Pages

الاثنين، 17 مايو 2010

ورقة من دفتر بحار




دعا شاه بندر البحار العيال والاتباع
وحدد في رسالته الهدف من الاجتماع
وبسرعه جاله البحارين من كل مكان
وما تخلف منهم غير المسافر او العيان
وقعد الجميع ساكتين زي الاموات
لما دخل عليهم كبيرهم يا بهوات
قال الكبير انا جمعتكم اليوم في حاجه مهمه
امور عظيمة ومشاكل بتتحدي الأمة
هنصحكم يا عيال نصيحة لوجه الله
واللي هيطنش كلامي يا سواد ليلاه
احنا مالناش في حاجه اسمها سياسه
لا انتخابات ولا دعاية ولا دخول في امور حساسه
اوعوا تسمعوا لأي بياع كلام
عايز يجر رجليكم معاه والسلام
وكلامي ليكم سيف ع الرقاب
عشان اخلص ذمتي منكم يا أحباب
نقطه تانيه عايز اقولكم عليها
اوعوا تنظموا اي مسيرة أو تمشوا فيها
وكل واحد يصون لسانه وكلامه
لأحسن يجيله اللي يطير من عينه منامه
القراصنه مستنيين لينا اي غلطه
وساعتها كلنا هنقع في اكبر ورطه
وبما انكم ولاد بلد وجدعان
وحقكم علينا نراعيكم بالإمكان
يا اولادي انا وفرتلكم احسن علاج
لكل بحار مش لاقي او محتاج
بس انتوا روحوا وجربوا في الاسبتاليات
هتلاقوا احسن عناية واشيك الخدمات
جبنالكم (حكما ) في كل الاقسام
رمد , باطنه , عصبي او حتي عظام
اوامري ليهم كانت صريحه
يعملوا معاكم الواجب بنفسية مريحة
يعني المريض منكم يعتبر نفسه ضيفي
هيتعاج وهو في بطنه بطيخه صيفي
......
وبما اني واحد من صغار البحارين
اللي مغلوبين علي امرهم ومتبهدلين
كنت حاسس بشوية الم في الفقرات
ورجلي الشمال فيها وجع يا حضرات
ورغم اني عارف ان كلامه كله تهجيس
ونوع من المبالغه والتهييس
قلت اجرب ومش هخسر حاجه 

وبلاش احكم ع الامور بتلقائية وسذاجه
ودخلت علي كبير ( حكما ) العظام
كان راجل مظبوط وشكله تمام
حاطط علي كتفه نسر ونجمايه
وقالي بتشتكي من ايه يا ضنايه
قلت الم في ضهري فظيع
ورجلي الشمال بقي حالها مريع
قالي وايه كمان يا شطور
قلت له بس كدا يا دوك طور
قالي تاخد علاجنا الخرافي
لغاية ما تبقي حلو ومتعافي
شريط من الابيض وشريط احمر كذلك
مع بعض دايما زي الاهلي والزمالك
وهو هو نفس العلاج يا جدعان
اللي بياخده مريض الرمد والباطنه والاسنان
طلعت من عنده وانا مصدوم
بقي هي دي العناية اللي  قالها كبير القوم
واستهونت بحالتي لما افتكرت في الحال
حكاية زمايلي عبدالله ومصطفي وجمال
.....
عبدالله: شعر بتعب شديد اسفل البطن توجه الي المستشفي
وتبين انه مصاب بفتق اربي ايسر
وقالوله فوت علينا كمان 3 شهور نشوف هنعملك ايه
( يعني روح موت احسن )

مصطفي : اصيب بكسر مضاعف في ذراعه الايسر
وبعد تجبيسه بطريقة خاطئة نتج عنها عاهة مستدية علي اثرها
لن يستطيع ان يمارس اي عمل بطريقة طبيعيه
( يعني ياخدوه لحم ويرموه عضم)

جمال : يعاني من ضعف شديد بقرنية العين
وبعد عدة عمليات جراحية فاشلة لم يستطع استراد بصره
والحاله تتدهور يوما يعد يوم
وما بين المماطلات يعاني الامرين للحصول علي حزء من حقوقه

هناك 16 تعليقًا:

غير معرف يقول...

لا جديد تحت المستشفيات

ده حال المستشفيات الحكومي والبلد كلها

ربنا يشفي الجميع

تحياتي

غير معرف يقول...

ربنا يشفى الجميع

سردك للقصه غايه فى الجمال والفكره جيده

حالات كتير بنشوفها كل يوم وفى أى مكان بتدخل المستشفيات سليمه بتطلع ياولداه

مع الاسف الموضوع بقا عمليه تجاريه بحته لكتير من الدكاتره والمستشفيات

الدك طور ......حلوه

دامت كلمات

كل التقدير والاحتراام
الحب الجميل

غير معرف يقول...

اه نسيت

أسمحلى باضافة مدونتك عندى للمتابعه

وشكرا

دمت بخير

د. ياسر عمر عبد الفتاح يقول...

يااااااااه
ربنا يعافيهم كلهم ويشفيهم

بس أنا أعرف إن الطب في القوات المسلحة اتقدم جداً
وفيه مستشفيات كثيرة متطورة جداً تابعة للجيش

دودي فلسطين يقول...

الاخطاء الطبيه
هي ممكن تكون على الناس الغلابه اكتر
يعني فيران تجارب

ربنا يسترنا احنا شباب
طب لما نصير ختياريه شو الحل

بكره المستشفيات


وتحياتي لك
الكلام حلو ومنطقى

Tarkieb يقول...

شهبندر البحار ح يغرقنا يامعلم ..دا بيتكلم من يأسه..مش كفاية المركب بتغرق كمان الشهبندر بيهجس ههههههههههه..ما تصدقهوش دا من حرقته اكيد..بس لعلمك مش الطب اللي بس اللي تدهور والله كل حاجة اتدهورت التعليم والعلم .ازاي مفيش تعليم كويس ولا علم كويس ولا فلوس وعايز طب كويس .... اسلوبك رهيب وجميل اوووي وربنا يبعد عنك المرض ...

دعاء العطار يقول...

االاهمال بقى صفه اساسيه متاصله فى المؤسسات الحكوميه وفى الشوارع وفى كل حته

الناس بقت تتعامل مع كل حاجه بلامبالاه متناهيه

عشان كده ماتستغربش من اللى بيحصل ده

ده بقى العااااااااااااااااادى

ربنا يرحمنا

اسلوبك حلو اوى فى كتابة التوبيك

رحلتنا في الحياة يقول...

لا حول ولا قوة الا بالله
الاهمال فى كل مكان مش فى المستشفيات بس
لكن للاسف اللى المفروض المكان اللى انسان يبقى مطمن فيه على نفسه وانه هيلاقى رعاية واهتمام يلاقى العكس
هى دى مصر ومش عارفين هتوصل لفين تانى :((

beautiful mind يقول...

فتاه من الصعيد
يارب يامروة
وعلي فكره دا مش مستشفي حكومي ولا حاجه
ربنا يشفينا جميعا
تحياتي

beautiful mind يقول...

الحب الجميل
متشكر جدا علي كلامك
ربنا يشفي جميع مرضي المسلمين
تحياتي

beautiful mind يقول...

الحب الجميل
طبعا طبعا
انا يكون ليا الشرف
اضافتك هتزيد مدونتي شرف
تحياتي

beautiful mind يقول...

د ياسر
ايه يادكتور
مين ياعم جاب سيرة القوات المسلحه
هههههه
شكلك عايز تلبسنا الاحمر
حرام عليك
ربنا يستر

beautiful mind يقول...

دودي فلسطين
دي مش اخطاء طبية
دا نظام اسمه ريح الزبون
وريح نفسك انت كمان
طيب وتشتغل بضمير ليه طالما المرتب شغال وكمان بيزيد
هههههههه
ربنا يشفي كل مريض
وتحياتي ليكي

beautiful mind يقول...

تركيب
تعرف والله عندهم امكانيات رهيبه
بس الله اعلم بعملوا بيها ايه
جرب بس تنزل واحده من الاسبتاليات دي
دا اذا عرفت تدخلها اصلا ههههههه
وانت تشوف العجب العجاب
واحد راح وكانت عنيه وارمه كدا وبايظه خالص
قالوله مفيش دكاتره
تعالي الاسبوع الجاي
هههههههه
حاجه تمرض
صح
تحياتي

beautiful mind يقول...

دعاء العطار
ميرسي اوي يا دودي
انا ماليش تعليق علي كلامك
لانك فسرتي كل حاجه صح فعلا
هو اهمال
ربنا يستر
تحياتي

beautiful mind يقول...

ايوشه
هنوصل كاس العالم طبعا
ههههههه
احنا نهتم بالرقصات
الممثلين
لاعيبة الكورة
لكن باقي الشعب
يولع بجاز
ولا حتي دا الجاز غلا اليومين دول
اقولك حاجه
يحطوه مع قش الرز
ويولعو فيه
اهو حتي يبقوا ضربو 50 مليون عصفور بحجر واحد
تحياتي