Pages

الخميس، 2 فبراير 2012

كنت ممكن أكون هناك



قضيت بالأمس أسوأ يوم في حياتي علي الإطلاق
لغاية دلوقتي ماليش نفس لأي حاجه
مش عارف اتكلم مع حد .... ولا أنا مستوعب اللي حصل
شباب زي الورد .. بل هم الورد نفسه
دكتور ومهندس وطلبة جامعة ومعيدين .. مؤهلات عليا
شباب مثقف عارف ازاي يتكلم عن بلده
فجأة وفي نص ساعه بقوا في عداد الموتي
انا كان ممكن أكون معاهم ..... اموت وانا مش عارف بموت ليه
اخرج من بيتي وانا رايح اتفرج علي الناس اللي بحبها 
يرجعوني ملفوف في بطانية لأهلي واقهر قلبهم عليا
للدرجة دي وصلت أدميتنا لكدا
ياتري الناس اللي بقوا يرموا الشباب دول من فوق سور الاستاد
عرفوا يناموا امبارح ... نفسيتهم مرتاحة
هتروجوا من ربنا فييييييييييييييييييييييييين
ياتري لما شوفت الشباب مرمين علي الأرض والدم سايل منهم
عادي كدا .... متحركش فيك أي حاجه
يا بلد معدش فيكي نخوة ..... يا بلد معدش فيكي راجل
يا بلد بتبيعي لحمك ... وبتاجري في دم شبابك
يا شعب النصابين والدجالين والشحاتين والبلطجية والحرامية
هو دا شعبك يا مصر
كله بينصب .. كله بيبلطج ..... كله في الشوارع يا بيسرق يا بيشحت
هي دي ناسك
من شوية ايام قولت اني بفتخر اني مصري
دلوقتي بقول انا بحتقر نفسي اني اعيش فيكي
فيكي ايه يشرف ؟

هناك 16 تعليقًا:

Mr. Degheidy يقول...

يا مستر و الله و مين سامعك. انا كمان كان صعب جدا انام امبارح. مش عارف ليه بيحصل كده و مين ليه مصلحة فى كده. بس كل الللى اعرفه ان فى تقصير امنى و كل امتحان بيعدى عليهم بيبن انهم اضعف و اهون مما كنا نعتقد و ان سياستهم هى الترهيب و خلاص

beautiful mind يقول...

مستر دغيدي
لا يا مستر محمود دول مش ضعفاء
دول خونة
ايديهم كلهم دم
وربنا ان شاء الله هيورينا فيهم العبر
انا لله وانا اليه راجعون

هبة فاروق يقول...

انا شايفه دلوقتى ان مفيش استقرار خالص والوقايه خيرا من العلاج بمعنى ان الواحد يبعد عن اى تجمع لان التجمع اصبج الان مستهدف بشكل ملحوظ
ونحمد الله انك لم تكن معهم
رحم الله شهدائنا وادخلهم جنات النعيم وانا لله وانا اليه راجعون

beautiful mind يقول...

هبه فاروق
كلامك صح ودا اللي بقوله لكل اللي اعرفه
اننا نأجل اي حاجه دلوقتي لما نشوف هيحصل ايه
احنا بنام علي مصايب ونحلم بكوابيس ونصحي نلاقي كوارث
البقاء لله
انا لله وانا اليه راجعون

نيللى على يقول...

حسبي الله ونعم الوكيل, وربنا يرحم شهدائنا يارب

غير معرف يقول...

نص الشعب اصبح ميت فعليا
والباقى لابد ان يعالج نفسيا
اتفاجئوا اننا فاهمين
عايزينا تانى نرجع شباب سيس
وبيقتلوا جوانا كل حلم جميل
بلدنا فى محنة
وبجد محتاجه دعواتنا
مش اننا نكرهها
احنا نقسم على محاربة اى فساد فيها
بس نتخلى عنها
هو ده اللى هم عايزين يوصلونا ليه
بعد الثورة
مصر بلدى
مش بلد المشير
البقاء لله
nour

beautiful mind يقول...

نيلي علي
اللهم امين
ربنا يرحمهم جميعا
انا الله وانا اليه راجعون

beautiful mind يقول...

nour
احنا زهقنا بقي من اننا نقول فيه ناس بتعمل وناس عايزة البلد نخرب
مين الناس دول
ولا هم اللهو الخفي اللي بيقولوا عليه
الحكاية مننا فينا
شعبنا شعب متخلف
اكتر حاجه بيصدقها وبيجري وراها هي الاشاعات
وبكلمة ممكن يسخن لدرجة انه يقتل اخوه
بقي انا لما يقولو في الدنيا كلها ان المصريين موتوا بعض في ماتش كورة
عايزاني افتخر بكدا
انا مازلت مصر علي رأيي
انا لله وانا اليه راجعون

غير معرف يقول...

فعلا الواحد مالوش نفس يعمل حاجة اية اللى بحصل دة بجد انا مش عارفة اصدق مين ولاعارفة مين معانا ومين ضدنا كل الواحد مايقول الوضع هيستقر نلاقى الدنيا ترجع تتقلب من جديد ,والله أول مرة اتمنى ان حياتى تنتهى لحد كدة لانى مش عاوزة اشوف حد من اللى بحبهم فى الموقف دة ,عموما انا لله وانا الية راجعون اكثروا من قول (لا حول ولا قوة الا بالله)فانها تغير الحال.
هويدا

amiraali يقول...

كان زمان اي حد فينا مكانهم...شباب رايحيين يشوفوا حاجه بيحبوها ويتدبحوا ويتقتلوا من غير سبب ومحدش عارف ياخد حقهم...قمه الجبروت ايلي ف الدنيا....المشكله ازاي واحد يجيله قلب يدبح اخوه ...مش مصدقه ايلي حصل لحد دلوقت...صعب اوي اوي ايلي احنا عايشينه دلوقت....يارب ملناش غيرك

غير معرف يقول...

يتم الحشد الآن لعصيان مدني يوم 11 فبراير القادم كرد فعل قوي على ما حدث في استاد بورسعيد
انشر واحشد الناس وأيد الفكرة من خلال مدونتك أو الفايس بوك وكلم اصدقائك

Unknown يقول...

سعيا منها لتطوير النقاش و الاستفادة من المدونين العرب ، مدونة الزمن الجميل تدعوك لإبداء رأيك في موضوع : الشباب العربي بين ما أرادوا له و ما اختاره !

شفـقــة و إحســــان يقول...

بلدنا جميلة بس احنا اللى بنشوهها
احنا بنحبها بس للاسف مش عارفين ازاى نحبها
صحيح اللى حصل مؤلم وكل يوم بيعدى اصعب من اللى قبله بس ان شاء الله كله هيعدى وربنا هينصرنا ويحفظ بلدنا ويحميها

وحي القلم يقول...

دايما بنقول يا نجيب حقهم يا نوت زيهم
وبنموت زيهم بس

غير معرف يقول...

لا اعتقد فعلا ان في كلمة وحدة تعبر عن الحزن الي جوايا انا شفت اسود ايام بمعني الكلمة حسيت اد ايه احنا مظلمين وعشان كام فرد خاين وميستحقش يعيش مات الالاف من يو الثورة مفيش حاجة تتقال غير حسبي الله ونعم الوكيل وربنا يجرنا في مصيبتنا ندي

Tarkieb يقول...

ربنا يرحم الجميع على الاقل ارتاحو