Pages

الخميس، 5 يوليو 2012

شوية أنا بقي






في هذه التدوينة هحاول إني أجاوب علي أسئلة التاج
اللي لقيته في احدي المدونات ضمن حملة التدوين الحالية
واللي المفروض ان كل المدونين هيجاوبوا عليها
فحبيت أخلص نفسي بدري بدري قبل الزحمة ورمضان وكدا
هه استعنا بالله 
.............................
عرف نفسك ؟
ممممممممم اسمي ابراهيم 
25 سنه الا شهر عشان عيد ميلادي في 8 
بشتغل مدرس في مدرسة بنات 
وبحب شغلي جدا ... حبيته بعد ما اشتغلته رغم اني كنت مرغم عليه
بس يلا عادي الحمد لله مهي دي مشكلة بلد بحالها مش انا لوحدي يعني
............................................
ما أكثر ما يميز شخصيتك ؟
مش عارف ..... بس ناس قالولي اني هادي 
وناس قالوا رومانسي .. وناس تانين قالوا اني رخم
انا بعتبر نفسي بسيط ... ابسط من البسيط كمان
مش بحب الزحمة ولا الصوت العالي ولا اي حاجه غريبه
وبيجيني توتر عصبي لما اسمع اغاني الخبط والرزع بتاعة اليومين دول
بيعجبني اوي كاظم الساهر وهشام الجخ والشيخ ناصر القطامي وابو اسحاق الحويني
ومدمن نزار قباني ومحمود سعد وأحمد حلمي 
ساعات بكتب شعر بس مش بكتبه الا لما بكون حاسه بجد
ومش بكتب الا لمواقف معينه واشخاص معينه.. قبل كدا اخدت كذا جايزة
في مسابقات شعر في الجامعه 
...............................................
ما هى اهم نقطة تحول فى حياتك ؟
فيه نقاط تحول كتير جدا في حياتي
الثانوية العامة كانت نقطة تحول
شغلي كان نقطة تحول
عشان عرفت فيه ناس حقيقين
ناس بعتز جدا بمعرفتهم وفعلا لقيتهم خير اخوة واصحاب
خطوبتي كانت نقطة تحول 
والسبب انا محتفظ بيه لنفسي 

.............................................

كيف دخلت الى عالم التدوين ؟
الحكاية دي غريبه أوي .. بدأت من حوالي 4 سنين كدا
كنت مرة بتفرج علي برنامج البيت بيتك بتاع محمود سعد
وكان مستضيف واحده ست كانت تعرضت لتحرش جنسي في الشارع
والست دي قالت انها عاملة مدونة عشان تدافع عن حقوق الستات اللي زيها
بعدها قررت اني أبحث عن موضوع المدونات دا وقريت كتيرعنها
واتفرجت علي فيديوهات لغاية ما أخدت قرار اني أنشىء المدونة دي
.........................................................

ما اسم مدونتك ولماذا اخترته ؟
 حناني 
اخترت الاسم دا ليه 
هو قصة غريبة شوية
انا لما جيت أعمل المدونة دي كنت فعلا محتار اسميها ايه
طلبت من ناس اعرفها انها تقترح لي اسماء
وملقتش فعلا الاسم اللي بدور عليه
في الوقت دا ممممممممم مش عارف اقول ازاي
كنت بحب حنان ترك جدا بجنون يعني
خاصة كمان لما لبست الحجات حبي ليها زاد اكتر
كنت بشوف فيها صورة البنت اللي ممكن احبها وارتبط بيها
قررت اسمي المدونة حناني علشان تبقي حاجه تشبهها
بس
............................................................
صف مدونتك ؟
مدونتي تحكي عن نفسها اكتر مني
خد بس حضرتك تاكسي من علي اول ناصية كدا
وخدلك كام لفة جواها هتعرف كل حاجه عنها
....................................................
من هم أكثر ثلاث شخصيات أثروا بك من داخل عالم التدوين ؟ ومن خارجه ؟
الشخصيات اللي في حياتي كتير جدا الحمد لله
من داخل عام التدوين فيه شمس النهار وتركيب
واستاذ فاروق وبناته هبه وكارولين وناس تانيه كتير جدا
من خارج التدوين فيه مثلي الاعلي وقدوتي استاذي محمود عيسي
وشخصية مديري في المدرسة وايضا اخويا وصديقي استاذ فتحي
...........................................
ما هو الاسلوب المفضل لديك فى التدوين ؟
والله علي حسب الموضوع نفسه بس انا بفضل
الاسلوب الساخر علشان بيكون أخف علي القارىء 
وعلشان بيخلق جو من المرح يخلي الواحد يكمل الموضوع للاخر
لأننا في عصر السرعه ومعدش حد ليه تقل انه يقعد ويقرأ وكدا
.......................................................
فى رأيك ما أهم ما يميز تدويناتك ؟
أهم ما يميز مدونتي انها انا 
بتتكلم عني في كل حالاتي
وانا فرحان وانا متضايق وانا عاشق
كل حاجه مريت بيها كتبتها هنا 
وكل حاجه بتكسف احكيها لحد بحكيها هنا
انا هنا بلاقي نفسي
..............................................................
اختر اقرب تدويناتك الى نفسك وضع رابطها وحدثنا عنها ؟
ممممممممممم بجد كل تدوينة كتبتها بتكون قريبة لقلبي
علشان لما بكتب اي حاجه مش بكتب الا لما بكون عايز اكتب
عشان كدا بيطلع الكلام مني وبيعبر فعلا عني
بس يمكن في تدوينة أو اتنين انا بحبهم جدا جدا
ولازم اقرأهم كل شوية لما بيوحشوني
وهم بيوحشوني كتير بصراحة
التدوينة الأولي اسمها
والتدوينة الثانية اسمها
..................................
استعرض اهم المواقف الغريبة او الطريفة التى صادفتك مع التدوين ؟
والله كلها بتكون مواقف لذيذه وبستفيد منها
يعني ممكن اقعد ساعات طويلة جدا وانا بدور علي حاجه
جديده اعملها للمدونة او اضيفهالها علشان شكلها يبقي احلي
ومرة عملت حاجه غلط واكتشفت بعد كدا ان كل حاجه في المدونة باظت
وقغدت بقي اعيد تاني كل حاجه من اول جديد
وقولت لنفسي اللي مكلش فيه متلعبش فيه
...............................................
هل أحدث التدوين تأثيرا عليك ؟ وكيف ؟
طبعا علشان بقيت مش بعدي اي موقف يحصلي 
اويحصل قدامي يعدي كدا وخلاص
بقيت بفكر كويس جدا في كل حاجه وفي اي حاجه
واتعلمت من التدوين ان مش اي كلام يتقال
ومش اي حاجه تعجب الناس
ولو مكنش المدون صادق فعلا بينه وبين نفسه
في اي حاجه بيقولها محدش هيحس كلامه
.....................................
اختر اى مدون ووجه له سؤال ؟
سؤالي لكل المدونين 
يمكن هو نصيحة أكتر منه سؤال
ياريت نرجع نقرأ لبعض تاني
ونسأل علي بعض تاني زي الاول 
...........................
تحياتي للجميع 
اتمني من ربنا ان كلامي يكون وصل فعلا 

هناك 28 تعليقًا:

;كارولين فاروق يقول...

يا صباح الحنان الترك :)
انا كمان بحبها وبحب تمثيلها
وقرأت المدونه كلها ولاحظت ان نقطه
التحول الخاصه بالثانويه العامه
مأثر علينا كلنا مش انا بس
اما عن الشغل فكما تفضلت البلد كلها
كده
سعدت جدا بقراءتي وتعرفت علي حضرتك
وسعيده اكتر اني من المذكورين
اشكرك جدا
ربنا يوفقك ويوفق الجميع
تحياتي

شمس النهار يقول...

صباح الفل ياابراهيم

شكرا علي مجاملتك الجميلة

انت من المدونين الشباب اللي بعتز بيهم وافتخر ان بلوجر يجمعني بيهم

وعايزة اقولك انك فعلا بتكتب شعر كويس وانك لازم تداوم علي ده الموهبه لو اهملت بتضيع

:)) بس مش فاهم انت جامع بين الحويني ونزار ازاي
:))

وبضم صوتي لصوتك ان لازم بلوجر يرجع زي الاول
ايام ماكنا نتسابق نقرا لبعض ونعلق ومش اي تعليق تعليق بيدل علي القراءة الجادة للبوست
وترجع المناقشات الساخنة المفيدة اللطيفة

ابتدي بنفسك واحرص انك تكون موجود هنا علي طول ولو بتدوينة كل اسبوع
وتتواجد بالتعليقات عند باقي الاصدقاء

مش عايزين بلوجر يتهجر وفي ناس جميلة زيكم

غير معرف يقول...

احسن مدونة في الشرق الاوسط واعطي لحضرتك جائزة بس الحقيقة معرفش بيدو جوايز ايه بس الجيزة الي بيدوها لاحسن مدون انا اعطيها لحضرتك بالتوفيق ديما ندي

كريمة سندي يقول...

جميل التعرف وأنا كنت بأحب حنان ترك وسافرت مخصوص لمصر عشان أحضر لها مسرحية واتصورت معاها كمان

جميل التعرف عليك عن كثب .. تحياتي

كريمة سندي يقول...

جميل التعرف وأنا كنت بأحب حنان ترك وسافرت مخصوص لمصر عشان أحضر لها مسرحية واتصورت معاها كمان

جميل التعرف عليك عن كثب .. تحياتي

beautiful mind يقول...

كارولين فاروق
وانا اكثر سعادة بمعرفة اسرتكم التدوينية الرائعه
عايزينك بقي تجاوبي عن الاسئلة دي زي استاذه هبه عشان نعرف عنك اكتر
تحياتي ليكي

beautiful mind يقول...

شمس النهار
وانا كمان ليا الفخر يا ماما شموسه
ورايك دايما بيهمني
واحب الاقيه علي كل حاجه بكتبها
بجد انا فاكر من سنه كدا كان معانا ناس كتير وكنا بنقرا بلعض وبنعلق وبنساند بعض
دلوقتي الفيس بوك سرق منا كتير اوي
عايزين نعمل حملة جديدة عشان نرجع بلوجر زي ما كان
تحياتي ليكي

beautiful mind يقول...

ندي
ندي الجميلة تلميذتي الرائعه
خلاص بقي كبرتي وداخله الجامعه السنه دي ان شاء الله ويارب تدخلي الكلية اللي بتحلمي بيها
شكرا جدا علي الجايزة وطالما منك فهي احسن جايزة في الدنيا
يارب كمان اشوف مدونتك قريب اجمل واحلي من حناني وتنافسني كمان

beautiful mind يقول...

كريمة سندي
وانت ايضا من الشخصيات الرائعه في عالم التدوين
وكم يشرفني التعرف عليكم ايضا
وكم اكون مسرورا بتواجدكم عندي وتعليقاتكم
تحياتي ودائما بخير ان شاء الله

رحاب صالح يقول...

مساء البنفسج
والله يا ابراهيم انت اجاباتك كلها جميلة واسلوبك لذيذ
وسؤالك الاخير ده بيدل علي انك شخص صافي القلب
وعجبني علي فكرة مووضع اسم مدونتك وحنان ترك...
اصل انا كمان بحبها اووي هي ومني زكي بس عشان الناس بيقولولي اني شبههم ههههه
بس انا اكتر شبه بمني زكي
اقصد يعني هما اللي شبهي انا احلي طبعا

beautiful mind يقول...

رحاب صالح
مساء الفل والورد والياسمين
هههههههه
اكيد انتي احلي منهم طبعا بكتير
نورتيني ونورتي حناني

عمرو يسرى يقول...

هو البلد كلها بتحب حنان ترك ايه الحكايه
والبلد كلها اتحولت بعد الثانويه
دا مش انا لوحدى بقى
بس فى حاجه غريبه فيك جامع بين حوينى ونزار تيجى ازاى غريبه
تحياتى

هبة فاروق يقول...

انا اتشرفت بمعرفتك أكثر يا استاذ ابراهيم وانت كاتب جميل ومميز واكثر من موضوع شدنى هنا فى مدونه حنانى بالتوفيق وبتمنى زيك اننا نصمد ونستمر فى عالمنا الجميل ونرجع من تانى نقرا لبعض
واخيرا اشكرك لانك ذكرتنى هنا فى مدونتك الرائعه شكرا لك

beautiful mind يقول...

عمرو يسري
والله شرفتني لأول مرة
وان شاء الله متبقاش الاخيره
اه انا كنت بحبها جدا
وحكاية نزار قباني محدش ينكر انه شاعر عملاق وانا باخد منه الشعر الكويس وانا عارف ان ليه شطحات
شرفتني
تحياتي

beautiful mind يقول...

هبه فاروق
والله وانا كمان ليا الشرف اكتر يا استاذه هبه وسعدت جدا بمعرفتكم
ان شاء الله المدونات ترحع تاني احسن من الاول
سلامي للوالد الغالي ويارب يرجع لنا بالسلامة
تحياتي ليكي

amiraali يقول...

يااااه ...
انا بجد بحب مدونتك جدا..ومن اقرب المدونات ليا...الكلام بسيط وطالع من جواك..فبيوصل صح...ربنا يكرمك ويوفقك امييين

beautiful mind يقول...

اميره
ربنا يكرمك يارب
والله كلك ذوق وأدب
يارب تكوني بخير
وخالص تحياتي ليكي

غير معرف يقول...

المدونة دى جميلة فعلا ومعلوماتها شيقة جدًَا . وعارف جمالها فى بساطتها . بس كان نفسى أعرف سر الاسم انا فعلا بحب حنان ترك جدًا . وأخيرًا وليس بأخير أحييك على أسلوبك الرائع فى الكتابة فأنت حقًا متميز ورائع


تحياتى :
إيمان ( مونة )

beautiful mind يقول...

ايمان
انتي الاروع يا صاحبة الاسم الجميل
اسعدني تعليقك للمرة الاولي
شرفتيني
وشكرا علي كلامك الرائع
خالص تحياتي

أمل حمدي يقول...

beautiful mind
سغيدة جدا باجاباتك ابني الغالي
ربنا يبارك في عمرك ويحققلك كل ما تتمنى
واعتذر عن تقصيري وان شاء الله أكون مثلك من المتابعين للتدوين والمدونات
كان تقصيري بسبب الطابع السياسي الغالب على التدوين والذي لا أميل له مطبقا فأنت تعلم كتاباتي بعيدة كل البعد عنها
ابني الطيب
سعدت بك
دمت طيبا سمحا

كلام حسام يقول...

جميل

reemaas يقول...

والله فكرة البوست ده عبقرية الله يصلح حاله صاحبها :D

سعيدة جدا باللى عرفته هنا وان شاء الله اكون متابعه جيدة

غير معرف يقول...

دي اول مره ادخل هنا واقرا الكلام اللي انت كاتبه وعجبني جدا لاني بسيط وبيعبر عن شخصيتك كعادتك هادي ومنظم زي ما اتعودت عليك انا مبسوطه انك بخير يمكن مش تفتكرني حتي بس انا دايما بدعيلك

beautiful mind يقول...

ماما امولة
شرفيني يا امي الغالية
لكم كل العذر
وان شاء الله تكوني بالف خير وهناء
وكم يسعدني أن أقرأ شعركم الجميل
تحياتي لحضوركم

beautiful mind يقول...

حسام صابر
انت الاجمل
تحياتي

beautiful mind يقول...

ريماس
انا اسعد بتعليقك
نورتيني عن جد
تحياتي

beautiful mind يقول...

غير معرف
اولا والله شرفني حضورك هنا للمرة الاولي وان شاء الله لن تكون الاخيره
ثانيا ربنا يباركلك علي وصفك ليا
وواضح ان حضرتك تعرفيني كويس جدا واسأل الله ان يتقبل دعواتك
وكان نفسي اعرف مين حضرتك لكني سأترك لذاكرتي هذا الأمر فالعزيزين علي قلبي لا يمكن لذاكرتي أن تنساهم
تحياتي

غير معرف يقول...

انا بحبكم كلكم واول مره اشارك رجاء منكم ابعدو اضاف لى دلوقت