Pages

الأربعاء، 9 سبتمبر 2009

واذا بليتم فاستتروا


السلام عليكم

اللهم اغفر لنا وارحمنا واعتق رقابنا من النار

ازيكم يا احلي واجمل ناس في الشبكه العنكبوتيه

بصراحه والله وبدون اي مجاملات ( ومش من صفاتي المجامله ) انتم

وحشتوني اوي فوق ما تتخيلوا

وانا كل ما اكون موجود هنا بتابع اعمالكم جميعا وبرد عليها كمان

والحمد لله اني ظروفي كويسه جدا في رمضان وموجود باستمرار اهو

ندخل بقي في موضوعنا علشان مطولش عليكم

بس بالله عليكم تاخدو بالكم من كلامي كويس

الموضوع اللي هتكلم فيه انا كنت فاكر انه تصرف فردي من شخص واحد

او اتنين وانه بقي شىء نادر خاصة مع موجة التدين اللي بتجتاح مجتمعنا

مع انتشار الفضائيات الدينيه بالشكل اللي احنا شايفينه اليومين دول

لكن الظاهر ( الا ما رحم ربي ) انه تدين وهمي شكلا لا موضوعا

ايه بقي الحكاية

رمضان الشهر الفضيل افضل شهور السنه اللي كل واحد فينا بينتظره

من العام للعام علشان يغسل ويطهر نفسه فيه من كل الاثام والذنوب الصغيره

والكبيره واللي بنعكف فيه علي الصيام والصلاة بالنهار وقراءة القران والتهجد بالليل

واللي له من الشان مالايعلمه الا الله

مش عارف حصل ايه للشباب انا مش لاقي كلام اقوله بجد

غير اني هحكي ليكم بعض الاشياء اللي شوفتها بعنيا واسيب ليكم الحكم

وانتم اللي تقولولي ايه اللي حصل ؟ وليه كدا؟

يقول رسولنا الكريم صلي الله عليه وسلم ( واذا بليتم بالمعاصي فاستتروا) وهذا الحديث

ينطبق اصلا علي ايام السنه العاديه فما بالك بالمعاصي في رمضان ومش دا المشكله

كل واحد حر في اللي بيعمله

المشكله الجهر بكدا ... تلاقي الواحد فاطر علنا وبيقولها صريحه وبياكل ويشرب قدام الكل

ولا حتي في قلبه ذره حياء او خجل من اللي بيعمله

خدوا الامثله دي

طبعا انا في الجيش والمعروف انه اليوم بيكون صعب شويه بس والله العظيم عادي

والحمد لله ربنا بيعنا جدا علي الصيام والحمد لله ايضا ان ربنا سخر لنا ناس فاهمه

يعني مش بيخلونا اساسا نعمل حاجه فوق طاقتنا واحنا صايمين

يعني كل اللي بنعمله حاجات عاديه ممكن اي حد يعملها ويتحملها

البعض بقي من ضعاف النفوس بيستغل انه عسكري واسمه في الجيش

ويسمح لنفسه انه يفطر ( طيب ياسيدي دي مشكلته هو ) انا ماليش دعوه بتصرفه

هو اكيد شخص تعدي سنه 21 سنه وعارف الصح من الغلط

لكن شوفوا بقي بيفطر ازاي

كنت في الكانتين او البوفيه ( المكان اللي بيتباع فيه الاكل والشرب في الجيش ) الساعه تقريبا

واحده الضهر وقال بمنتهي البجاحه ( عايز اكل ) انا عادي قلت دا اكيد ( نصراني ) بس غريبه اوي

طيب ما الناس دول ( النصرانيين ) معانا وبصراحه والله في قمة الادب والاحترام والذوق وعمر ما واحد فيهم

سمح لنفسه انه ياكل او يشرب قدام اي واحد فينا بل بالعكس كانوا بياكلوا ساعة المغرب معانا زي الصايمين بالظبط

كانت بقي دهشتي الكبيرة لما عرفت انه مسلم وزي ( الشحط ) واللي ما يستهلش اسمه حتي

قلت عادي ممكن يكون تعبان ولا حاجه .. اللي حصل بقي انه جه ومعاه 3 او 4 شباب حلوين كدا زيه

واشتغلوا سندويتشات وسجاير وشاي قدام كل اللي موجدين بمنتهي قلة الادب والوقاحه

من يومين كدا روحت اجيب طلبات للكانتين ( ايه حكاية الكانتين دي ) اصل انا اشتغلت فيه يومين كدا

من حي المندره في اسكندريه وهناك سوق معروف جدا مليان بقي من كل ما تشتهيه الانفس

وصلت هناك بقي وعينك ما تشوف الا النور الناس عادي جدا ولا كأن فيه رمضان ولا غيره

السجاير شغاله والشيشه والالفاظ البذيئه زي ماهي والبنات ماشيه لابسين هدوم رش

هههههه ( علي رأي الشيخ وجدي غنيم ) قلت في نفسي هو ايه دا

هي الناس دي عارفه يعني ايه رمضان ولا انا يمكن اللي جيت في وقت غير مناسب؟

ان شاء الله هكمل الموضوع دا في جزء تاني علشان بس تقدروا تقروا

ومطولش اكتر وعلشان اللي جاي انقح من كدا بكتير

ويارب يهدي كل عاصي ويرد الشباب لدينهم ردا جميلا

دومتم بكل خير

هناك 20 تعليقًا:

------ يقول...

انا اوووول تعلييق

ولا ايييييييييه؟!

------ يقول...

ياااحلولى يااحالوولى


والتاااااااانى كماااااان

------ يقول...

ودا علشااان خاطر الحباايب

حجججججججززززززززز

------ يقول...

حمد لله على سلامتك

وحشتنا بوستاتك والله

------ يقول...

وداااا

كمااااااان

يامحلى الاحتلااالات

بعد الفطااار
الله اكبر

------ يقول...

بدوون تعلييق


حسبنا الله ونعم الوكيل

------ يقول...

ربنا يهدينا ويرحمنا

بجد مش عارفة اقول ايه لانى مصدومة من الموقف نفسه

يعنى اللى فطر دا مش عارف انه مهما عمل عمره ماهيقضى اليوم دا

ولا يكونوا مشيوا ورا المفتى اللى يقولك مضغ اللبان فى نهار رمضان لايفطر

وشرب السجائر على الاحوط لايجوز
ياسبحان الله

*السؤال : لاحظت في ايام شهر رمضان بعض الناس يدخنون علناً فما الحكم في ذلك؟
*الجواب : الاحوط وجوباً للصائم عدم ادخال الدخان الجوف

يعنى بيقولوا افطر

------ يقول...

أن الفطر في رمضان بلا عذر من كبائر الذنوب،
وقد روى أصحاب السنن الأربعة "من أفطر يوماً من رمضان من غير رخصة

رخصها الله له لم يقض عنه صيام الدهر"
ويجب على هذا الشخص أن يقضي ذلك

اليوم الذي أفطر فيه، وإن كان فطره في هذا اليوم قد تم بالجماع، فعليه القضاء والكفارة الكبرى، وهي: عتق

رقبة مؤمنة، فإن لم يجد فعليه صيام شهرين متتابعين، فإن لم يستطع فعليه إطعام ستين مسكيناً.


أما زوجته فلا تحرم عليه ولكن عليها أن تنصحه في الله وأن تذكره بالله وأن تعينه على طاعة الله تعالى، وأرى أن

دور الزوجة هنا كبير جدا فعليها واجب الأمر بالمعروف والنهي عن المنكر مع زوجها، كما عليها أن تجتهد في تربية

أولادها تربية صالحة، وأن تحاول في أن تحبب لهم الإيمان وتساعدهم على الالتزام بحدود الله تعالى.
والله أعلم.

beautiful mind يقول...

دموع القمر
ماشاء الله عليكي 8 تعليقات مرة واحده
ربنا يبارك فيكي
دا بس جزء وليس الكل
ان شاء الله هكتب باقي المواقف
ويارب تتابعي
تحياتي اليكي

ستيتة يقول...

حمد الله على سلامتك يا ابراهيم
يارب دايما مطمنين عليك
انت قلتها
ويارب يهدي كل عاصي ويرد الشباب لدينهم ردا جميلا
احنا في اخر الزمان يا هيما
والجاي اكتر
ربنا لا يفتنا يارب احنا وذريتنا
تحياتي

دعاء العطار يقول...

على فكره انا اتعرضت لموقف زى موقفك ده قبل كده وكنت مندهششه جدااا

هحكيلك الموقف بالظبط

احنا كنا عاملين جروب اسمه عروسه من غير شبكه ع الفيس

المهم ان برنامج ع " كام تى فى " دى اذاعه الكترونيه طلبت انها تصور معانا ع الجروب وده كان السنه اللى فاتت فى رمضان

المهم روحنا وكنا بنصور فى كافى تخيل بقى الصدمه

مجموعة بناااااااات فى رمضان بيشيشوا

وطبعا اللبس لا يمت لرمضان ولا للاسلام بصله

انا بصراحه اتصدمت جدااااااا من الموقف لان دول بنات وبيشربوا شيشه وبمنتهى التفاخر والتباهى

فضلت اليوم كله مش فاهمه ولا مستوعبه الموقف وبصراحه اتخنقت انى اتوجدت فى مكان زى ده

عشان كده انا مقدره احساسك وغيرتك ع دينك
ربنا يهدى كللل شباب المسلمين ياااارب ويعز بيهم الاسلام ويفرح بيهم سيدنا محمد عليه افضل الصلاه والسلام

معلش طولت عليك

بوست جميل وفى انتظار الجزء التانى

تحياتى

Yusuf يقول...

دلوقتي الواحد بقا بيحس إن رمضان موجود في دول العالم كلها بس عندنا السنة دي أجازة

علي فكرة اللي انت بتشوفه قدامك ميجيش 1% من اللي بيحصل في مارينا والعجمي اللي الصيف فيهم لسة مخلصش لأنه بيخلص لما الدنيا متبقاش حر ومش مهم بقا رمضان جه ابقا خليه يعدي السنة اللي جاية

للأسف في ناس كتير بتتعامل مع الدين كأنه هامش ..... ربنا يهديهم

beautiful mind يقول...

dodo
انا سعيد جدا برايك الجميل دا والموقف اللي حكيتيه يشبه كتير للي انا عايشه
عموما ان شاء الله هكمل وبردو لازم تردي
اشوفك بخير ان شاء الله
وربنا يديم عليكي نعمة الصحة والعافيه

beautiful mind يقول...

دكتورتي وتاج راس المدونين والمدونات
دكتورة ستيته
متتصوريش قد ايه بكون فرحان وسعيد لما بشوف اسم حضرتك منور عندي
يارب يتقبل منك الدعاء
ويارب يديم عليكي نعمة الصحة والعافيه

beautiful mind يقول...

yusuf
اول زيارة عندي وان شاء الله لن تكون الاخيره
فعلا بجد كلامك كله صح
اصحابي حكولي كتير عن المصايف واللي بيحصل فيها
ولا بيفرق معاهم رمضان ولا شوال
عموما ياباشا ربنا يهدي الجميع
وان شاء الله هزور مدونتك
ويارب يحقق بينا التاخي والقبول
دومت بالف خير

♥نبع الغرام♥♪≈ يقول...

احم احم

انا جيت يا هيما اخبارك ايه يارب تكون بخير وبالف صحه وعافيه

وربنا يلغنا ليلة القدر

بجد فرحت بيك قووى لما لقيتك نورتنى

♥نبع الغرام♥♪≈ يقول...

بوست جميل قوووى

ظاهرة غريبه فعلا

وانت اتكلمت بمنتها الوضوح

ربنا يكرمك ويبارك فيك

دمت بكل خير

غير معرف يقول...

ازيك ياابراهيم عامل ايه
ايوه كده ياراجل منور فى وسطنا
ماكتبت عنه يابراهيم كارثة
واصبحت ظاهرة منتشرة
ونتيجتها محق البركة من الوقت
شوفت رمضان بيجرى ازاى والله الواحد مش مصدق وفعلا اجنا فى اخر الزمان
اللهم لاتؤاخذنا بما يفعل السفهاء منا
ومااكثرهم هذه الايام
مبسوطة لتواجدك بينا ربنا يحفظك وشباب
المسلمين من الفتن
تحياتى

غير معرف يقول...

حمد الله ع السلامه

وربنا يهدي الجميع ..... ان لم تستحي فافعل ما شئت

همس يقول...

انا اعتقد ان هلال رمضا تقريبا ممرش لسه على الاسكندريه يمكن هيبان الشهر الجاى جايز الله اعلم