والله ما أعرف حصل إزاي .؟
كل اللي أعرفه إني من يومين كدا لما رجعت البيت
كالعادة بليل , والليل بيجي عندنا بليل
لقيت مرات أخويا ماسكة عنيها وبتقولي انها بنوجعها
ومش شايفة بيها كويس , طمنتها وقولتلها ان الموضوع عادي
وشوية وجع وهيروحوا لحالهم
وقعدت تاكل معايا وياريتها ما قعدت.......
صحيت من النوم لقيت نفسي مش انا
بقيت بعين واحده وعيني الشمال مش شايف بيها
ولونها احمر زي الدم غير الوجع اللي فيها
ولما روحت المدرسة لقيت الحكاية عمالة تزيد
اقترح عليا زملائي اني اخرج اكشف بره
وفعلا خرجت . وقالتلي الدكتورة هو انت منهم ؟
المتفيرسين زادوا واحد
دا فيرس منتشر اليومين دول في الجو ومعدي جدا
جدا كمان بس هيروح بالعلاج ان شاء الله
أخدت طبعا العلاج علي أمل اني اعرف امشي حتي
من غير ما احط عليها منديل وابقي مسار للتساؤل من اي حد
بيقابلني ... واضطر للإجابة عن نفس الاسئلة كل مرة.
وعلي بليل كدا اللي بيجي عندنا بردو بليل الأمر اتطور جدا
وعيني التانيه اشتغلت وبقيت زي العيال اللي بيشربوا
استغفر الله العظيم وبيعملوا حاجات استغفر الله العظيم
ااااااااااه ياعيني
واحد دكتور صاحبي قالي ان الفيرس دا مش بينفع معاه علاج
لأنه لازم ياخد دورته وهيروح لوحده
يعني استحمل يابطل 5 ايام كدا
ادعولي يا جماعة ... ووحياة ابوكم اوعوا تدعوا عليا دلوقتي
عشان اكيد اكيد يعني
كل اللي قرا البوست دا جاتله العدوي
هناك 8 تعليقات:
انا كمان عنيا تعباني :(
ربنا يشفينا كلنا :)
الف سلامه عليك يا ابراهيم
بجد والله انا زعلت جدا لما قرأت
البوست ربنا يشفيك ويعفو عنك
وان شاء الله هتبقى كويس وهتخف بسرعه
سلااامتك الف سلامة
معلش ان شاء الله خير واجر وعافية
شوف بقا العلاج علي عيني وراسي
بس خدها نصيحة من تيته شمس
اعمل لها كمادات شاي يعني تعمل شاي عادي مش تي باج
ويكون دافي حبتين
وتحط فيه القطن وتحطه علي عينك
الشاي فيه زيوت وحاجات ملطفة لألتهابات العين بالذات
وصدقني هتحس بفرق كبير
والله هو الشافي المعافي
شفاك الله وعفاك يا ابراهيم الف الف سلامة عليك بجد زعلتنى اوى وفعلا هو فايروس فى الجو معلش ان شاء الله فى ميزان حسناتك
فتاة من الصعيد
ربنا يشفيكي يا مروة
الموضوع بقي رخم اوي
لانه بيتطور يوم ورا يوم
ربنا يشفينا كلنا
منه
الله يسلمك
ربنا يسمع منك يارب
وان شاء الله تكوني كويسه
وابقي طمنينا عليكي
شمس النهار
حاضر والله ان شاء الله هحرب الوصفة دي حالا
بس انا سألت الدكتور وقالي انه فيرس ولازم ياخد وقته وكدا
بس هجرب
وربنا الشافي
أسماء
ميرسي ليكي بجد
ويارب يشفي كل مريض
وكل واحد بقي ياخد باله من نفسه
إرسال تعليق