Pages

الخميس، 6 مايو، 2010

لما يموت سيد الناس




الراجل كان كويس جدا والشعب كان عايش زي ما هو
الله اعلم كانوا بيحبوه ولا الموضوع عندهم كان عادي مش هتفرق
والائمة بيدعوله بالصحة وطولة العمر كل خطبة جمعه
وبين يوم وليله
يتبدل كل شىء ودوام الحال من المحال
وجلالته اسنانه توجعه
وبسرعه البرق يتحول القصر كله لحاجه تشبه خلية النحل
ليه لأ وجلالته اسنانه تعبته
وبمنتهي السرية والسرعه يجي لمصر امهر الاطباء علي مستوي العالم
علشان مكنش فيه طيارات هتسعفه انه يروح المانيا يتعالج
الراجل كان عدي ال 70 وصحته بقت علي قده بردوا
ويقرر الاطباء انهم لازم يخلعوله اسنانه كلها
علشان جلالته عنده ورم تعفني في اللثه ولازم يتطهر
وبالفعل بدأوا يقلعوا اسنانه لغاية اخر سنتين ملكيتين في فم عظمته
لما خلعوهم بدأ ينزف بشده من فمه وانفه ومحدش عارف يوقف النزيف
واعلنت حالة الطوارىء في القصر الملكي
والناس بره حاسه ان فيه حاجه بتحصل 
اي هي ؟ الله وحده اعلم
اخواننا الدكاتره شغالين بايديهم وسنانهم علشان النزيف يقف
وفعلا نجحوا انهم يوقفوه وبدأوا مرحلة جديده من العلاج
وهي تطهير الجروح وعلاج التعفن اللي اصاب اللثه
وبدأ فخامته يحس بتحسن شوية ونجح انه يقدر يقعد علي سريره
ويتعامل مع الناس اللي معاه في الاوضه ولو عن طريق الاشاره
وطلعت الاهرام تطمن الناس علي صحة ولي نعمتهم
وانه كان عنده شوية تعب صغنطيتن في اسنان عظمته وخلاص
بقي كل شىء تمام بس طالبين دعواتكم ان ربنا ياخد بايده
قعد الراجل ساعات كويس والدكاتره يشرحوله الاستراتيجية الجايه 
للعلاج وانه لازم يجمد كدا ويتحمل علشان نعدي المرحله دي علي خير
ويساله واحد من الدكاتره الطليان :
Signore
Qual è il tuo desiderio  
ويجاوب بحاجه غريبه اوي
انا مش عايز اموت
ويسمك يايده جواب كان باعتهوله ابنه الامير اللي
بيدرس في بلاد الفرنج وكان عمره مكملش لسه 16 سنه
ولما بدأ يقرا جواب ابنه فجأة يسقط الجواب من ايده
وتتصلب ايديه وتنقطع انفاسه
يجري البروفيسورات عليه لكن قضاء ربنا ينفذ
ويموت جلالته
ويخرج كبير الجراحين ليعلن الخبر لرئيس الوزراء
اللي كان حضر هو واخوته الوزراء للاطمئنان علي صحة ولي نعمتهم
والكل يبدأ في البكاء والعويل والصراخ
ومحدش مصدق حاجه
علشان كل الناس كانت فاكره ان الحاكم واخد حق الخلود
وان حياته بقت من الثوابت 
ومينفعش انه يموت
وينقلب القصر وتقعد الاجتماعات وهنعمل ايه يا رجاله؟
الواد اللي هيمسك بعد ابوه لسه بره مصر 
احنا نبعت نجيبه في التو واللحظه
وتطلع الاهرام يوم 1863/4/22
وتكتب 
مات الملك ... ليحيا الملك
والملك الاول هو  فؤاد باشا
والتاني هو ابنه الملك فاروق
وتعم الاحزان البلاد
وتغلق الدكاكين والمحلات وتتشح المدن بالسواد
والاذاعه الحكوميه تقرر وقف البث بتاعها لمدة يومين لغاية ما يندفن الفقيد
والاعلام اتنكست
والناس تعيط في الشوارع هم مش عارفين ليه
بس اهو اصلهم زي انا ما قولت قبل كدا مش بتهون عليهم العشره
والراجل حكمهم 19 سنه مش قليل بردو يا جدعان
     **************
وقعت تحت ايدي صفحة جورنال صفراء 
مش صفراء يعني قليلة الادب والعياذ بالله
لا
لكن عتي عليها الدهر لانها كانت مرميه بقالها يجي 6 سنوات
وقريت فيها مقال للدكتور يونان لبيب رزق
واللي  كانت مقال عن القصة اللي انا حكيتها فوق دي
ويومها كنت لسه شايف سيد الناس في التليفزيون يوم عيد تحريم سينا
وساعتها قولت سبحان الله ما دايم الا وجهه
هو ايه اللي حصللك يا ولداه انا مش شايف غير هيكل واقف
ولا عارف يتكلم ولا عارف ياخد نفسه
وقارنت بين المقال وبين الحال
ايه هايحصل لما يموت سيد الناس؟
اكيد
مش هنلاقي حاجه في اي قناة او اذاعة مصرية او صديقه
الا ومشغله قران وادعيه وصلوت وشوية والتليفزيون هيطلعله دقن
ويقصر ثيابه من التقوي اللي ربنا نزلها عليه فجاتن
والمذيعات الفاتنات هيلبسوا اسود وهيطلعوا يعيطوا 
وهايجي راجل اعلامي كبير ويخرج في التليفزيون
ويقول بصوت خاشع وباكي ومنهمر في العياط
( لقد فقدت مصر رجلا ولا كل الرجال..... الخ )
انا متصور كمان الحاجه الادهي
النااااااااااااس
اللي هتملا الشوراع علشان تولول
وتقول بعلوا الصوت الحياني
بالروح
بالدم
نفديك
يا جيمي
  ***********
ياريت كلنا نتخيل ايه هايحصل وقتها
وكل واحد يقول
ايه هايجري في بلدنا
لما يموت سيد الناس

         

هناك 18 تعليقًا:

فتاه من الصعيد يقول...

بدأنا نخرف بقا ....هو في زعيم بيموت :D

استغفر ربنا كده..واتفل على شمالك ..واشرب بقين ميه :))

تحياتي

beautiful mind يقول...

ههههههههه
ماشي يا مروة
علي اساس اني حلمت بكابوس
تحياتي ليكي

أع ـقل مـ ج ـنـونــة يقول...

امممممممممممم
اممممممممممممممممممم
اممممممممممممممممممممممممممممم

ايه بفكر عندك مانع ؟؟ :P

اولا سردك للقصة جامد بجد وعيشني فيها جامد ^_^

ثانيا .. هاقولك توقعاتي

انا متفقة معاك فاللي هايحصل ف الاعلام والقنوات وكدا

والناس هتملا الشوارع وتعيط وتبكي وتقول اهو برده كان مهنينا !!

بس انا مش عارفة ليه متوقعة مصر للاسوء في الاحوال الداخلية !

سواء مسك جيمي الحكم ولا البرادعي ولا غيره !

حاسة بسواد :D

سواد جاي من بعيييييييييييييييييييد

:D :D

انا متفائلة جدا .. هاه !؟ O_o

انا ماشية احسن :D

سلام :P

هي وظروفها يقول...

خيالي عارف وشايف وتافف علي اللي هيحصل

في منت هتلاقي الرجاله المنتفعه

تؤيد وتبايع ولا تمانع السيد الرئيس

جمال كارتر

مبايعه ابديه لا نهائيه غير منتهيه الصلاحيه

واللي مات هيتشد عليه السفون بعد اربع خمس تيام
وسيجري التوريث علي قدم وساق
وسيبرز الفاسدين والفساق
وهتبقي هيصه

اوصيهملك علي ترنج من القنطره؟؟؟؟

ستيتة حسب الله الحمش يقول...

والله مش عارفة بعد المعمر ما يتبع سنن الأولين ايه اللي ممكن يحصل في البلد
لأن ببساطة اللي ها يحصل مش ها يكون بإيدينا ولا بعقولنا
دي خوطط قومية عليا خارجية بحتة

بجول لك اييييييه يا ولد العم
معلش علشان خاطري بلاش سياسة الكام شهر دول
معلش اسمع مني ومترميش البحر
دي هانت ومينفعش خالص وانا عارفة

ربنا يكرمك يا هيما وتخلص

Tarkieb يقول...

ساعات بقول ربنا يديله الصحة عشان ابنه ما يحكمنا ...

شذا الروح يقول...

ازيك يا ابراهيم


ما كنتش حباك تتكلم عن حاجه زى دى

الاعمار بيد الله
انا معاك بكلامك بس مش هتكلم غير هقول يارب

دعاء العطار يقول...

هو لوووو جيمى مسك الحكم

ففعلاً الناس هتولووووول وبالقوى كمان

مش عشان زعلانين على الرئيس

عشان عارفين ان الجاى اسوووووووود واضل سبيلا

لكن لو حد تانى هو اللى مسك

فالتاريخ بيقول ان اى حاكم _ حتى لو كان كويس نوعا ما _ بيبقى ابن ستين فى سبعين

فحتى المؤيدين هتلاقيهم اتقلبوا راسا على عقب لتايد الرئيس الحالى

معاهم معاهم عليهم عليهم

ده اغلب الظن يعنى

تسسسسلم ايدك

وماتخافش الحلاوه هتجيلك لغاية عندك

هههههههههه

ريمان يقول...

هههههههههههههههههههه


ليه بس كده

انت هتقر ع الراجل ولا اييييييييييييه

هو لحق يقعد ع الكرسى وياخد راحته؟

لا لا مينفعش كده ربنا يعطيه الصحه

يا عم قول كلام غير ده

beautiful mind يقول...

اعقل مجنونه
بعد ما فكرتي واتكلمتي
طلع كلامك امر من الحقيقه
فعلا اذا كانت الحياه سوداء
فاللي جاي اسود
انا ابتديت اخاف ولا ايه
ربنا يستر
تحياتي

beautiful mind يقول...

هي وظروفها
ماشي ياعم وليد
ربنا يستر
ولغاية ما يحصل اللي يحصل
انا هبطل كلام في السياسة
انا مالي ياعم
تحياتي يا مان

beautiful mind يقول...

د ستيته
حاضر ياستي
هو مش انتي اللي جمدتي قلبي وخليتيني اتكلم في الغلط دا
يا وقعتي ياني
انا جر رجلي للسكة دي
انا لازم اغير كل بياناتي عشان محدش يعرف يوصلي
استر يارب
تحياتي

beautiful mind يقول...

تركيب
يارب ياخويا يارب
ويطول عمره
عشان منروحش كلنا في حديد
حمدلله ع السلامه
ويارب تكون بخير وبصحة
تحياتي

beautiful mind يقول...

شذا الروح
حرمت والله خلاص اتكلم في الحاجات البطاله دي
هو العمر بعزقة يا جدعان ولا ايه
ربنا يعديلنا الكام يوم علي خير
تحياتي

beautiful mind يقول...

دعاء العطار
ممممممم
حلاوة
ماشي
اهي تتاكل عن الفول بردو
ربنا يستر
ويطول في عمره
ويديله علي قد نيته قادر يا كريم
ابقي اسالي عني والنبي

beautiful mind يقول...

ريمان
لا يا ريمو يقعد براحته
ويجيب ولاده يقعدوا كمان
احنا ناس كرماااااااااء
مش بنكسف حد
يلا
ربنا يخرجنا منها علي خير
تحياتي

مش مهم مين يقول...

حرام عليك ياهيما فى حد يتمنى موت باباه دا بابا مبارك ياهيما
والله احنا من غيره هنضيع بجد

دندنة قيثارة الوجد يقول...

دردشة حلوووة

بس الكابوس راح نصحا منه قريب إن شاء الله