شوية أنا بقي

في هذه التدوينة هحاول إني أجاوب علي أسئلة التاج

اللي لقيته في احدي المدونات ضمن حملة التدوين الحالية

واللي المفروض ان كل المدونين هيجاوبوا عليها

فحبيت أخلص نفسي بدري بدري قبل الزحمة ورمضان وكدا

هه استعنا بالله 

.............................

عرف نفسك ؟

ممممممممم اسمي ابراهيم 

25 سنه الا شهر عشان عيد ميلادي في 8 

بشتغل مدرس في مدرسة بنات 

وبحب شغلي جدا ... حبيته بعد ما اشتغلته رغم اني كنت مرغم عليه

بس يلا عادي الحمد لله مهي دي مشكلة بلد بحالها مش انا لوحدي يعني

............................................

ما أكثر ما يميز شخصيتك ؟

مش عارف ..... بس ناس قالولي اني هادي 

وناس قالوا رومانسي .. وناس تانين قالوا اني رخم

انا بعتبر نفسي بسيط ... ابسط من البسيط كمان

مش بحب الزحمة ولا الصوت العالي ولا اي حاجه غريبه

وبيجيني توتر عصبي لما اسمع اغاني الخبط والرزع بتاعة اليومين دول

بيعجبني اوي كاظم الساهر وهشام الجخ والشيخ ناصر القطامي وابو اسحاق الحويني

ومدمن نزار قباني ومحمود سعد وأحمد حلمي 

ساعات بكتب شعر بس مش بكتبه الا لما بكون حاسه بجد

ومش بكتب الا لمواقف معينه واشخاص معينه.. قبل كدا اخدت كذا جايزة

في مسابقات شعر في الجامعه 

...............................................

ما هى اهم نقطة تحول فى حياتك ؟

فيه نقاط تحول كتير جدا في حياتي

الثانوية العامة كانت نقطة تحول

شغلي كان نقطة تحول

عشان عرفت فيه ناس حقيقين

ناس بعتز جدا بمعرفتهم وفعلا لقيتهم خير اخوة واصحاب

خطوبتي كانت نقطة تحول 

والسبب انا محتفظ بيه لنفسي 

.............................................

كيف دخلت الى عالم التدوين ؟

الحكاية دي غريبه أوي .. بدأت من حوالي 4 سنين كدا

كنت مرة بتفرج علي برنامج البيت بيتك بتاع محمود سعد

وكان مستضيف واحده ست كانت تعرضت لتحرش جنسي في الشارع

والست دي قالت انها عاملة مدونة عشان تدافع عن حقوق الستات اللي زيها

بعدها قررت اني أبحث عن موضوع المدونات دا وقريت كتيرعنها

واتفرجت علي فيديوهات لغاية ما أخدت قرار اني أنشىء المدونة دي

.........................................................

ما اسم مدونتك ولماذا اخترته ؟

 حناني 

اخترت الاسم دا ليه 

هو قصة غريبة شوية

انا لما جيت أعمل المدونة دي كنت فعلا محتار اسميها ايه

طلبت من ناس اعرفها انها تقترح لي اسماء

وملقتش فعلا الاسم اللي بدور عليه

في الوقت دا ممممممممم مش عارف اقول ازاي

كنت بحب حنان ترك جدا بجنون يعني

خاصة كمان لما لبست الحجات حبي ليها زاد اكتر

كنت بشوف فيها صورة البنت اللي ممكن احبها وارتبط بيها

قررت اسمي المدونة حناني علشان تبقي حاجه تشبهها

بس

............................................................

صف مدونتك ؟

مدونتي تحكي عن نفسها اكتر مني

خد بس حضرتك تاكسي من علي اول ناصية كدا

وخدلك كام لفة جواها هتعرف كل حاجه عنها

....................................................

من هم أكثر ثلاث شخصيات أثروا بك من داخل عالم التدوين ؟ ومن خارجه ؟

الشخصيات اللي في حياتي كتير جدا الحمد لله

من داخل عام التدوين فيه شمس النهار وتركيب

واستاذ فاروق وبناته هبه وكارولين وناس تانيه كتير جدا

من خارج التدوين فيه مثلي الاعلي وقدوتي استاذي محمود عيسي

وشخصية مديري في المدرسة وايضا اخويا وصديقي استاذ فتحي

...........................................
ما هو الاسلوب المفضل لديك فى التدوين ؟

والله علي حسب الموضوع نفسه بس انا بفضل

الاسلوب الساخر علشان بيكون أخف علي القارىء 

وعلشان بيخلق جو من المرح يخلي الواحد يكمل الموضوع للاخر

لأننا في عصر السرعه ومعدش حد ليه تقل انه يقعد ويقرأ وكدا

.......................................................

فى رأيك ما أهم ما يميز تدويناتك ؟

أهم ما يميز مدونتي انها انا 

بتتكلم عني في كل حالاتي

وانا فرحان وانا متضايق وانا عاشق

كل حاجه مريت بيها كتبتها هنا 

وكل حاجه بتكسف احكيها لحد بحكيها هنا

انا هنا بلاقي نفسي

..............................................................

اختر اقرب تدويناتك الى نفسك وضع رابطها وحدثنا عنها ؟

ممممممممممم بجد كل تدوينة كتبتها بتكون قريبة لقلبي

علشان لما بكتب اي حاجه مش بكتب الا لما بكون عايز اكتب

عشان كدا بيطلع الكلام مني وبيعبر فعلا عني

بس يمكن في تدوينة أو اتنين انا بحبهم جدا جدا

ولازم اقرأهم كل شوية لما بيوحشوني

وهم بيوحشوني كتير بصراحة

التدوينة الأولي اسمها

أطفال ... وكلاب 

والتدوينة الثانية اسمها

جنت علي نفسها براقش

..................................

استعرض اهم المواقف الغريبة او الطريفة التى صادفتك مع التدوين ؟

والله كلها بتكون مواقف لذيذه وبستفيد منها

يعني ممكن اقعد ساعات طويلة جدا وانا بدور علي حاجه

جديده اعملها للمدونة او اضيفهالها علشان شكلها يبقي احلي

ومرة عملت حاجه غلط واكتشفت بعد كدا ان كل حاجه في المدونة باظت

وقغدت بقي اعيد تاني كل حاجه من اول جديد

وقولت لنفسي اللي مكلش فيه متلعبش فيه

...............................................

هل أحدث التدوين تأثيرا عليك ؟ وكيف ؟

طبعا علشان بقيت مش بعدي اي موقف يحصلي 

اويحصل قدامي يعدي كدا وخلاص

بقيت بفكر كويس جدا في كل حاجه وفي اي حاجه

واتعلمت من التدوين ان مش اي كلام يتقال

ومش اي حاجه تعجب الناس

ولو مكنش المدون صادق فعلا بينه وبين نفسه

في اي حاجه بيقولها محدش هيحس كلامه

.....................................

اختر اى مدون ووجه له سؤال ؟

سؤالي لكل المدونين 

يمكن هو نصيحة أكتر منه سؤال

ياريت نرجع نقرأ لبعض تاني

ونسأل علي بعض تاني زي الاول 

...........................

تحياتي للجميع 

اتمني من ربنا ان كلامي يكون وصل فعلا