Pages

الأربعاء، 27 يناير، 2010

مشاعر متناقضه



مشاعر متضاربة
وأفكار متناقضه
شعور كبير بالسعاده
وبعده
شعور فظيع بالأسي
أحوالي بتتقلب بين كدا وكدا
أنا دلوقتي مثلا بجهز شنطة سفري
عشان مسافر الفجر
متتصوروش كمية الضيق والقرف اللي جوايا
ودا بيحصلي كل مرة في نفس اليوم دا
اللي هو قبل اليوم اللي بسافر فيه
بس المره دي كمية الضيق اكتر
وكمية القرف زايده شويه
وطبعا اكيد كل حاجه ليها سبب
يمكن المرات اللي قبل كدا كان عشان
اني هسيب اصحابي واهلي
والسرير اللي مش بقوم من عليه
وهروح هناك للصحيان قبل الفجر
وصفا وانتباه ومعتدل مارش
المره دي انا اصلا جوايا قلق وحزن
علشان حد معين
انا مش عايزه يخرج من حياتي
لأني كل ما افكر في كدا
بحس اني خلاص
قاربت علي النهايه
مش عارف ليه
يمكن عشان انا حياتي كلها اتعلقت بيه
ويمكن عشان انا معدتش شايف بعنيا غيره
ويمكن عشان هو الشخص الوحيد
اللي مش بلاقي احد اكلمه واحكيله
واترمي في حضنه غيره
انا مش عايز اخسره
لاني لو خسرته هخسر كل شىء جميل في حياتي
احنا اكيد بشر
وطالما احنا بشر
يبقي لازم نخطىء
ولازم بردوا نعفوا ونصفح
اكيد مرارة الكلمات جوايا
هي افصح مني في التعبير عنها
وابلغ مني في وصف حالها
انا مش جاي النهارده عشان انكد علي حد
اكيد كل واحد فينا فيه اللي مكفيه
بس طالما كل واحد فينا بيقول كل اللي في نفسه
وبيلاقي حد يسمعه
قررت اني اقول كلامي دا
لاني لما بحب حد
بحبه بكل ذرة جوايا
وبحب كل همسه فيه
ولما بحس انه ممكن لحظه يبعد
ساعتها كل نقطة فيا بتتأثر
وغالبا مش بترجع زي ماكانت

هناك 10 تعليقات:

promise is promise يقول...

هو فين التناقض فى اللى قولته ده

ده قمه الاخلاص والاتفاق لانك متفق وصريح جدا مع نفسك وده كفايه

هانت اهى ايام وبتعدى وربنا يارب ما يكتب عليك انك تفارق حد بتحبه ابدا يارب

ريمان يقول...

على فكره موضوع المشاعر المتناقضه دى موجوةده عندنا كلنا

بس هى مش متناقضه بالمعنى التناقض يعنى

لكن زى ما بيقولوا لا حزن بيدوم ولا فرح بيدوم واحنا شويه كده وشويه كده

مفيش حاجه بتفضل على حالها

سافر كده وبلاش تقلق نفسك وتضايق وان شاء الله خير


بالنسبه للى بتحبه اوى كده بجد يا بخته اللى حد يحبه الحب ده كله

الحب لازم يبقى فيه تسامح والشخص اللى بيحب بيغفر ويسامح اللى بيحبه اكيد

الانسان اما بيحس ان اللى بيحبه ممكن فى لحظه يبعد عنه الدنيا بتسود قدامه اوى


بس لازم تدافع عن حبك ليه وتحاول باى وسيله تخليه يسامحك ويغفر لك وترجعوا مع بعض زى الاول واحسن

القدر و انا يقول...

ابراهيم
انت انسان شفاف وصادق المشاعر
بس عاوزة اقول لك حاجة مهمة
احنا بشر والايام بتغير حاجات كتير جوانا
يعنى ممكن وببساطة كده نلاقى الحب الكبير اصبح سراب
حنتعب شويتين لكن دى مش حتكون ابدا نهاية العالم
دى حتكون بداية رحلة جديدة ومولد مرحلة اهم فى حياتنا
وفقك الله دائما

ستيته حسب الله الحمش يقول...

اه
ها تقولي اه ايه؟
ها اقول لك كل اللي قلته صح وحقيقي ووصف تفصيلي ومميز جدا
ومش سهل اقول لك متتخنقش
مش سهل اقول لك متحسش ان فيه فراغ جواك لو بعد عنك الحبيب
ودي مش مشاعر متناقضة ابدا
ده بوست بعنوان بحب بجد
وليه خايف من الفراق؟
ما تدعي ربنا يكملها ويتمها طالما حب حقيقي
يارب ربنا يرزقك الخير حيث كان ويفتح لك ابواب رحمته

dodoo يقول...

ربنا يكون فى عونك بجد
احساس صعب اوووووووى بس ادعى ربنا وهو قادر انه يجمعكم

ربنا يسعدك ياااارب

فتاه من الصعيد يقول...

مفيش شيء بيفضل على حاله

حاول تنسى ... او متحاولش ...وفي الحالتين هتنسى :)

تحياتي

إبتسامة ملاك يقول...

ابراهيم

معلهش متأخره عليك

نظرآ لظروف ما

يارب ترجع بالسلامه وربنا يطمنى عليك يارب

إبتسامة ملاك يقول...

الف مبروك علينا الكاس يا ابراهيم

قلت اجى ابارك ليك ياقمر

يارب الفرحه دايمآ

إبتسامة ملاك يقول...

إن شاء الله ربنا هيكرمك خير طالما نيتك خالصه لوجه الله اكيد هيكون معاك

استخير ربك وهو وحده قادر على كل شىء

ولو ليك نصيب فيه صدقنى ما فيش مفر


بتمنالك السعاده من كل قلبى
مع من تحب
تحياتى
ايناس

همس يقول...

ربنا يخيلهولك ممعقوله لسه فى حد بيحافظ على اللى بيحبه كدا