Pages

السبت، 2 يوليو 2011

لعله خير




في غابر الزمان عاش احد الملوك في عز وخير ونعمة

وكله تمام والشعب راضي ولا فيه مظاهرات ولا اعتصامات

ولا حد بيتكلم عن التوريث ولا حد مش عاجبه الحال

ولا حتي حد بيغنيله اختارناك اخترناك

وعمنا الملك الهمام دا كان عنده وزير بس بصراحه كان راجل تمام

وزير مش بيحب الكراسي ولا قاعدتها ولا عاوز يكوش علي كل

حاجه ولا شاغل باله بتغيير وزاري ولا باللي حصل في ماتش الاهلي والزمالك
 
والوزير دا مكنش علي لسانه غير تعليق واحد بس علي اي حاجه بيقوله عليها الملك


كل ما الملك يقوله حاجه يرد الوزير ويقول : لعله خير يا مولاي

وظلت الكلمة دي علي لسانه يرد بيها علي اي قرار او حاجه يكلمه فيها الملك

وفي يوم من الايام قال الملك للوزير انا طالع زيارة كدا لغاية

الاتحاد الاوروبي هروح فرنسا اجيب شوية برفانات واعدي بعدها علي ايطاليا

اجيب كام بدلة من هناك وبعدين هروح المانيا اكشف علي صباع رجلي الصغنون

اصله تاعبني بقاله كام يوم وشكله مش عاجبني خالص

وبالمرة وانا هناك اشوف اخر موديل للمرسيدس اصلي انا زهقت من

الهامر اللي لسه جايبها من شهرين دي

وهنختم الرحله بقي باسبانيا عشان اتفرج علي ماتش الريال والبارسا

نشوف ياعم الكورة اللي بصحيح بدل ماحنا مخنوقين بشوية العيال

بتوعنا اللي فاكرين نفسهم بيلعبوا كورة

ايه رايك تطلع معايا ؟

رد الوزير : ودي فيها كلام اطلع طبعا يا مولاي

واهو حتي ابقي ابعت وانا هناك اجيب شوية بط مسكوفي من روسيا

لام العيال " ولعله خير يعني

وسافر الجماعة للزيارة اللي قالوا عليها

ولما راح يكشف علي صباعه قاله الدكاتره ان احسن حل انهم يقطعوه

علشان دا فيه مرض خطير وممكن ينتشر في جسمه كله

وقطعوا للملك صباعه واتقلبت الرحله غم وقرروا الرجوع لبلدهم

وقعد الملك حزين علي صباعه اللي طار في غمضة عين

ومعدش عارف يلبس الشبب ابو صباع خالص

قاله الوزير : يامولاي انت زعلان عشان صباعك يعني

لعله خير ومتزعلش

قال الملك: ياعم انت خنقتني بالكلمة دي هو انا كل ما اقولك حاجه

تقولي كدا هو انت معندكش غيرها

يا أمن تعالوا خدوا الوزير وروحوا ارموه في سجن طره

هو انا جايبه ينكد عليه انا ناقصه

لما الوزير سمع قرار الملك قال:طره طره وايه يعني اهو حتي هكون جنب

عز وجيمي وخلي بالك ممكن نعمل انقلاب عليك وانت عارف

ان حبايبنا كلهم مشرفين هناك

وبردو مش هقولك غير كلمة واحده لعله خير يامولاي

قال الملك : بردو اللي فيك فيك ولسه بتقولها

طيب يلا يا حبيبي روح شرف مع اخواتك

وتمر الايام والملك لسه في حالة اكتئاب وبعدين ينصحه اصدقاء السوق

انه يروح يرفه عن نفسه في زيمبابوي وقالوله انهم هناك

بيصطادوا اسود ونمور وكدا وعندهم كمان ملاعب اسكواش تمام

ومارس هوايتك بقي القديمة ياريس

وسافر المعلم " و هناك هجمت عليه قبيله من بتوع جيمبا جيمبا

اللي بيعبدوا الفران دول أصلهم كانوا دايخين علي حد يقدموه قربان
 
للإله بتاعهم وجابوا الملك عشان يدبحوه وقلعوه كل هدومه

"طيب انتوا خبيتوا وشكم ليه علي فكره انتم ضميركم وحش"

قلعوه هدومه عادي علشان تقاليدهم بتقول ان القربان لازم يكون سليم ميه في الميه

"ومفيهوش خدش صغنطوط قد كدا " شايفين ايدي "

ولقيوا بقي صاحبنا وصباعه المقطوع وزعلوا اوي

وقرروا يسيبوه وادوله كمان فردة شراب يداري بيها رجليه دي

عشان العيال الصغيره عندهم بيقرفوا اوي من الحاجات دي

ولما أطلقوا سراح الملك مكنش مصدق نفسه

وافتكر بسرعه كلام الوزير وقال فعلا لعله خير

ورجع خرجه من السجن وكافأه كمان

قال الوزير يا مولاي دا احلا حاجه انك دخلتني السجن
 
عشان انا لو كنت معاك كان زماني دلوقتي مشوي

وعمالين ياكلوا فيا عرفت يا مولاي : لعله خير

*******************

وانا بفتكر كلمتك يا وزير لما بيحصل معايا اي حاجه

لما تروح مني حاجه كنت بتمناها

ولما تتاخر حاجه عن معادها

ولما بيضيق الخناق أوي 
 
  ولما يطول الغياب وتنقطع الاسباب

برجع واقول : لعله خير
 

هناك 12 تعليقًا:

Mahmoud Ahmed يقول...

لعله خير !!

قصه حلوه
عارفها من زمان
بس انتي غيرتها خالص :)

كريمة سندي يقول...

والله صغت القصة بأسلوب شيق جدا .. فقد قرأتها من قبل ولكن استمتعت بقرائتها أكثر هكذا

أرق التحايا

AmiroZ يقول...

موضوع جميل .. بس أنا عندي سؤال .. هو إيه مناسبة صورة المسيح مع بيلاطس البنطي مع موضوع التدوينة نفسها؟ إلا إذا ماكنتش تعرف صورتهم!

beautiful mind يقول...

سبايدر مان
اهلا بيك وسهلا لاول زياره
وان شاء الله تكرر
لازم نغير شوية علشان نكسر اي موضوع ممل
تحياتي ليك

beautiful mind يقول...

كريمة سندي
نورتي المدونه كالعادة استاذتي
والحمد لله ان القصه اعجبتك
وايضا مني خالص التحايا

beautiful mind يقول...

amiroz
اهلا بيك لاول مرة وبجد شرفتنا
وانا متشكر جدا علي المعلومة بجد مكنتش اعرف دي صورة مين بس انا حتطها لاني لقيتها مناسبه للموضوع
اهلا بيك مرة تانيه
ولك جزيل الشكر

غير معرف يقول...

ازيك يا مستر
القصة حلوة اوي واسلوبك جميل جدا
ومكنتش اعرف ان عندك موهبة الكتابة الساخره زي الاستاذ احمد رجب
بتمنالك كل خير وياريت ترد علي المسدج اللي عندك في الفيس مستنياه ضروري الموضوع مهم
أمنية

beautiful mind يقول...

امنية
اهلا وسهلا بيكي للمرة الاولي ويارب ما تكون الاخيرة
بلاش مبالغه انا بكتب عادي جدا والاستاذ احمد رجب حاجه كبيرة اوي وانا فين وهو فين
بالنسبة لموضوع الفيس انا معرفش هو ايه بالظبط بس اكيد هشوفه وهرد ان شاء الله
تحياتي

غير معرف يقول...

لعله خير يا مستر ان الواحد عك في امتحان التفاضل ومش تفائل والله بس لعله خير الواحد يجيب مجموع يكسف ولعله خير ان الواحد في الدنيا اساسا نظرية حلوة والله ندي

beautiful mind يقول...

ندي
انتي عارفه انا رأيي ايه في موضوع الامتحانات دا وعارفه كمان انا كلمتك قد ايه ان كل حاجه في ايد ربنا
وايه يعني؟
منا جبت 95% ومدخلتش بيهم حاجه
وغيري جاب 50 % ودخل كليات عالية جدا بفلوسه
مش دي النظريه
المهم انك تقدري تعرفي انتي نفسك عايزة ايه
وارادة ربنا فوق اي اراده تانيه
وان شاء الله لعله خير
وهتعرفي معني الكلمة دي بعدين بجد
وانتي قولتيها في الاخر
كفايه وجودك في الدنيا
وكفايه حب باباكي ومامتك ليكي ودا اللي انا شوفته بعيني وحسيته
يلا خدي بالك من نفسك وسلميلي علي الواد حسن وقوليليه سيبك من الزمالك يابني هو الاهلي وبس
تحياتي ياندي

غير معرف يقول...

شكرا بجد علي كل حاجةبس موضوع الزمالك ده صعب شوية

sony2000 يقول...

هههههههههههههههه
حلو التغيير فالقصه دا

شكرا ليك