو الفكري الذي بتغلغله صار عاديا عند بعض الشباب ...
تقديري لنقشاتك !

http://zaman-jamil.blogspot.com/

بنت قلبى يقول...

ههههههههههههه

الحمد لله عليكى يا مصر دلوقت اقدر اموت وانا مرتاحه على شعبك يامصر

نيللي علي يقول...

ده تخده من أيدو وتوديه السرايا التافه مش الصفر ع الأقل المجانين غصب عنهم, لكن ده تااافه

ربنا يستر علي الناس

موضع جميل وساخر

تحياتي

faroukfahmy يقول...

اول مرة اعرف ان فيه مصطلحات سيسيية بالرغم من تقدم ستى
اختارت نفسى ان اكون احد متابعينك حتى اقف الى آخر المصطلحات السيسية
خاطرة اكثر من رائعة ولى لقاء فى متابعة ما سبق ان كتبته

شمس النهار يقول...

ضحكتني ضحك

ده عيل عيل مش سيس

العيال دي بتبقا طايقة نفسها ازاي اصلا
قصدي اصلي
:)

وحي القلم يقول...

السلام عليكم
دي حاجة تضحك بس برضة تحزن والواحد متضايق من الظاهرة دي