Pages

الأربعاء، 30 ديسمبر 2009

اللي اختشوا ماتوا.... باقي الحكايه



كمل صاحبي كلامه وقال:
حسيت في اليوم دا ان فيه مصيبه هتحصل مش عارف ليه
المهم . كل واحد روح بيته في الليله دي وانا روحت نمت
وفجأه تليفوني رن حوالي الساعه 4 الفجر كدا
قولت دا مين دا اللي امه داعيه عليه اللي سمح لنفسه انه يرن علي دلوقتي
قومت وانا في غاية العكننه وناوي اديله شوية كلام مما لذ وطاب
لقيته اخو ..... صاحبنا اللي مقطع السمكه وديلها مع البنات
قالي : الحق يا محمد تعالي بسرعه دلوقتي
قولتله: فيه ايه يابني مالك؟
قالي: اخويا في ناس جم رموه قدام البيت والواد متعور جامد
ومش بيتكلم تعالي بسرعه
جيت لابس هدومي بسرعه وطلعت اجري في الشوارع لغاية ما روحت بيته
فيه ايه يا جماعه ؟ ايه اللي حصل ؟
الواد كان بيجيب دم من كل حته في جسمه ومش راضي ينطق
سالت والدته في ايه يا ام فلان ماله .......؟
قالتلي : والله يابني ما اعرف . انا بصيت لقيت عربيه واقفه
وابو ..... ( البنت زميلتنا ) بينادي ويقول
خدي يا حاجه ابنك اهو واحمدي ربنا انه لسه فيه نفس
ابنك خرب بيتي وخرب بيت بنتي
ورمي الواد غرقان في دمه وسابه ومشي

بصراحه الواد كان معدوم العافيه كأنه كان بيلاعب واحد من بتوع المصارعه
جبناله دكتور عمله شوية حاجات كانت معظم الجروح سطحيه
وواحده واحده ابتديت افهم منه اللي حصل
قالي: انه كان مع ....... في بيتهم وجوزها دخل عليهم
ومسكه خلي جسمه شوارع من الضرب
ومش كدا وبس
دا مضاه علي 6 وصولات امانه بمبالغ كبيره
واتصل جاب ابو البنت وعرفه اللي حصل كله
انا عقلي بقي يودي ويجيب واقول بقي انتم الاتنين
انت والبنت تقرطسونا كدا واحنا زي الطرش في الزفه
ويطلع منكم كل دا
قولتله : طيب والله دا جوزها طلع واد ابن حلال وكاجوال خالص
هو دا اللي ربنا قدره عليه علقه ووصولات امانه

قالي : مهو طلق البنت وراح رفع قضايا بالوصولات دي ع الواد
انا بقي حكيتلك الحكايه دي كلها ليه؟
قولتله : ليه يا معلم؟
قالي: لان انا مطلوب أشهد في النيابه علي اللي حصل
دلوقتي الواد مستنينا عند المحامي فلان هنروح نشوف هيقولنا ايه
قولتله : محامي ونيابه ؟ 

وانت يابني مالك ومال دا كله " ميولع الواد واللي جابوه
قالي : اصل انا حاولت اصلح بينهم واروح لجوز البنت عشان
يدينا الوصولات دي وهو رفض
الغريب كمان ان البنت بتحلف بالايمانات كلها
ان الواد هو اللي اتهجم عليها هههههههه
شايف البجاحه
وانا هشهد اني شوفت الواد مضروب ومتعور ليلة الحادثة دي
المهم
روحت انا مع صاحبي لمكتب المحامي اللي الواد موكله

 ( اصل الباشا رافع قضية هو كمان 
انه انضرب ومضي الوصولات دي بالاكراه)
لقينا سيادته مستنينا ومعاه اتنين كمان
المهم طلعنا كلنا عند المحامي
انا استنيتهم بره لاني ماليش دعوه بالحوار دا كله
وهم دخلوا عنده
عمنا المحامي بقي بيقول ايه لصاحبي :
انت مستعد تشهد باللي حصل وتقسم بالله عليه ؟
قاله: ايوه انا مستعد اشهد اني شوفته مضروب
قاله : لا    "  تشهد ان جوز البنت ضربه ومضاه ع الحاجات دي
غصب عنه عشان المحضر ينجح وصاحبك ياخد حقه
قاله : لا مهو انا مش هشهد علي حاجه مشوفتهاش
انا سمعت الكلام دا
خلاصة دا كله
ان المحامي عايز محمد صاحبي دا يشهد علي حاجه مشفهاش
علشان قال ايه ينقذ صاحبه اللي هو اتمسك مع البنت
شوفتوا الناس بتفكر ازاي؟
انا بقي قررت اني احكي دا كله واوجع دماغكم علشان
فيه شوية اسئله هتكسر جمجمتي مش لاقيلها اجابه
هو للدرجه دي فيه بنات كدا؟
طيب هي اتجوزت وربنا المفروض انه ملي عنيها بكل حاجه
ايه بقي لازمتها الرمرمه ؟

ولا الواد اللي سمح لنفسه انه يدخل بيت حد في غيابه
وياخد حاجه مش بتاعته حتي ولو هي اللي دعته ليها
راحت فين الامانه؟
والمحامي اللي اساسا دي شغلته انه يزور الحقيقه
ويخلي الحق باطل والباطل حق
انا عايز منكم لما تقروا الموضوع دا للاخر تقولولي بجد
تقولوا ايه للاشخاص دي
البنت
جوزها
الواد المدرس
المحامي
وتقولو ايه لصاحبي

يلا اشوفكم بخير الاجازة الجايه
سلام

هناك 10 تعليقات:

دعاء العطار يقول...

البنت : بصراحه لو كل البنات كده فانا هكره نفسى كبنت بجد حقيره اووووووووووى


جوزها : معرفش يختار اللى تصونه وعشان كده يشرب بقى

الواد المدرس : ماجمع الا وفق حقير وحقيره واتلموا ع بعض

صاحبك : ياقاعدين يكفيكوا شر الجاين اهو المثل ينطبق عليه بالظبط بس نصيحه منى يقطع اىىىىىىىى علاقه له بالناس دى لانهم فعلا شبهه ولان المرء على دين خليله

المحامى : ده واحد عديييم الضميييير زيه زى الاف المحامين اللى شاغلهم الشاغل جمع الفلوس وبسسس واول مابيخونوا بيخونوا نفسهم وشرف مهنتهم

بجد حكايه تثير الاندهاش بس اللى انا عايزه افهمه لما هى معجبه بالمدرس زميلها ده ليه مش ارتبطت بيه هو بدل ماتظلم حد معاها

بجد ناس عجيييييييييييييييبه

ربنا يهدى يارب

ستيتة يقول...

البنت
ملهاش كلام
ربنا يتوب عليها
دي ملهاش حل
كان قدامها الدونجوان ده قبل ما تتجوز وتشيل اسم وكرامة وشرف راجل ومع هذا يظاهر مكانش معاه أبيج فقالت تشتغل الزوج ويشيل الليلة المادية والحب الحرام في عيونها ها يبقى سهل
ربنا يتوب عليها
دي يتقال لها كلام كتير
بس كله قلة أدب

الزوج كان الله في عونك جزئيا
ليه جزئيا؟
لأن المغفل مش بإيدينا نتعاطف معاه بالكامل
يعني زمايلها والبلد والمجتمع والناس شايفين انها شوية مش متظبطة لا شكلا ولا مضمونا وده إيه؟ بيبلبع إيه علشان عينيه تخليه يبص لدي؟
والا هي الطيور على اشكالها وقعت؟
الله اعلم
اظفر بذات الدين تربت يداك

الواد سارق الأعراض
ربنا ياخد أمثالك ممن يستحلون الحرمات ويخوضون في الأعراض بكل جراءة
يعني زاني وبجح؟
جوا بيته يا اللي تشبيهك بالحيوان يقلل من قدر الحيوانات


صاحبك
ليه يا محمد بس
ده واد مشبوه ومش كويس وميشرفش راجل انه يعرفه
كمان خد بالك انت مطلع على شغل حلق حوش من قبل الزواج
يعني معندكش ذرة في عقلك يقول ان الراجل ده مظلوم
لأ انت عارف انه كده وكده وكده
ومؤكد مش ها تشهد زور
ده الرسول قام وكان مضجع وقال ألا وشهادة الزور
حتى تمنى الصاحبة أن يكف عن قولها
الأمانة دي حملها الإنسان بقدر الله وها يسأل عنها

المحامي
ده الطبيعي بتاع أغلب فئتكم
ها تروحوا جهنم بلعب الأراجوزات وها تاخدوا معاكم اللي يطاوعكم

بصراحة يا هيما جوز البنت مش وحش لما ضربه ومضاه على شيكات
يعني يضيع مستقبله في كلاب
ماهو لو البلد دي ماشية بالشريعة
كان البت والواد فعلا راحوا ورا الشمس بيد الشرع والقانون
لكن لو قتله ها يضيع مستقبله على كلاب
ولو سابه هو اللي ها يموت
والشيكات بإذن واحد أحد يسجنه بيها زي ما مفروض يحصل
لأن سارق الأعراض ده ولا يستاهل أي شفقة

اما البنت اتسجنت ولا متسجنتش خلاص هي بقت والعياذ بالله شهرة عالمية ودي اكبر من ميت سجن

اللهم استرنا فوق الأرض وتحت الأرض ويوم العرض عليك
آمين

Cute Kitty **sookra يقول...

حسبى الله ونعم الوكيل
الدنيا بقت وحشه جدا ولاناسها اللى بقوا اوحش
هقول للبنت اتقى الله وتوبى عما تفعلى
دا على اساس الحكى بتاع صاحبك
هاقول لجوزها طلقها
الواد المدرس قالوا قف للمعلم وفيه التبجيلا كاد المعلم ان يكون رسولا
وانت ماينفعش تتسمى مدرس
المحامى هاقوله ربنا على المفترى والظالم
والمحاميين كلهم اما حراميه او شحاتين
ربنا يسترها علينا وعلى كل نساء المسلمين
والله دى حكايه تخلى الواحد يقرف ونفسه تتسد عن الدنيا كلها

VÖltaa يقول...

بص

هى كلمة واحدة

كلمة واحدة اللى هقولها

هابى نيو يير ياجميل

الفراغ يقول...

انا لو منك معرفش صاحبى ده
واصلا ماقولش عليه صاحبى
وكما قال رسول الله صلى الله عليه وسلم:
المرء على دين خليله
فلينظر الانسان من يخالل

وطبعا الباقيين اكيد عرفت رأيى فيهم

همس يقول...

ربنا يهديكى للبنت توبى الى الله واذا كنتى مظلومه فلينصرك الله
الولد اتقى الله فين العفه يا شباب وبتعلم الولاد ايه عيب عليكى
المحامى دا الطبيعى بتاعهم الا من رحم ربى منهم الكويس فيهم كويس
صاحبك بقى اذكره واذكر نفسى بالا وشهاده الزور الا وشهاده الزور
ربنا يحفظنا
اذا انتشرت الفاحشه وماتت العفه فقل على الدنيا الفناء

غير معرف يقول...

صحيح اللى اختشوا ماتوا
دكتورة ستيتة كفت ووفيت فى ردها
اللهم استر نا فوق الارض وتحت الارض ويوم العرض عليك
واد يابراهيم بلاش سهر كثير بره البيت

القدر و انا يقول...

كل سنة وانت طيب أولا
ويارب 2010 يكون سنة سعيدة عليك
البنت الرجم حتى الموت كما قال الدين الحنيف
جوزها حمار لانه من الاول شايف سلوك اعوج وبرضه استمر واتجوز يعنى مسؤل عن اختياره
الواد المدرس نفس عقاب البنت ويستحق يدخل السجن بايصلات الامانة وده اقل عقاب فى الدنيا
المحامى .. اقوله اتقى الله
فى انتظارك بعد الاجازة برواية اخرى
بس من غير دماء

-_- يقول...

بصراحة المعلقين وفوا و كفوا

جارة القمر يقول...

ربنا يهدي الجميع

بجد هدا اللي بتمناه لانه الحكاية بتتكرر كل يوم مئات المرات


أسلوبك رائع بجد

يسلمو