Pages

الخميس، 25 مارس 2010

الناس في بلدنا




-->
* الناس في بلدنا طيبين اوي
لما تبص في وشوشهم هتعرف الطيبه دي
والاحساس دا صعب تلاقيه في أي شعب في
الدنيا الا في حد شاف اللي هم شافوه طول سنين
عمرهم ال 7000
من طيبتهم ممكن أي حاجه ولو بسيطه اوي تفرحهم
حتي لو فازوا في ماتش كورة يخرجوا للشوراع ويرفعوا الاعلام
ساعتها بينسوا الاسعار والسكن والشغل والجواز وكل حاجه تعكنن عليهم

* جدعان اوي تلاقيهم واقفين جنب بعض في
وقت الشدة والازمات ويقولوا لبعض : معلش شدة وتزول
وفي نفس الوقت حياتهم كلها ازمات وشدائد أكتر من اللي بيقولوله

* متناقضين اوي , يعني ممكن الواحد فيهم يعمل خمسين حاجه
ضد بعض في وقت واحد . يشتم في امريكا ويلعنها
وتلاقيه مستعد يدفع عمره وعمر اللي
حواليه عشان يسافر لها
مش لاقي تمن السجاير اللي بيشربها
وتلاقيه لابس ومتجنتل ويقولك : اصرف
ما في الجيب يأتيك ما في الغيب


فهلويين اوي ، لدرجة انهم عبوا الشمس في قزايز ،
ودهنوا الهوا دوكو
وتلاقي الواحد فيهم بيفهم في كل حاجه في الدنيا 
وممكن يكلمك عن أي حاجه
لانهم شعب ما بيعرفش حاجه اسمها تخصص ابدا ،
يعني يحكيلك عن الفمتوثانيه وازاي زويل اخترعها 
وفي نفس الوقت لو سالته انت بتشتغل ايه؟ يقولك:
علي باب الله يابيه
انا معايا دبلون DABLONبس بشتغل نقاش وسباك
وببلط سيراميك وعندي محل نوبايل NOBILE   بقعد فيه بليل
حتي لما حاجه تبوظ عندهم بيرفضوا انهم يصلحوها من اول مرة
تلاقي المعلم بقي باشمهندز
واشتغل بالمفكات في الجهاز لغاية ما يجيب اجله
ولما الحاجه تخرب خالص يقول:
ادي العيش لخبازه ولو أكل نصه

* متدينين أوي ، بص كدا عليهم في رمضان
وقد إيه الشوارع والجوامع بتبقي ماليانه ناس رايحه تصلي 
حتي البنات بردوا بيخرجوا يصلوا مع انها ممكن تكون لابسه
بنطلون وبدجي BADJY وفوقهم طرحه اسبانش
بس تقولك : اهم حاجه القلب
النضجيف NEDJEF وربك رب قلوب
حتي لما بيرجعوا من الحج او العمره البيوت تتدهن والشوارع تتزوق
ومع ان احنا اغلي بلد علي مستوي العالم في تكاليف الحج
الا انهم مش بتفرق معاهم
وبيفضلوا يحوشوا طول عمرهم عشان زيارة البيت الكريم
ودا اللي خلا الحاجه فوفا كل سنه لازم تروح تحج وتغسل نفسها كويس
علشان تبدأ السنه الجديده علي نضافه

* نصابين اوي ، وسيرتهم في النصب بقت علي كل لسان دول حتي نصبوا
ع البنوك وأخدوا فلوسها وخلعوا
ونصبوا علي الغلابه اللي كل واحد فيهم باع
حتة الارض اللي حيلته والغويشتين بتوع مراته
واخدوهم في مراكب صيد
وقعدوا يلفوا بيهم حوالين نفسهم في البحر
3 تشيام   TSHEAM وفي الاخر خرجوهم عند رشيد
ويقولوهم يلا يا رجاله وصلنا ايطاليا
Ci congratuliamo con lei per la sicurezza di accesso
 * فشارين اوي , ودي حاجه في طبعهم ويقولولك : بلدنا ام الدنيا وام العروبه
وكبيرة الاخوات ولازم ياخدوا رايها في أي حاجه
وهي حامية الحمي وراعية البلاد والعباد
ومستحيل حد يدوسلها علي طرف والدنيا كلها بتحبها وبتموت فيها
والست شادية تقول : ياحبيبتي يا مصر يا مصر
وودجيع WADJE3 يقول : اذا مصر قالت نعم ايدوها
وفي نفس ذات الوقت بياخدوا صفر في المونديال
لان محدش يعرف مين مصر دي  ،
والعيال بتوع الجيريا ALGEREA  ينقحوهم علقة محترمه
والعالم كله اللي مصر تبقي امه ينسي حنان الام 
ويطلع واد ابن حرام ويقول ان مصر امه هي
 اللي غلطانه وقليلة الادب وتستاهل كل اللي يجرالها

* عشريين اوي , حتي بيقولوا ان العشره متهونش الا علي ولاد الحرام
عشان كدا تلاقي ناس كابسه علي نفسهم 
من سنين طويله حتي من قبل انا ما اتولد 
وراضين بيهم وبيقولوا : برضه اللي تعرفه احسن من اللي ماتعرفوش
هم دول اهل بلدي
بدون مبالغه
وبدون تعصب


هناك 10 تعليقات:

ستيتة يقول...

اسمح لي اغتت عليك واصقف بإيديا الأتنين
الوصف التفصيلي الحقيقي لكم الشيزوفرينيا المصرية

ونسيت تقول اننا ممكن نتخنق من حاكم 30 سنة ونعيط عليه لما يدخل المشتشهم
ونبعث له اسمى ايات الحب والعرفان مش عارفة بإيه اول ما يجيب عيل
واحنا الشعب اللي نقعد نشتم في فاسد 20 سنة واول ما يموت نلاقي له حسنات وفتكات ومعزات من حيث لا يحتسب هو سخصيا

حلو بجد
ولا عزاء للشيزوفرينيا

beautiful mind يقول...

د ستيته
منوره الدنيا والله
ومش هتكلم عن اللي قولتيه
هههههههه
عشان بجد حضرتك حرقتي البوست الجاي
هههههههه
تحياتي يادكتور

sweet angel يقول...

visiting your blog

ريمان يقول...

هههههههههههههههههه

معاك حق والله

خصوصا موضوع التناقض ده


بس نسيت تقول انهم نمامين اوى

ولكاكين اووووووووى

بجد والله دى اهم حاجه

ربنا يخليك يا رب ويصلح حال البلد دى ويصلح ناسها ويصلح حالنا معاهم


تحياتى ليك

دعاء العطار يقول...

وصف رائع للشعب المصرى

فعلا بدون اى تحيز او تعصب

"وتلاقي الواحد فيهم بيفهم في كل حاجه في الدنيا
وممكن يكلمك عن أي حاجه "

لاء ولو جيت تساله ع حاجه معندهمش فى قاموسهم كلمه مااعرفشش

لازم يجتهد ويجيب كلمه من هنا وهنا عشان مايطلعش قدامك انه مش عارف

وممكن لو بتساله عن مكان معين احتمال يتوهك لكن انه يتوهك اسها عنده من انه يقولك ماااعرفش !!

بوست مميز اووى

beautiful mind يقول...

sweet angel
واضح ان تعليقلك موصلش كامل
معلش
انا هستني تزويني تاني
وتكتبي تعليق علي الموضوع
تحياتي

beautiful mind يقول...

ريمان
ممممممممممم
اكيد في ناس كتير عندهم الصفات دي
بس علشان ميبقاش موضوع تعميم
تحياتي علي ردك الجميل
وان شاء الله علي طول منورة الدنيا
وربنا يتقبل دعواتك

beautiful mind يقول...

دعاء العطار
هههههههههه
والله فعلا عندك حق
انا نسيت اقول دي كمان
تعرفي انها حصلت مع واحد صاحبي كان نازل القاهره علشان حاجه معينه وفضل يسال عن المكان والناس تتوهه
علشان فعلا معندهمش حاجه اسمها معرفش
تحياتي يا دعاء

мαησηα يقول...

ههههههههههه والله بجد كفيت ووفيت

ماسبتش حاجة بصراحة الواحد

يتكلم فيها عن نفسه

بما انى مصرية هههههههههههه

تسلم الايادى وبجد اسلوبك عجبنى اوى

ربنا يكرمك ويوفقك واشوفك

من كتاب مصر ام الدنيا

الكباااااااار

قول اميييييييين

غير معرف يقول...

ازيك ياابراهيم
زعلانة منك لاسلام ولاكلام
ولاحتى سؤال بس سماح
تقول ايه ماأنا من المصريين المتسامحين
الطيبين اللى مش بيزعلوا من ولادهم لما
مايسألوش عليهم شفت بقى
تحياتى