Pages

الاثنين، 29 يونيو، 2009

شخصيات في حياتي

كل واحد فينا اكيد له حياته اللي بيحبها




وبيحب يعيشها زي ماهي بحلوها .. ومرها




وحياة كل واحد منا مليانه بالشخصيات اللي بنعتبرها مثال اعلي لينا




كل واحد حسب ميوله واهتماماته ونوعية شخصيته



حياتي زي اي حد



عندي شخصيات كتير اتاثرت بيها وباعمالها

انا حبيت بس اعرضها النهارده واكتب نبذه عن كل شخصية منها



يمكن من خلالها تقدروا تعرفوني اكتر



طبعا اكيد مش دي كل الشخصيات اللي عندي



لكن دول اهم ناس فيها وطبعا بردو مش كل الشخصيات دي هتنال استحسانكم



لاني زي ما قلت هي مسالة ميول واتجاهات


نبدا بقي




الشيخ يوسف القرضاوي



انا بعتبره اعلم رجل في هذا الزمن




انا عارف ان فيه ناس كتير بينتقدوه




لكن نفس الناس دول هم بردو اللي بيقفوا عاجزين عن النطق




لما بيكتشفوا ان الشيخ كان علي حق




انا بدات اقرأ له من ايام الثانوي وبصراحه كان منهجه من اكثر المناهج اللي ارتاح لها قلبي




الشيخ يوسف مثال لامام الفكر المعتدل صاحب الراي الوسطي




لاهو بالمتطرف ولا هو بالمتسيب




جزاك الله عنا وعن الاسلام خير الجزاء




وانت دائما في قلبي




فكلما ذكر اهل العلم اجدك دائما في الطليعه






الشهيد سيد قطب ( عليه رحمة الله )




لو لسه معرفتش حاجه عنه يبقي بالتاكيد فاتك كتير جدا




فاتك انك تتعرف علي اكثر شخصية اثرت في وجدان وعقل عدد كبير جدا




من ابناء الامه كلها مشرقها ومغربها




الشهيد سيد قطب اللي ضحي بحياته من اجل كلمة واحده قالها قبل ما ينفذ فيه حكم الاعدام




ايام الطاغيه الاكبر




لما جابوا واحد من مشايخ الكراسي علشان يلقنه الشهادتين قبل ما يستشهد




تخيلوا ماذا قال سيد قطب



قال: يا هذا انت تعيش حياتك عالة علي لا اله الا الله وتكسب بها قوتك




وانا الان انهي حياتي من اجلها



الشيخ سيد قطب اثر فيا لما قرأت قصة حياته



ولما قرأت الظلال ومعالم في الطريق



رحمك الله يا شهيد






عمرو خالد






لقبوه بالداعيه المودرن




وقالوا كمان مفتي الفتيات والفنانات




وقالوا وقالوا وقالوا




لكن اللي بيقول غير اللي بيعيش




والي بيسمع غير للي بيشوف




وانا شوفت وسمعت وعيشت حياتي معاه




خلاني اتغيرت في كل حاجه




كل سؤال محيرني كانت اجابته عند عمرو خالد




اعترف اني بدين بالفضل له بعد المولي سبحانه وتعالي انه خلاني علي حالي دا




واللي الحمد لله انا راضي عنه




يكفيك يا استاذ عمرو ( باسمك نحيا )




يكفيك ( الجنه في بيوتنا )




يكفيك ( علي خطي الحبيب ) و ( صناع الحياه )




يكفيك كل البنات اللي لبسوا الحجاب علي اديك وكل الشباب اللي انت نورت حياتهم




بالقرب من ربنا




يكفيك انك عايش حياتك متغرب علشان قيمه انت مؤمن بيها






الشيخ مشاري راشد






صوت من الجنه




ماشاء الله لا قوة الا بالله




بحب دايما اسمعه في كل حاجه في القران وفي الاناشيد




لان ربنا وهبه الصوت الشجي الجميل وهو استغله صح




ربنا يجعل عملك خالصا لوجهه الكريم




ويارب تنور كل القلوب بالقران






محمود سعد






طبعا من حقي احبه




تعرفوا اني اول مرة شوفته معجبنيش وقلت عليه .........




كل واحد يحط مكان النقط اللي هو عايزه




لكن مرة من ذات المرارير




اتفرجت عليه في البيت بيتك




وشوفت اسلوبه في الحوار وخفة دمه وتلقائيته اللي ملهاش مثيل




وقد ايه عرفت انه شخص نضيف من جواه وقد ايه هو بيتمني انه يكون انسان كويس




خاصة لما بيكون معاه الشيخ خالد الجندي




محمود سعد دلوقتي بقي حاجه كبيرة عندي




بقيت بتابعه في اي لقاء




رغم ان لي شوية تحفظات عليه




بس عامة هو احسن من غيره كتييييييييير






عماد متعب






خلينا بقي في الكورة شويه




انا طبعا واد اهلاوي متعصب زي ما انتم عارفين




بس عصبيتي دي مش عصبية علي جهل




عماد متعب ........ مش عارف



سبحان الله





انا مش لاقي حد بيحبه في الناس اللي حواليا واللي معظمهم اهلاويه




لكن لقيت نفسي بتحمق له اوي




وازعل اوي لو حد قال عليه كلمة كدا ولا كدا




وياعيني لو لعب ماتش وجاب جول




تلاقي بقي فيه حريقة عندنا في البيت ( بغيظ في اخويا علشان مش بيحبه )




المهم ان عماد متعب اكثر شخصية رياضيه نالت حبي في الوقت الحالي




( طبعا محمد ابوتريكه علي جنب لانه خارج نطاق المقارنات مع اي حد )




ادعوله بقي ربنا يشفيه ويرجع تاني للملاعب بسرعه




معلش ضايقتكم اوي ورخمت عليكم




بس اهو




اعمل ايه




مدونتي وانا حر فيها ههههههه





وان مكنتش هقولكم الكلام دا هقوله لمين يعني




لو قريتوا البوست دا بالليل هقولكم تصبحوا علي خير




ولو قريتوه الصبح هقولكم ربنا يجعل ايامكم كلها خير




وتقبلوا مني كل الحب

هناك 23 تعليقًا:

ديالا يقول...

انا برضه زيك

عندي مثلي الاعلي عمرو خالد


بس عندي شخصيه تانيه بحترمها جدا

هيا مش معروفه غير في كليتنا بس انسان بمعني الكلمه

دكتور_حامد الفار

رئيس قسم اللغه الفرنسيه في الكليه بتاعتي

وده من الناس القليله الي اخدتها قدوه ليا في حياتي

بوستك هايل

احييك عليه

تقبل مروري

عاشقه الرومانسيه يقول...

اول تعليق
فى اول زياره
لمدونتك الجميله
محجوززز
لعاشقه الرومانسيه

عاشقه الرومانسيه يقول...

ديالا اخدت منى اول تعليق
مش مهم
هاعتبر نفسى الاول مكرر

نيجى للبوست
انا بحب عمرو خالد جدا زيك
لانه بجد غير مفاهيم ناس كتير عن الاسلام
وخلى ناس كتير بقوا مسلمين بحق
مش بس فى خانة الديانه فى البطاقه الشخصيه
اما عن الشيخ
سيد قطب فانا فعلا مش اعرف عنه حاجه
وانت شوقتنى انى اعرفه من قريب وابحث عن اى معلومه عنه

حلو البوست
وحلوه شخصياتك

beautiful mind يقول...

ديالا

دايما منوراني والله

فعلا كل واحد فينا عنده شخصيات جميله في حياته

انا بس حبيت اتكلم عن الشخصيات العامه اللي كلنا عارفينها

لكن طبعا في ناس كتير في حياتي بحترمها جدا

تقبلي تحياتي لمرورك الجميل

beautiful mind يقول...

عاشقة الرومانسيه

معلش المرة الجايه تيجي بدري شويه هههههه

بس انتي ولا ديالا واحد يعني

المهم بقي انك تقري عن الشيخ سيد قطب كويس

علشان تعرفي قد ايه هو رجل عظيم

تقبلي تحياتي اليكي

promise is promise يقول...

وانا اسعد والله انى هسيب تعليق هنا

اولا حياتنا عامله زى القطر فى كل محطه بتقابل ناس بتاثر فيهم او بياثروا فيكم ولكن بيجى وقت القطر بيعلن فيه ان ده وقت لازم ينزلوا لان دى محطتهم اهم حاجه انهم سابوا فيك بصمتهم

الشخصيات اللى انت بتحبهم دول كلنا بنحبهم زيك وكل واحد فيهم اثر فينا بطريقه مختلفه بس اهم حاجه اننا نقدر ناثر فى غيرنا بطريقه ايجابيه زيهم

تقبل مرورى ولك خالص تحياتى
ويسعدنى تشريفك لى فى عالمى الخاص

والسلام ختام

dramaqueen يقول...

طبعا البلوج بتاعك تكتب براحتك

بس بجد البوست جميل جدا وفعلا انت ذكرت ناس مهمين اوى زى عمرو خالد ومحمود سعد ومشارى راشد

ماعرفش سيد قطب لكن هاحاول ادور على معلومات عنه
ومرتش حاجة للشيخ يوسف القرضاوى لكن سمعت ناس كتير اتأثرت بيه

اما ابو تريكة فده خارج المنافسة لان سبحان الله مفيش حد مش بيحبه
وهو يستاهل


بوست جميل
تحياتى

ستيته حسب الله الحمش يقول...

فعلا مجموعة الشخصيات دي تعرفنا انت مين
وفي نفس الوقت كلها شخصيات رائعة وكلنا بنحبها


تحياتي لشخصك الكريم

تلميذة سلمان الفارسى يقول...

الشهيد سيد قطب
يكفى تفسيره للقرآن ( تحفه)
د/يوسف القرضاوى
أ/عمرو خالد
بارك الله فيهم
ليك حق تقتدى بيهم

عمرو وجيه يقول...

بصراحة


انا مش بحب يوسف القرضاوي

لانه حلل الغناء في فتوي


و قال انه بيحب يسمع فيروز وده طبعا مخالف للشريعة


أما عمرو خالد فالصراحة انا كنت بحبه

بس حاليا مش متابع معاه دلوقتي

و اعتقد ان فيه شيوخ افضل بكتير منه

زي الشيخ محمد حسان و محمود المصري


بس انا بحب مشاري راشد جدا جدا

و سيد قطب الشاعر الشهيد بموت في قصيدته ( هبل )


تذكير جيد للشخصيات

تحياتي لك

Abd Al-Rahman يقول...

د.يوسف القرضاوى
الشهيد سيد قطب
مشارى راشد
عمرو خالد
***********
هنيئا أخى على فكرك الراقى ، واختياراتك التى تعكس فكرك واهتماماتك
***********
سأتابع مدونتك بإذن الله ، لأن موضوعك هذا أخبرنى بأشياء كثيرة عنك...
دمت بألف خير

beautiful mind يقول...

عمرو وجيه

يا اخي دكتور يوسف القرضاوي لم يحلل الغناء ولا شىء وبالنسبه لمعلومة انه بيسمع فيروز فاعتقد ان الكلام دا حضرتك سمعته من حد مش قريته عن الشيخ او سمعته منه شخصيا

وبالنسبه ل عمرو خالد

اعتقد ان البوست ان مش عملته علشان اقارن حد بحد المهم اننا نتعلم منهم
الناس دي كلها جزاها الله خير
بس كفيانا بقي تجريح في الناس ونقول دا حلو ودا مش حلو

رب اشعث اغبر لو اقسم علي الله لابره

تقبل تحياتي يا عمرو

beautiful mind يقول...

عبد الرحمن

وانا يسعدني تشريفك لي

وان شاء الله تنورني دايما

ولك مني خالص التحيات

إيمان يقول...

ياسلاااام لقيت حد متفق معايا كل اللى ذكرتهم بحبهم جداا
لحد محمود سعد انا بعتيره احسن من غيره كتيييير لكن مش لدرجة انى احبه
والكوره طبعا مليش فيها خالص مالص

فتاه من الصعيد يقول...

بتحب محمود سعد اممممممم
على العموم ده رايك ودي مدونتك وبراحتك........ بس المهم ما يكنش مثلك الاعلى
لكن باقي الشخصيات لها منا كل الاحترام

beautiful mind يقول...

فتاة من الصعيد

انا طبعا بحترم وجهة نظرك
بس انا وضحت ليه انا بحب محمود سعد
في البوست

واكيد طبعا مش هو مثلي الاعلي

انا سعيد جدا لرايك وشكرا علي ردك ومرورك

روح الفدا يقول...

عمرو خالد
هو من اكتر الناس اللى اتظلمت
يوسف القرضاوى
عالم مجدد فى زمن افتقد الى التجديد
محمود سعد
شخصية لها كريزما خاصة
عماد متعب
مش باقدر ابلعه خالص دمه تقيل على قلبى فى الكلام واللعب
---------------------------
مع تحياتى / حازم ربيع

بزنس تعيش يقول...

ان يكون للانسان شخصيات
تلهمه وتؤثر فيه
-------------------------
تقبل مرورى
هانى عمر

حلم بيعافر يقول...

كل واحد حر
وانت حر

Zika يقول...

حلو البوست ده يا كابتن
دي اول زياره وبالنسبه لسيد قطب وعماد متعب
انا معاك فيهم اكيد
يوسف القرضاوي ده راجل عبقري وجرئ ومابيخافش من حد
محمود سعد يعني ساعات بحالات حبه يبقي كويس وحبه تحس انه بيسيس
بس انا عموما باحترمه جدا
تحياتي

ريمان يقول...

انا بحب جدا صوت مشارى بصراحه بيساعدنى فى حفظ القرءان كتير وبحفظ بصوته بسرعه الحمد لله

وعمرو خالد كانت اول مره اتوب فيها فى حياتى كانت على ايده


ربنا يباركلهم يا رب


بوست مميز


تحياتى

dodoo يقول...

اول مره ازور فيها مدونتك وسعيده ان اول بوست اقراه يبقى عنك

على فكره معظم اللى انت بتحبهم انا كمان بمووووووت فيهم خاصة استاذ عمرو خالد

وبجد عجبنى اوووووى انك اتكلمت عن الناس اللى اضفتلك فى حياتك

لان دى اقل حاجه ممكن نقدمهالهم

انا كمان كان نفسى انزل بوست بس عن دكاترة الجامعه اللى اثروا فيا

بس دى كانت فكره ونسيت انفذها

عامة مادام الناس دى هى اللى اثرت فيك وكونت شخصيتك يبقى انت اكيد شخصيه كويسه

تقبل مرورى

همس يقول...

الموضوع جميل لانك بتدى لك حد بتحبه وتقتدى بيه حقه واسمحلى اعلق على راى الاخ عمرو وجيه تعليق صغنون اولا عمرو خالد ما ارتقيت وسمعت محمد حسان عمرو خالد بيعرف يصفى النفس عشان تستعد للدين وتقبل مرور شكرا