بلد بتاعة تكاتك صحيح

من زمان اوي ( مش اوي يعني ) وانا صغير

كانت فيه حكاية مضحكة منتشرة في بلدنا كل واحد

بيحكيها للتاني وهو بيعتبرها انها نادرة من النوادر

لانها كانت غريبة الحدوث في مثل ذاك الوقت بين الناس

الناس اللي كان كل واحد فيهم عارف فين حدوده وفين اخره

ومكنش ابدا حد يتجرأ يعدي الحدود دي اللي كانت كأنها اعراف

وقوانين وتقاليد بين الناس

تعالوا نشوف الحكاية ونشوف الحال اتغير ازاي دلوقتي

اكتر من مليون درجة

القصة وما فيها ان شاب من نواحينا كدا شاف بنت

الله اعلم فين ودخلت دماغه وروح بقي البيت ونام علي ضهره

وقعد يفكر فيها وانها فتاة الاحلام اللي بيدور عليها

البنت دي كانت بتدرس في الجامعة في الوقت اللي كانت

نسبة البنات الجامعيات مش كتير تكاد تكون محدودة جدا

بسبب امكانيات وظروفهم وخوفهم علي خروج البنات لاماكن بعيده

وعيلة البنت كانت عيلة مثقفة ومرموقة اجتماعيا 

اما اخينا فكان تقريبا معاه دبلوم الله اعلم او مكملش تعليمه بس معاه فلوس

عمل ايه بقي علشان ميفكرش كتير ؟ قام بعت الست والدته لبيت البنت

تخطبهاله وراحت الام قعدت مع والد البنت

وقالتله انها عايزة تطلب ايد بنته المصونة لابنها

رد الراجل وسأل السؤال المعتاد : وابنك ياست معاه ايه ؟ او بيشتغل ايه؟

ردت الست وقالت : ابني ياخويا باشمهندس نجار قد الدنيا

وبيتنا اكبر من موقف الاتوبيسات

ضحك الراجل وقالها : ياست انتي جيتي غلط انا معنديش بنات للجواز

وانتهت الحكاية علي كدا بس بقت زي ما قلتلكم حادثة ونادرة يتندر بيها

الناس حتي وقت قريب

ايام ماكان عادل باشا امام بيقول : بلد بتاعة شهادات صحيح

يمكن دلوقتي الحكاية دي بقت ولا حاجة ولو حد سمع عنها الايام دي

هيقول طب وايه يعني ايه الغريب في كدا؟

ايام ما حصلت القصة دي كان الشرط بتاع التوافق العلمي والمادي

شرط اساسي للجواز واستحالة تعرف ان فيه بنت متعلمة حتي لو تعليم متوسط

تتجوز واحد اقل منها ابدا

عارفين ليه ؟

علشان الناس كان عندهم عزة نفس .. كانت بناتهم مش للبيع

مهما كان الشخص او عيلته او فلوسه

الايام دي بقت حاجه تقرف

الناس مش عارف حصل ايه فيها وفي عقليتها

المادة سيطرت علي كل حاجه

وبقي عادي جدا تسمع ان واحدة متعلمة دكتورة. مهندسة. مدرسة

اي حاجه تتجوز واحد مبيعرفش يفك الخط اساسا

الله يرحم ايام زمان

شوفوا دلوقتي نسبة التفكك الاسري والخيانات الزوجية بقت قد ايه؟

شوفوا نسبة الطلاق وصلت بينا لفين؟

لما بتاع التوكتوك بقي يتجوز المهندسه

وابن الجزار يتجوز الصيدلانيه علشان يفتحلها صيديله بفلوسه

ويقعدها في البيت ويقعد هو في الصيديله

وهي تبقي مرات المعلم وهو يبقي الدكتور

علي رأي الجربوع اللي بيقول:

راحت عليكي يادنيا وراح زمن الشهادات

***********

في التدوينة القادمة ان شاء الله

حصريا ولاول مرة علي اي مدونة او موقع

او منتدي اوحتي قناة تلفزيونية

سأقوم بنشر قسم الولاء الجديد

لرئيس الجمهورية القادم

انتظرونا