Pages

الاثنين، 9 يناير 2012

وجع الراس



صحيح صدق اللي قال الغايب حجته معاه
وانا غيبت  كتير أوي وكانت معايا حجه كبيرة اوي بردو
الا وهي شىء ملعون اسمه وجع الدماغ المادي والمعنوي
من شهر تقريبا وانا بشعر بصداع رهيب في راسي من فوق
وقولت ياد ا كيد دا من البرد وهياخدله كام يوم ويروح لحاله
لكنه كان كل يوم يتطور عن اللي قبله
ومع مجهود الشغل الاقي نفسي اخر اليوم مش قادر حتي افتح عنيا
ولقيته عمال يزيد يوم ورا التاني وانا مش قادر اعرف اذا كان دا صداع
ولا وجع ولا ايه بالظبط... هو ابتدي بصداع ودلوقتي بقي عباره عن خرقان جامد
جدا في فروة الراس وشعور خفيف بالدوار اللي هو الدوخة يعني
وقررت اني اروح بقي اكشف عند دكتور وبلاش استهتار اكتر من كدا
وفعلا روحت لدكتور كبير ومشهور عندنا بتاع مخ واعصاب قعد بقي يسألني
اسئلة كتير عن كل حاجه حتي سألني ان كنت خاطب ولا لأ
وبعد ما كشف عليا قالي ان كل حاجه تمام وقاع العين سليم والجهاز العصبي
زي الفل ونخاعك الشوكي لسه فيه شوك زي ما هو
انت بس عندك شوية ارهاق من الشغل  وكتبلي علي علاج قد كدا وقالي
لو ارتحت عليه كان به ولو ما ارتحتش يبقي تروح تعمل كشف انف واذن
ونظر وتحليل دم كامل وتعمل اشعة مقطعية وتبقي تجيني تاني
ولما لقيت ان الالم زي ماهو ومفيش جديد روحت كشفت انف واذن
ونظر وحللت دم وكان كلام الدكاترة الاربعة هو هو 
كل ماحد يكشف عليا يقولي يابني انت معندكش اي حاجه
انت زي الفل
طيب يا جماعة امال الغول اللي عمال ينهش في راسي دا ايه
كانت بردو اجابتهم واحده
انت عندك ارهاق نفسي وتعرضت لضغط عصبي شديد
لازم تاخد فتره راحه وتستجم 
ياتري كلام الدكاترة دا بجد ؟
عامة انا عشان اقطع الشورت في البيسين هروح اعمل الاشعة
ولو بردو طلعت كويسه هضطر اسفا اني اتجه لاشياء غير طبيه
ادعولي والنبي
الله المستعان
 



هناك 13 تعليقًا:

amiraali يقول...

الف سلامه عليك... وان شاء الله خير متقلقش وحاول مش ترهق نفسك اوي في الشغل وارتاح
ربنا معاك

موناليزا يقول...

سلامتك يا فندم
ربنا يخفف عنك يارب
بس على فكرة كلامهم صح لإن العامل النفسى له تأثير قوى جدا على الصحة الجسدية

هبة فاروق يقول...

والله انت زى الفل كل دى اعراض نفسيه بطل تفكر كثير وانت ترتاح قرص هدوء وقرص روقان وقرص راحه بال قبل النوم وحتبقى عال العال
وربنا يشفيك بس جرب الاقراص دى وانت حتدعيلى

ياسمين يقول...

من رأي تغير الدكتور طالم مش مقتنع..!!
وربنا يشفيك يارب وثانيا ع فكرة الضغط العصبي بيؤثر جامد ومش تستهون بالموضوع دا ..!!وربنا معاك

غير معرف يقول...

متألش انشاء الله خير بس اكيد فعلا انت محتاج راحة مع ان صعب الحصول عليها بس مطلوبة نصيحة من اخت صغيرة روح اسكندرية في الاجازة شوية واستجم من غير حد معاك واقتي وقت طويل علي البحر ده احلي علاج وانشاء الله تبقي كويس من اختك الصغيرة ندي

beautiful mind يقول...

اميره علي
ربنا يخليكي يارب
وتقبل الله دعواتك
انا الحمد لله ابتديت اعالجه بطريقتي
والحمد لله حاسس بتحسن كبير
فعلا راحة البال هي الاساس
تحياتي ليكي

beautiful mind يقول...

موناليزا
اللهم امين
فعلا الكلام صح
والراحة النفسية ضرورية
لازم ناخد بريك من كل حاجه
شكرا جزيلا ع السؤال

beautiful mind يقول...

هبه فاروق
احلي روشته والله اخدتها لغاية دلوقتي
لوكنت اعرف من الاول كنت قولتلك ع اللي عندي
وكنت وفرت الفلوس الكتييييييييير اللي الدكاتره اخدوها
يلا الله المستعان والف شكر علي النصيحة الجميله
ان شاء الله هنفذها

beautiful mind يقول...

ياسمين
المشكلة انه مش دكتور واحد اللي قالي كدا
دول 4 دكاتره كلهم قالوا نفس الكلام
بس انا دلوقتي بقيت احس بتحسن كبير
الحمد لله علي كل حال

beautiful mind يقول...

ندي
بجد نصايحك بتبقي احلا كلام
وبعمل بيها علي فكره
وان شاء الله هروح اسكندرية قيرب اوي بس نخلص من جو الامتحانات والمراجعات وخلافه
وبعدين كدا كدا هروح لوحدي
ههههههههه
مش ناقص وجع دماغ من حد
ابقي طمنيني عليكي وعلي اخبارك

Tarkieb يقول...

التعب النفسي يعمل كدة ويعلى الضغط ..روق يا ابو على واشرب الليمون

beautiful mind يقول...

تركيب
حاضر
اديني عمال اشربه في البرد دا
لما جالي التهاب في الحلق
هنلاقيها منين زلا منين
ربنا يتولانا

sony2000 يقول...

ربنا ماك
ويكرمك ويشفيك
ويبعد نك كل شر يارب

ويطلع ارهاق بس

وخد اجازا بجد
ماتفكرش فحاجه
واخرج وعيش حياتك