Pages

السبت، 11 فبراير 2012

انا عيل سيس




ذات يوم قرررت وأنا في كامل قواي العقلية
وبدون أي ضغوط خارجية أو داخلية إني أتخلى
عن كل حاجه تخصني وتخص شخصيتي اللي قاعد
أكون فيها بقالي سنين .. وأتغير زي ما كل حاجه بتتغير
ولقيت نفسي محتار .. طيب أتغير أبقي ايه ... فيه حاجات كتير أوي
أروح التحي وأقصر البنطلون وابقي سلفي ... ولا ابقى ليبرالي
ولا انضم لأي حزب جديد واشوف بيقولوا ايه واشارك معاهم في اي حاجه
يمكن أفهم هم بيعملوا ايه .. وهم عايزين إيه أصلا ؟
ولا اروح أقدم في نادي والعب أي لعبة ان شالله حتى العب بلي مسافات طويله
المهم آخد لقب رياضي .. ولا أعملي أي مشروع علي قدي كدا وابقى رجل أعمل
وفي لحظة قررت إني أكون حاجه تانيه خالص غير كل دا
قررت إني ابقي شاب استايل .. واغير لبسي وكلامي وكل حياتي
واتعرفت علي واحد من الشباب دول اللي احنا بنسميهم شباب " سيس "
وعرضت عليه فكرتي وسعادتي بإني أكون واحد منهم وطلبت منه بعض
النصايح علشان ابقي " سيس " معتبر وسالك
قعد الواد يقولي شوية حاجات اللي كانت بالنسبه له كأنها شيء مقدس
أو عقيدة " عقيدة الشباب السيس " .. 
وانا عمال استمع لكلامه وكلي اذان صاغية
قالي :
بص يا مان عشان تكون زينا لازم تعمل اللي هقولك عليه
قولتله : قول
قالي : أول حاجه لازم تغير طريقة كلامك وسيبك بقي من الكلام القديم
بتاعكم دا .. يعني أديك مثال ... مثلا انت لما تدخل مكان علي ناس بتقول ايه؟
قولتله : بقول السلام عليكم ؟
قالي : دا كان زمان .. دلوقتي لأ
انت تقول: هاي يا جماعه ... عاملين ازاي ؟ وحشتوني طحن موت
لو عايز تمشي بقي تفول . بيس دلوقتي .. سي يو
قولتله : يا سلام ... تصدق حاجات حلوة
قالي : ولازم تعمل ابديت لكل كلامك يا مان لأن فيه حاجات جديدة بتظهر
كل يوم عشان يبقي عندك باك جراوند لأي كلام بيتقال
قولتله زي ايه كدا ؟
قالي: يعني تقول انا هامشي ناو .. وهكلمك فون .. وهقعد ع الفيس
وهروح السكول ... كدا يعني
فل يا مان كدا ؟
قولتله : فل الفل كمان .. انا كدا بقي بقيت استايل " بلاش كلمة سيس عشان بيزعلوا منها "
قالي : لالالا هو احنا لسه عملنا حاجه
قولتله : دا انت غيرت قاموس اللغة بتاعتي ولساني اتعوج ناقص ايه تاني ؟
قالي : نيجي بقي للأكل ... انت بتحب تاكل ايه ؟
قولتله : عادي يعني باكل اي حاجه ... مش بتفرق معايا
قالي : ايه دا يعني ايه اي حاجه ؟ ... يعني ممكن تاكل فول وطعمية والحاجات دي
قولتله : يا سلام ومالك قرفان من نفسك كدا ليه ؟ ... ايوه طبعا باكلها وبشرب عرق سوس كمان
بصلي باشمئزاز وشكله كان هيرجع وقال : يا مان دا أكل الناس الداون احنا بناكل حاجات تانيه
لازم تجرب تاكل سوسيس .. هوت دوج ... تشيكن بيكاتا .. حاجات من دي
قولته : اه حاضر بس يارب الاقي الصيدليات فيها الحاجات دي
قالي : تعالي بقي للدماغ..   قولتله : دماغ ايه .: ما احنا كدا كويسين
قالي : يا مان دماغك لازم يبقي ع المود ويبقي ريفريش علي طول
اي حته تروحها لازم يكون معاك التظبيط بتاع الهيد دا عشان الروشنه تكمل
بصتله وانا مش فاهم ولا كلمة وقولتله : نعم
قالي : يعني الحشيش دا اساسي .. البرشام ... لو فيه افيون يبقي بيس
بس سيبك من البانجو عشان دا بيقلب بمعيلة في الاخر ... ها . فهمت ؟
قولتله : وانا اجيب الحاجات دي منين يا مان ؟
قالي : انوي انت بس وجهز البراتس وانا اظبطك
قولتله : براتس ... وتظبطني .... هو لسه فيه حاجات تانيه ولا كدا تمام ؟
قالي فاضل بقي الحتة ..... قولتله : حتة اية ؟
قالي : القطة ؟ .. قولتله يا عم قطة ايه ؟ هي فيها قطط كمان
قالي اقصد الجيرل فيرند يا مان .. انت مصاحب ولا ايه؟
قولتله : بفكر ... قالي : انا هعرفك علي شلة بنات استايل اخر حاجه
وانت شوف اي حتة فيهم عشان الشكل العام بتاعك قدام باقي الشباب
عشان تبقي معاك في اي مكان ومتبقاش الوون
اخر حاجه بقي وهي اهم حاجه يا مان
قولتله : قول يا مان انا دماغي باظت اصلا
قالي : كدا غلط .. متقولش دماغي باظت اصلا .. اسمها دماغي باظت اصلي
قولتله : والله .... تصدق فرقت .. انتم عيال ولاد ايه
قالي : اهم حاجه بقي في دا كله وهو الاساس يا مان .. الشكل البراني واللبس بتاعك
قولته : ايوه هو دا الكلام .. انا عايز الناس كلها تعرف اني استايل
قالي : اول حاجه لازم تسيب شعرك يكبر اخر حاجه واوعي الشيطان يوزك في يوم وتسرحه
لازم يبقي عامل زي فروة الخروف وسيبه علي راحته
وانت بتشتري بقي الهدوم اشتري اكبر حاجه يعني البنطلون يكون اكبر 4 او 5 نمر عليك
والتيشيرتات اشتريها عليها رسومات كتير زي جماجم مطربين الروك .. جيفارا
لازم بقي تلبس اكبر عدد من السلاسل الجلد والحظاظات ودي مهمه جدا
لو عرفت تعمل وشم في اي حته باينه يكون تمام لو معرفتش احنا نعملك
مممممم اه لازم بقي تسقط البنطلون شوية لا مش شوية .. شويتين
عشان البوكسير يبقي باين وانت ماشي .. هو دا النظام
قولتله وانا متاخد كدا ومش مصدق اللي بسمعه : بصحيح دا يا مان
قالي : هو انا ههرج في الحاجات دي .. شايفني انا عامل ازاي ؟
قولتله : عارف يا كابتن
قالي : تل مي ..
قولتله : انا اصلا عيل سيس اني قعدت معاك وسمعت كلامك



الأربعاء، 8 فبراير 2012

جنت علي نفسها براقش


( موضوع قديم لكن بصياغة جديدة )

من زماااااااااااااان اوي

ايام العرب القدامي بتوع القبائل والصحرا والجمال

كان فيه قبيلتين كبار

دايما بينهم مشاكل وحروب وكر وفر

وناس تموت هنا وناس تموت هناك

ومفيش صلح نافع

ولا حد بيكبر لحد

لغاية ما شوية رجاله من قبيله فيهم

قالوا احنا خلاص فاض بينا الكيل

ولازم نشوف حل للعيال بتوع القبيله التانيه

واتفقوا انهم اول ما يطلع عليهم النهار

ياخدوا السلاح والشوم والمطاوي

ويهجموا علي القبيلة التانيه هجمة رجل واحد

لغاية ما يخلصوا عليهم وعلي اللي جايبنهم

ويرموهم في مزبلة التاريخ ( علي رأي التراس الاهلي )..

ولا تقوم لهم قومة بعد كدا

وروح كل واحد نام في بيته وعمال بيفكر في المعركه

اللي هينفذوها بكره واللي كل واحد فيهم هايشفي غليله

من العيال ولاد التيييييييييييييييت ولاد عمهم التانين

الجماعه التانين بقي كان ليهم عيون في كل حته

وعرفوا اللي حصل في الاجتماع

وايه اللي ناوي عليه جيرانهم

قام الكبير بتاعهم وقال :

يارجااااااااااااال انتم عارفين اننا مش قدهم

لا في العدد ولا القوة ولا التسليح

ولو دخلنا معاهم في حرب اكيد خسرانين خسرانين

انا هقولكم رأيي اللي انا شايف اننا لازم نعمل بيه

احنا لازم نرحل عن الديار

ولازم نجهز للرحيل في التو واللحظه

يعني في الحال ومفيش داعي ابدا لأي نقاش

وفعلا الجميع وافق علي كلام السيد الكبير

وكل واحد اخد خيمته وغنماته واللاب توب بتاعه

وجهز الركايب وانطلق الجميع

وعنيهم مليانه بدموع الحسرة والذل والعار

واحد ( نايتي ) منهم وفي رواية أخري ( سيس )

زي العيال بتوع 6 ابريل اللي مش بيسرحو شعرهم دول

 كان عنده كلبه والكلبة اسمها براقش

لقيت الواد صاحبها لم حاجاته ومحتاجاته وماشي

راحت ماشية وراه من باب الوفاء يعني عشان محدش يشمت في الكلاب

وبراقش بقي مش تعرف انهم هربانين وتمشي وهي ساكته

لا

سمعت ان فيه حكمة بتقول ( الكلاب تعوي والقافلة تسير )

قالت وهو انا مش من الكلاب دول ولا ايه؟

وراحت شغاله عواء... نباح يعني

يووووووه

يعني قعدت تقول هو هو هو هووووووووووووه بصوت عالي

مين بقي اللي سمع صوت براقش

الرجاله التانين

راحوا قايلين : اصحوا يا جدعان العيال هربوا

هجوووووووووووووووووم يارجاله

وتتبعوا صوت الكلبة لغاية ما وصلوا لهم

وصاحبها النايتي عمال يسكت فيها وهي وخداها الجلالة اوي

هجم عليهم الاعداء وكانت براقش اول الضحايا

وأبيد قومها عن بكرة ابيهم

يعني لغاية اخر واحد فيهم

ولم يعد لهم ذكر بعد ذلك

وصارت براقش مثلا يضرب

يقولون

جنت علي نفسها براقش


بالبلدي يعني

هي اللي جابته لنفسها

.....
واحنا كلنا عملنا زي براقش او بيتعمل فينا زيها
قولنا نعمل ثورة ونغير اللي مكنش ابدا ممكن يتغير
وافتكرنا ان كل حاجه بقت تمام وباقي لينا
كام يوم ونبقي امريكا التانيه
لكن كان فيه ناس تانيه ليها رأي تاني
مش انتم عملتم ثورة؟
مش انتم سجنتم كبار البلد؟
مش انتم عايزين حرية وديمقراطية؟
طيب احنا هندفعكم ضريبة الحاجات البسيطة دي
لازم تدفعوا الضريبة دي من دمكم
ومش اي دم لازم يكون دم شبابي طازه
مش بس كدا ... لا هتلاقو المصايب كل يوم والتاني
ومش هتقدرو تعرفوا تعملوا اي حاجه
ولا هتعرفوا مين اللي بيعمل كدا ؟
لاننا ببساطه متغلغلين جوا كل حتة في البلد
مش بعيد تكون انت شخصيا معانا وانت مش عارف
وبتنفذ كل اللي احنا عايزينه
احتجاجات .. مظاهرات ... اضرابات
واللي جاي احلي كمان
هنخليكم تعملوا عصيان مدني
وانتم اصلا متعرفوش يعني ايه عصيان
احنا مسيطرين كويس
ومعانا احلا شباب الشباب الثورجي
اللي مظبط الداخلية وهدفه الاول والاخير انه يخلص عليها
نقابلكم بقي بعد عشرين سنه
عشان نعرف وصلتم لإيه
يلا باي دلوقتي .. تليفونات بقي





الخميس، 2 فبراير 2012

كنت ممكن أكون هناك



قضيت بالأمس أسوأ يوم في حياتي علي الإطلاق
لغاية دلوقتي ماليش نفس لأي حاجه
مش عارف اتكلم مع حد .... ولا أنا مستوعب اللي حصل
شباب زي الورد .. بل هم الورد نفسه
دكتور ومهندس وطلبة جامعة ومعيدين .. مؤهلات عليا
شباب مثقف عارف ازاي يتكلم عن بلده
فجأة وفي نص ساعه بقوا في عداد الموتي
انا كان ممكن أكون معاهم ..... اموت وانا مش عارف بموت ليه
اخرج من بيتي وانا رايح اتفرج علي الناس اللي بحبها 
يرجعوني ملفوف في بطانية لأهلي واقهر قلبهم عليا
للدرجة دي وصلت أدميتنا لكدا
ياتري الناس اللي بقوا يرموا الشباب دول من فوق سور الاستاد
عرفوا يناموا امبارح ... نفسيتهم مرتاحة
هتروجوا من ربنا فييييييييييييييييييييييييين
ياتري لما شوفت الشباب مرمين علي الأرض والدم سايل منهم
عادي كدا .... متحركش فيك أي حاجه
يا بلد معدش فيكي نخوة ..... يا بلد معدش فيكي راجل
يا بلد بتبيعي لحمك ... وبتاجري في دم شبابك
يا شعب النصابين والدجالين والشحاتين والبلطجية والحرامية
هو دا شعبك يا مصر
كله بينصب .. كله بيبلطج ..... كله في الشوارع يا بيسرق يا بيشحت
هي دي ناسك
من شوية ايام قولت اني بفتخر اني مصري
دلوقتي بقول انا بحتقر نفسي اني اعيش فيكي
فيكي ايه يشرف ؟