Pages

الخميس، 18 فبراير 2010

شعره

لو كل واحد فينا فكر لحظة قبل ما يعمل اي حاجه
ايه نتيجة الحاجه دي؟
وايه هيكون تاثيرها القريب والبعيد عليه
وحتي علي اللي حواليه
اكيد
كانت افعاله كلها مش هتكون زي الصورة اللي بقت عليها
لاننا دايما مش بنشوف نفسنا وقت اي فعل
زي بالظبط اللي بيبص لنفسه في المرايه
استحاله يشوف حركة عنيه وقت ما بيحركها يمين وشمال
عجبتني اوي جملة سمعتها في اخر فيلم لاحمد حلمي
وتقريبا هي محور الفيلم كله
الجمله بتقول :
( احنا ممكن نغير الواقع علشان احنا اللي بنعمله....
لكن مش ممكن ابدا نغير القدر علشان بيحصل لينا)
لما سمعتها عرفت انا ليه كتير كنت بتصرف غلط؟
علشان مكنتش بفكر صح
فيه حاجات كتير ليها نفس النتيجه
لكن الطريقه مختلفه... ممكن صح او غلط
مثلا
زي انا مثلا لما بصرف الفلوس
النتيجه واحده
ان الفلوس ضاعت
لكن مرة صرفتها ع التليفون والكلام عمال علي بطال
والمرة التانيه اديتها لوالدتي
هي هي نفس النتيجه
لكن الشعور هو اللي مختلف
هو دا تغيير الواقع
واحنا واقعنا مليان حاجات زي دي عايزة تتغير
دور كدا علي اخر حاجه عملتها وكانت نتيجتها سلبيه
فكر ثواني
لو رجع بيك الزمن لورا شويه
هتتصرف نفس التصرف؟
اكيد
مش ممكن
عشان دايما بيكون
بين الصح والغلط......... شعره
وبين الحياه والموت بردو شعره
وبين انك اتكون انت او تكون حد تاني خالص غيرك
هي هي نفس الشعره

هناك 22 تعليقًا:

حنين الذكريات يقول...

السلام عليكم
التسرع فى اى شئ بنقوم بيه بيفسده ربد من التفكير قبل القيام بأى عمل والنظر الى ابعاده
وأقدرنا من صنع أفكارنا وممكن نغيرها بتقرب من الله والدعاء له
مش ممكن تكون النتيجه واحده فى المثل اللى ذكرتيه لما الفلوس تتصرف على التليفون غير لما تعطيها لماما أكيد ماما هاتصرف فيها صح
وحقيقى كل شئ وعكسه بينهم شعره

beautiful mind يقول...

حنين الذكريات
اولا انا سعيد بتعليقك عندي لاول مرة
واتمني انها تتكرر تاني ان شاء الله
حضرتك بتقولي ان اقدارنا من صنع افكارنا
انا مش موافق ع المقوله دي
اقدارنا من صنع الله
ومحدش بيصنع قدره
اللي قصدته اننا ممكن نغير في طريقة تصرفنا للامور عشان النتيجه تتغير
لكن بجد وجهة نظرك تحترم جدا وشكرا مرة تانيه علي تعليقك
وان شاء الله هزور مدونتك

ريمان يقول...

السلام عليكم

والله يا ابراهيم فى حاجات كتير اوى بنعملها وبنرجع نندم عليها
واما نيجى بس نفكر بعدها بنقول يا ريت كنت عملت كذا او قولت كذا

بجد المشكله فى التسرع

ستيتة يقول...

سلامات يا هيما ايه الأخبار


مش ده اللي بنطلق عليه الحكمة يا هيما

"وَمَن يُؤْتَ الحِكْمَةَ فَقَدْ أُوتِيَ خَيْراً كَثِيراً"

ربنا يوفقنا لكل ما يرضى

تحياتي

غير معرف يقول...

تعرفى الشعرة دى هى اللى مبهدلة الدنيا معانا
لو نركز شوية بنعمل ايه واللى بنعمله ليه وعشان ايه وعشان مين وهيفيدنا ولا يضرنا وووووووو حاجات كتير

اكيد كان واقعنا هيتغير
بس احيانا مش بنعرف نقرق بين الغلط والصح واحيانا بنعمل الغلط عشان عاوزين نعمله

فعلا النفس امارة بالسوء

ربنا يكرمنا بالصح دايما والافضل الانسب فى حاجة فى حياتنا وفى قرارتنا

beautiful mind يقول...

ريمان
فعلا عندك حق المشكله في التسرع
ودا اللي بيخلينا نندم بعد كدا علي حاجات كتير
يلا الحمد لله علي كل حال
تحياتي ويارب تنورينا علي طول يا قمر

beautiful mind يقول...

د ستيته
انا تمام الحمد لله
ربنا يسلمك
معلش مقصر معاكي والله بس بجد غصب عني
حضرتك عارفه الظروف
الحكمة دي اكيد بتيجي من خبرة السنين ومن تعلمنا من المواقف الكتير اللي بتحصل في حياتنا
ربنا يهدينا جميعا للحكمة
وتحياتي اليكي

beautiful mind يقول...

star in the sky
كلامك بجد جميل
لكن زي ما في نفس اماره بالسوء
في بردو نفس لوامه
وفي نفس مطمئنه
ربنا يجعلها لينا كلنا
علشان كل واحد يراقب افعاله قبل ما تطلع منه ويعرف هي صح ولا غلط
تحياتي

Unknown يقول...

بس يا خسارة بقا الزمن مش بيمشى الا فى اتجاه واحد طبعا

غير معرف يقول...

انا شفت الفيلم ... والجمله دي فعلا جميله

ويا ريت الكل يفكر قبل ما يتصرف .... لان ده هو المفروض

تحياتي

beautiful mind يقول...

العيسوي الصغير
عندك حق
الزمن مش بيمشي غير في اتجاه واحد
عشان كدا لازم نفكر كويس
لان اللحظة اللي بتعدي مش بترجع تاني
تحياتي

beautiful mind يقول...

فتاة من الصعيد
تحياتي لمرورك وتعليقك
واللي قولتيه تماما زي اللي انا اقصده
اتمني بردو من اي واحد انه يفكر كويس قبل اي حاجه
تسلم ايدك
وتحياتي

>>> يقول...

السلام عليكم

أحييك أخي على هذه الملاحظة المميزة

وصدق القائل : ((لو علمتم الغيب ، لاخترتم الواقع))

يعني هناك مقدمات ونتائج لأي فعل ..

وأحياناً عندما تأتي النتائج مخيبة في المستقبل ، فإننا نتمنى العودة للوراء لإصلاح الأفعال التي أدتْ بنا إلى هذه النتائج ..

وهنا التسرع هو السبب ..

وفي رأيي هناك أيضاً شعرة رفيعة تفصل بين التسرع والتردد .. فكلاهما مذمومان ..

والحكمة هي الوسط بين الطرفين ..

ومن يؤتَى الحكمة فقد أوتيَ خيراً كثيراً ..


تمنياتي لك بحياة موفقة

وأرجو أنْ تتقبل مروري الأول على مدونتك الجميلة ..

وإن شاء يبقى التواصل ..


بَرَاء

دعاء العطار يقول...

الله عليك يابراهيم

بوست حلوووووو اوووى

انا على فكره شغل بالى كتييييير سؤال ياترى احنا مسيرين ولا مخيرين ؟

بس بعد كده عرفت اننا مسيرين فى اشياء ومخيرين فى اخرى زى بالظبط جملة احمد حلمى دى

بجد تسلم ايدك

promise is promise يقول...

دايما ما بيكون فى العجله الندامه

اللهم اتنا من لدنك رحمه وهيى لنا من امرنا رشدا

beautiful mind يقول...

براء
وعليكم السلام ورحمة الله
اشكرك علي مشاعرك الجميله
وان شاء الله نبقي علي الود كما قلت
وردك يدل علي رصانة عقلك ورزانة اسلوبك
وتقبل مني اسمي التحيات

beautiful mind يقول...

دعاء العطار
طبعا احنا مسيرين في حاجات
ومخيرين في حاجات تانيه
بس افعالنا اللي خارجه عن ارادتنا هي اللي احنا بنختار فيها
وهي دي الاولي بالتفكير
تحياتي لمرورك وتعليقك وان شاء الله متكونش المره الاخيره

sweet angel يقول...

التسرع والعند هو اساس المشكله
والصفات الكويسه والوحشه بينها فعلا شعره
المقوله دي اتقالتلي قريب جدا
ان الانسان ممكن يملك كل الصفات الكويسه
بصورة مبالغ فيها فتكون عيب
يعني الفرق بين الحرص والبخل شعره
الفرق بين الحساسيه والحساسيه المفرطه الي تخنق بردو شعره
والمشكله كلها ان الانسان بيفكر بعد ما يتصرف

ربنا يسعدك دايما
تقبل مروري

عايش... ولكن !!!! يقول...

التسرع مشكله صحيح
بس انا مش بندم على شىء لانى كل شىء بعمله من اختيارى وانا المسئول عنه حتى لو كان غلط ... ع الاقل بتعلم منه

beautiful mind يقول...

promise is promise
يارب امين لدعواتك
ويارب تكوني بخير
وفعلا زي ما قولتي في التاني السلامه ودايما في العجله بتكون الندامه
تقبلي مني كل تحيه

beautiful mind يقول...

sweet angel
كل تحيه وتقدير لكلامك اللي فعلا بيدل علي عقليه راجحه
واكيد فعلا كل اللي قصدته وصل ووجهة النظر واحده
تحياتي
ويارب دايما بخير وسعاده

beautiful mind يقول...

عايش ... ولكن
اولا احب اقدملك تحياتي لان دي اول زيارة واول تعليق ليك عندي
كل سنه وانت طيب بمناسبة كل المناسبات الجميله اللي احنا بنعيشها
فعلا احنا بنتعلم من كل حاجه بنعملها
بس لما بنتمادي في حاجه ونعملها كذا مرة واحنا عارفين انها غلط دا يبقي هو الغلط
تحياتي