Pages

الخميس، 10 سبتمبر 2009

رمضان ...والشباب السيس


تعالوا نكمل الموضوع اللي بداته البوست اللي فات

واللي اتكلمت فيه عن الظواهر المنحرفه في الشباب

واللي زادت جدا في رمضان دون مراعاه لحرمة الشهر

ولا لشعور الاخرين اللي بيحاولوا يكونوا ملتزمين

كان نفسي استخدم اسلوب ارقي من كدا في التعبير

علشان اوصف بيه العيال دي لانهم فعلا عيال

ومتعلموش ابدا يكونوا رجاله وابسط شىء يقال عنهم

انهم شباب ( سيس ) علي راي احمد حلمي

اكملكم بقي الامثله اللي انا شوفتها وادهشتني

بل وصل بعضها لحد الصدمه لاني عمري ما شوفت حاجه زي كدا

في رمضان بل وعمري ما تخيلت لحظه انه ممكن يحصل



طبعا الالفاظ البذيئه دي حاجه موجوده وبكثره عندنا وخاصة في المكان

اللي انا موجود فيه وكنت متخيل والله انه لما يجي رمضان والناس تصوم

كل واحد هيحاول يصون لسانه علشان يحافظ علي صيامه

بالعكس زادت جدا في رمضان انا مش عارف السبب ايه؟

حتي ان بعضهم قالنا ( اوعوا تكونوا فاكرين ان رمضان يعني هنام..

انا معنديش حاجه اسمها رمضان)

ولما حد قاله رمضان كريم يافندم قاله (........) رمضان كريم كل سنه وانت طيب يا حبيبي

طبعا مكان النقط فيه بلاوي

وهلم جرا من الكلام اللي بجد والله يخدش الحياء ويخلي

كل واحد يستحي خجلا من اللي بيسمعه



طبعا فيه مكان للاستراحه موجود فيه تليفزيون وريسيفر

وطالما احنا في الشهر دا يبقي اكيد هتلاقي التليفزيون شغال ليل

نهار علي محطات القران والقنوات الدينيه او حتي القنوات العامه

المعتدله شويه

طبعا دا حلم

التليفزيون بدءا من الساعه 12 الضهر لغاية الساعه 3 بليل

مفيش حاجه عليه غير رقص وغناء وافلام

ولو حاول حد انه حتي يشغل برنامج عادي يبقي يومه مش فايت

نقعد نقول يا رجاله احنا في رمضان حرام عليكم عيب كدا

ولا حياة لمن تنادي

حتي الماتشات ممنوعه بردوا لان سيادتهم مش بيحبوا الكورة

يبقي خليك ساكت ياتتفرج معاهم يا تغور من هنا



المعظم بقي من الشباب السيس دا بيعمل ايه بليل

علشان يسلي وقته اصله يا حرام تعبان اوي

ومحبوس وعنده كبت وبعيد عن اهله

بيكون طبعا مهرب تليفون معاه ( لانه ممنوع ) ويقعد بقي

طول الليل يكلم سوسو ولولو

يابني حرام عليك عايزين ننام

ولا كانك بتكلم بني ادم

وعادي جدا يكلمها كدا ويشغل الميكرفون كمان علشان غيره

يسمع ويعرف ان الواد راجل وسبع وبيعرف يوقع البنات

وياذن الفجر وندخل في صباح جديد والتليفون لسه شغال

ميتقفلش غير لما البطاريه تفصل

مش عايز اقولكم بقي ان معظم كلامهم علي اشياء خارجه جدا

وكلام يندي له الجبين



اليوم بقي اللي كنت نازل فيه الاجازة دي

دخلت اغير هدومي عادي يعني

واتفاجات بحوالي 10 كدا من الشباب دول

السيس يعني وطبعا فارشين ولقمه هنيه تكفي ميه

بصتلهم كدا باحتقار لغاية ما واحد منهم لاحظ

الموضوع وقالي وهو مكسوف اوي

رمضان كريم يا صاحبي تاخد حته

الحاجه بقي اللي تغيظ انهم كلهم من اسكندريه

وكل واحد فيه بيروح كل يوم ياكل وينام في بيته

يعني مش بيجي غير 4 ساعات تقريبا

ومش مستحملهم

مامته بتحضرله السندويتشات ياخدها معاه

علشان حماده بيتعب اوي والصيام غلط عليه



والله اللي خلاني اكتب الموضوع دا

المناظر السيئه اللي شوفتها

والحاجات اللي مكنتش اتصور انها موجوده في رمضان

فعلا الخجل والحياء ضاعوا

ياتري باقي ايه عندنا لسه مضاعش؟

القاكم بخير

الاسبوع القادم




هناك 16 تعليقًا:

غير معرف يقول...

لا بجد شيء مؤسف ..... ايه القرف ده

ربنا يهدي

dramaqueen يقول...

اولا مبسطة انك بتكتب
ثانيا ربنا يكون فى عونك
بجد حاجة مقززة
ان دول يكونوا مسلمين وبعملوا كدة بدون اى حياء او خجل

ربنا يهديهم
وربا يقويك

عاشقه وغلبانه يقول...

بجد زي يحزن
عيني ع الرجاله
انا شوفت ممرضه عندنا في المستشفي
ست كبيره
ومريضه بالسكر
وكانت صايمه تقريبا لحد الضهر لما شوفتها
بس فجأه السكر نزل جامد ومن كتر الشغل هاتروح مننا
اهي دي لو اخدت معلقه سكر في بوقها ولا بوق عصير هاتبقي زي الفل
الست ياعيني مكسوفه تتكلم
ومش عايزه تفطر
اخدت شويه ميه بسكر بالعافيه وهي مكسوفه مننا وشها في الارض بعد ماكنت خلاص هاتموت

شوفت الفرق...!!

♥نبع الغرام♥♪≈ يقول...

ازيك يا ابراهيم

الله عليك وعلى مواضيعك الجميله ربنا يكرمك يارب ويجعل كل حرف تكتبه بميزان حسانتك
ولا نملك سوى الدعاء
ربنا يهدنا جميعا

تقبلى مودتى
ومنتظرينك ترجع لينا بالسلامه

ايناس

Unknown يقول...

السلام عليكم ورحمة
الله تعالى وبركاته
رمضان مش حيغير
اللى مش عايز يتغير
ابداً لو 100رمضان وهو
الايمان والاسلام(الحقيقى )لم يدخل
قلبه يبقى مفيش فايدة مهما قلتله او عدت له.ربنا يرحمه ويرحمنا
بس نصيحة لك من اخت اكبر
سناً منك ما تحتكش بحد
فيهم لان التجنيد
بالنسبة لهم فايدة
مش خسارة لان ماعندهمش
حاجة عايزين يخلصوا علشانها
ولا يعملوها وبالتالى فاضيين ورايقين
انت عليك نفسك فى مثل هذه الامور
ياأبراهيم واسمح لى اقولك كده:
اللى ما بيخاف من ربه مش
حيهمه ولا حيتأثر من نظرتك
له وهو زى(الباب)ومجاهر
بالأفطار !!

Unknown يقول...

ربنا يوفقك
وخلى بالك من
نفسك خلص مدتك
وارجع بالسلامة .

د. ياسر عمر عبد الفتاح يقول...

أستغفر الله العظيم
ربنا يهديهم ,, ويثبتك يا أخي
شد حيلك وربنا يوفقك

Yusuf يقول...

" إن الله لا يغير مابقوم حتي يغيروا مابأنفسهم"

بجد ربنا يكون ف عونك واحنا منملكش غير ان احنا ندعيلهم بالهداية

الواحد بقا بيجبر نفسه ف نهار رمضان انه يقعد ف البيت ولو نزل لأي سبب يفضل يدعي ان مفيش حاجة تأذي بصره وهو صايم

علي فكرة كلامك طلع صح واسم المدونة طلع كان موجود ف انا غيرته

تحياتي

♥نبع الغرام♥♪≈ يقول...

السلام عليكم

معلهش يا ابراهيم والله نفسيتى تعبانه شويه بس ان شاء الله احتمال انزل موضوع انهارده على الساعه 9 كده ان شاء الله تعالى

بس بالله عليك ادعليى لانى بمر بأزمة نفسيه صعبة شوية
ربنا ما يحرمنيش منك ولا من سؤالك ياغالى
بجد انت من الشخصيات اللى بحترمها قووى وبحب اتعامل معاها
ربنا يبارك فيك ويسعدكيارب
دمت بكل خير
مودتى
ايناس

ghorBty يقول...

لا حول ولا قوة الا بالله

الله يهديهم ويهدي الجميع

ضياع ووهم اسمه الدنيا

الله يردهم اليه مردا جميلا

ستيتة يقول...

فعلا شيء يقرف مش يحزن بس
اكتر شيء تعبني
قصة اللي بيكلم لولو ومش بس ده حرام جوا رمضان وبراه
لأ معقد لدرجة انه بيجاهر فرحان بنفسه
ميعرفوش انه كله سلف ودين
ربنا يهدي شباب المسلمين
قال ها نجاهد وننتصر على اسرائيل وامريكا
ربنا يصلح الحال

دعاء العطار يقول...

شبابك يامصر !

ياحسرتى

غير معرف يقول...

السلام عليكم
كل عام والأمة الإسلامية بكل خير
أتمنى التواصل
تحياتى

promise is promise يقول...

مصدوووووووووووووووووووووووووووووومه جدا من كلالالالالالالالالامك ومش قادره اصدق انى ممكن يكون فيه شباب زى الورد وصحتها فل ومش بتصوم رمضان امال هيصووا امتى لما صحته خلاص




فى حديث عن الرسول صلوات الله عليه
انه من كلام النبوه الاولى ان لم تستحى فاصنع ماشئت

واذا اراد الله ان يهلك امه نزع من قلبها الحياء


اللهم احفظنا واعفوا عنا ولا تاخذنا بما فعل السفهاء منا


تصدق انى خايفه عليك وعلى كل الشباب اللى ملتزمه من الجو اللبش اللى انتوا قاعدين فيه ده


ربنا يستر عليكم ويحفظكم وترجعوا بالسلامه


واحب ان اذكرك ان رب رمضان هو رب باقى الشهور فاللى مش بيستحى فى رمضان لا تنتظر منه حاجه تانيه فى غير رمضان


دمت بكل خير والسلام ختام

ريمان يقول...

والله ده مش فى رمضان السنه دى بس

ده بيحصل كل رمضان عادى جدا عندهم

وبقى طبيعى اننا نشوف من الاشكال دى كتير


ربنا يهديهم يا رب

روز يقول...

بص هو الموضوع حلو اوى اوى وانا معاك فية ان فعلا دلوقتى بقى فى كتير شباب فافى اوى ومش بيتحموا اى مسئولية كبيرة او صغيرة ورماين كل حاجة ع مامى طبعا بس دا بيضيع عمرة وهيندم ف الاخر وببقى انا عن نفسى مش طايقة لو شوفت قدامى ولد كدا فافى وبيتعامل برقة ومش راجل ف افعالة
لحد كدا تمام بس بقى الى مش تمام لية حاطط صورة احمد ميكى يا ابراهيييييييم لية دا كان بيمثل انة كدا ف الفيلم شاب مستهتر بس هو مش كدا ومكنش لازم تحط صورتة هو بقى