Pages

السبت، 4 يونيو، 2011

المرايه





أثناء بحثي في دفاتري القديمة اللي أنا متعود بين كل فتره والتانيه

اني اقعد أدور فيها وأقرا الكلام اللي انا كنت بكتبه من ايام ما كنت لسه بدرس

لأني بلاقي جوايا حنين قوي جدا لاسترجاع اللحظات دي واللي بشوفها

تاني قدامي كأنها حصلت امبارح رغم انها عدي عليها سنين طويله

وقعت ايدي علي كتاب قديم أوي من ايام الورق الاصفر

الكتاب عبارة عن مجموعة قصص باللغة الانجليزية
 
وافتكرت ان الكتاب دا كان اهداهولي مستر هشام ربنا يمسيه بالخير

مدرس الانجليزي بتاعي ايام الثانويه اللي هاجر امريكا

قريت قصه جميلة اوي والاجمل ما فيها الهدف اللي عايزة توصله

لأي حد بيقراها ويفهمها كويس !!!!!!
 

من قديم الزمان كان فيه قرية يابانيه أهلها عمرهم ما استخدموا المرايات

أبدا ولا يعرفوا أي حاجه عنها

واحد من القرية دي سافر لبلد تانيه بعيدة جدا عن قريته

وهناك وهو ماشي في السوق شاف حاجه غريبه

شاف المراية لأول مرة في حياته
 
بسرعه مسكها بإيده وبص فيها وهو هيتجنن وقال

أنا مش مصدق عنيا الراجل اللي في الصورة دي شبه

والدي تمام انا فرحان اوي لاني لقيت اخيرا صورة لأبويا

وقام الياباني واخد المراية او الصورة زي ما كان فاكرها

وخباها جوا هدومه ورجع بيته
 
ودخل جوا اوضته وخباها وبقي كل يوم يدخل ويمسك المراية

ويقعد بالساعات يكلم في صورة ابوه

ولما زوجته لاحظت انه بيخلي بنفسه كتير ودا مش من عادته

استغلت فرصة انه مش موجود في البيت وقامت بسرعه داخله

الاوضه وقعدت تدور علي السبب اللي خلي جوزها
 
بقي متغير كتير عن الاول وفجأة لقت المرايه

مسكتها بإيديها وبصت فيها اوي وقالت

دلوقت بس عرفت سبب بعده عني

أنا كنت متأكده ان فيه واحده تانيه في حياته

بس دي تطلع مين ؟ هي صحيح فيها شبه مني

بس دي وحشه اوي اوي كمان
 

بقي يسبني انا عشان دي .نهاره مش فايت

ولما رجع الراجل مسكته وقامت خناقه بينهم لرب السما

الراجل المسكين يحلف انها صورة ابوه وهي تقوله يا كداب

دي صورة مراتك التانيه ام شكل وحش

وهم علي الحال دا مر صديق ليهم من جنب البيت

ولما سمع صوتهم العالي دخل البيت بسرعه وقال فيه

ايه ياجماعه خير مالكم؟
 

كل واحد حكاله الحكايه من وجهة نظره هو

قام صاحبهم قالهم طيب وروني كدا الصورة دي

ومسك المرايه هو كمان وبص فيها وقال

انتم الاتنين أكيد مجانين وعمي كمان

دي صورتي أنا


*********

انتهت الحكايه علي كدا بس هدفها عمره ما انتهي

لازم نشوف نفسنا كويس

بدون تعالي او تفاخر او حتي جلد للذات

لازم نبقي زي صديق الراجل الياباني

اللي شاف نفسه هو

مش زي الراجل اللي شاف ابوه

او مراته اللي شافت نفسها بس بصورة وحشه
_________________


هناك 3 تعليقات:

فتاه من الصعيد يقول...

مغزى مهم جدا .... كل واحد بيشوف اللي عايزه وبيتمناه :)

كريمة سندي يقول...

كل واحد فينا ىزم يبص لنفسه من جوا قبل بره .. الباطن أهم من الظاهر

مغزى حلو من الحكاية خالص تقديري

غير معرف يقول...

فعلا الواحد لازم يشوف نفسه الاول قبل ما يشوف غيره باي شكل من الاشكال كل التقدير تلمذتك الي متعلمة منك كل حاجة ندي