Pages

الثلاثاء، 11 مايو 2010

هو فيه ايه؟





رن جرس الباب فأسرع الرجل ليفتح
وهو لا يعرف من القادم الاتي
أول ما شاف الطارق استغرب جدا
اي نعم هو زميله في العمل
لكن العلاقة بينهم كانت علاقة اتنين جمعهم عمل واحد
والسؤال اللي دار في عقل صاحب البيت كان محيره جدا
ايه اللي جابه في وقت زي دا؟خاصة وانه من مكان مش قريب من هنا
رحب الرجل بالضيف واللي كان مش جاي وايده فاضية
لكن كان جايب معاه حاجه اغرب من زيارته
كان جايب معاه واحده ست 
دخلهم الرجل بيته في الوقت المتأخر دا وبدأ يتعامل معاهم
زي اي حد من ولاد البلد الكرماء اللي لما يجيله ضيف 
يبقي محتار يعمل معاه ايه
قاله الضيف انه جاي هنا علشان زوجته المسكينه
اللي جايه معاه علشان تعمل عملية خطيرة عند طبيب مشهور
وهي ازالة الرحم
بدأت زوجة الرجل صاحب البيت بدافع الحنو الانثوي والامومي الخالص
في محاولة التخفيف عن زوجة الضيف المسكينه التي لاحول لها ولا قوة
واللي هتتحرم من اعظم شىء تمتلكه الانثي 
هرع الرجل صاحب البيت ولبس هدومه ونزل الشارع علشان يجيب اكل
لضيفه بينما زوجته كانت منهمكه في تجهيز المكان اللي هينام فيه الضيف وزوجته
واللي مكنش ع البال ولا ع الخاطر انهم هيجوا في وقت زي دا
اكل الضيوف واخدوا واجبهم من الضيافه وقام صاحب البيت مع زوجته 
وجابلوهم ملابس تنفع انهم يناموا بيها خاصة انهم جايين من بلدهم مش عاملين حسابهم
ونام الجميع في هدوء وسلام
وصحبي الجميع في الصباح ليتناولوا الافطار سويا وبكل خجل شكر الضيف
زميله علي كرمه وحسن ضيافته لهم واستاذنه في ان يرحل مع زوجته 
علشان يلحقوا معادهم مع الدكتور 
طلب زميله انه يجي معاهم لكنه رفض علشان ميبقاش ضيف تقيل
وكفايه اوي اللي عمله معاهم دي حاجه اكتر من اللي بتكون بين الاخوات
رحل الضيوف الي وجهتهم ومشي ايضا الراجل لعمله
وتفاجأ زوجته ان بعض مصوغاتها الذهبيه مش موجوده
تتصل بزوجها تليفونيا وتخبره بالواقعه
وتخبره ايضا بشىء صادم وهي انها شاكه ان هو اتفق مع الراجل دا
وزوجته علشان يجوا عندهم ويسرقوا دهبها 
وانها رايجه بيت اهلها ومش هترجع الا اذا الحاجه رجعت
طار عقل الراجل من الصدمه
هو ايه اللي بيحصل دا؟ هو دا جزاء المعروف
معقول يكون الضيف هو اللي عمل كدا
وانه كان جاي فعلا علشان يسرقه
احتار الرجل وتخبط ودارت بيه الدنيا
حكي الموضوع لبعض اصدقائه واللي كان رايهم
انهم ياخدوا بعضهم بربطة المعلم ويروحوا للولد دا في بلده
يمكن يلحقوه قبل ما يعمل اي حاجه في اللي اخده
وفعلا راحو
وقابلوا والده لان صاحبنا كان لسه مازال هناك في المدينه لم يرجع بعد
لكن المفاجأه اللي الجمت الجميع
وكانت صدمتها اكبر من الكل
ان الراجل اللي اتسرق من بيته الحاجات دي قابل هناك زوجة الرجل
ودي واحده تانيه خالص غير اللي كانت معاه
يعني اللي كانت معاه كانت واحده من اياهم 
تخيلوا
يجي لبيت الراجل في وقت متاخر
ووينام علي سريره ويلبس هدومه وهي تلبس هدوم زوجته
وهلم جرا
ويسرقوهم
هو دا جزاء الاحسان؟
هي الدنيا حصل فيها ايه؟
اسئلة حيرتني انا شخصيا لما سمعت القصة الغريبه اوي دي
واللي تناقلتها السنة الاخوة الزملاء
بجد ربنا يستر


هناك 11 تعليقًا:

ستيتة يقول...

الدنيا بتتغير
ومش ببطأ
لأ دي بتتغير بسرعة قوي قوي

عارف يا ابراهيم ان اهم ما كان يميزنا سابقا
ينبغي ان نتخلى عنه حاليا لأنه غير مناسب

شيء كان اسمه العشم
العشم ده مبقاش مناسب خالص
بيسبب حرج كبير وبيخلي حاجات كتير تتسرق
مش من دواليبنا
لأ من جوانا

ربنا يلطف

sony2000 يقول...

في مثل بيقول:حرص ومتحونش
المفروض فعلا انه يعرف اننا فذمن وحش اوي جدا
فكان لاذم ياخد باله وميأمنش لحد اول مره يتعامل معاه
او ميعرفهوش خالص
وربنا يستر

هي وظروفها يقول...

هههههههههههههههههه

يعني اتعمل معاه الصح واتعمل في بيته الصح

شاامبو وبلسم يا معلم

وف بيته وعلي سريره

كلوا وشربو وناموا و0000000000000

وسرقوه كمان

الله الراجل ده بيشقي

بس صاحبنا ده هو اللي مغفل عارف ليه

وطيب زياده عن اللزوم

اللي عامل عمليه ريحته بينج

بمعني ان التعبان بيبان عليه

واكيد اللي كانت معاه شكلها

كانت تعبانه بس نوع من التعب الخفي وانت هارش يا معلم
ربنا يكفيك شر الفضيحه
فل يا هيما

دعاء العطار يقول...

مايتقاش عليها غيييير

خييييييييراً تعمل شراً تلقىىىىى

بس بصراحه اللى انا مستغرباله اكترر موقف الزوجه

يعنى ايه يعنى زوجها هيتفق معاهم عشان يسرقوها

ناس غرررررررررريبه

ريمان يقول...

استغفر الله العظيم

لا حول ولا قوه الا بالله

هو ده جزاء المعروف؟

وكمان مش سرقه وبس لاء دى بجاحه وقله ادب


اعوذ بالله

غير معرف يقول...

لا حول ولا قوة الا بالله

هو فية أية بجد

حكاية غريبة
خيرا تعمل شرا تلقى
بس أزاى الزوجة تشك فى زوج عمرها على فعل زى دا ؟

مستغربة برضوا موقف الزوجة ؟

والجرأة بتاعة الراجل الغريب وزوجتة اللى هى مش زوجتة ...جرأة ملهاش حدود بجد .

ربنا يستر علينا... ويعين الزوج على ما بلاة من مصيبة .


تقبل دعوتى على زيارة مدونة مجرد انسانة .

تحياتى وتقديرى

العلم نور يقول...

الدنيا كدا صارت آخر فلة .. وما عادش فيها حاجة نقدر نأتمنها عليها!!

زمن العجايب صحيح

رحاب صالح يقول...

صباح الورد
اول مرة ادخل المدونة واول ما ادخل الاقي بوست جميل بيتكلم عن الواقع المرير بكل اسف , البشر اصبحوا بكل شرورهم والقليل فقط هم من يفكرون بالخير وللأسف هم من يقعون اكتر بالمشاكل لكن ده مش مبرر للوقوع في الخطأ انا نفسي والحمد لله مازلت علي مباديء وسأظل عليها مهما حدث تغيرات للأسوء حولي , تحياتي رحاب صالح

أع ـقل مـ ج ـنـونــة يقول...

يالهوي ياه ياه ياه !

علي رأي خالتي نوسة ؟

ياخرابي بجد ايه الناس دي ؟

خير تعمل شر تلقي

مممممممم

بس صاحب البيت غلطان من الاول

كان ممكن يتصرف بطريقة احسن .. يكرمهم اه لكن مش يسيبلهم البيت كدا ولا اوضة

كان ياخده معاه ف اوضة .. ويخلي مراته مع الحاجة التانية دي !

او كان اي حل تاني !

يووه بئة .. قدر الله ماشاء فعل

وفعلا بقينا في زمن العجاااااااااااااايب

علي رأى مامتي

قوم القيامة بئة يارب .. هايحصل ايه اكتر م اللى احنا فيييييييييييه ؟

توفى يقول...

معقول فيه كده

الحكايه غريبه قوى بس مبتكره

اسلوب جديد فى ممارسه الرذيله و

السرقه فى نفس الوقت

الاشكال اللى زى دى خلت الواحد يخاف

يعمل معروف فى حد

و للاسف الناس مبقتش تصدق الحكايات دى

و المظلوم الحقيقى بيروح فعلا فى الرجلين

رحلتنا في الحياة يقول...

لا حول ولا قوة الا بالله
مش عارف الناس هيوصل بيهم تتدهور الاخلاق لفين تانى